Karolo ea 74
Ts’enolo e fanoeng ho Moporofeta Joseph Smith, Wayne County, New York, ka 1830. Esita le pele Kereke e thehoa, lipotso li ne li ile tsa tsoha mabapi le mokhoa o nepahetseng oa kolobetso, tse lebisitseng hore Moporofeta a batle likarabo tabeng eo. Nalane ea Joseph Smith e bolela hore ts’enolo ena ke tlhaloso ea 1 Bakorinthe 7:4, lengolo le halalelang le neng le sebelisoa khafetsa ho ts’ehetsa kolobetso ea masea.
1–5, Paulosi o eletsa Kereke ea nako ea hae ho se boloke molao oa Moshe; 6–7, Bana ba banyenyane ba halalela ‘me ba halaletsoa ka Topollo.
1 Hobane monna ea sa lumeleng o halaletsoa ke mosali, ‘me mosali ea sa lumeleng o halaletsoa ke monna; hoja ha ho joalo e ka be eba bana ba lona ba lits’ila, empa joale ba halalela.
2 Joale, matsatsing a baapostola molao oa lebollo o ne o le teng har’a Ba-Juda bohle ba neng ba sa lumele evangeli ea Jesu Kreste.
3 ’Me ho ile ha etsahala hore ho tsohe likhang har’a batho malebana le molao oa lebollo, hobane monna ea sa lumeleng a ne a lakatsa hore bana ba hae ba lokela ho bolla ‘me ba fetohe ba mamele molao oa Moshe, oo molao o neng o se o phethahalitsoe.
4 ’Me ho ile ha etsahala hore bana bao, ba holisitsoeng ba mamela molao oa Moshe, ba ile ba latela litloaelo tsa bo-ntat’a bona ‘me ba se ke ba lumela evangeli ea Kreste, ka tsela eo, ba fetoha ba lits’ila.
5 Ka baka leo, ke ka lebaka lena moapostola a ngoletseng kereke, a ba neha taelo, eseng ea Morena, empa ea hae, hore molumeli ha lokela ho kopana le ea sa lumeleng; ntle le hore molao oa Moshe o lokela o felisoe har’a bona,
6 Hore bana ba bona ba ke ba tsoelepele ntle le lebollo; ‘me hore moetlo o ke o felisoe, o reng bana ba banyenyane ba lits’ila; hobane o ne o le teng har’a Ba-Juda;
7 Empa bana ba banyenyane ba halalela, ba halalelitsoe ka topollo ea Jesu Kreste; ‘me sena ke seo mangolo a halalelang a se bolelang.