“Pagpapakumbaba,” Mga Paksa at mga Tanong (2023)
Buod
Pagpapakumbaba
Ang pagpapakumbaba ay pagkilala nang may pasasalamat na umaasa tayo sa Panginoon—na nauunawaang palagi nating kailangan ang Kanyang tulong. Ang pagpapakumbaba ay pagkilala na ang ating mga talento at kakayahan ay mga kaloob ng Diyos. Hindi ito tanda ng kahinaan, kakimian, o takot; pahiwatig ito na alam natin kung saan nagmumula ang ating tunay na lakas. Maaari tayong maging kapwa mapagpakumbaba at walang takot. Maaari tayong maging kapwa mapagpakumbaba at matapang.
Si Jesucristo ang ating pinakadakilang halimbawa ng pagpapakumbaba. Sa Kanyang mortal na ministeryo, palagi Niyang kinikilala na nagkaroon Siya ng lakas dahil sa pagdepende Niya sa Kanyang Ama. Sabi Niya: “Hindi ako makakagawa ng anuman mula sa aking sarili. … Hindi ko pinaghahanap ang aking sariling kalooban, kundi ang kalooban ng Ama na nagsugo sa akin.”
Palalakasin tayo ng Panginoon kapag nagpakumbaba tayo sa Kanyang harapan. Itinuro ni Santiago: “Ang Diyos ay sumasalungat sa mga mapagmataas, subalit nagbibigay ng biyaya sa mga mapagpakumbaba. … Mangagpakababa kayo sa paningin ng Panginoon, at kaniyang itataas kayo.”