1 Liteboho li isoe ho lebitso la hau, Oho Morena Molimo oa Iseraele, ea bolokang selekane le ho bonts’a mohau ho bahlanka ba hau ba tsamaeang ka bots’epehi ka pele ho uena ka lipelo tsohle tsa bona—

2 Uena ea laetseng bahlanka ba hau ho aha ntlo lebitsong la hau sebakeng sena [Kirtland].

3 ‘Me joale u bone, Oho Morena, hore bahlanka ba hau ba phethile ho latela taelo ea hau.

4 ‘Me joale rea u kopa, Ntate ea Halalelang, ka lebitso la Jesu Kreste, Mora oa sefuba sa hau, eo ka lebitso la hae feela poloko e ka fanoang ho bana ba batho, rea u kopa, oho Morena, hore u amohele ntlo ena, mosebetsi oa matsoho a rona, bahlanka ba hau, eo u ileng ua re laela ho e aha.

5 Hobane u tseba hore re entse mosebetsi oona ka mahlomola a maholo; ‘me ka bofuma ba rona, re fane ka thepa ea rona ho aha ntlo lebitsong la hau, e le hore Mora oa Motho a ke a be le sebaka sa ho itlhahisa ho batho ba hae.

6 ‘Me joaloka ha u buile ts’enolong e fanoeng ho rona, u re bitsa metsoalle ea hau, u re—Bitsang kopano ea lona e halalelang, joaloka ha ke le laetse;

7 ‘Me joalo ka ha bohle ba se na tumelo, le ke le batle ka mafolofolo, le rutane mantsoe a bohlale; ee, le ke le batle mantsoe a bohlale ho tsoa libukeng tse molemo ka ho fetisisa, le batle tsebo ka ho ithuta hape le ka tumelo.

8 Itokisetseng; hlophang ntho e ‘ngoe le e ‘ngoe e hlokahalang, ‘me le thehe ntlo esita le ntlo ea thapelo, ntlo ea ho itima, ntlo ea tumelo, ntlo ea ho ithuta, ntlo ea khanya, ntlo ea taolo, ntlo ea Molimo.

9 E le hore ho kena ha lona e be ka lebitso la Morena, le ho tsoa ha lona e be ka lebitso la Morena, le hore litumeliso tsohle tsa lona e be ka lebitso la Morena, ka matsoho a phahamisitsoeng ho ea Phahameng ka ho Fetisisa—

10 ‘Me joale, Ntate ea Halalelang, rea u kopa hore u re thuse, batho ba hau, ka mohau oa hau, ha re bitsa kopano ea rona e halalelang, e le hore e etsoe bakeng sa tlotla ea hau le kamohelo ea hau ea bomolimo;

11 ‘Me ka mokhoa oo re ka fumanoang re ts’oaneleha ka pele ho sefahleho sa hau, hore re tle re sireletse phethahatso ea litšepiso tseo u re neileng tsona, batho ba hau, ka ts’enolo tseo u re neileng tsona.

12 E le hore khanya ea hau e ka theohela holim’a batho ba hau, le holim’a ntlo ena ea hau, eo re e nehelang ho uena hona joale, hore e ke e halaletsoe le ho neheloa hore e be e halalelang, ‘me sefahleho sa hau se halalelang se ke se lule se le teng kamehla tlung ena;

13 ‘Me hore batho bohle ba tlang ho kena monyako oa ntlo ea Morena ba ke ba utloe matla a hau, ‘me ba utloe ba susumelleha ho amohela hore u e halalelitse, ‘me ke ntlo ea hau, sebaka sa khalalelo ea hau.

14 ‘Me o re fe, Ntate ea Halalelang, hore bohle ba tlang ho rapela ka tlung ena, ba ke ba rutoe mantsoe a bohlale a tsoang libukeng tsa bohlokoa ka ho fetisisa, ‘me ba ke ba batle thuto esita le ka boithuto, hape le ka tumelo, joaloka ha u boletse.

15 ‘Me ba ke ba holele ho uena, ‘me ba amohele botlalo ba Moea o Halalelang, ‘me ba itlhophise ho latela melao ea hau, ‘me ba itokisetse ho fumana ntho e ‘ngoe le e ‘ngoe e hlokahalang.

16 ‘Me le hore ntlo ena e ke e be ntlo ea thapelo, ntlo ea ho itima, ntlo ea tumelo, ntlo ea khanya le ea Molimo, esita le ntlo ea hau;

17 Hore ho kena hohle ha batho ba hau ka tlung ena, e ke e be ka lebitso la Morena;

18 Hore ho tsoa hohle tlung ena eka ka lebitso la Morena;

19 ‘Me hore litumeliso tsohle tsa bona li ke li be ka lebitso la Morena, ka matsoho a halalelang a phahamisitsoeng ho Ea Phahameng ka ho Fetisisa;

20 ‘Me hore ntho efe kapa efe e silafetseng e se ke ea lumelloa ho kena ka tlung ea hau ho e silafatsa.

21 ‘Me ha batho sa hau ba sitiloe, mang kapa mang oa bona, ba ke ba bake kapele ‘me ba khutlele ho uena, ‘me ba fumane mohau mahlong a hau, ‘me ba busetsoe litlhohonolofatsong tseo u li behileng hore li ts’olleloe holim’a ba tlang ho u hlonepha ka tlung ea hau.

22 ‘Me rea u kopa, Ntate ea Halalelang, hore bahlanka ba hau ba ke ba tsoe ka tlung ena ba hlometse ka matla a hau, le hore lebitso la hau le ke le be holim’a bona, ‘me khanya ea hau e ba potapote, le mangeloi a hau a ba hlokomele;

23 ‘Me ho tloha sebakeng sena ba ke ba pake ka litaba tse kholo ka ho fetisisa ‘me tse khanyang, ka ‘nete, ho isa lipheletsong tsa lefats’e, hore ba ke ba tsebe hore oona ke mosebetsi oa hau, ‘me hore u otlolotse letsoho la hau ho phethahatsa seo u se buileng ka melomo ea baporofeta, malebana le matsatsi a ho qetela.

24 Rea u kopa, Ntate ea Halalelang, hore u tiise batho ba tla khumamela, ‘me ka tlotla ba ts’oare lebitso le boemo ka tlung ena ea hau, ho isa melokong eohle le ka ho sa feleng.

25 Hore ha ho sebetsa se etsoeng khahlanong le bona se tla atleha; hore ea chekang sekoti bakeng sa bona, e tle e be eena ea oelang ka ho sona.

26 Hore ha ho kopano efe kapa efe ea bokhopo e tlang ho ba le matla a ho tsoha le ho hlola batho ba hau, holim’a bao lebitso la hau le tla behoa ka tlung ena;

27 ‘Me haeba batho bafe kapa bafe ba tla tsoha khahlanong le batho bana, hore khalefo ea hau e tuke khahlanong le bona.

28 ‘Me haeba tla otla batho bana, u tla ba otla; u tla loanela batho ba hau joaloka ha u ile ua phethisa ka letsatsi la ntoa, hore ba lokolloe matsohong a lira tsohle tsa bona.

29 Rea u kopa, Ntate ea Halalelang, hore u ferekanye, le ho makatsa, le ho tlisa ts’oabo le pherekano ho bohle ba phatlalalitseng litlaleho tsa bohata ka ntle ho naha, lefats’eng ka bophara, khahlanong le mohlanka oa hau kapa bahlanka ba hau, haeba ba ke ke ba baka, ha evangeli e sa feleng e tla phatlalatsoa litsebeng tsa bona;

30 ‘Me mesebetsi ea bona eohle e ke e fetohe lefeela, ‘me e timetsoe ka sefako, le ka likahlolo tseo u tla li romela holima bona ka khalefo ea hau, e le hore ho tle ho felisoe mashano le linyefolo khahlanong le batho ba hau.

31 Hobane uena ua tseba, Oho Morena, hore bahlanka ba hau ba ne ba se na molato ka pele ho uena ka ho paka lebitso la hau, ka hoo ba mamelletse lintho tsena.

32 Ka baka leo, re kopa ka pele ho uena, bakeng sa topollo e tletseng le e feletseng tlas’a joko ena;

33 E robe, Oho Morena; e robe e tlohe melaleng ea bahlanka ba hau, ka matla a hau; hore re ke re phahame har’a moloko ona, ‘me re etse mosebetsi oa hau.

34 Oho Jehova, e ba mohau holim’a batho ba na, joaloka ha batho bohle ba etsa sebe, tsoarela lit’sito tsa batho ba hau, ‘me etsa hore li hlakohe ka ho sa feleng.

35 Etsa hore tlotso ea basebeletsi ba hau e tiisoe holim’a bona ka matla a tsoang holimo.

36 Etsa hore e phethahale holim’a bona, joaloka ha ho bile joalo ka letsatsi la Pentekonta; etsa hore neo ea lipuo e ts’olleloe holim’a batho ba hau, esita le maleme rarahaneng joaloka malakabe mollo, le tlhaloso ea ‘ona.

37 ‘Me etsa hore ntlo ea hau e ke e tlale, joaloka moea o fokang ka sefefo, ka khanya ea hau.

38 Beha holim’a ba bahlanka ba hau bopaki ba selekane, hore ha ba tsoela ka ntle ‘me ba phatlalatsa lentsoe la hau, ba ke ba tiise molao, le ho lokisa lipelo tsa bahalaleli ba hau bakeng sa likahlolo tsohle tseo u tlang ho li romela, ka khalefo ea hau, holim’a baahi ba lefats’e ka lebaka la lits’ito tsa bona; e le hore bana ba hau ba se ke ba tepella letsatsing la mats’oenyeho.

39 ‘Me motseng ofe kapa ofe oo bahlanka ba hau ba kenang ho oona, ‘me batho ba motse oo ba amohela bopaki ba bona, etsa hore khotso ea hau le poloko li be holim’a motse oo; hore ba ke ba bokelle ba lokileng motseng oo, hore ba ke ba tle Sione, kapa literekeng tsa hae tse kholo, libakeng tsa khetho ea hau, ka lipina tsa nyakallo e sa feleng;

40 ‘Me ho fihlela sena se phetheha, etsa hore ikahlolo tsa hau li se ke tsa oela holima motse oo.

41 ‘Me motseng ofe kapa ofe oo bahlanka ba hau ba tlang ho kena ho oona, ‘me batho ba motse oo ba sa amohele bopaki ba bahlanka ba hau, ‘me bahlanka ba hau ba ba lemosa hore ba ipoloke molokong oona o khopo, etsa hore ho be joalo motseng oo ho latela seo u se buileng ka melomo ea baporofeta ba hau.

42 Empa u lokolle, Oho Jehova, rea u kopa, bahlanka ba hau matsohong a bona, ‘me u ba hloekise maling a bona.

43 Oho Morena, ha re thabele timelo ea batho ba habo rona; meea ea bona ke ea bohlokoa ka pele ho uena;

44 Empa lentsoe la hau le tlameha ho phethahala. Thusa bahlanka ba hau hore ba re, ka mohau oa hau o ba thusang: Thato ea hau e etsoe, Oho Morena, eseng ea rona.

45 Rea tseba hore u buile ka molomo oa baporofeta ba hau lintho tse ts’abehang malebana le ba khopo, matsatsing a ho qetela—hore o tle o ts’ollele likahlolo tsa hau kantle ho tekanyo;

46 Ka baka leo, Oho Morena, lokolla batho ba hau tlokotsing ea ba khopo; matlafatsa bahlanka ba hau hore ba tiise molao, ba tlamelle bopaki, hore ba ke ba itokise khahlanong le letsatsi la ho cha.

47 Rea u kopa, Ntate ea Halalelang, hore u hopole ba lelekiloeng ke baahi ba Jackson County, Missouri, mafats’eng a lefa la bona, ‘me u qhaqhe, Oho Morena, joko ena ea mahlomola a behiloeng holim’a bona.

48 Uena ua tseba, Oho Morena, hore ba ne ba hatelletsoe ‘me ba hlorisoa haholo ke ba khopo; ‘me lipelo tsa rona li lutla mahlomola ka lebaka la meroalo ea bona e boima.

49 Oho Morena, ke nako e kae o tlang ho lumella batho bana ho mamella mahlomola aa, ‘me lillo tsa ba senang molato li nyolohele litsebeng tsa hau, ‘me mali a bona a tle e le bopaki ka pele ho uena, ‘me u sa hlahise bopaki ba hau sebakeng sa bona?

50 E-ba le mohau, Oho Morena, holim’a mokhupi oona o khopo, o lelekileng batho ba hau, hore ba khaotse ho senya, hore ba ke ba bake libeng tsa bona haeba pako e lokela ho fumanoa.

51 Empa haeba ba ke ke ba baka, bonahatsa letsoho la hau, Oho Morena, ‘me o lopolle seo o se khethetseng Sione bakeng sa batho ba hau.

52 ‘Me haeba ho ke ke ha e-ba ka tsela e ‘ngoe, hore morero oa batho ba hau u se ke oa hloleha ka pele ho uena, khalefo ea hau e ke e tuke, ‘me bohale ba hau bo oele holim’a bona, hore ba timetsoe, ka bobeli motso le lekala, ka tlas’a maholimo;

53 Empa ha feela ba tla baka, ke uena ea mohau le lereko, ‘me u tla tlosa khalefo ea hau ha u talima sefahleho sa Motlotsuoa oa hau.

54 Hauha, Oho Morena, holim’a lichaba tsohle tsa lefats’e; hauhela babusi ba lefats’e la rona; a metheo e neng e sirelelitsoe ka tlotla le bokhabane, e leng Molao oa Motheo oa naha ea rona, ka bo-ntat’a rona, e ke e thehoe ka ho sa feleng.

55 Hopola marena, likhosana, ba khabane, le ba baholo lefats’eng, le batho bohle, le likereke, mafutsana ohle, ba hlokang, le ba mahlomoleng lefats’eng;

56 Hore lipelo tsa bona li ke li nolofale ha bahlanka ba hau ba tla tsoa tlung ea hau, Oho Jehova, ho fana ka bopaki ba lebitso la hau; hore khethollo ea bona e ke le suthele ‘nete, ‘me batho ba hau ba fumane mohau mahlong a bohle;

57 Hore lipheletso tsohle tsa lefats’e li ke li tsebe hore rona, bahlanka ba hau, re utloile lentsoe la hau ‘me u re rumile;

58 Hore ho tsoa har’a tsena tsohle, bahlanka ba hau, bara ba Jakobo, ba ka bokella ba lokileng ho aha motse o halalelang bakeng sa lebitso la hau, joaloka ha u ba laetse.

59 Re u kopa hore u khethe Zion le litereke tse ling tse kholo ntle ho sena seo u se khethileng, e le hore pokello ea batho ba hao e ka tsoela pele ka matla le khanya e kholo, hore mosebetsi oa hau o ke u khutsufatsoe ka ho loka.

60 Joale mantsoe ana, Oho Morena, rea buile ka pele ho uena, malebana le ts’enolo le litaelo tseo u re neileng tsona, rona ba amahangoang le Balichaba.

61 Empa uena ua tseba hore u na le lerato bakeng sa bana ba Jakobo, ba ileng ba qhalakana lithabeng nako e telele, tsatsing le maru le lefifi.

62 Ka baka leo rea u kopa hore u hauhele bana ba Jakobo, hore Jerusalema, ho tloha ka hora ena, e ke e qale ho lopolloa;

63 ‘Me joko ea kholeho e ke e qale ho robeha ho tloha tlung ea Davida;

64 ‘Me bana ba Juda ba ke ba qale ho khutlela mafats’eng ao u kileng oa a fana ho Abrahama, ntat’a bona.

65 ‘Me etsa hore masalla a Jakobo, ba rohakiloeng le ho otloa ka lebaka la ts’ito ea bona, ba sokolohe boemong ba bona bo hlaha ‘me bo sa laoleheng, ho isa botlalong ba evangeli e sa feleng;

66 Hore ba ke ba behe libetsa tsa bona tsa ts’ollo ea mali, ‘me ba emise bokoenehi ba bona.

67 ‘Me a masalla ‘ohle a Iseraele a qhalakaneng, a ileng a lelekelloa lipheletsong tsa lefats’e, a tle tsebong ea ‘nete, a lumele ho Messia, ‘me a lopolloe khatellong, ‘me a nyakalle ka pele ho uena.

68 Oho Morena, hopola mohlanka oa hau, Joseph Smith le mahlomola ‘ohle le litlhoriso tsa hae—ka moo a ileng a kena selekaneng le Jehova, ‘me a ikana ho uena, Oho Molimo ea Matla oa Jakobo—le litaelo tseo u mo fileng tsona, ‘me o lekile ka bots’epehi ho etsa thato ea hau.

69 E-ba le mohau, Oho Morena, ho mosali oa hae le bana ba hae, hore ba ke ba phahamisoe ponts’eng ea hau, ‘me ba bolokoe ke letsoho la hau le holisang.

70 E-ba le mohau ho bohle ba amani ba haufi le bona, hore khethollo ea bona e ke e senngoe le ho fieloa joaloka ha e ka ke ka moroallo; hore ba ke ba sokolohe le ho lopolloa hammoho le Iseraele, ‘me ba tsebe hore u Molimo.

71 Hopola, Oho Morena, baetapele, esita le bohle ba etellang pele kereke ea hau, hore letsoho la hau le letona le ke le ba phahamise, hammoho le malapa ‘ohle a bona, le baamani ba haufi le bona, hore mabitso a bona a ke a hopoloe ka ho sa feleng ho tloha molokong ho isa molokong.

72 Hopola Kereke eohle ea hau, Oho Morena, hammoho le malapa a bona, le bohle baamani ba haufi le bona, hammoho le bohle ba kulang le ba mahlomoleng, hammoho le mafutsana ‘ohle le ba bonolo ba lefats’e; hore ‘muso oo u o thehileng ntle le ka matsoho o ke o fetohe thaba e kholo, ‘me o tlale lefats’e lohle.

73 Hore Kereke ea hau e ke e tsoe lefeelleng la lefifi, ‘me e phatsime e le ntle joaloka khoeli, e hlake joaloka letsatsi, ‘me e ts’abehe joaloka lebotho le nang le lifolakha;

74 ‘Me e khabisoe joaloka monyaluoa bakeng sa letsatsi leo ha u tla bula maholimo, ‘me lithaba li tla ts’olohela pela sefahleho sa hau, ‘me liphula li phahamisoe, libaka tse litutulu li batalatsoe; e le hore khanya ea hau e tle e tlatse lefats’e.

75 Hore ha lengeloi le letsa terompeta bakeng sa bafu, re tle re nkeloe marung ho u khahlametsa, hore re ka mehla re ke re be le Morena;

76 Hore liaparo tsa rona li ke li hloeke, hore re ke re apesoe likobo tsa toka, ka lipalema ka matsohong a rona, le meqhaka ea khanya holim’a lihloho tsa rona, ‘me re kotule nyakallo ea bosafeleng bakeng sa lits’otleho tsohle tsa rona.

77 Oho Morena Molimo ea Matla ‘Ohle, re utloe lithapelong tsena tsa rona, ‘me u re arabe u le maholimong, tlung ea hau e halalelang, moo u lutseng teroneng ka khanya, hlompho, matla, borena, boholo, puso, ‘nete, toka, kahlolo, mohau, le botlalo bo sa lekanngoeng, ho tloha ka ho sa feleng ho isa ka ho sa feleng.

78 Oho utloa, Oho utloa, Oho re utloe, Oho Morena! ‘Me u arabe lithapelo tsena, ‘me u amohele khakolo ea ntlo ena ho uena, mosebetsi oa matsoho a rona, eo re e ahileng lebitsong la hau.

79 ‘Me hape le kereke ena, u behe holim’a eona lebitso la hau. ‘Me re thuse ka matla a Moea oa hau, hore re ke re kopanye mantsoe a rona le ba khanyang, lirafime tse phatsimang tse pota-potileng terone ea hau, ka litlatse tsa thoriso, re bina: Hosanna ho Molimo le Konyana!

80 ‘Me etsa hore bana, batlotsuoa ba hau, ba apesoe ka poloko, ‘me bahalaleli ba hau ba hoelehetse mehoo ea nyakallo. Amen, le Amen.