Vahe 8
Ko e Laumālie Māʻoniʻoní
ʻOku fakamoʻoniʻi ʻe he Laumālie Māʻoniʻoní ʻa e Tamaí mo e ʻAló mo ne hoko ko ha fai fakahinohino pau ki he moʻoní.
Mei he Mo’ui ‘a Siosefa F. Sāmitá
ʻI he konifelenisi lahi ʻa e Siasí ʻi ʻEpeleli 1854, naʻe uiuiʻi ai ʻe Palesiteni Pilikihami ʻIongi ʻa Siosefa F. Sāmita ke ne ngāue fakafaifekau ʻi he Otu Motu Sanuisí (Hauaiʻi). Naʻe kei taʻu 15 pē ʻa Siosefa F. Sāmita. Ne ʻikai fuʻu fuoloa e siʻi mālōlō ʻa ʻene fineʻeikí, ka ne ne hoko ai ko ha tokotaha ohi. ʻOku hā ʻi heʻene tohinoa mei he taimi ko iá ʻa ʻene ako ke fakafalala ki he Laumālie Māʻoniʻoní ki ha fakanonga pea mo ha fakahinohinó.
ʻI he ʻaho 8 ʻo Fēpueli 1856, hili haʻane lea ki he kāingalotu Hauaiʻí, ne ne hiki ai ʻo pehē, “Naʻe fakahaaʻi heni e mālohi fau ʻo e Laumālié.” ʻI he ʻaho 19 ʻo Māʻasi 1856, hili haʻane toe lea, naʻá ne hiki ʻeni, “Ko e fuofua taimi ʻeni ne tangi ai ʻa e [Kāingalotú].” ʻI he ʻaho 30 ʻo Māʻasí naʻá ne hiki ai ʻeni, “Naʻá ku tuʻu leva ʻo feinga ke u lea, ka naʻá ku tangi ʻa loʻi mata…. Naʻe kau mai mo e Kāingalotú ʻi he tangí.” ʻI he ʻaho 29 ʻo Sune ʻo e taʻu tatau pē ne hā ʻi heʻene meʻa ne hiki ʻi heʻene tohinoá kuó ne kamata ke ongoʻi ʻa e mālohi kakato ʻo ʻene ngāué: “Naʻe ʻiate kimautolu ʻa e laumālie ʻo e ʻOtuá he ʻahó kakato…. Naʻá ne ʻai au ke u fiefia, koeʻuhí he naʻe fakamoʻoniʻi ʻe he Laumālié kiate au e ngāue ʻa e ʻEikí.”1
ʻI heʻene hoko ki mui ange ko e mēmipa ʻo e Kōlomu ʻo e Toko Hongofulu Mā Uá, ne pehē leva ʻe Siosefa F. Sāmita: “ ʻI heʻeku ʻuluaki ngāue fakafaifekaú ne u kamata ai ke ako ha meʻa; naʻe pau ke u tui ki he ngaahi fakamoʻoni ʻa e kau tamaioʻeiki ʻa e ʻOtuá ʻa ia ne u fanongo ki hono fakahokó pea mo hono malangaʻí, pea pehē ki he ngaahi fakahinohino ne u maʻu mei ha faʻē angaʻofa mo loto ʻofa moʻoni, kae ʻumaʻā ʻa e ngaahi meʻa ne u ala maʻu mei he mahino ne u maʻu ʻi heʻeku lau ʻa e Tohi ʻa Molomoná, Tokāteline mo e Ngaahi Fuakavá, pea mo e Tohi Tapú. Ka ʻi he ngāue fakafaifekaú, ne u ngāue tōtōivi ai, pea ne kamata ke mahino kakato ange kiate au, ʻo fou ʻi he fakahinohino ʻa e Laumālie Māʻoniʻoní, ʻa e ngaahi meʻa ne u lau mo akoʻi maí, pea ko ia ne nau hoko ai ʻi heʻeku fakakaukaú ko ha ngaahi moʻoni kuo fokotuʻu maʻu, pea naʻá ku fakapapauʻi ia ʻo hangē ko ʻeku ʻiloʻi ʻoku ou moʻuí.”2
Ngaahi Akonaki ‘a Siosefa F. Sāmitá
Ko e meʻafoaki ʻo e Laumālie Māʻonʻoní ko ha fakamoʻoni tuʻu maʻú.
Ko e Laumālie Māʻoniʻoní ko hono sinó ko e laumālie pē, pea ko hono toko tolu ʻaki ia ʻo e Toluʻi ʻOtuá. Ko e meʻafoaki pe fakahaaʻi ʻo e Laumālie Māʻoniʻoní ko ha ngāue fakaemafai ia ʻo hono foaki ʻo e Laumālié ki he tangatá. ʻE lava ʻa e Laumālie Māʻoniʻoní ʻiate ia pē ʻo ʻaʻahi ki he tangatá pea ʻe ʻaʻahi kia kinautolu ʻoku moʻui taau mo fakamoʻoni ki he laumālie ʻo e ʻOtuá pea mo Kalaisí, ka he ʻikai ke nofo maʻu ʻia kinautolu [vakai, T&F 130:22–23].3
“Ko e meʻafoaki ʻo e Laumālie Māʻoniʻoní,” ko ha tāpuaki makehe ia kuo silaʻi ki he kau tui kia Kalaisi kuo papitaiso mo fakatomalá, pea ʻoku hoko ia ko ha “fakamoʻoni tuʻu maʻu.” ʻE lava ʻo maʻu fakataimi ʻa e laumālie ʻo e ʻOtuá ʻo lava ai ha maama mo ha mālohi fakalangi ke hoko mai ki he faʻahinga ʻo e tangatá ʻi ha ngaahi taumuʻa pe ʻuhinga pau. Ka ko e meʻafoaki ʻo e Laumālie Māʻoniʻoní, ʻa ia… ʻoku foaki ʻi he hilifaki ʻo e nimá, ko ha fakamoʻoni tuʻu maʻu ia mo ha fakakoloa ʻoku māʻolunga ange.4
ʻE anga fēfē haʻatau maʻu ʻa e Laumālie Māʻoniʻoní? Ko e foungá pea mo hono angá kuo ʻosi fakamahinoʻi mai. Kuo ʻosi fakahā mai ke tau tui ki he ʻOtuá, ʻo tui ʻoku ʻi ai, pea ko ha tokotaha ia ʻokú ne fakapaleʻi ʻa kinautolu ʻoku fekumi faivelenga kiate iá; ke tau fakatomala mei heʻetau ngaahi angahalá, mapuleʻi e ngaahi holi ʻa hotau lotó, ngaahi anga fakavalevalé, pea mo ʻetau ngaahi taʻe-ngalí; ke tau moʻui angamaʻa, faitotonu, mo angatonu ʻi heʻetau ngaahi fengāueʻaki kotoa pē mo e kakaí, pea mo fefuakavaʻaki mo e ʻOtuá te tau kamata ʻi he taimí ni hono tauhi e ngaahi tefitoʻi moʻoni ʻo e moʻoní, mo tauhi e ngaahi fekau kuó ne tuku kiate kitautolú, pea papitaiso ke fakamolemole ʻetau ngaahi angahalá, ʻe ha taha ʻokú ne maʻu ʻa e mafaí; pea ʻi he taimi ʻoku fai pau ai ki he ouau ko ʻeni ʻo e ongoongoleleí, ʻe lava leva ke tau maʻu ʻa e meʻafoaki ʻo e Laumālie Māʻoniʻoní ʻi he hilifakinima ʻe kinautolu kuo fakakofuʻi ʻaki ʻa e mafai ʻo e Lakanga Fakataulaʻeikí. Ko ia ʻe lava ʻe he Laumālie Maʻoniʻoní mo e mālohi ʻo e ʻOtuá—ʻa e Fakafiemālié—ke ʻiate kitautolu ko ha matavai ʻoku mapunopuna hake ki he moʻui taʻengatá. Te ne fakamoʻoniʻi ʻa e Tamaí, fakamoʻoniʻi ʻa Sīsū, mo “toʻo ʻa e ngaahi meʻa ʻa e Tamaí ʻo fakahā ia kia kitautolu,” ʻo fakamoʻoniʻi ʻa ʻetau tuí, fokotuʻu maʻu kitautolu ʻi he moʻoní, pea he ʻikai ke kei felī1īʻaki ai kitautolu ʻe he ngaahi matangai ʻo e tokāteliné; ka te tau “ ʻiloʻi ʻa e tokāteliné” pe ʻoku mei he ʻOtuá ia pe mei he tangatá [vakai, ʻEfesō 4:14; Sione 7:17].5
Ko e Laumālie Māʻoniʻoní, ʻa ia ʻokú ne fakamoʻoniʻi ʻa e Tamaí pea mo e ʻAló, ʻa ia ʻokú ne toʻo ʻa e ngaahi meʻa ʻa e Tamaí ʻo fakahā ia ki he tangatá, ʻokú ne fakamoʻoniʻi ʻa Sīsū Kalaisi, pea mo e ʻOtua moʻui taʻe faʻaliliuá, ko e Tamai ʻa Sīsū Kalaisí, pea ʻokú ne fakamoʻoniʻi ʻa e moʻoní—ko e Laumālié ni, ʻa e ʻIlo ko ʻení, ʻoku ʻikai foaki ia ki he tangata kotoa pē kae ʻoua kuo nau fakatomala mei heʻenau ngaahi angahalá ʻo nau omi ki ha tuʻunga moʻui taau ʻi he ʻaho ʻo e ʻEikí [vakai, 3 Nīfai 28:11]. Te nau toki maʻu leva ʻa e meʻafoaki ʻo e Laumālie Māʻoniʻoní ʻi he hilifaki ʻo e nima ʻe kinautolu kuo fakfamafaiʻi ʻe he ʻOtuá ke nau foaki ʻa ʻene ngaahi tāpuakí ki he ʻulu ʻo e fānau ʻa e tangatá.6
Ko hono foaki pe “meʻafoaki” ʻo e Laumālie Māʻoniʻoní ko hono foaki pē ia ki he tangatá ʻa e totonu ke maʻu ʻi ha faʻahinga taimi pē, ʻi he taimi ʻoku moʻui taau ai mo iá, ʻa e mālohi mo e maama ʻo e moʻoni ʻo e Laumālie Māʻoniʻoní, neongo ʻe faʻa tuku pē ia ʻi ha taimi lahi ki heʻene ongoʻí pea mo ʻene fakakaukau leleí.7
Ko e Laumālie Māʻoniʻoní ko ha maama ke ne huluhulu ʻetau laka ki muʻá.
Ko e fatongia ʻo e Laumālie Māʻoniʻoní ke ne fakamoʻoniʻi ʻa Kalaisi, pe fakamoʻoniʻi ia, pea mo fakapapauʻi ʻa e kau tui ki he moʻoní, ʻaki haʻane ʻomi ki heʻene manatú ha ngaahi meʻa ne ʻosi hoko, pea fakalika pe fakahaaʻi ki he ʻatamaí ha ngaahi meʻa ʻo e lolotongá pea mo ia ʻe hoko maí. “Ka ko e Fakafiemālié, ʻa ia ko e Laumālie Māʻoniʻoní,ʻa ia ʻe fekauʻi mai ʻe he Tamaí ʻi hoku hingoá, te ne akoʻi kia kimoutolu ʻa e meʻa kotoa pē, mo fakamanatu ʻa e meʻa kotoa pē kia kimoutolu, ʻi he ngaahi meʻa kotoa pē kuó lea ʻaki kia kimoutolú” [Sione 14:26.]. “Te ne taki kimoutolu ki he moʻoni kotoa pē” [Sione 16:13].8
Ko e fatongia ia ʻo e Kau Māʻoniʻoni ʻi he Ngaahi ʻAho Kimui Ní ke nau akoʻi ʻenau fānaú … hono mahuʻinga ke maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nimá, ʻa ia te ne tataki kinautolu ki he moʻoni kotoa pē, mo ne fakahā kia kinautolu ʻa e ngaahi meʻa kuo ʻosi hokó pea mo e ngaahi meʻa ʻe hoko maí, pea mo fakahā mahino ange kia kinautolu ʻa e ngaahi meʻa ʻoku nau maʻú, ke mahino kia kinautolu ʻa e moʻoní, pea ke nau lava ʻo ʻaʻeva ʻi he māmá ʻo hangē ko e hāʻele ʻa Kalaisi ʻi he māmá; ke nau maʻu ʻene feohí pea ke fakamaʻa ʻe hono taʻataʻá kinautolu mei he angahalá.9
ʻOku ʻi ai ha hala kuo ʻosi tofa ke tau fononga ai—ko e hala lausiʻi mo fāsiʻi ia ʻoku fakatau atu ki he ʻao ʻo e ʻOtuá; ko e maama ke ne huluhulu ʻetau laka ki muʻá ko e Laumālie Māʻoniʻoní, ʻa ia ʻoku tau maʻu ʻi hono fanauʻi foʻou pe ʻi he hili hono fanauʻi foʻou kitautolú. Kapau te tau momou pe tafoki ki tafaʻaki, ʻe ulo siʻi ʻetau māmá pea ʻe aʻu pē ʻo mate, pea ʻi heʻene peheé, ʻe mavahe leva meia kitautolu ʻa e Fakafiemālié, ʻa ia ko e maʻuʻanga ʻo e fakahaá, pea tō mai ʻa e fakapoʻulí; pea hono ʻikai ʻe lahi fau ʻa e fakapoʻuli ko iá! ʻE fakatatau pē mo e maama ne tau maʻú ʻa e faʻahinga fakapoʻuli te ne kapu kitautolú, pea kapau he ʻikai fai ha fakatomala fakavavevave, ʻe tupulaki ʻa e fakapoʻulí ʻi loto ʻia kitautolu kae ʻoua kuo ʻikai ke tau lava ʻo fakatokangaʻi hotau uiuiʻí pea ngalo ai ia ʻia kitautolu, ʻa ia naʻá ne huhuʻi mo toʻo atu ʻo ne lau ʻoku ʻaʻana kitautolú.10
Ko e fatongia ʻo e Laumālie Māʻoniʻoní ke fakamaama e fakakaukau ʻa e kakaí ʻo fekauʻaki mo e ngaahi meʻa ʻa e ʻOtuá, ke fakalotoʻi kinautolu ʻi he taimi ʻo honau papitaisó ke nau fakahoko ʻa e finangalo ʻo e Tamaí, pea ke ʻiate kinautolu ha fakamoʻoni tuʻuloa ke hoko ko hanau takaua ʻi he moʻuí, ʻo hoko ko e fai fakahinohino pau mo malu ki he moʻoni kotoa pē pea mo fakafonu fakaʻaho kinautolu ʻaki ʻa e fiefia mo e nēkeneka, mo ha ngeia ke fai lelei ki he tangata kotoa pē, ke faingataʻaʻia he faihala maí kae ʻikai fai ha hala, ke angaʻofa mo ʻaloʻofa, ʻūkuma pea mo ʻofa fakaʻOtua. Ko kinautolu kotoa pē ʻoku nau maʻu ʻa e ngaahi meʻafoaki mātuʻaki mahuʻingá ni, ʻa e mataʻi tofe mahuʻingá ni, te ne maʻu ha fieinua taʻe tuku ki he angatonú. Ka ʻikai e tokoni ʻa e Laumālie Māʻoniʻoní he ʻikai lava ha tangata fakamatelie ia ʻe taha ʻo fononga ʻi he hala hangatonu mo fāsiʻí, he ʻe ʻikai ke ne lava ʻo fakafaikehekeheʻi ʻa e tonú mei he halá, ʻa e meʻa moʻoní mei he meʻa loí, pea ʻe lava ʻo ʻai ke ʻiloʻi ʻa e ngaahi meʻa ʻoku nau meimei fōtunga tataú. Ko ia ʻoku taau ai mo e Kau Māʻoniʻoni ʻi he Ngaahi ʻAho Kimui Ní ke nau moʻui haohaoa mo totonu, kae lava ke nofoʻia kinautolu ʻe he Laumālié; he ʻoku toki lava pē ke maʻu ia ʻi he tefitoʻi moʻoni ʻo e angatonú. He ʻikai ke u lava ʻe au ke maʻu ia maʻau, pe te ke maʻu ia maʻaku; kuo pau ke tuʻu ʻa e tokotaha kotoa pē maʻana, tatau ai pē pe naʻe fanauʻi māʻolunga pe masiva mai ia, ako pe taʻe ako, pea ko ha monūʻia tatau ia ʻo e tokotaha kotoa pē ke nau hoko ko ha kau maʻu ʻinasi mei ai.11
ʻOku toki ʻalu hifo pē ʻa e Laumālie Māʻoniʻoní ki he kau angatonú pea kia kinautolu kuo fakamolemoleʻi ʻenau ngaahi angahalá…. Kapau ʻe loto pē ʻa e Kau Māʻoniʻoni ʻi he Ngaahi ʻAho Kimui Ní ke nau talangofua ki he ngaahi fekau ʻa e ʻOtuá, mo fakaʻaongaʻi honau taimí, ʻenau koloá, ki hono fakalāngilangiʻi e huafa ʻo e ʻOtuá, ke langa hake ʻa Saione, pea mo fokotuʻu ʻa e moʻoní mo e angatonú ʻi māmani, kapau ʻe haʻisia ai pē ʻa ʻetau Tamai Hēvaní ki heʻene fakapapaú mo ʻene fuakava ke maluʻi kinautolu mei he fili kotoa peé, mo tokoni ke nau ikunaʻi ʻa e fakatūkiaʻanga kotoa pē ʻe malava ʻo hā kia kinautolu, pe felei ʻaki honau halangá; ka ʻe kamata ke tokanga pē ʻa e kakai ʻo e koló kia kinautolu, ʻo siokita, pea hoko ʻo femoʻuekina ʻi he ngaahi meʻa muna ʻo e moʻuí, ʻo nau falala ki he koloá, ko e mōmēniti ko ia ʻe kamata ke mahuʻi atu ai ʻa e mālohi ʻo e ʻOtuá meia kinautolú, pea kapau he ʻikai ke nau fakatomala, ʻe mahuʻi fakaʻaufuli ʻa e Laumālie Māʻoniʻoní meia kinautolu, pea tuku ai kinautolu kia kinautolu pē.12
Ko kimoutolu ko ē kuo mou talangofua ki he ngaahi fiemaʻu ʻo e Ongoongolelei taʻengatá, pea kuo fili mei māmaní, mo mou maʻu ʻa e meʻafoaki ʻo e Laumālie Māʻoniʻoní ʻi he hilifaki ʻo e nimá, ko homou monūʻia ke maʻu ʻa e fakamoʻoni ʻo e Laumālié ʻia kimoutolu; ko homou monūʻia ke ʻilo ʻa e fakakaukau pea mo e finangalo ʻo e Tamaí fekauʻaki mo homou tuʻunga tuʻumālié, pea mo mātaʻia e ikuna fakaʻosi ʻo e ngāue ʻa e ʻOtuá.13
ʻOku toe fanauʻi foʻou kitautolu ʻo fakafou ʻi he mālohi ʻo e Laumālie Māʻonʻoní.
Naʻe folofola ʻa e Fakamoʻuí kia Nikotīmasi, “Kapau he ʻikai fanauʻi foʻou ha tangata, ʻe ʻikai ʻaupito mamata ia ki he puleʻanga ʻo e ʻOtuá,” [vakai, Sione 3:3] pea ʻoku hoko moʻoni ia he ʻahó ni. Kuo pau ke fanauʻi ʻa e tangatá mei he taʻe ʻiló ki he moʻoní, he ʻahó ni…. Kapau ʻoku ʻikai fanauʻi pehē, ʻoku kui lahi ange ia ʻi he tokotaha naʻe fakaʻā ʻe Kalaisí, he ʻoku mata kae ʻikai mamata, mo telinga kae ʻikai fanongo.14
ʻOku hoko mai ʻa e liliu ko iá he ʻahó ni ki he foha mo e ʻofefine kotoa ʻo e ʻOtuá ʻoku fakatomala mei heʻene angahalá, kiate kinautolu ʻoku nau loto fakatōkilalo ʻi he ʻao ʻo e ʻEikí, pea ʻoku fekumi ki ha fakamolemole pea mo hano fakaleleiʻi ʻo ʻenau angahalá ʻi he papitaiso ʻi he fakaukú, ʻe ha taha ʻokú ne maʻu ʻa e mafai ke fakahoko e ouau toputapú ni ʻo e ongoongolelei ʻo Sīsū Kalaisí. He ko e fanaʻu foʻou ia naʻe folofola ki ai ʻa Kalaisi kia Nikotīmasi ʻoku mātuʻaki mahuʻinga ke lava ai ʻa e tangatá ʻo mamata ki he puleʻanga ʻo e ʻOtuá, pea ka ʻikai ia he ʻikai ha tangata ia ʻe lava ʻo hū ki he puleʻangá. Mahalo ʻe lava pē ke tau manatuʻi fakatāutaha, ʻa e faʻahinga liliu ne hoko ki hotau ngaahi lotó ʻi he taimi ne papitaiso ai kitautolu ke fakamolemole ʻetau ngaahi angahalá…. Ko ʻeku lau ʻeni ki he ivi mo e mālohi ʻo e Laumālie Māʻoniʻoní ne u maʻu ʻi he taimi ne u papitaiso ai ke fakamolemole ʻeku ngaahi angahalá. Ko e faʻahinga ongo ko ia ne u maʻú, ko ha faʻahinga ongo haohaoa ia ʻo e nonga, ʻo e ʻofa pea mo e maama….
Pehē ange mai! ne u lava ke pukepuke ʻa e laumālie tatau pea mo e holi fakamātoato ko iá ʻi hoku lotó, ʻi he mōmēniti kotoa ʻo ʻeku moʻuí, mei he ʻaho ko iá ʻo aʻu mai ki he ʻahó ni. Ka ko ha tokolahi ʻo kitautolu kuo tau ʻosi maʻu ʻa e fakamoʻoni ko iá, ʻa e fanauʻi foʻou ko iá, ʻa e faʻahinga liliu ko ia ʻo e lotó, neongo te tau ala fehālaaki ʻi he anga ʻo ʻetau fakakaukaú pe fakahoko ha ngaahi fahālaaki lahi, pea tau faʻa tōnounou ʻi he ngaahi tuʻunga totonu ʻi heʻetau moʻuí, kuo tau fakatomala mei he koví, mo tau feinga mei he taimi ki he taimi ke maʻu ha fakamolemole ʻi he toʻukupu ʻo e ʻEikí; koeʻuhí ke aʻu mai ki he ʻaho ní ʻoku kei lōmekina pē ʻetau moʻuí ʻe he loto holi moe taumuʻa tatau mo ia ne tau maʻu ʻi he ʻaho ne papitaiso ai kitautolu mo maʻu e fakamolemole ʻo ʻetau ngaahi angahalá, ke ne kei maʻu hotau lotó, pea mo hoko ko e ongo mo e faʻahinga manako ʻo ʻetau moʻuí. Neongo ʻe ʻi ai ha taimi ʻe niʻihi ʻe ueʻi ai kitautolu ke tau ʻita, pea fakatupu ai ʻe heʻetau ʻitá ke tau lea mo fakahoko ha ngaahi meʻa ʻoku ʻikai fakahōifua ʻi he ʻao ʻo e ʻOtuá, ka ʻi he taimi pē ʻoku haʻi ai ʻetau ngaaahi ongo pe fakakaukau leleí pea tau ake mai mei he tō atu ki he mālohi ʻo e fakapoʻulí, te tau ongoʻi fakatōkilalo, fakatomala, pea mo kole fakamolemole ʻi he fehālaaki ne tau fakahoko kia kitautolú, pea mo e niʻihi kehé. Ko e fakaʻamu maʻongoʻonga, fakamātoato, mo lahi taha, ʻa ia ʻoku tupu mei he moʻoní pea mo e fakamoʻoni ki he Laumālie Māʻoniʻoní ʻi he loto ʻo e kakai ʻoku talangofua ki he moʻoní, te ne puleʻi mo maʻu ʻetau moʻuí, tataki atu kitautolu ʻi he hala ʻo hotau fatongiá. Ko ʻeku fakamoʻoní ʻeni pea ʻoku ou ʻiloʻi ʻoku moʻoni.15
Ko e angahala taʻe lava ke toe fakamolemoleʻí ko hono fakaʻikaiʻi mo fakafetauʻi moʻoni e Laumālie Māʻoniʻoní ʻi he hili hono maʻu ʻo ʻene fakamoʻoní.
He ʻikai lava ha tangata ia ʻo faiangahala ki he māmá kae ʻoua kuó ne maʻu ia; pe ki he Laumālie Māʻoniʻoní, kae ʻoua kuó ne maʻu ia ʻi he meʻafoaki mei he ʻOtuá ʻi he halanga pe hala ne fokotuʻu ki aí. Ko e faiangahala ki he Laumālie Māʻoniʻoní, ʻa e Laumālie ʻo e Moʻoní, ʻa e Fakafiemālié, ʻa e Fakamoʻoni ʻo e Tamaí mo e ʻAló, ko hono fakaʻikaiʻi ia ʻi he loto moʻoni pea mo fakafetau kiate ia, ʻi he hili hono maʻu iá, ʻoku hoko ia ko ha [angahala taʻe lava ke toe fakamolemoleʻi].16
He ʻikai malava ʻe ha tangata ia ʻo fakahoko ʻa e angahala taʻe lava ke fakamolemoleʻí ʻi he taʻe ʻilo. Kuo pau ke ʻomi ʻa e tangatá ke ne ʻilo ʻa Kalaisi; kuo pau ke ne maʻu ha fakamoʻoni kia Kalaisi ʻi hono lotó, maʻu e māmá mo e mālohí, ʻiló mo e mahinó, ka ne toki lava ʻo fakahoko ʻa e angahala ko iá. Ka ʻi he taimi ʻoku sītuʻa ai ha tangata mei he moʻoní, maumauʻi ʻa e ʻilo ne ne maʻú, ʻo tāmoloki ʻi hono lalo vaʻé, fakamaaʻi fakahāhā ʻa Kalaisi, ʻokú ne fakaʻikaiʻi ʻene fakaleleí, fakaʻikaiʻi ʻa e mālohi ʻo e toetuʻú, fakaʻikaiʻi ʻa e ngaahi mana kuó ne fai maʻá e fakamoʻui ʻo e fāmili ʻo e tangatá, mo pehē ʻi hono lotó, “ ʻOku ʻikai moʻoni”, pea tuʻu maʻu ʻi he fakaʻikaiʻi ko ia ʻo e moʻoní, ʻi he hili ʻo ʻene maʻu e fakaamoʻoni ʻa e Laumālié, ʻokú ne fakahoko ʻe ia ʻa e angahala taʻe lava ke fakamolemoleʻí.17
[Hili hono Tutuki ʻo e Fakamoʻuí,] ko e hā naʻe ngalo ai ʻi he [kau ʻAposetoló] pea hangē ne nau taʻe ʻiloʻi e ngaahi meʻa kotoa ne ʻosi akoʻi kinautolu ki ai ʻe he Fakamoʻuí fekauʻaki mo e ngaahi kaveinga ʻo hono misiona ʻi māmaní? Koeʻuhí he naʻe mole meia kinautolu ha meʻa mahuʻinga naʻe fie maʻu, naʻe teʻeki ke “fakakoloaʻi ʻaki kinautolu e mālohi mei ʻolungá.” [Vakai, Luke 24:49.] Naʻe teʻeki ke nau maʻu ʻa e meʻafoaki ʻo e Laumālie Māʻoniʻoní….
Kapau ne ʻosi fakakoloaʻi e kau ākongá ʻaki ʻa e “meʻafoaki ʻo e Laumālie Māʻoniʻoní,” pe “ ʻaki ha mālohi mei ʻolunga,” ne mei aʻu mai ki he taimi ní kuo kehe ʻaupito honau ʻalungá … , ʻo hangē ko e ngaahi meʻa kuo fakamoʻoniʻi ki mui maí. Kapau ne maʻu ʻe Pita, ko e ʻaposetolo fika ʻuluakí, ʻa e meʻafoaki ʻo e Laumālie Māʻoniʻoní, pea mo e mālohi mo e fakamoʻoni ko iá ki muʻa ʻi he pō fakamamahi naʻá ne fakaʻikaiʻi mo fuakava ai pea mo faka-fisinga hono ʻEikí [vakai, Mātiu 26:69–75], naʻe mei kehe ʻaupito hono olá ʻiate ia, he naʻe mei faiangahala ai ia ki he “māmá mo e ʻiló,” pea ki he “Laumālie Māʻoniʻoní,” ʻa ē ʻoku ʻikai ha toe fakamolemole ki aí. Ka koeʻuhí ne toe fakamolemoleʻi ia, hili ʻene tangi ʻa loʻimata ʻi heʻene fakatomalá, ko ha fakamoʻoni ia naʻe ʻikai ke ne maʻu ha fakamoʻoni ʻi he Laumālie Māʻoniʻoní, he naʻe teʻeki ke ne maʻu ia. Naʻe ʻi he tuʻunga tatau pē mo e kau ākonga pe kau ʻaposetolo kehe ʻa Kalaisí, ka naʻe toki foaki
e Sīsū ki a kinautolu ʻi he efiafi ʻo e ʻaho ne toetuʻu ai mei he faʻitoká ʻa e meʻafoaki mahuʻinga hulu faú ni [vakai, Sione 20:22].18
Ki muʻa pea toki mavahe ʻa e Huhuʻi kuo toetuʻú mei māmaní ne ne fekau ki heʻene kau ākongá ke nau tatali ʻi he kolo ko Selusalemá kae ʻoua kuo fakakoloaʻi kinautolu me ʻolunga. Naʻa nau fai ʻeni, mo lototaha ke nau fakapapau, pea ne hoko mai ʻa e Fakafiemālié ʻi he lolotonga ʻo ʻenau kei fakatahá, ʻo fakafonu honau ngaahi lotó ʻaki ha fiefia taʻe malava ke fakamatalaʻi, ʻo aʻu ki ha tuʻunga ne nau leaʻaki ai ha ngaahi lea kehekehe mo kikite; pea naʻe ʻiate kinautolu ʻa e ivi fakalaumālie ʻo e tokotaha māʻoniʻoni ko ʻení ʻi honau ngaahi fatongia fakafaifekaú, pea fakafaingofuaʻi ai kinautolu ke nau fakahoko e misiona maʻongoʻonga ne uiuiʻi kinautolu ki ai ʻe he Fakamoʻuí.19
Naʻe maʻu ʻe Saula ʻo Tāsisí, ha faʻahinga poto mo ha ʻilo makehe ange, he naʻe ohi hake ia ʻi he vaʻe ʻo Kāmelielí, mo akoʻi ʻo fakatatau mo e founga haohaoa ʻo e fonó, ka ne ne fakatangaʻi ʻa e Kāingalotú ʻo aʻu ki he maté, ʻi heʻene haʻi mo ʻave fakatouʻosi ʻa tangata mo fafine ki he ngaahi fale fakapōpulá; pea ʻi he taimi ne lilingi ai e toto ʻo e tokotaha naʻe fakapoongi ko Sitīvení, naʻe tuʻu ai ʻa Saula ʻo ne puke ʻa e vala ʻo kinautolu ne nau fakapoongi iá, pea mo loto ki heʻene maté. Naʻá ne “maumauʻi ʻa e Siasí, ʻo hū ki he fale kotoa pē, mo ne toho ʻa e kakai tangata mo e fefine, ʻo fakahū ki he fale fakapōpulá” [Ngāue 8:3.] Pea ʻi he taimi naʻe tāmateʻi ai kinautolú, naʻá ne talatalaakiʻi kinautolu, mo ne “tautea ʻa kinautolu ʻo liunga lahi ʻi he fale lotu kotoa pē, ʻo fakamālohiʻi ke nau lea kovi; pea naʻá ku loto lili fakamanavahē kiate kinautolu , pea ne u ʻalu ki he kolo kehekehe ʻo fakatangaʻi,” [Ngāue 26:11] ka naʻe ʻikai ke fakahoko ʻe he tangatá ni e angahala taʻe malava ke fakamolemoleʻí, koeʻuhí he naʻe ʻikai ke ne ʻiloʻi ʻe ia ʻa e Laumālie Māʻoniʻoní.20
Ka ʻi ai ha faʻahinga kakai ʻi māmani ʻoku nau malava ke fakahoko e hia taʻe malava ke fakamolemoleʻí, te mou ʻilo kinautolu ʻia kinautolu naʻa nau, pe te nau, ʻilo ʻa e moʻoní…. Kuóke ʻosi maʻu ʻe koe mo au ʻa e māmá. Kuó ta ʻosi maʻu ʻa e Lakanga Fakataulaʻeiki Māʻoniʻoní. Kuó ta ʻosi maʻu e fakamoʻoni ʻa e Laumālie Māʻoniʻoní, mo ʻomi ʻa kitaua mei he maté ki he moʻuí. Ko ia, ʻoku tau tuʻu ai he lolotongá ni ʻi ha kelekele ʻoku mātuʻaki malu pe ʻoku fakatuʻutāmaki,—ʻo fakatuʻutāmaki kapau ʻoku tau vaʻinga ʻaki ʻa e ngaahi meʻa toputapu kuo tuku ke tau tokangaʻí. Ko ia ʻoku ou fakatokanga atu ai, ʻe hoku ngaahi tokoua mo e tuofāfine, kae tautautefito ki hoku kaungā-ngāué, fekauʻaki mo e vaʻinga ʻaki homou [lakanga fakataulaʻeikí]…. Kapau te mou fai pehē, hangē ʻoku moʻui ʻa e ʻOtuá te ne toʻo hono Laumālié meia kimoutolu, pea ʻe hoko ha kuonga ʻe ʻilo ai kimoutolu ʻoku mou fakafepakiʻi ʻa e maama mo e ʻilo kuo mou ʻosi maʻú, pea te mou hoko ai ko e ngaahi foha ʻo e malaʻiá. Ko ia, ʻe sai ange ke mou tokanga telia naʻa hoko ʻa e mate hono uá kia kimoutolu.21
Ngaahi Fokotu’u ki he Akó
-
Ko e hā hano faikehekehe ʻi he ivi fakataimi pe hāsino ʻa e Laumālie Māʻoniʻoní pea mo e meʻafoaki ʻo e Laumālie Māʻoniʻoní? (Vakai foki, Molonai 10:4.) ʻE anga fēfē haʻatau maʻu ʻa e meʻafoaki ʻo e Laumālie Māʻoniʻoní? Ko e hā ha ngaahi tāpuaki ʻoku tau maʻu ʻi heʻetau fakaʻapaʻapaʻi ʻa e meʻafoaki ko ʻení?
-
ʻE anga fēfē hano tataki kitautolu ʻe he Laumālie Māʻoniʻoní ki he moʻoní kotoa? (Vakai, Sione 16:13.) Ko e hā ha ngaahi moʻoni kuo ʻosi fakamoʻoniʻi ʻe he Laumālie Māʻoniʻoní kia koe?
-
Ko e hā ʻoku hoko ai ʻa e māmá ko ha fakataipe lelei ke ne fakafofongaʻi ʻa e Laumālie Māʻoniʻoní? Ko e hā ha meʻa te tau lava ʻo fai ke fakapapauʻi ai ʻe ulo ngingila maʻu ai pē ʻa e maama ko ʻení ʻi heʻetau moʻuí?
-
Ko e hā te tau lava ʻo fai ke fakalahi ai e ivi ʻo e Laumālie Māʻoniʻoní ʻi heʻetau moʻuí? ʻE anga fēfē haʻatau tokoni ke mahino ki he kakai kehé ʻa e founga ʻoku tāpuakiʻi ai ʻe he Laumālie Māʻoniʻoní ʻenau moʻuí?
-
Ko e hā kuo pau ke tau fai ke tau maʻu ai ʻa e fanauʻi foʻou naʻe folofola ki ai ʻa e Fakamoʻuí? (Vakai, Sione 3:5.) Ko e hā ha faʻahinga ongo ʻoku haʻu fakataha mo e fanauʻi foʻou ko ʻení? ʻE anga fēfē haʻatau lava ʻo pukepuke maʻu ʻa e ngaahi ongo ko ʻení? (Vakai, ʻAlamā 5:14–16, 26.)
-
Ko e fē ʻa e angahala taʻe lava ke fakamolemoleʻí? ʻOku ʻuhinga ki he hā ʻa e meʻa-vaʻinga ʻaki e “ngaahi meʻa toputapu kuo tuku mai ke tau tokangaʻí”?