Karolo ea 110
Lipono li hlahisitsoeng ho Moporofeta Joseph Smith le Oliver Cowdery tempeleng Kirtland, Ohio ka la 3 ‘Mesa 1836. Ketsahalo e ne e le ea kopano ea Sabatha ea Sontaha sa Paseka. Nalane ea Joseph Smith ea hlalosa: “Ka thapama, ke ile ka thusa Baokameli ba bang ho fana ka Lijo tsa Mantsiboea tsa Morena ho Kereke, ke li amohela ho tsoa ho ba Leshome le Metso e ‘Meli, bao monyetla oa bona e neng e le ho sebeletsa tafoleng e halalelang ka letsatsi lena. Kamor’a ho etsa ts’ebeletso ena ho baena ba ka, ke ile ka ea sefaleng, masira a theoloa, ‘me ka khumama, le Oliver Cowdery, thapelong e tebileng ‘me e khutsitseng. Kamor’a ho ema thapelong, pono e latelang e ile ea buleha ho rona ka bobeli.”
1–10, Morena Jehova o hlaha ka khanya ‘me o amohela Tempele ea Kirtland joaloka ntlo ea hae; 11–12, Moshe le Elia ka bonngoe ba hlaha ‘me ba fana ka linotlolo tsa bona le mokhahlelo; 13–16, Elija o khutlisa le ho fana ka linotlolo tsa mokhahlelo oa hae joaloka ha ho ts’episitsoe ke Malakia.
1 Lesira le ile la tlosoa mehopolong ea rona, ‘me mahlo a kutloisiso ea rona a buloa.
2 Re ile ra bona Morena e eme holim’a sefala ea lepolanka, ka pele ho rona; ‘me ka tlas’a maoto a hae ho ne ho aliloe khauta e hloekileng, ea ‘mala o kang oa koporo.
3 Mahlo a hae e ne eka ke lelakabe a mollo, moriri oa hlooho ea hae o ne o le mosoeu joaloka ka lehloa le hloekileng; sefahleho sa hae se ne se benya ho feta khanya ea letsatsi; ‘me lentsoe la hae e ne eka molumo oa metsi a mangata a phallang, esita le lentsoe la Jehova le re:
4 Ke ‘na oa pele le oa ho qetela; ke ‘na ea phelang, ke ‘na ea ileng a shoa; ke ‘na ‘muelli oa lona ho Ntate.
5 Bonang, libe tsa lona li ts’oaretsoe; le hloekile ka pele ho ‘na; ka baka leo, phahamisang lihlooho tsa lona ‘me le nyakalle.
6 Lesang lipelo tsa baena ba lona li nyakalle, ‘me lesang lipelo tsa batho ba ka li nyakalle, ba ileng, ka sefutho sa bona, ba aha ntlo ena lebitsong la ka.
7 Hobane bonang, ke amohetse ntlo ena, ‘me lebitso la ka le tla ba mona; ‘me ke tla iponahatsa ho batho ka mohau ka tlung ena.
8 Ee, ke tla itlhahisa ho bahlanka ba ka, ‘me ke bue le bona ka lentsoe la ka, haeba batho ba ka ba tla boloka litaelo tsa ka, ‘me ba se ke ba silafatsa ntlo ena e halalelang.
9 Ee, lipelo tsa likete le mashome oa likete li tla nyakalla haholo ka lebaka la litlhohonolofatso tse tlang ho ts’olleloa kantle, le tlhohonolofatso ea tempele eo ka eona bahlanka ba ka ba hlohonolofalitsoeng ka eona ka tlung ena.
10 ‘Me setumo sa ntlo ena se tla pharalla le mafatse’ng a kantle; ‘me hona ke qaleho ea tlhohonolofatso e tlang ho ts’olleloa holim’a lihlooho tsa batho ba ka. Esita le joalo. Amen.
11 Kamor’a hore pono ena e koaloe, maholimo a ile a buleha hape ho rona; ‘me Moshe o ile a hlaha kapele ho rona, ‘me a fana ho rona linotlolo tsa pokello ea Iseraele ka liqola tse ‘ne tsa lefats’e, le ketapele ea merabe e leshome ho hlaha lefats’eng la leboea.
12 Kamor’a mona Elia o ile a hlaha, ‘me a fana ka mokhahlelo oa evangeli ea Abrahama, e reng ho rona le peo ea rona melokong eohle kamor’a mona e lokela ho hlohonolofatsoa.
13 Kamor’a hore pono ena e koaloe, pono e ‘ngoe e kholo ‘me e halalelang e ile ea hlaha holim’a rona; hobane Moporofeta Elija, ea ileng a nkeloa leholimong kantle le ho latsoa lefu, o ne a eme ka pele ho rona, ‘me a re:
14 Bonang, nako e fihlile ka botlalo, eo ho boletsoeng ka eona ka molomo oa Malakia—e pakang hore eena [Elija] o lokela ho romelloa, pele letsatsi le leholo le ts’abehang la Morena le e-tla—
15 Ho busetsa lipelo tsa bontate ho bana ba bona, le bana ho bo ntat’a bona. Esere lefats’e lohle la otloa ka thohako—
16 Ka baka leo, linotlolo tsa mokhahlelo ona li fanoa matsohong a lona; ‘me ka sena le ka tseba hore letsatsi le leholo le ts’abehang la Morena le haufi, esita le menyako.