Tuʻu maʻu ʻi he Moʻoní Telia Naʻa Kākaaʻi Koe

Kuopau ke tau moʻui fakatatau mo e ngaahi tefito ʻi moʻoni haohaoa mo moʻoni ʻo e ongoongolelei ʻo Sīsū Kalaisí pea fakaʻehiʻehi mei he ngaahi loi mo e fehālaaki ʻa e kau kākaá.

Mei he Moʻui ʻa Siosefa F. Sāmitá

Ne toki ʻosi pē he māhina ʻe nima ʻo e foki mai ʻa Siosefa F. Sāmita mei heʻene ngāue fakafaifekau ki Pilitānia Lahí feʻunga mo hono uiuiʻi ia ʻe Palesiteni Pilikihami ʻIongi ke ne toe ngāue fakafaifekau ko hono tuʻo tolú ʻaki ia—ko ʻene ngāue fakafaifekau hono uá naʻe fai ia ʻi he ʻOtu Motu Hauaiʻí. Koeʻuhí ko ʻene poto ʻi he lea faka-Hauaiʻí, ne kole ai ia ʻe Palesiteni ʻIongi ke fakatonulea maʻa ʻEletā ʻĒsela Tafu Penisoni mo ʻEletā Lōlenisou Sinou, ko ha ongo mēmipa ʻo e Kōlomu ʻo e Toko Hongofulu Mā Uá. ʻI heʻenau tukufolau ki Hauaiʻi he faʻahitaʻu failau ʻo e 1864, ne kei taʻu 24 pē ʻa Siosefa F. Sāmita.

Ne fakamatalaʻi ʻe Siosefa F. Sāmita ʻene ngāue fakafaifekaú ʻo pehē: “Ko e tefitoʻi kaveinga ʻo ʻemau ngāué ke fakangata e ngāue kākā ʻa [ha] taha anga kākā …ʻa ia ne ne kākaaʻi ʻa e … kāingalotu tuʻufonua ʻo e Siasí, ʻo ʻikai ngata pē ʻi he ngaahi meʻa fakatokāteliné, ka ne toe ngāueʻaki fakakonga hono mafaí mo hono mālohí ki heʻene kākaá. Ne ne toe fokotuʻutuʻu ʻe ia ʻa e Siasí ʻo fakatatau mo e anga ʻo ʻene fakakaukaú, fakanofo ha Toko Hongofulu Mā Ua mo ha kau ʻōfisa kehe, totongi kae toki fakanofo honau lakanga fakataulaʻeikí, pea mo fokotuʻu ia ʻi he kakaí ko ha pule fakataulaʻeiki mo fakatuʻi, ʻa ia kuo pau ke nau foaki ki ai mo fakaʻapaʻapaʻi. Ne mau fehangahangai mo ia, fakaʻilo faka-Siasi ia ki heʻene ngaahi ngāue halá, pea mo ngāue faivelenga ke fakahaofi ia, ka naʻe vilitaki ʻi heʻene ngāue halá mo loto fefeka ko ia ne tuʻusi ai mei he Siasí. Ne toki tukutaha leva homau iví ki hono fakafoki mai ʻo kinautolu ne ne taki halaʻí, pea ʻi he ngāué ni, ne mau lavameʻa ai ʻi he malumalu ʻo e tāpuaki ʻa e ʻOtuá.”¹ ʻI he mavahe ʻa ʻEletā Penisoni mo ʻEletā sinou mei he ʻOtu Motú, naʻe toe nofo atu ai pē ʻa Siosefa F. Sāmita ʻo aʻu ki he faʻahitaʻu momoko hono hokó, ke fakatonutonu mo fakamāʻopoʻopo e ngaahi ngāue ʻo e Siasí. ʻI he lolotonga ʻo e taimi ko ʻení, ne tala-talaifale ai mo e kāingalotu ʻo e Siasí ne taki halaʻi ki he meʻa ʻoku halá ʻe he tokotaha hē ko ʻení, ʻa ia ne nau loto ke nau fakatomalá. ʻI he toenga ʻo ʻene moʻuí ne akoʻi ai ʻe Palesiteni Sāmita ʻa e Kāingalotú ki hono mahuʻinga ke fakatokangaʻi mo tekeʻi ʻa e ngaahi akonaki halá.

Ngaahi Akonaki ʻa Siosefa F. Sāmitá

Kuo pau ke tuʻu maʻu ʻa e Kau Māʻoniʻoni ʻi he Ngaahi ʻAho Kimui Ní ʻi he moʻoní, tatau ai pē pe ko e hā e hoko maí.

ʻOku totonu ke tau ʻosi maʻu ʻe kitautolu ha taukei feʻunga ʻi he taimí ni ke tau fakatokangaʻi ʻoku ʻikai ke ʻi ai ha tangata, ha taha fakafoʻituitui, ha kiʻi falukunga kakai, pea ʻoku ʻikai ke ʻi ai ha kulupu fakapulipuli te ne lava ke fakatahaʻi ha ivi mo ha mālohi feʻunga ke ne laiki ʻa e ngaahi taumuʻa ʻa e Māfimafí, pe ke liliu e founga ʻo ʻene ngāué. Ne tuʻu hake ha kakai tokolahi fakafoʻituitui ʻi he kuo hilí, pea ko e kakai ko ʻení ne taki halaʻi kinautolu ʻe he foʻi fakakaukau ko ia te nau fakahoko ha liliu fakaʻofoʻofa ʻi he Siasí; ne nau pehē ʻe taimi nounou pē kuo tukuange ʻe he kakaí - kotoa honau tuʻunga mahuʻinga ʻi he Siasí, ʻa e ngaahi tuʻunga ʻo e moʻoní ʻa ia ne nau fakatahatahaʻí pea mo ia ne nau poupouʻi talu mei he kamataʻanga ʻo e Siasí ʻo aʻu mai ki he taimi ko ʻení. Naʻe fakakaukau ʻa e kakai ko ʻení ʻe muimui ʻa e kakaí ki he “kau tauhisipi foʻoú,” ka naʻe ʻilo ʻe he kakai ʻo e ʻOtuá ʻa e leʻo ʻo e tauhi sipi moʻoní, pea mo e leʻo ʻo e muli he ʻikai ke nau fakafanongo ki aí, pe ko e faleʻi ʻa e tokotaha ko ia ʻokú ne lau ʻokú ne maʻu ʻa e mafai ka ʻoku ʻikai ʻaʻaná. He ʻikai ke nau teitei muimui kinautolu ki ha taha pehē. ʻOku ʻilo ʻe he Kau Māʻoniʻoni ʻi he Ngaahi ʻAho Kimui Ní ʻa e laumālie ʻo e Ongoongoleleí; ʻoku mahino kia kinautolu ʻa e laumālie ʻo e moʻoní. Ne nau ʻosi ako honau fatongiá, pea te nau tuʻu maʻu ʻi he moʻoní, ʻo tatau ai pē pe ko e hā ʻe hoko maí.

Talu mei he kamataʻangá ʻo aʻu mai ki he taimí ni, mo e pau ke tau fehangahangai mo māmani kotoa; pea ko e foʻi māmaní kotoa, kuo meimei ke ʻosi fokotuʻutuʻu ke ne fakafepakiʻi ʻa e ngāeu ʻa e ʻEikí, ʻo ʻikai fakangatangata pē ki he tāufehiʻá, pea ʻikai fakangatangata pē ki he loto pe fakaʻamu honau lotó ke fai koví pe ke tauʻi ʻa e moʻoní, ka koeʻuhí ʻoku ʻikai ke nau ʻilo ʻa e moʻoní, pea mo e ʻikai ke nau ʻilo ʻa e meʻa ʻoku nau fakahokó. Kuo kākaaʻi ha tokolahi ʻe he leʻo ʻo ha kau tauhisipi kākā, pea mo takihalaʻi ʻe ha ngaahi mālohi taʻe moʻoni. ʻOku kākaaʻi kinautolu; ʻoku ʻikai ke nau ʻilo ʻa e moʻoní; ʻoku ʻikai mahino kia kinautolu ʻa e meʻa ʻoku nau faí pea, ko ia, ʻoku nau hē aí, ʻo hangē ʻoku nau fakafepakiʻi ʻa e moʻoní, mo fakafepakiʻi mo e ngāue ʻa e ʻEikí; pea naʻe pehē ai pē ia mei he kamataʻangá. Talu mei he ʻaho ne fuofua fakahā ai ʻe he Palōfita ko Siosefa Sāmitá ʻa ʻene ʻuluaki mata meʻa-hā-maí ʻo aʻu mai ki he lolotongá ni, mo e fokotuʻutuʻu fakafepaki ʻa e fili ʻo e angatonú, fili ʻo e moʻoní, ʻo e angamaʻá, ʻo e ngeiá, ʻo e faitotonú, mo e maʻa ʻo e moʻuí; ʻa e fili ki he ʻOtua moʻoni pē tahá, ʻa e fili ke ne fakahoko ʻa e fakahā mei he ʻOtuá pea mo e ngaahi ueʻi fakalaumālie ʻoku haʻu mei he langí ki he tangatá, ke ne fakafepakiʻi ʻa e ngāué ni.

Kuo teʻeki ke mou maʻu ha kaumeʻa ʻo e angatonú, ʻa e kaumeʻa ʻo e fakahaá, ʻa e kaumeʻa ʻo e ʻOtuá, ʻa e kaumeʻa ʻo e moʻoní, ʻa e kaumeʻa ʻo e moʻui angatonú mo e moʻui maʻá, pe ko ia ʻoku līʻoa ki he angatonú mo poto feʻunga ke mahino ki ai ʻa e moʻoní mei he halá pea mo e māmá mei he fakapoʻulí—Te u pehē kuo teʻeki ke mou teitei ʻilo ha faʻahinga fakahala pehē ʻokú ne fakafepakiʻi e ngāue ʻo Saioné. Ko e fokotuʻutuʻu ke fakafepaki ki he ngāue ʻo Saioné ko e fokotuʻutuʻu fakafepaki ia ki he ʻOtuá, ʻo fakafepaki ki he fakahā mei he ʻOtuá, fakafepaki ki he laumālie ʻokú ne tataki ʻa e tangatá ki he moʻoni kotoa ʻoku haʻu mei he maʻuʻanga ʻo e māmá mo e potó, pea toe fakafepaki ki he tefitoʻi moʻoni ʻokú ne fakatahatahaʻi ʻa e tangatá pea mo ʻai ke nau siʻaki ʻa ʻenau ngaahi angahalá, ka nau fekumi ki he angatonú, ke ʻofa ki he ʻOtuá ʻaki honau lotó, ʻatamaí mo e iví kotoa, pea mo ʻofa ki honau ngaahi kaungāʻapí ʻo hangē pē ko kinautolú.²

Tokanga telia ʻa e ngaahi akonaki halá.

ʻOku ʻi ai ha kau tangata ai te nau fakangatangata ʻa e mālohi ʻo e Otuá ki he mālohi ʻo e tangatá, pea ʻoku tau maʻu ha niʻihi pehē ʻi hotau lotolotongá pea kuo nau kau mai ʻi heʻetau kau faiakó. Te nau ʻai koe ke ke tui ki he fakamatalaʻi fakapoto ʻo e Folofolá, pea ko e loi ʻa e moʻulaloa ʻa e matangí mo e peaú ki he mālohi ʻo e ʻOtuá; pea ʻoua ʻe tui ki he fakamatala ʻo e Fakamoʻuí ʻi heʻene kapusi ʻa e fanga tēvoló, fokotuʻu ʻa e pekiá, pe fakahoko e ngaahi meʻa maná, ʻo hangē ko hono fakamaʻa ʻo e kiliá, ka ko e loi pē ia. Te nau ʻai koe ke ke tui naʻe ʻikai hā ʻa e ʻOtua ko e Tamaí mo hono ʻAlo ko Sīsū Kalaisí kia Siosefa Sāmita, ka ko ha foʻi usu pē ʻeni, ka ʻoku lelei ange ʻetau ʻiló; kuo ʻosi fakamoʻoniʻi ʻe he Laumālié ʻoku moʻoni ʻeni. Pea ʻoku ou teo tala atu, tokanga telia ʻa e kau tangata ʻoku omi kia kimoutolu mo e ngaahi akonaki hala ʻo pehē ʻoku hoko fakanautula mai ʻa e ngaahi meʻá kia kinautolu, pea ʻoku ʻikai ke ʻi ai ha mālohi ia ʻo e ʻOtuá.³

ʻI he lotolotonga ʻo e Kau Māʻoniʻoni ʻi he Ngaahi ʻAho Kimui Ní, ko hono malangaʻi ʻo e ngaahi tokāteline halá ʻo fakangalingali ko ha ngaahi moʻoni ʻo e ongoongoleleí, ʻoku ala hoko ia mei ha faʻahinga kakai ʻe ua, pea meimei ko kinaua pē; ko ʻeni ia:

ʻUluakí—Ko e kau mūnoa ʻaupitó, ʻa ia ko e siʻi ʻo ʻenau ʻiló ʻoku tupu ia mei heʻenau nofonoá mo e fakapikopikó, ʻa ia ʻoku siʻisiʻi haʻanau feinga, ʻo kapau ʻoku fai ha feinga pehē, ke fakaleleiʻi honau tuʻungá ʻaki haʻanau laukonga mo ako; ko kinautolu ia ʻoku fokoutua ʻi ha mahaki fakalilifu ʻe iku ʻo fakautuutu ʻo hoko ko ha mahaki ʻoku ʻikai hano lava ke toe faitoʻo—ʻa ia ko e fakapikopikó.

Uá—Ko e kau hīkisiá mo e kau sanitunguá, ʻa ē ʻoku nau pehē ʻoku nau hīkisia ʻi heʻenau ngaahi lavameʻá, ʻo lau ʻoku nau poto ange ʻi ha toe tahá, pea mo fakaʻuhingaʻi ʻa e ngaahi tuʻutuʻuní ʻo fakatatau mo honau lotó; kuo nau hoko ai ko ha fono kia kinautolu pē, pea mo fakaʻalinga ko e kau fakamaau kinautolu ki heʻenau ngaahi angafaí. Ko ha faʻahinga mūnoa ʻeni ʻoku fakatuʻutāmaki ange ia ʻi he ʻuluakí.

Tokanga telia ʻa e fakapikopikó mo e hīkisiá.⁴

ʻOku totonu ke ʻosi tuʻu lelei ʻa e Kau Māʻoniʻoni ʻi he Ngaahi ʻAho Kimui Ní ʻi he taimí ni ʻi he ʻilopau kuo ʻosi fokotuʻu ʻe he ʻOtuá hono Siasí ʻi māmani ʻa ia ko hono fokotuʻu fakaʻosí ia, ke tuʻu, pea ʻoua naʻa toe maumauʻi hifo ia pe fakaʻauha; he ko e fale ʻo e ʻOtuá ko e fale ia ʻo e maau, ʻo e fono, ʻo e fakahoko ʻo e meʻa pau, pea ko e kau tangata ʻoku taʻe manonga mo fakatupu moveuveú, ʻa ē ʻoku tupu mei heʻenau mūnoá mo ʻenau siokitá, haʻanau hoko ko ha kau papūnoa, mo fakangalingali ʻoku nau maʻu ha mālohi fakapalōfita mo ha ngaahi ʻaloʻofa pea mo ha ngaahi meʻafoaki fakalaumālié, ʻoku ʻikai totonu ke toe ʻi ai hanau mālohi ki he kāingalotú, pe ko ha uesia ʻo e Kāingalotú ʻi honau faʻahinga laumālié koeʻuhí ko honau faʻahinga ʻulungāangá mo ʻenau ngaahi fakakaukau fakapotó. Ko e Siasi ʻo Kalaisí ʻoku ʻi he Kāingalotú ia. Kuo ʻosi foaki ki ai ʻa e fono ʻa e ʻOtuá ki hono puleʻí pea mo hono pukepuké. ʻOku ʻi ai ʻa e meʻa kotoa pē ki hono fakatonutonu ʻo e fehālaaki kotoa pe ngaohikovia pe faʻahinga hala ʻe ala faʻa mapuna hake mei he taimi ki he taimi, ka he ʻikai hoko ha taʻe mapuleʻiá, pe ha liukava; ʻe lava ke fakahoko ʻeni ʻi ha founga ʻo e māfulifuli—ʻi he fakalakalaka, ʻi he tupulekina ʻo e ʻiló, potó, faʻakātakaí mo e ʻofa faka-Kalaisí.

Ko e ngaahi kōlomu pule ʻo e Siasí kuo pau ke foʻu maʻu ʻaki pē ia ha faʻahinga tangata pehē, pea kuo pau ke fili kinautolu ʻi he faʻahinga founga ko iá, koeʻuhí ke fakapapauʻi ki he Kāingalotú, ʻa e faʻahinga tōʻonga ʻo e ngaahi tuʻutuʻuni ʻanautolu kuo fakafalala ki ai ʻa hono puleʻi ʻo e ngaahi meʻa ʻo e Siasí, ke ʻi ai ʻa e poto moʻoní, angatonú, pea mo fai pau ki honau fatongiá.⁵

Talu mei he ngaahi ʻaho ʻo Hailame Peisí (T&F 28), pea mo ha ngaahi taimi kehe, mo e lahi ʻo ha ngaahi fakahā mei ha ngaahi laumālie fakahala ki he kāingalotu ʻo e Siasí. Kuo faʻa hoko mai ʻeni ki ha kau tangata mo ha kau fefine ne tuʻunga ʻi heʻenau maumau fonó ʻa ʻenau hoko ʻo moʻulaloa mo faingofua ki he Kākā Lahí. ʻI he ngaahi taimi ʻe niʻihi ʻoku taki halaʻi ai ha kakai ʻoku nau pōlepole ʻi heʻenau faipau ki heʻenau tauhi e ngaahi fonó mo e ngaahi ouaú pea fakataha mo e ngaahi mōihū ʻo e Siasí, ʻa ia ʻoku nau ngāueʻaki ha ivi ʻoku mātuʻaki fāitatau mo ia ʻoku haʻu mei ha maʻuʻanga tokoni Fakalangí, pae naʻa mo e kakai ko ʻení, ʻoku nau pehē ko e kakai “fili totonú pē “ kinautolu, ʻe faingataʻa ke nau ʻilo ʻa e ngaahi faikehekehe ʻoku mahuʻingá [Mātiu 24:24]. Naʻa mo Sētane ne ne liliu ia ʻo he hoko ko ha “ ʻāngelo ʻo e māmá.”[2 Kolinitō 11:14; 2 Nīfai 9:9].

Ko e taimi koē ʻoku fakahoko mai ai ʻe ha ngaahi meʻa-hā-mai, ngaahi misi, ngaahi lea kehekehe, ngaahi kikite, ngaahi ongo pea mo ha ngaahi meʻafoaki pe ueʻi fakalaumālie ha faʻahinga meʻa ʻoku ʻikai fenāpasi mo e ngaahi fakahā kuo tali ʻe he Siasí pe fehangahangai mo e ngaahi tuʻutuʻuni ʻo hono kau maʻu mafai totonú, ʻe lava ke ʻilo heni ʻe he Kau Māʻoniʻoni ʻi he Ngaahi ʻAho Kimui Ní ʻoku ʻikai mei he ʻOtuá ia, ʻo tatau ai pē pe ko e hā hano lahi ʻo haʻane hā ngali tonu. ʻOku totonu foki ke toe mahino kia kinautolu ko e ngaahi tuʻutuni ki hono tataki ʻo e Siasí kuo pau ke haʻu ia, ʻi he fakahā, ʻo fou mai ʻi he Palesiteni ʻo e Siasí. ʻOku maʻu ʻe he kāingalotu faivelenga kotoa pē ha totonu ke maʻu e tataki fakalaumālie ʻa e Laumālie Māʻoniʻoní maʻanautolu pē, mo honau ngaahi fāmilí, pea mo kinautolu kuo fokotuʻu mo fakanofo kinautolu ke nau puleʻí. Ka ʻo ka ʻi ai ha meʻa ʻoku ʻikai tukungamālie mo ia ʻoku haʻu mei he ʻOtuá ʻo fou mai ʻi he Palesiteni ʻo e Siasí ʻoku ʻikai totonu ke tali ia ko ha meʻa kuo fakamafaiʻi pe falalaʻia.⁶

Ko e ngaahi meʻafoaki ʻo e Laumālié mo e ngaahi mālohi ʻo e Lakanga Taulaʻeiki māʻoniʻoní ʻoku mei he ʻOtuá ia, ʻoku foaki mai kinautolu ke tāpuakiʻi ʻaki ʻa e kakaí, ke fakalotolahia ʻaki kinautolu, pea mo fakamālohia ʻaki ʻenau tuí. ʻOku ʻiloʻi lelei ʻeni ʻe Sētane, ko ia ʻoku feinga ai ʻi ha ngaahi mana loi ke ne fakakuihi mo kākaaʻi ʻa e fānau ʻa e ʻOtuá. Manatuʻi naʻe lava pē e feinga ʻa e kau faimana ʻo ʻIsipité ʻo kākaaʻi ʻa Felo ʻi heʻene fekauʻaki mo hono fakalangi ʻo e ngāue ʻa Mōsese mo ʻĒloné….

Naʻe fakahā ʻe Kalaisi ʻi heʻene kikite fekauʻaki mo e fakamaau fakaʻosí ʻe lava pē ʻa e mālohi ke fai ha meʻa fakaofó ʻo haʻu mei ha feituʻu ʻoku hala: “ ʻE pehē ʻe he tokolahi kiate au ʻi he ʻaho ko iá, ʻEiki, ʻEiki, ʻikai naʻa mau [kikite] ʻi ho huafá? pea ʻi ho huafá naʻa mau kapusi ki tuʻa ʻa e kau tēvoló? pea ʻi ho huafá naʻa mau fai ʻa e ngaahi meʻa [fakaofo] lalahi? Pea te u toki fakahā kiate kinautolu, naʻe ʻikai ʻaupito te u ʻilo ʻa kimoutolu; ʻalu ʻiate au ʻa kimoutolu ʻoku fai kovi.” (Mātiu 7:22–23.)

Ko e fakatuʻutāmaki ʻo e mālohi ke fai e kovi ʻi he fakalouʻakaú ʻoku ʻikai nofoʻataʻatā pē ia ʻi he fakalouʻakaú, ka ʻoku kovi ange ʻa e vale ʻo e loto ʻa e kakaí ki he ngaahi meʻa ʻoku fai maʻanautolú. ʻOku fakavalevale fau ke fai ha tui ʻe lava ʻe he tēvoló ʻo uesia pe fakamamahiʻi ha tangata pe fefine tonuhia, ʻo tautautefito kapau ko ha kāingalotu kinautolu ʻo e Siasi ʻo Kalaisí—[tukukehe] kapau ʻoku tui ʻa e tangata pe fefine ko iá ʻe lava ke uesia ia ʻe he faʻahinga mālohi mei he tafaʻaki ko iá. Kapau ʻoku nau maʻu ha faʻahinga fakakaukau pehē, pea ta te nau moʻulaloa mo vaivai ki heʻenau ngaahi tui tēvoló. ʻOku ʻikai ke ʻi ai ha mālohi ia ʻi he fakalouʻakaú ʻataʻatā pē, ka ʻoku toki hoko ia ʻi he taimi ʻoku fai ai ki ai ha tui pe ʻe talí.⁷

Fakaʻehiʻehi mei he nofotaha pē ʻi ha tefitoʻi moʻoni mamaná.

Siʻi ngaahi tokoua mo e tuofāfine, ʻoua muʻa naʻa ʻi ai hato mamana. ʻOku fakatuʻutāmaki ke ʻi ai hato mamana ʻi he Siasi ʻo Kalaisí. ʻOku fakatuʻutāmaki he ʻokú ne ʻai ʻe ia ke mahuʻinga ange ʻi ha ngaahi tefitoʻi moʻoni pau ʻe niʻihi pe ngaahi tefitoʻi fakakaukau pea fakaliʻeliʻaki ai ha niʻihi ʻoku nau mahuʻinga tatau pē, mo ʻaonga tatau, pea mo ʻaonga ki he fakamoʻuí ʻo hangē ko e ngaahi tokāteliné pe ngaahi fekaú.

Ko e ngaahi mamana [fakalotú] ʻoku nau ʻoange kia kinautolu ʻoku nau saiʻia aí ha faʻahinga fakakaukau hala ki he ongoongolelei ʻo e Huhuʻí; ʻoku nau fakakeheʻi mo fokotuʻutuʻu hala ʻa hono ngaahi tefitoʻi moʻoní mo hono ngaahi akonakí. ʻOku ʻikai hoa ʻa e faʻahinga fakakaukaú ni. Ko e tefitoʻi moʻoni mo e ngāue kotoa pē kuo fakahā mei he ʻOtuá ʻoku nau ʻaonga kotoa ki he fakamoʻui ʻo e tangatá, pea ka fakamuʻamuʻa taʻe totonu ha taha ʻo kinautolu, ʻo fufuuʻi mo fakangalongaloʻi ai ʻa e toengá, ʻoku ʻikai fakapotopoto ia mo fakatuʻutāmaki; ʻokú ne uesia hotau fakamoʻuí, he ʻokú ne fakapoʻuliʻi ʻetau fakakaukaú mo fakaʻaoʻaofiaʻi ʻetau mahinó. Ko e faʻahinga fakakaukau peheé, ʻoku tatau ai pē pe ko e hā ʻoku fakataumuʻa ki aí, ka ʻokú ne fakasiʻisiʻi ʻa e vīsoné, fakavaivaiʻi e fakakaukau fakalaumālié, mo fakapoʻuliʻi ʻa e ʻatamaí, pea ko hono olá–ko e taha ko ia ʻoku fokoutua ʻi he faʻahinga fakakaukau halá ni mo hōloa e vīsone ʻo ʻene fakakaukaú ʻoku fokotuʻu ai ia ʻi ha tuʻunga ke ʻahiʻahiʻi ʻe he tokotaha koví, pe, ʻe makatuʻunga ʻi he ʻaoʻaofia ʻo ʻene vakaí pe ʻikai kakato ʻene vīsoné, te ne fakamāuʻi taʻe totonu ai hono kāingá mo moʻulaloa ki he laumālie ʻo e hē mei he moʻoní. ʻOku ʻikai faitotonu ia ʻi he ʻao ʻo e ʻEikí.

Kuo mau fakatokangaʻi ʻa e faingataʻaʻia ko ʻení: ko e Kāingalotu ko ē ʻoku ʻi ai honau mamana ʻi he ngaahi tefitoʻi moʻoní ʻoku nau meimei hehema ke fakaangaʻi mo fakahalaʻi honau ngaahi tokoua mo e tuofāfine ʻoku ʻikai ke nau fuʻu vilitaki ʻi ha faʻahinga meʻa fekauʻaki mo ʻe foʻi fakakaukau ʻoku nau pipiki aí ʻo hangē ko kinautolú. Ko e tangata ko ē ʻoku tuʻu pē ʻi heʻene fakakaukaú ʻa e Lea ʻo e Potó, te ne meimei fakaangaʻi taʻe fakangatangata maʻu pē ʻe ia ʻa e toenga ʻo e kāingalotu ʻo e Siasí ʻoku tuʻunga tatau pē ʻenau fakamahuʻingaʻi e ngaahi tokāteline kotoa ʻo e ongoongoleleí.

ʻOku ʻi ai foki ha fōtunga e taha ʻo e palopalema ko ʻení—ko e tangata ko ē ʻoku ʻi ai hano mamana he ngaahi tefitoʻi moʻoní ʻoku meimei ke ne maʻu e fakakaukau “ ʻOku ou māʻoniʻoni ange au ʻia koe,” pea ongoʻi ʻulu pupula mo hīkisia, ʻoku ʻikai falala ki ha taha, pea ʻikai ha ongoʻi fie tokoni, ki hono ngaahi tokoua mo e tuofāfine ʻoku ʻikai ke nau moʻui haohoa ʻaki ʻa e foʻi fono ko iá. ʻOku fakamamahiʻi ʻe he faʻahinga ongo peheé ʻa hono kaungātamaioʻeikí pea mo fakatupu houhau ki he ʻEikí. “ ʻOku muʻomuʻa ʻa e fie lahí ʻi he fakaʻauhá, pea mo e loto angahikí ʻi he hoko ʻa e hingá.”—(Lea Fakatātā 16:18.)

ʻOku ʻi ai ha ngaahi moʻoni maʻongoʻonga ʻi he palani ʻo e huhuʻí pea ʻoku mahuʻinga. He ʻikai lava ʻo fakaliʻeliʻaki kinautolu; ʻoku ʻikai foki ha toe meʻa ia ʻe lava ʻo fakamuʻomuʻa ʻia kinautolu. Kuo pau ke tali ʻaki ʻa e lotó kakato ʻa e tuʻunga fakatamai ʻo e ʻOtuá, ʻa e mālohi ʻo e fakalelei ʻa hotau ʻEikí mo hotau Fakamoʻuí, pea mo hono fakafoki mai ʻo e ongoongoleleí ʻi he ngaahi ʻaho ki mui ní. He ʻikai ke tau toe lava ʻe kitautolu ʻo fai ha fetongi ki ha siʻisiʻi ʻo e tuí ʻi he ngaahi tokāteline mahuʻingá ni ʻaki haʻatau fakaʻehiʻehi kakato mei he ngaahi meʻa ʻoku ʻikai fakatupu moʻui leleí, pe ʻaki ʻetau totongi pau ʻo e vahehongofulu ʻi heʻetau “ ʻanetó mo e kuminó” [vakai, Mātiu 23:23], pe ko haʻatau tauhi ki ha toe ouau fakatuʻasino. Ko e papitaiso ʻataʻatā taʻe maʻu ha tuí ʻoku ʻikai maʻu ai ha meʻá ia.⁸

ʻOku fakatauʻatāinaʻi kitautolu ʻi he maʻu ʻo e moʻoní, mei he angahalá mo e fakapoʻulí.

ʻOfa ke ʻoua muʻa naʻa kākaaʻi kitautolu, pe taki halaʻi, ʻo felīlīʻaki ʻe he matangi ʻo e ngaahi akonakí, ʻe he ngaahi fakakaukau taʻepau mo fakavalevalé pe poto kākā ʻo e tangatá, pe muimui ki he kalanga loi ko ia ʻoku pehē, Vakai, ʻoku ʻi heni ʻa Kalaisi, pe ʻi hena [vakai, Mātiu 24:23], Kuo ʻosi fokotuʻu ʻe he ʻOtuá ʻa e founga maau mo totonu ʻo e fetuʻutaki ʻi hono vā mo e tangatá, kuó ne fokotuʻu ia ʻi hono Siasí, pea ʻe lelei ki he faʻahnga ʻo e tangatá kotoa ʻo ka nau ka muimui ki he moʻoni ko ʻení, telia naʻa kākaaʻi kinautolu. Ko e meʻa ko ia ʻoku fenāpasi mo ʻení ʻoku mei he ʻOtuá ia, pea ko ia ʻokú na fehangahangaí ʻoku mei he tēvoló ia.⁹

Ko e tōʻonga fakaʻaho ko ia … ʻo e kole ha ʻaloʻofa fakalangi mo ha fakamolemole ʻi heʻetau fonongá, ʻa ē okú ne ʻomi ha mālohi ke tau hao ai mei he koví, ʻe toki lava pē ʻo ikuna ʻo kapau te tau holomui moʻoni ʻo hao mei ai.¹⁰

He ʻikai moʻoni pē ke teitei ʻi ai ha faingamālie ia ke tui ai ha tangata ʻokú ne maʻu ʻa e Laumālie Māʻoniʻoni ʻo e ʻOtuá ko e [fakalouʻakaú mo e ngaahi mālohi peheé] ʻoku nau maʻu ha mālohi ange kiate ia. ʻOku hoko hono maʻu ʻo e Laumālie Māʻoniʻoní ko ha maluʻi moʻoni mei he ngaahi ivi ʻo e koví.¹¹

ʻOku ou tui ko e tokolahi taha ʻo e Kau Māʻoniʻoni ʻi he Ngaahi ʻAho Kimui Ní ʻoku fakautuutu ke lahi ange ʻenau tuí. ʻOku ou toe tui foki, ko e tokolahi taha ʻo e Kau Māʻoniʻoni ʻi he Ngaahi ʻAho Kimui Ní ʻoku nau fakapotopoto feʻunga, pea ʻoku lahi feʻunga honau potó pea mo maʻu ha konga feʻunga ʻo e Laumālie ʻo e ʻOtua moʻuí ʻi honau lotó, ke nau fakafaikehekeheʻi ʻa e moʻoní mo e loí, ʻi he vā ʻo e totonú mo e halá, pea ʻi he vā ʻo e māmá mo e fakapoʻulí; pea te u tala atu ʻoku ou tui ʻoku nau fakakaukau lelei feʻunga ke talangofua ki he ngaahi tefitoʻi moʻoni faingofua, haohaoa, mo moʻoni ʻo e ongoongolelei ʻo Sīsū Kalaisí, ʻo laka ange ʻi he ngaahi fakamahamahalo ʻa e kau filōsefá, kau saienisí, pe ʻa ha toe taha pē. ʻOku ʻikai ha faʻahinga saienisi pe fakakaukau fakapoto ia ʻe laka hake ʻi he moʻoni ʻa e ʻOtua Fungani Māfimafí.

Ne folofola ʻa e ʻEikí, “Ko ʻeku folofolá ko e moʻoní ia” [vakai, Sione 17:17], pea ʻoku moʻoni ia; pea ʻoku ou tui kuo ʻilo feʻunga ʻa e Kau Māʻoniʻoni ʻi he Ngaahi ʻAho Kimui Ní ki he folofola ʻa e ʻOtuá ke nau ʻiloʻi ko ʻene folofola ia ʻi he taimi ʻoku nau mamata ai ki ai, pea tekeʻi ha toe meʻa kehe pē; pea te nau tauhi ki he folofola ʻa e ʻOtuá, he ko e moʻoní ia. Hangē ko e folofola ʻa e Fakamoʻuí, “Kapau te mou nofo maʻu ʻi heʻeku leá, pea ko ʻeku kau ākonga moʻoni ʻa kimoutolu; pea te mou ʻilo ʻa e moʻoní pea ʻe fakatauʻatāinaʻi ʻa kimoutolu ʻe he moʻoní” [vakai, Sione 8:31–32].

ʻOku ou tui ko e Kau Māʻoniʻoni ʻi he Ngaahi ʻAho Kimui Ní, ʻo tautau-tefito ki he kau tangata taki ʻi ʻIsilelí, ʻoku nau maʻu ha ʻilo mo mahino feʻunga kia kinautolu ʻa e ngaahi tefitoʻi moʻoni ʻo e ongoongoleleí ke nau nau lava ʻo ʻilo ai ʻa e moʻoní, pea ʻoku fakatauʻatāinaʻi ai kinautolu ʻi heʻenau maʻu iá—ʻo tauʻatāina mei he angahalá, tauʻatāina mei he fehālaakí, tauʻatāʻina mei he fakapoʻulí.¹²

Ngaahi Fokotuʻu ki he Akó

ʻE anga fēfē haʻatau lava ʻo fakaʻehiʻehi mei hano “kākaaʻi ʻe he leʻo ʻo e kau tauhisipi loí” ka tau fakatokangaʻi ʻa e leʻo ʻo e Tauhisipi Moʻoní? ʻE tokoni fēfē ʻeni ke tau “tuʻu maʻu ai he moʻoní, neongo pe ko e hā ʻe hoko maí”?
ʻE anga fēfē haʻatau tuʻu maʻu ʻo fakafepakiʻi ʻa e ngaahi mālohi ʻi hotau ngaahi koló ʻoku “fokotuʻutuʻu ke fakafepaki ki he ngāue ʻa e ʻEikí”?
Ko e hā ha ngaahi founga ʻoku feinga ai ʻa e kakai ʻo e ʻaho ní ke “fakangatangata ʻa e mālohi ʻo e ʻOtuá ki he mālohi ʻo e tangatá”?
ʻE lava fēfē ʻe he hīkisiá ʻo taki kitautolu ki he fehālaakí? ʻE anga fēfē hano fakahoko ʻe he fakapikopikó ʻa e meʻa tatau? Ko e hā ʻoku mātuʻaki mahuʻinga ai ke ʻoua naʻa kākaaʻi kitautolu ʻe he “malangaʻi ʻo e ngaahi tokateline halá” mo e “fakapikopikó pea mo e hīkisiá”?
Ko e hā ha ngaahi fakatokanga kuo ʻosi fai ʻe he ʻEikí fekauʻaki mo kinautolu ʻoku “fakangalingali ʻoku nau maʻu ha ngaahi mālohi fakapalōfitá”? (Vakai foki, T&F 42:11.)
ʻE fakatuʻutāmaki fēfē ha ʻi ai hato mamana ʻi he ngaahi meʻa fakalotú, ki he fakafoʻituituí pea mo e Siasí? Ko e hā ʻoku ʻikai hoko ai ha fai-pau moʻoni ki ha “ouau fakatuʻasino” ko ha fetongi feʻunga ʻo e siʻisiʻi ʻo e tuí ʻi he ngaahi “tokāteline ʻoku ʻaongá”?
ʻE lava fēfē haʻatau lava ʻo fakaʻehiʻehi mei hano kākaaʻi pe taki atu “ke felīlīʻaki ʻe he ngaahi matangi ʻo e tokāteline halá”?
ʻOku fakatauʻatāinaʻi fēfeeʻi kitautolu ʻe heʻetau maʻu ʻa e moʻoní? ʻE lava anga fēfē haʻatau fakaʻaongaʻi ʻa e meʻafoaki ʻo e Laumālie Māʻoniʻoní ke tokoni ke tau ʻiloʻi ʻa e leleí mei he koví pea mo tekeʻi ʻa e ngaahi mālohi koví?