Karolo ea 78
Ts’enolo e fanoeng ka Moporofeta Joseph Smith, Kirtland, Ohio, ka la 1, Tlhakubele 1832. Ka letsatsi leo, Moporofeta le baetapele ba bang ba ne ba bokane ho buisana ka mosebetsi oa kereke. Sethathong ts’enolo ena e ile ea laela Moporofeta, Sidney Rigdon, le Newel K. Whtiney ho tsamaea ba ee Missouri le ho hlophisa mesebetsi ea Khoebo le ea Bophatlalatsi ea Kereke ka ho theha “feme” e neng e tla hlokomela boiteko bona, ho hlahisa matlole bakeng sa ho theha Sione le ho thusa mafutsana. Feme ena, e neng e tsebahala ka hore ke Feme e Kopaneng, e ile ea thehoa ka ‘Mesa 1832 ‘me ea qhaloa ka 1834 (bona karolo ea 82). Ka morao ho hore feme ena e qhaloe, ka taelo ea Joseph Smith, poleloana e reng “mesebetsi ea polokelo bakeng sa mafutsana” e ile ea nka sebaka sa polelo e reng “litsi tsa boralitaba le tsa khoebo” ts’enolong ena, ‘me lentsoe “taelo” la nka sebaka sa lentsoe “feme.”
1–4, Bahalaleli ba lokela ho hlophisa le ho theha ntlo ea polokelo; 5–12, Ts’ebeliso e bohlale ea thepa ea bona e tla lebisa polokong; 13–14, Kereke e lokela ho ikemela ntle le matla a lefats’e; 15–16, Mikaele (Adama) o sebetsa tlasa tataiso ea Ea Halalelang (Kreste); 17–22, Ho lehlohonolo ba ts’epahalang, hobane ba tla ja lefa la lintho tsohle.
1 Morena a buoa le Joseph Smith, a re: Mamelang ‘na, ho rialo Morena Molimo oa hau, lona ba behiloeng matsoho ho boprista bo baholo ba kereke ea ka, lona ba bokaneng hammoho;
2 ‘Me mamelang keletso ea ea le behileng matsoho ho tsoa holimo, ea tlang ho bua mantsoe a bohlale litsebeng tsa lona, hore poloko e ka ba ho lona ka ntho eo le e hlahisitseng ka pele ho ‘na, ho rialo Morena Molimo.
3 Hobane kannete ke re ho lona, nako e fihlile, ‘me joale e haufi; ‘me talimang, le bone, ho hlokahala hore ho be le tlhophiso ea sechaba sa ka, ho laola le ho theha litaba tsa polokelo bakeng sa mafutsana a sechaba sa ka, mona le lefats’eng la Sione—
4 Bakeng sa motheo o tsitsitseng ‘me o sa feleng le taelo ho kereke ea ka, ho nts’etsa pele morero oo le o ts’episitseng, ho poloko ea motho, le tlotlisong ea Ntat’a lona ea maholimong;
5 Hore le ke le lekane litlamahanong tsa lintho tsa leholimo, ee, le tsa lefats’e hape, bakeng sa ho fumana lintho tsa leholimo.
6 Hobane haeba le sa lekane linthong tsa lefats’e, le ke ke la lekana ha le fumana lintho tsa leholimo;
7 Hobane haeba le batla hore ke le nehe bolulo lefats’eng la selestiale, le tlameha ho itokisa ka ho etsa lintho tseo ke le laetseng tsona le tseo ke li hlokang ho lona.
8 ’Me joale, kannete ho rialo Morena, ho molemo hore lintho tsohle li etsoe bakeng sa khanya ea ka, ke lona ba kopantsoeng ka taelo ena;
9 Kapa, ka mantsoe a mang, etsang hore mohlanka oa ka Newel K. Whitney le mohlanka oa ka Joseph Smith, le mohlanka oa ka Sidney Rigdon ba lule lekhotleng le bahalaleli ba Sione;
10 Ho seng joalo Satane o batla ho khelosa lipelo tsa bona ho tloha ’neteng, hore ba foufale ’me ba se ke ba utloisisa lintho tseo ba li lokiselitsoeng.
11 Ka baka leo, ke le nea taelo, hore le itokise ‘me le itlhophise ka tlamahano kapa selekane se sa feleng se ke keng ea robeha.
12 ’Me ea se robang o tla lahleheloa ke ofisi ea hae le boemo ka hare ho kereke, ’me o tla neheloa litlamong tsa Satane ho fihlela letsatsi la topollo.
13 Bonang, ena ke tokiso eo ke le lokisang ka eona, le motheo, le mohlala oo ke le nehang oona, oo ka oona le ka phethahatsang litaelo tseo le li fuoang;
14 Hore ka tlhokomelo ea ka, ho sa natsoe mats’oenyeho a tlang ho theohela ho lona, e le hore kereke e ke e be le boikemelo holim’a libupuoa tsohle tse ka tlase ho lefats’e la selestiale;
15 Hore le ke le tle moqhakeng oo le u lokiselitsoeng, ‘me le etsoe baahloli holim’a mebuso e mengata, ho rialo Morena Molimo, Ea Halalelang oa Sione, ea thehileng metheo ea Adam-ondi-Ahman;
16 Ke mang ea behileng Mikaele khosana ea lona, ’me a theha maoto a hae, le ho mo phahamisa, ‘me a mo nea linotlolo tsa poloko tlasa keletso le tataiso ea Ea Halalelang, ea se nang qalo ea matsatsi kapa pheletso ea bophelo.
17 Kannete-nete, ke re ho lona, le bana ba banyenyane, ‘me ha le e-so utloisise hore li kholo hakakang litlhohonolofatso tseo Ntate a nang le tsona matsohong a hae ‘me li lokiselitsoe lona;
18 ’Me lona le sitoa ho mamella lintho tsohle hajoale; leha ho le joalo, nyakallang, hobane ke tla le etella pele. ’Muso ke oa lona le litlhohonolofatso tsa teng ke tsa lona, le maruo a bosafeleng ke a lona.
19 ’Me ea amohelang lintho tsohle ka teboho e tletseng o tla etsoa ea khanyang; ‘me lintho tsa lefats’e lena li tla ekeletsoa ho eena, esita le ho menahana ha lekholo, ee, ho feta.
20 Ka baka leo, etsang lintho tseo ke le laetseng tsona, ho rialo Molopolli oa lona, e sita le mora oa Ahmana, ea lokisang lintho tsohle pele a le nka;
21 Hobane le kereke ea Matsibolo, ‘me o tla le nkela ka leru, ‘me a nehe e mong le e mong karolo ea hae.
22 ’Me ea ts’epahalang le ho ba mohlokomeli ea bohlale o tla ja lefa la lintho tsohle. Amen.