Iralaud 8
Kaudiahl kohieng soukohp Sosep Smith ong Oliver Cowdery, nan Harmony, Pennsylvania, Epreil 1829. Ni ansou me doadoahk en kawehweh Pwuhk en Mormon, Oliver, me wiwia sounnting, oh kin ntintigihdi koasoi kan me soukohpo mahsanih, e ahpw inangih alehdi kisakis en kawehweh. Kauno ketin sapeng eh pekipek ni e ketin kasalehiong kaudiahl wet.
1–5, Kaudiahl kohdo sang ni manaman en Ngehn Sarawi; 6–12, Marainiki sapwellimen Koht rir kan oh manaman en kawehweh poadoapoad en kawa kan kin kohdo sang ni pwoson.
1 Oliver Cowdery, mehlel, mehlel, I ndahionguhk, me nin duwen Kauno e ketin ieias, me wia ahmw Koht oh ahmw Soundor, udahn ke pahn alehdi kamarainpen soahng kan me sohte lipilipil me ke pahn peki ni pwoson, sang ni mohngiong mehlel, kamkamehlele me ke pahn alehdi kamarainpen nting kan en poadoapoad en mahs, me sang kawa, me audaudiki pali kan en nei pwuhk sarawi me kosoiepe wiawiher sang ni kasansal en Ngehnio.
2 Ei, kilang, I pahn ndahionguhk nan ahmw madamadau oh ahmw mohngiong, sang ni Ngehn Sarawi, me pahn tiahda pohm oh pahn ketiket nan ahmw mohngiong.
3 Eri, kilang, met iei ngehn en kaudiahlo; kilang, met iei ngehno me Moses wahkihdo serihn Israel ko sang nan Sehd Weitahtao pohn pwehl madekeng.
4 Eri met iei ahmw kisakis; doadoahngki, oh meid pahi kowe, pwe e pahn doarehsanguhk pahn manaman en ahmw imwintihtih kan, pwe ma soh, irail pahn kemeiukala oh kawehla palingenomw.
5 O, tamataman mahsen pwukat, oh kapwaiada ei kosonned akan. Tamataman, met iei ahmw kisakis.
6 Eri kaidehn ihte ahmw kisakis koaros met; pwe ke ahneki pil ehu kisakis, me iei kisakis en Aron; kilang, kisakis wet padahkihonguhk soahng tohto kei;
7 Kilang, sohte ehu manaman, ihte manaman en Koht, me kak elehda kisakis en Aron wet en ieianguhk.
8 Eri, dehr masak, pwe iei kisakis en Koht met; oh ke pahn kol nan pehmw kan, oh wia doadoahk kapwuriamwei kan; oh sohte manaman pahn kak kihsang nan pehmw kan, pwe iei sapwellimen Koht doadoahk met.
9 Oh, eri, dahme ke pahn peki rehi I en ndahionguhk sang ni kisakis wet, I pahn kasalehionguhk, oh ke pahn alehdi kamarainpe.
10 Tamataman me ma sohte pwoson ke sohte kak wia mehkot; eri peki ni pwoson. Dehr mwamwahliki mepwukat; ke dehr peki me ke sohte konehng.
11 Peki pwe ken kak ese sapwellimen Koht rir kan, oh ken kak kawehwe oh alehdi kamarain sang nan poadoapoad en kawa kan koaros me ekiekla, me sarawi; oh nin duwen ahmw pwoson e pahn pweida ong kumwail.
12 Kilang, iei ngehi me koasoiahier; oh ihte ngehio me koasoionguhk sangete nin tapio. Ahmen.