Karolo ea 108
Ts’enolo e fanoeng ka Moporofeta Joseph Smith, Kirtland, Ohio, ka la 26 Ts’itoe 1835. Karolo ena e ne e amoheloe ka kopo ea Lyman Sherman, ea neng a ile a behoa pele e le e mong oa baokameli ba supileng oa ba Mashome a Supileng ‘me ea neng a ile a tla ho Moporofeta ka kopo bakeng sa ts’enolo ho tseba mosebetsi oa hae.
1–3, Lyman Sherman o ts’oaretsoe libe tsa hae; 4–5, O tla balelloa le baholo ba tsamaisang Kereke; 6–8, O bitsoa ho ruta evangeli le ho matlafatsa baena.
1 Kannete joana ho rialo Morena ho uena, mohlanka oa ka Lyman: Libe tsa hau li ts’oaretsoe hobane o ile oa mamela lentsoe la ka ka ho tla mona hoseng hona ho fumana keletso ho tsoa ho eena eo ke mo khethileng.
2 Ka baka leo, lesa moea ua hau u phomole malebana le boemo ba hau ba moea, ‘me u se ke ua hlola u hanyetsa lentsoe la ka.
3 ‘Me tsoha ‘me u be hlokolosi haholo ho tloha joale ka ho boloka likano tsa hau, tseo u ileng ua li etsa le tseo u li etsang, ‘me u tla hlohonolofatsoa ka litlhohonolofatso tse kholo ka ho fetisisa.
4 Ema ka mamello ho fihlela kopano e halalelang e tla bitsoa ke bahlanka ba ka, ebe u tla hopoloa har’a baholo ba ka ba pele, ‘me u tla fumana tokelo ka peho le baholo ba bang ba ka bao ke ileng ka ba khetha.
5 Bona, ena ke ts’episo ea Ntate ho uena haeba u tsoelapele ho ts’epahala.
6 ‘Me e tla phethahala holim’a hau ka letsatsi lane leo u tlang ho ba le tokelo ea ho ruta evangeli ea ka hohle moo ke tlang ho u roma, ho tloha ha joale nakong eo.
7 Ka baka leo, matlafatsa baena ba hau lipolelong tsohle tsa hau, lithapelong tsohle tsa hau, litlhalosong tsohle tsa hau, ‘me le liketsong tsohle tsa hau.
8 Talima, ‘me u bone, ke na le uena ho u hlohonolofatsa le ho u lopolla ka ho sa feleng. Amen.