“Igice cya 14: Abinadi n’Umwami Nowa,” Inkuru zo mu Gitabo cya Morumoni (1997), 38–42
“Igice cya 14,” Inkuru zo mu Gitabo cya Morumoni, 38–42
Igice cya 14
Abinadi n’Umwami Nowa
Zenifu yari umwami w’umukiranutsi w’itsinda ry’Abanefi. Amaze gusaza, umuhungu we Nowa yabaye umwami.
Nowa ntabwo yari umwami mwiza nka se. Yari umugome kandi ntiyubahaga amategeko y’Imana.
Yahatiye abantu kumuha igice cy’ibinyampeke byabo, amatungo, zahabu n’ifeza.
Umwami Nowa yakoze ibi kubera ko yari umunebwe. Yatumye Abanefi bamuha ibyo yari akeneye byose ngo abeho.
Abatambyi beza se yari yarahamagaye yabasimbuje abatambyi b’abagome. Aba batambyi b’abagomei bigishije abantu gukora ibyaha.
Umwami Nowa yari afite inyubako nyinshi nziza, harimo ingoro imwe ngari irimo intebe y’umwami. Inyubako zari zitatswe na zahabu, feza n’imbaho zihenze.
Umwami Nowa yakundaga ubutunzi yambuye abantu be. We n’abatambyi be bamaraga igihe cyabo banywa vino kandi baba abagome.
Imana yohereje umuhanuzi witwa Abinadi ku bantu ba Nowa. Abinadi yababuriye ko nibatihana, bazaba abacakara b’Abalamani.
Ubwo Umwami Nowa yumvise ibyo Abinadi yavuze, yararakaye. Yohereza abantu ngo bazane Abinadi i bwami kugira ngo amwice.
Abinadi yajyanywe ku mwami. Umwami Nowa n’abatambyi be bamubajije ibibazo byinshi. Bagerageje kumutega imitego ngo agire icyo avuga kibi.
Abinadi ntiyatinyaga gusubiza ibibazo byabo. Yari abizi ko Imana imufasha. Abatambyi batangajwe n’ibisubizo bya Abinadi.
Umwami Nowa yararakaye ndetse ategeka abatambyi be kwica Abinadi. Abinadi ababwira ko nibamukoraho, Imana ibica.
Roho Mutagatifu yarinze Abinadi kugira ngo arangize kuvuga ibyo Nyagasani yashakaga ko avuga. Mu maso ha Abinadi hararabagiranaga. Abatambyi batinye kumukoraho.
Abinadi avuga afite ububasha buturutse ku Mana, yabwiye abantu ku bijyanye n’ubugome bwabo. Yabasomeye amategeko y’imana.
Yababwiye ko Yesu Kristo azavuka ku isi. Yesu azatuma bishoboka ko abantu bihana, bakazuka kandi bakabana n’Imana.
Abinadi yabwiye abantu kwihana no kwemera Yesu Kristo cyangwa se ntibazakizwe.
Umwami Nowa n’abatambyi be bose uretse umwe banze kwemera Abinadi. Nowa yabwiye abatambyi kwica Abinadi. Baramuboshye bamujugunya mu nzu y’imbohe.
Wa mutambyi umwe wemeye Abinadi yitwaga Aluma. Yasabye Umwami Nowa kureka Abinadi akagenda.
Umwami yarakariye Aluma asaba ko bamuta hanze. Nuko yohereza abagaragu be kumwica. Aluma yarirukanse aranihisha, ndetse abagaragu ntibigeze bamubona.
Nyuma yo kumara iminsi itatu mu nzu y’imbohe, Abinadi yarongeye agarurwa imbere y’Umwami Nowa. Umwami yabwiye Abinadi kwisubiraho ku magambo yari yamuvuzeho n’abantu be.
Umwami Nowa yabwiye Abinadi ko nadahakana ibyo yavuze, ari bwicwe.
Abinadi yari abizi ko yavuze ukuri. Yifuzaga gupfa kuruta kwisubira kubyo Imana yamutumye kuvuga.
Umwami Nowa yategetse abatambyi be kwica Abinadi. Baramuboshye, baramukubita ndetse baramutwika kugeza apfuye. Mbere y’uko apfa, Abinadi yavuze ko Umwami Nowa nawe azicwa n’umuriro.
Bambwe mu Banefi ntibavugaga rumwe n’Umwami Nowa ndetse bagerageza kumwica. ingabo z’Abalamani nazo zaje kurwanya umwami n’abayoboke be.
Umwami n’abayoboke be bahunga Abalamani, ariko Abalamani barabafata batangira kubica. Umwami abwira abagabo gusiga imiryango yabo maze bagakomeza kwirukanka.
Abagabo benshi banze kugenda. Bafashwe mpiri n’Abalamani.
Benshi mu bagabo birukankanye n’Umwami Nowa barababaye. Bashakaga gusubirayo ngo bafashe abagore n’abana babo ndetse n’abantu babo.
Umwami Nowa ntiyifuzaga ko abagabo basubira mu miryango yabo. Yabategetse kugumana na we.
Abagabo barakariye Umwami Nowa. Baramutwitse kugeza apfuye, nk’uko Abinadi yari yarabihanuye. Maze basubira mu miryango yabo.