Iralaud 61
Soukohp Sosep Smith alehdi kaudiahl pohn keilen pillap en Pillap en Misori, nan McIlwaine Bend, Oakos 12, 1831. Ni arail seiseilok pwurupwuralahng Kirtland, Soukohpo oh elder ehk dake wahr akan seisei kohla pohn Pillap en Misori. Ni kesiluhn rahn en arail seiseilok kohla, soangen kahpwal tohto me irail lellohng. Elder William W. Phelps, nan pweleng en nihrahn, ahpw kilangada meninkauwo ah wie tangatangki uwen kehlail ehu pohn pihlo.
1–12, Kauno ketin mahsanih me kamwomwala tohto me pahn wiawi pohn pihl akan; 13–22, Pihl akan me John kerialahr, oh meninkauwo me kin tangatang powe; 23–29, Ekei irail ahniki manaman en kamwakid pihl akan; 30–35, Elder kan kin wad riemen seiseilok oh kalohngki rongamwahuo; 36–39, Irail en kaunopada ong ni ketido en Nein-Aramas.
1 Kilang, oh rong mwahu kepitien ih me ahniki manaman koaros, ih me ketsang wasa soutuk kolahng wasa soutuk, iei me wia Apla oh Omeka, tapi oh imwi.
2 Kilang, mehlel Kauno ahpw mahsanihong kumwail, kumwail elder kan en ahi mwomwohdiso, me kapokonpenehr wasa kiset, me dipemwail kan lapwadahsang kumwail, pwe Ngehi, Kauno, kin lapwada dihp akan, oh I kin mahkohng irail kan me kin wehkada diperail kan ni mongiong karakarahk;
3 Ahpw mehlel I ndahiong kumwail, me sohte anahnepen pwihn wet pwon en nei elder kan en mwekid mwadang pohn pihl akan, ni ahnsou me tohn kouson kan en pali koaros wie kamwkamwomwala nan soupwoson.
4 Ahpw, I mweidada pwe kumwail en kak kadehdehki; kilang, diren kamasepwehk pohn pihlo, oh pahn wie tohtohla mehlel mwurin met;
5 Pwe Ngehi, Kauno, me mahsaniher ni ei lingeringeriki tohtohn kamwomwalah kan pohn pihl akan; ei, oh mehlel pohn pihl pwukat.
6 Ahpw, soahng koaros me momour mihmi pahn ahi manaman, oh mehmen me pwoson nan pwungamwail sohte pahn mehkihla pihl akan.
7 Eri, e konehng nei ladu Sidney Gilbert oh nei ladu William W. Phelps en kamwadangahieng ara katanga ara doadoahk oh doadoahk en misin.
8 Ahpw, I sohte pahn mweidada kumwa en mwesel lao kumwa ale kalokolok pwehki dipemwah kan koaros, pwe kumwa en wiahla ehu, pwe kumwa dehr mehla nan lamalam mwersuwed;
9 Ahpw met, mehlel I patohwan, me e konehng ien nda me kumwail anahnehier mwesel. Eri mweidohng nei ladu kan Sidney Gilbert oh William W. Phelps en iangiada pwihn me ira iang irail seilok mwoweu, oh mweidohng ira en tapiada ara seilok ni karuaru pwe ira en kak kanekehla ara doadoahk en misin, oh sang ni pwoson me ira pahn powehdi;
10 Oh ni ara pahn loaloapwoat ira pahn mourla, oh Ngehi, Kauno, pahn patohwan ketiket rehra.
11 Oh mweidohng me luwehdi kan en ale me anahnepe ong mehn kiemmad.
12 Mweidohng nei ladu Sidney Gilbert en ale dahme irail sohte anahne kan en uhd ahniki, ma kumwail pwungki.
13 Oh met, kilang, ong kamwaupemwail me I kihong kumwail kosonned ehu me pid duwen mepwukat; oh Ngehi, Kauno, pahn koasoieng kumwail nin duwen aramas en kawahko.
14 Kilang, Ngehi, Kauno, ni tapio I kapaiada pihl akan; ahpw ni imwin rahn akan, sang ni ewen nei ladu John, I keriahla pihl akan.
15 Eri, rahno pahn kohdo me sohte mour pahn kak poadoandoarala pohn pihl akan.
16 Oh e pahn koasoia ni rahn akan me pahn kohdo me sohte emen pahn kak kotehla pihl akan kolahng nan sapwen Saion, ahpw ihte me ahniki mongiong mehlel.
17 Oh, ni ansouo me Ngehi, Kauno, ni tapio keriahla sahpwo, iei ni imwin rahn ako me I kapaiada, ni ahnsou mwahu, ong nei souleng kan pwe en doadoahngki, pwe irail en kak tungoale me tohto.
18 Oh met I kihong kumwail ehu kosonned me dahme I ndahiong emen I ndahiong koaros, me kumwail en kehsehki riamwail ohl kan duwen pihl pwukat, pwe irail dehr seilokodo loalle, pwe irail en dehr soupwosonla oh lidipidi;
19 Ngehi, Kauno, me mahsaniher, oh meninkauwo me kin tangatang powe, oh I sohte pahn kasorehla kalohko.
20 Ngehi, Kauno, me engiengda pahmwail aio, ahpw rahn wet I solahr lingeringer.
21 Eri, mweidohng irailko me pid duwen irail me I koasoikier, me anahne tapiada arail seilok ni ansou karuaru—I pwurehng ndahiong kumwail, mweidohng irail en tapiada arail seilok ni karuaru.
22 Oh e sohte wiahng ie mehkot, mwurin ansou kis, ma irail pahn wialahr arail doadoahk en misin, ma irail pahn seilokwei pohn pihl de pohn pwehl; mweidohng met en mwomwen me e sansalohng irail nin duwen pein arail madamadau mwurin met kohla.
23 Oh met, duwen nei ladu kan, Sidney Rigdon, Sosep Smith, Jun., oh Oliver Cowdery, dehr mweidohng irail en pwurehng pwurodo pohn pihl akan, ihte ma nan dahu kan, ni arail pahn seiseilokwehng nimwarail akan; de me pil wewehki irail en dehr seilok pohn pihl akan, ihte ma nan dahu kan.
24 Kilang, Ngehi, Kauno, piladahr ehu ahl en seilok ong nei souleng kan; oh kilang, iei ahlo met—me mwurin arail pahn mweselsang dahuo irail pahn uhd seilok pohn pwehl, ma ruwes kohieng irail en mwesel oh kohdahla nan sapwen Saion;
25 Oh irail pahn wia duwehte seri en Israel kan, me kin kawada arail impwal kan nan ereihn arail kin seiseilok kowei.
26 Oh, kilang, kosonned wet me kumwail pahn kihong riemwail ohl kan koaros.
27 Ahpw, ong ih me manamano pahn kohieng pwe en ruwese pihl akan, ong ih me Ngehno pahn ketkihong pwe en ese ah ahl akan koaros;
28 Eri, mweidohng en wia nin duwen me Ngehn en Koht ieiaso mahsaniong ih, ma pohn pwehl de pohn pihl akan, ni eh mihmihte rehi pwe en wiawi mwurin met.
29 Oh ong kumwail e kasalehda wasahn alu ong souleng kan, de ahl me karis en souleng kan en Kauno, pahn keihd ie.
30 Oh pil, mehlel I ndahiong kumwail, nei ladu kan, Sidney Rigdon, Sosep Smith, Jun., oh Oliver Cowdery, sohte pahn kihpeseng ewerail kan nan kapokon en aramas suwed kan lao irail lellahng Cincinnati;
31 Oh ni wasahuo me irail pahn likwerdalahng Koht ni ngihl laud pwe en uhwong aramasoko, ei, ong ih me engiengkihda arail suwed kan, aramas ekei me kereniengehr onopada en kamwomwala.
32 Oh sang mwo mweidohng irail en seilongki kapokon kan en rierail ohl oh lih kan, pwe arail doadoahk kan me inenen anahnepe laud nanpwungarail sang kapokon kan en aramas suwed akan.
33 Oh met, me pid duwen irail me luwehdi kan, mweidohng irail en seilokwei oh kalohngki mahseno nan kapokon kan en aramas suwed akan, nin duwen Kauno ketin kaweidkinirail;
34 Oh ni arail pahn wia met arail likou kan pahn saledekla, oh irail pahn mwakelekel mwohi.
35 Oh mweidohng irail en seilokpene, de wad riemen, me pahn mwahu ong irail, ihte mweidohng nei ladu Reynolds Cahoon, oh nei ladu Samuel H. Smith, me I kupwurpereniki, en dehr mweipeseng lao ira pwurodohng imwarahko, oh met sang ni eripit me I ahniki.
36 Oh met, mehlel I ndahiong kumwail, oh dahme I ndahiong emen I ndahiong koaros, ahniki koapworoapwoar, samwa ko; pwe I mihmi rehmwail, oh I sohte keseikumwailla;
37 Oh ni amwail pahn karakarahkla mwohi, kapai kan en wehin Koht iei amwail.
38 Pirehkipene likepomwail kateng kan oh mwasamwasahn oh onohnop, kaskasik ketidohn Nein-Aramas, pwe e pahn pwaredo nan awa me kumwail sasairiki.
39 Kapakap ansou koaros pwe kumwail dehr lohdieng nan kasongosong, pwe kumwail en kak kanangamahieng rahn en sapwellime ketidohu, ma nan mour wet de mwurin mehla. Iei ni mehlel. Ahmen.