Karolo ea 34
Ts’enolo e fanoeng ka Moporofeta Joseph Smith ho Orson Pratt, Fayette, New York, ka la 4 Pulungoana 1830. Ntate Pratt o ne a le lilemo tse leshome le metso e robong ka nako eo. O ne a ile a sokoloha ’me a kolobetsoa ha a qala ho utloa thuto ea evangeli e tsosolositsoeng ka moholoane oa hae Parley P. Pratt, libeke tse ts’eletseng pele ho moo. Ts’enolo ena e ile ea amohelloa lapeng la Peter Whitmer Sr.
1–4, Ba ts’epahalang ba fetoha bara ba Molimo ka Topollo; 5–9, Ho rutoa ha evangeli ho lokisa tsela bakeng sa Ho Tla Lekhetlo la Bobeli; 10–12, Boporofeta bo tla ka matla a Moea o Halalelang.
1 Mora oa ka Orson, mamela ’me u utloe le ho ts’oara seo ’na, Morena Molimo, ke tla se bua ho uena, esita le Jesu Kreste Molopolli oa hau;
2 Leseli le bophelo ba lefats’e, leseli le khanyang lefifing ’me lefifi ha le le utloisisi;
3 Ea ratileng lefats’e hore a le nehe bophelo ba hae, hore joaloka ha ba bangata ba tla lumela ba ke ba fetohe bara ba Molimo. Ka baka leo, u mora oa ka;
4 ’Me u lehlohonolo hobane u ile ua lumela;
5 ’Me u lehlohonolo ka ho fetisisa hobane u bitsoa ke ’na ho ruta evangeli ea ka—
6 Ho phahamisa lentsoe la hau joaloka ha eka ke molumo oa terompeta, le le telele ’me le lerata, ’me u hooa pako ho moloko oona o khopameng le o khelohileng, ho lokisetsa tsela ea Morena bakeng sa ho tla ha hae lekhetlo la bobeli.
7 Hobane bona, kannete-nete ke re ho uena, nako e haufi eo ke tla tla ka maru ka matla le ka khanya e kholo.
8 ’Me e tla ba letsatsi le leholo ka nako ea ho tla ha ka, hobane lichaba tsohle li tla thothomela.
9 Empa pele letsatsi leo le tla tla, letsatsi le tla fifala, ’me khoeli e tla fetoha mali; ’me linaleli li tla hana ho khanya, ’me tse ling li tla oela, ’me ts’enyeho e kholo e emetse ba khopo.
10 Ka baka leo, phahamisa lentsoe la hau ’me u se ke ua sia letho, hobane Morena Molimo o buile; ka baka leo porofeta, ’me ho tla fanoa ka matla a Moea o Halalelang.
11 ’Me haeba u ts’epahala, bona, ke na le uena ho fihlela ke e-tla—
12 ’Me kannete-nete ke re ho uena, ke tla ka potlako. Ke ’na Morena le Molopolli oa hau. Esita le joalo. Amen.