Karolo ea 77
Ts’enolo e fanoeng ho Moporofeta Joseph Smith, Hiram, Ohio, ka bo Tlhakubele 1832. Nalane ea Joseph Smith ea hlalosa, “E le mabapi le phetolelo ea Mangolo a Halalelang, ke ile ka fumana tlhaloso e latelang ea Ts’enolo ea Johanne.”
1–4, Libata li na le meea ‘me li tla lula thabong ea bosafeleng; 5–7, Lefats’e lena le na le bophelo ba nakoana ba lilemo tse 7,000; 8–10, Mangeloi a fapaneng a tsosolosa evangeli ‘me a sebeletsa lefats’eng; 11, Ho ts’oaoa ha ba 144,000; 12–14, Kreste o tla tla qalong ea sekete sa bosupa sa lilemo tse sekete; 15, Baporofeta ba babeli ba tla hlahisoa sechabeng sa Ba-Juda.
1 Potso: Ke eng leoatle la seipone leo ho builoeng ka lona ke Johanne, khaolong ea bone, le temaneng ea bots’elela ea Ts’enolo?Karabo: Ke lefats’e, boemong ba lona bo halalelitsoeng, bo sa shoeng, ‘me ba bosafeleng.
2 Potso: Ke eng seo re lokelang ho se utloisisa ka libata tse ‘ne, tseo ho builoeng ka tsona temaneng e ts’oanang?Karabo: Ke mekhabo puo, e sebelisitsoeng ke Mosenoli, Johanne, ho hlalosa leholimo, paradeisi ea Molimo, thabo ea motho, le ea libata, le ea lihahabi, le ea linonyana tsa moeeng; tseo e leng tsa moea tse bapisitsoeng le tseo e leng tsa nama; ‘me le tseo e leng tsa nama tse bapisitsoeng le tseo e leng tsa moea; moea oa motho o bapisitsoe le botho ba hae le joalo feela ka moea oa sebata, le sebopuo se seng le se seng seo Molimo a se bopileng.
3 Potso: Na libata tse ‘ne li fella ho libata ka bonngoe, kapa li emetse lihlopha kapa mefuta?Karabo: Li fella ho libata tse ‘ne, tse ileng tsa bonts’oa Johanne, tse emetseng khanya ea lihlopha tsa libopuoa ka mefuta ea tsona oo li o etselitsoeng kapa sebakeng sa popo, nyakallong ea thabo ea bosafeleng.
4 Potso: Ke eng seo re lokelang ho se utloisisa ka mahlo le mapheeo, ao libata li nang le ‘ona?Karabo: Mahlo a tsona ke sesupo sa khanya le tsebo, ke hore, li tletse ka tsebo; ‘me mapheeo a tsona a bonts’a matla, ho tsamaea, ho etsa, joalo-joalo.
5 Potso: Ke eng seo re lokelang ho se utloisisa ka baholo ba mashome a mabeli a metso e mene, bao ho builoeng ka bona ke Johanne?Karabo: Re lokela ho utloisisa hore baholo bana bao Johanne a ba boneng, ke baholo ba neng ba ts’epahala mosebetsing oa boruti ‘me ba neng ba se ba shoele; ba ikarabellang likerekeng tse supileng, ‘me ba neng ba se ba le paradeising ea Molimo.
6 Potso: Ke eng seo re lokelang ho se utloisisa ka buka eo Johanne a e boneng, eo e neng e tiisitsoe kantle ka litiiso tse supileng?Karabo: Re lokela ho utloisisa hore e ts’etse thato e senotsoeng, liphiri, le mesebetsi ea Molimo; lintho tse patiloeng tsa bolebeli ba hae malebana le lefats’e lena nakong ea lilemo tse sekete tsa ho tsoelapele ha lona, kapa bophelo ba nakoana ba lona.
7 Potso: Ke eng seo re lokelang ho se utloisisa ka litiiso tse supileng tse neng li tiisitsoe ka tsona?Karabo: Re lokela ho utloisisa hore tiiso ea pele e ts’etse lintho tsa lilemo tse sekete sa pele, le ea bobeli hape ea lilemo tse sekete sa bobeli, le joalo-joalo ho fihlela ho sa bosupa.
8 Potso: Ke eng seo re lokelang ho se utloisisa ka mangeloi a mane, ao ho builoeng ka ‘ona khaolong ea bosupa le temaneng ea pele ea Ts’enolo?Karabo: Re lokela ho utloisisa hore ke mangeloi a mane a romiloeng ho tsoa ho Molimo, ao ho ‘ona ho fanoeng matla holim’a likarolo tse ‘ne tsa lefats’e, ho boloka bophelo le ho timetsa; ana ke ‘ona a nang le evangeli e sa feleng ho e nehela ho tsohle lichaba, maloko, merabe, le batho; a na le matla a ho koala maholimo, ho tiisa ho isa bophelong, kapa ho lahlela tlase tikolohong tsa lefifi.
9 Potso: Ke eng seo re lokelang ho se utloisisa ka lengeloi le nyolohang ho tsoa bochabela, Ts’enolo khaolo ea bosupa le temana ea bobeli?Karabo: Re lokela ho utloisisa hore lengeloi le nyolohang ho tsoa bochabela ke leo ho lona ho fanoeng ka lets’oao la Molimo ea phelang holim’a meloko ea Iseraele e leshome le metso e ‘meli; ka baka leo, le hooa ho mangeloi a mane a nang le evangeli e sa feleng, le re: Le se ke la senya lefats’e, leha e le leoatle, kapa lifate, ho fihlela re ts’oaile bahlanka ba Molimo oa rona liphatleng tsa bona. ‘Me, haeba le rata ho e amohela, enoa ke Elia ea neng a lokela ho tla ho tla bokella hammoho meloko ea Iseraele le ho tsosolosa lintho tsohle.
10 Potso: Ke ka nako e feng eo lintho tseo ho builoeng ka tsona khaolong ee li tlang ho phethahala?Karabo: Li lokela ho phethahatsoa lilemong tsa sekete sa bots’elela, kapa pulong ea tiiso ea bots’elela.
11 Potso: Ke eng seo re lokelang ho se utloisisa ka ho ts’oaea ba likete tse lekholo le mashome a mane a metso e mene, ho tsoa melokong eohle ea Iseraele—likete tse leshome le metso e ‘meli ho tsoa molokong o mong le o mong?Karabo: Re lokela ho utloisisa hore bao ba ts’oailoeng ke baprista ba baholo, ba behiloeng matsoho taelong e halalelang ea Molimo, ho tsamaisa evangeli e sa feleng; hobane ke bona bao ba behiloeng matsoho ho tsoa ho se seng le se seng sechaba, moloko, morabe, le batho, ka mangeloi ao ho fanoeng matla holim’a lichaba tsohle, ho tlisa ba bangata ba ba tlang ho tla kerekeng ea Letsibolo.
12 Potso: Ke eng seo re lokelang ho se utloisisa ka ho letsoa ha terompeta, e boletsoeng khaolong ea borobeli ea Ts’enolo?Karabo: Re lokela ho utloisisa hore joaloka ha Molimo a entse lefats’e ka matsatsi a ts’eletseng, ‘me ka letsatsi la bosupa a qeta mosebetsi oa hae, ‘me a le halaletsa, ‘me a boela a bopa motho ho tsoa leroleng la lefats’e, esita le joalo, qalong ea lilemo tse sekete sa bosupa Morena Molimo o tla halaletsa lefats’e, ‘me a phethele poloko ea motho, ‘me a ahlole lintho tsohle, ‘me o tla lopolla lintho tsohle, ntle le tseo a e-so ho li behe matleng a hae, ha a tla be a tiisitse lintho tsohle, ho isa qetellong ea lintho tsohle; ‘me ho letsoa ha terompeta ke mangeloi a supileng ke ho lokisa le ho phethela mosebetsi oa hae, qalong ea lilemo tsa likete tsa bosupa—tokisong ea tsela pele ho nako ea ho tla ha hae.
13 Potso: Ke neng lintho tseo li tlang ho phethahatsoa, tse ngoliloeng khaolong ea borobong ea Ts’enolo?Karabo: Li lokela ho phethahatsoa kamor’a ho buloa ha tiiso ea bosupa, pele ho ho tla ha Kreste.
14 Potso: Ke eng seo re lokelang ho se utloisisa ka buka e nyenyane eo e jeloeng ke Johanne, joalokaha ho boletsoe khaolong ea leshome ea Ts’enolo?Karabo: Re lokela ho utloisisa hore e ne e le thomo, le ts’ebeletso, bakeng sa hae sa ho bokella meloko ea Iseraele; bonang, enoa ke Eliase, eo, joalokaha ho ngoliloe, a tlamehang ho tla ‘me a tsosolose lintho tsohle.
15 Potso: Ke eng e lokelang ho utloisisoa ka lipaki tse peli, khaolong ea leshome le motso o mong ea Ts’enolo?Karabo: Ke baporofeta ba babeli ba lokelang ho phahamisetsoa sechaba sa Ba-Juda matsatsing a ho qetela, ka nako ea tsosoloso, le ho porofeta ho Ba-Juda kamorao ho re ba bokelloe ‘me ba ahe motse oa Jerusalema lefats’eng la bo-ntat’a bona.