1 Ka letsatsi lena, lekhotla le akaretsang la baprista ba baholo ba mashome a mabeli a metso e mene le ile la bokana ntlong ea Joseph Smith, ka ts’enolo, ‘me la tsoelapele ho theha lekhotla le leholo la kereke ea Kreste, le neng le lokela ho etsoa ka baprista ba baholo ba leshome le metso e ‘meli le e mong oa ba bararo ba baokameli ha nyeoe e ka hloka joalo.

2 Lekhotla le leholo le ile la khethoa ka ts’enolo bakeng sa sepheo sa ho rarolla mathata a bohlokoa a ka hlahang ka kerekeng, a ka sitoang ho rarolloa ke kereke kapa lekhotla la mobishopo bakeng sa ho khotsofalo ha mahlakore.

3 Joseph Smith, Sidney Rigdon le Frederick G. Williams ba ile ba ananeloa e le baokameli ka lentsoe la lekhotla; ‘me Joseph Smith, Sen., John Smith, Joseph Coe, John Johnson, Martin Harris, John S. Carter, Jared Carter, Oliver Cowdery, Samuel H. Smith, Orson Hyde, Sylvester Smith, le Luke Johnson, baprista ba baholo, ba ile ba khethoa hore e be lekhotla le emeng la kereke, ka lentsoe le le leng la lekhotla.

4 Baeletsi ba boletsoeng ka holimo ba ile ba koptjoa hore na ba amohela likhetho tsa bona, le hore na ba tla sebetsa ofising eo ho latela molao oa leholimo, eo bohle ba ileng ba arabela ka hore ba amohetse likhetho tsa bona ‘me ba tla tlatsa liofisi tsa bona ho latela mohau oa Molimo oo a o faneng ho bona.

5 Lenane le entseng lekhotla, le khethileng ka lebitso le bakeng sa kereke mabapi le ho khethoa ha baeletsi ba boletsoeng ka holimo e ne e le mashome a mane a metso e meraro, e le le latelang: baprista ba baholo ba robong, baholo ba leshome le metso e supileng, baprista ba bane le litho tse leshome le metso e meraro.

6 Le ile la khetha: hore lekhotla le leholo le ke ke la e-ba le matla a ho sebetsa kantle ho baeletsi ba supileng ba boletsoeng ka holimo, kapa bahlahlami ba bona ba loketseng ba khethiloeng ba le teng.

7 Bana ba supileng ba tla ba le matla a ho khetha baprista ba baholo, bao ba ka ba nkang ba lokeleha ‘me ba e-na le bokhoni ba ho sebetsa sebakeng sa baeletsi ba sieo.

8 Le ile la khetha: hore neng le neng ha sekheo sefe kapa sefe se joalo se etsahala ke lefu, ho tlosoa ofising ka lebaka la ts’ito, kapa ho tlosoa ka ho tloha moeling oa tsamaiso ea kereke ena, sa e mong oa baeletsi ba boletsoeng ka holimo, se tla tlatsoa ka ho thonngoa ha mookameli kapa baokameli, ‘me se amoheloe ka lentsoe la lekhotla le akaretsang la baprista ba baholo, le kopaneng ka sepheo seo, ho sebetsa ka lebitso la kereke.

9 Mookameli oa kereke, eo e boetseng e le mookameli oa lekhotla, o khethoa ka ts’enolo, ‘me o ananeloa bosebeletsing ba hae ka lentsoe la kereke.

10 ‘Me ke ho latela seriti sa ofisi ea hae hore o lokela ho okamela lekhotla la kereke; ‘me ke tokelo ea hae hore a thusoe ke baokameli ba bang ba babeli, ba khethilloeng ka tsela e ts’oanang le eo eena a khethiloeng ka eona.

11 ‘Me nakong ea bosieo ba e mong kapa ka bobeli ba bao ba khethiloeng ho mo thusa, o na le matla a ho okamela lekhotla kantle ho mothusi; ‘me nakong eo eena a leng sieo, baokameli ba bang ba na le matla a ho okamela sebakeng sa hae, ka bobeli kapa e mong oa bona.

12 Ha lekhotla le leholo la kereke ea Kreste le thehoa ka mehla, ho latela moralo o tsoelang pele, e tla ba mosebetsi oa baeletsi ba leshome le metso e ‘meli ho lahlela ka lotho linomoro, ‘me ka hona ho netefatsa hore ke mang ho ba leshome le metso e ‘meli ea tla bua pele, ho qala ka nomoro ea pele ‘me joalo ka ho hlahlamana ho isa ho nomoro ea leshome le metso e ‘meli.

13 Neng le neng ha lekhotla lena le kopana ho sebetsa taba efe kapa efe, baeletsi ba leshome le metso e ‘meli ba tla shebisana hore na e thata kapa che; haeba e se joalo, ba babeli ba baeletsi ba tla buisana ka eona, ho latela mokhoa a ngotsoeng ka holimo.

14 Empa haeba ho bonoa e le thata, ba bane ba tla khethoa; ‘me haeba e le thata ka ho fetisisa, ba ts’eletseng ba tla kethoa; empa ha ho le ka mohla ba fetang ba ts’eletseng ba tla khethoeloa ho bua.

15 Moqusuoa, litabeng tsohle, o na le tokelo ea halofo e le ‘ngoe ea lekhotla, ho thibela thohako kapa ho hloka toka.

16 ‘Me baeletsi ba khethiloeng ho bua ka pele ho lekhotla ba tla hlahisa taba, kamor’a hore bopaki bo hlahlojoe, ka bonnete ba eona ka pele ho lekhotla; ‘me motho e mong le e mong o tla bua ho latela ka tekano le toka.

17 Baeletsi bao ba hulang linomoro tse sa sieeng letho, tseo e leng, 2, 4, 6, 8, 10, le 12, ke batho ba lokelang ho ema bakeng sa ea qusitsoeng le ho thibela thohako le ho hloka toka.

18 Litabeng tsohle moqosi le moqosuoa ba tla ba le tokelo ea ho ipuelella ka pele ho lekhotla, kamor’a hore bopaki bo mameloe ‘me baeletsi ba khethiloeng ho bua tabeng eo ba se ba qetile ho fana ka lipuo tsa bona.

19 Kamor’a hore bopaki bo mameloe, baeletsi, moqosi le moqosuoa ba se ba buile, mookameli o tla fana ka qeto ho latela kutloisiso eo a tlang ho ba le eona ka taba eo ‘me a bitse baeletsi ba leshome le metso e ‘meli ho lumellana le e ts’oanang ka khetho ea bona.

20 Empa haeba baeletsi ba setseng, ba sa buang, kapa e mong oa bona, kamorao ho ho mamela bopaki le likopo ntle le leeme, ba fumana phoso qetong ea mookameli, ba ka e hlahisa, ‘me taba eo e tla mameloa bocha hape.

21 ‘Me haeba kamor’a ho mamela bocha ka hloko, leseli lefe kapa lefe le tlatsetsang le hlahisoa holim’a taba eo, qeto e tla fetoloa ho latela leseli leo.

22 Empa moo ho sa fanoang ka leseli le tlatsetsang, qeto ea pele e tla ema, boholo ba lekhotla bo na le matla a ho etsa qeto e ts’oanang.

23 Tabeng e thata malebana le thuto ea tumelo kapa motheo, haeba ho se na se lekaneng so ngotsoeng ho etsa taba e hlake mehopolong ea lekhotla, mookameli a ka batla ‘me a fumana mohopolo oa Morena ka ts’enolo.

24 Baprista ba baholo, ha ba le kantle ho naha, ba na le matla a ho bitsa le ho theha lekhotla ka mokhoa o seng o hlalositsoe, ho rarolla mathata, ha mahlakore kapa le leng la ‘ona le tla kopa.

25 ‘Me lekhotla la baprista ba baholo le boletsoeng le tla ba le matla a ho khetha e mong oa bona ho okamela lekhotla le joalo ha nakoana.

26 Etla ba mosebetsi oa lekhotla le boletsoeng ho fetisa, ka potlako, kopi ea liketsahalo ka tlaleho e feletseng ea bopaki bo tsamaeang le qeto ea bona, ho lekhotla le leholo la tulo ea Boetapele ba Pele ba Kereke.

27 Haeba mahlakore kapa le leng la ‘ona le sa khotsofala ke qeto ea lekhotla le boletsoeng, le ka ipiletsa lekhotleng le leholo la setulo sa Boetapele ba Pele ba Kereke, ‘me la ba le kutlo-bocha, tabeng eo e lokelang ho mameloa, ho latela mokhoa o ngotsoeng oa pele, joaloka ha eka qeto e joalo ha ea etsoa.

28 Lekhotla lena la baprista ba baholo ba kantle ho naha le lokela ho bitsetsoa feela litaba tse thata ka ho fetisisa malebana le litaba tsa kereke; ‘me ha ho taba e tloaelehileng kapa e sa khethehang e lekaneng ho bitsa lekhotla le joalo.

29 Baprista ba baholo ba leetong kapa ba behiloeng kantle ho naha ba na le matla a ho bolela hore na ho hlokahala ho bitsoe lekhotla le joalo kapa che.

30 Ho na le phapano pakeng tsa lekhotla le leholo kapa baprista ba baholo ba leetong le kantle ho naha, le lekhotla le leholo le etang le entsoeng ka baapostola ba leshome le metso e ‘meli, liqetong tsa bona.

31 Ho tsoa qetong ea la pele, ho ka ba le boipeletso; empa ho tsoa qetong ea le qetellang, bo ke ke ba e-ba teng.

32 La ho qetela le ka bitsetsoa lipotsong feela ke boetapele bo akaretsang ba kereke haeba ho na le ts’ito.

33 Ho rarollotsoe: hore mookameli kapa baokameli ba setulo sa Boetapele ba Kereke ba tla ba le matla a ho etsa qeto hore na taba efe kapa efe e joalo, e ka ipiletsoang, ka nepo e lokela ho mameloa bocha, kamor’a ho hlahloba boipeletso le bopaki le litlaleho tse tsamaeang le eona.

34 Baeletsi ba leshome le metso e ‘meli kamorao ho moo ba ile ba tsoelapele ho laola ka lotho kapa ka khetho, ho netefatsa ea tlang ho bua pele, ‘me se latelang e ile ea e-ba sephetho, ka mabitso e le: 1, Oliver Cowdery; 2, Joseph Coe; 3, Samuel H. Smith; 4, Luke Johnson; 5, John S. Carter; 6, Sylvester Smith; 7, John Johnson; 8, Orson Hyde; 9, Jared Carter; 10, Joseph Smith, Sen.; 11, John Smith; 12, Martin Harris.Ka mor’a thapelo seboka se ile sa qhalana.