Pang-aabuso

Ang pang-aabuso ay pagmamalupit o pagpapabaya sa iba sa paraang nagdudulot ng pisikal, emosyonal, o seksuwal na pinsala. Ang paninindigan ng Simbahan ay na ang pang-aabuso ay hindi maaaring kunsintihin sa anumang anyo at na ang mga yaong nang-aabuso ay mananagot sa harap ng Diyos.

Inaasahan ng Panginoon na gagawin natin ang lahat upang pigilan ang pang-aabuso at protektahan at tulungan ang mga biktima. Walang sinuman ang dapat magtiis sa mapang-abusong pag-uugali.

Hindi dapat balewalain ang mga ulat tungkol sa pang-aabuso. Ang lahat ay dapat tumugon nang may habag at pagiging sensitibo sa mga biktima at sa kanilang pamilya. Ang mga yaong naapektuhan ng pang-aabuso ay kailangang pakinggan at suportahan.

Kapag may nalaman o may hinala ang mga bishop at stake president na may pang-aabuso, dapat silang tumawag kaagad sa abuse help line ng Simbahan na itinatag sa kanilang bansa o sa kanilang area office. Tatanggap sila ng mga partikular na tagubilin kung paano tulungan ang mga biktima, magprotekta laban sa mangyayari pang pang-aabuso, at gawin ang anumang obligasyon sa pag-uulat.

Ang pang-aabuso ay labag din sa mga batas ng lipunan. Hinihikayat ng Simbahan na iulat ang pang-aabuso sa mga awtoridad, at dapat gawin ng mga lider at miyembro ang lahat ng legal na obligasyon na iulat ang pang-aabuso. Sa ilang lugar, ang mga lider at guro na naglilingkod sa mga bata ay may legal na responsibilidad na iulat sa mga awtoridad ang pang-aabuso sa mga bata. Sa ibang lugar, ang sinumang tao na nakaaalam na may pang-aabusong ginagawa sa mga bata, matatanda, o may kapansanan ay may legal na responsibilidad na sabihin sa mga awtoridad ang pang-aabuso.

Dapat gawin ng mga lider, miyembro ng pamilya, at mga kaibigan ang lahat ng makakaya nila upang mapatigil ang pang-aabuso, gawing ligtas ang biktima, at tulungan ang biktima na makasumpong ng paggaling. Maaaring may mga biktima na kailangan ng tulong sa pag-uulat ng pang-aabuso sa tagapagpatupad ng batas o sa tagapagbigay ng proteksyon. Maaaring kailangan din ng mga biktima ng tulong sa proseso ng paggaling mula sa mga propesyonal, kabilang na ang mga doktor at mga tagapayo.

Karamihan sa mga biktima ay inaabuso ng mga taong kilala nila. Ang mga taong iyon ay maaaring asawa, kapamilya, kadeyt, kaibigan, o iba pang kakilala. Dapat maipadama sa mga biktima na hindi sila kailanman dapat sisihin sa masasamang ginawa ng iba—kahit sino pa ang umaabuso sa kanila. Walang kasalanan ang biktima.

Bagama’t ang ilang uri ng pang-aabuso ay maaaring magdulot ng pisikal na pananakit, ang lahat ng uri ng pang-aabuso ay nakaaapekto sa isip at espiritu. Ang mga biktima ng pang-aabuso ay kadalasang nakadarama ng pagkalito, pagdududa, pagkabagabag, kahihiyan, kawalan ng tiwala, at takot. Maaaring madama nila na sila ay wala nang magagawa, mahina, malungkot, at nag-iisa. Maaari pa ngang pagdudahan nila ang pagmamahal ng Ama sa Langit at ang sarili nilang banal na kahalagahan. Ngunit makatitiyak ang mga biktima at ang mga yaong sumusuporta sa kanila na, sa pamamagitan ng Kanyang walang hanggang Pagbabayad-sala, nagpapaabot ang Tagapagligtas ng tulong, paggaling, at lakas.

Ang mga biktima ng pang-aabuso ay maaaring mapanatag kapag humingi sila ng espirituwal na patnubay at suporta mula sa mga lider ng Simbahan habang sila ay nagpapagaling. Ang unang responsibilidad ng mga lider ng Simbahan ay tulungan ang mga yaong naabuso at protektahan ang mga yaong maaaring maabuso sa hinaharap. Maaaring sumangguni ang mga lider sa counselingresources.ChurchofJesusChrist.org para sa iba pang impormasyon.

Ang mga alituntunin sa “Ang Mag-anak: Isang Pagpapahayag sa Mundo” ay nagtakda ng pamantayan kung paano natin dapat pakitunguhan ang isa’t isa. Ang pagsunod sa mga alituntuning ito ay naghihikayat sa atin na bumuo ng matitibay at magagandang ugnayan. Magagamit ng mga magulang, asawa, at mga miyembro ng pamilya ang mga alituntuning ito upang suriin kung paano nila kakausapin at pakikitunguhan ang isa’t isa.

Tingnan ang abuse.ChurchofJesusChrist.org para sa iba pang impormasyon.