Iralaud 49
Soukohp Sosep Smith alehdi kaudiahl ong Sidney Rigdon, Parley P. Pratt, oh Leman Copley, nan Kirtland, Ohio, Mei 7, 1831. Leman Copley perenkidahr rongamwahuo ahpw ihte e wie kolokolete ekei padahk kan en Shakers (United Society of Believers in Christ’s Second Appearing [Pwihn en Utuht me kamehlele nan Sapwellimen Krais Keriau en Ketido]), palien lamalam me e iang mwowehu. Ekei iren padahk kan en Shakers me dene Ketido Keriau en Krais e wiawiher oh me dene E ketidohr ni mwohmw en paliweren lih emen, Ann Lee. Irail sohte kin medewe me pepdais en pihl kesempwal. Irail sohte kamehlele kapwopwoud oh ihme irail kamehlele me mour sohte anahne en mie pwopwoud nan pwungen riemen. Ekei souleng en Shakers kan pil sohte kin kang uduk. Pwe en wia mehn kapehse ong kaudiahl wet, nan poadoapoad en Sosep Smith e koasoaia me, “Pwe en kak udahn wewehki mwahu irehu, I peki rehn Kauno oh alehdi mepwukat.” Kaudiahl kadehdehda ekei ire sapwung kan me sansal nan pwihn en Shaker. Eden irail ohl akan me sansalehr powe ahpw wahla ehu koapi en kaudiahlo nan kousapw en pwihn en Shaker (karanih Cleveland, Ohio) oh wadekehng irail soahng koaros me mih nan kaudiahlo, ahpw irail sohte alehda.
1–7, Rahn oh awa en ketidohn Krais pahn sohte sansal lao lel ansou me E pahn ketido; 8–14, Aramas akan anahne koluhla, kamehlele rongamwahuo, oh peikiong tiahk sarawi kan pwe en kak komourla; 15–16, Kapwopwoud wia kosoandi en Koht; 17–21, Kang uduk e mweimwei; 22–28, Saion pahn keirda oh Mehn Leimen kan pahn duwehte masal en rohs mwohn Ketido Keriau.
1 Rong mwahu ei mahsen, nei ladu Sidney, oh Parley, oh Leman; pwe kilang, mehlel I mahsanihong kumwail, me I ketkihong kumwail kosonned ehu me kumwail en kowei oh kalohngki ei rongamwahu me kumwail alehdier, iei me kumwail alehdierko, ong Shaker kan.
2 Kilang, I mahsanihong kumwail, me irail inangih en esehte ekei me mehlel kan, ahpw kaidehn koaros, pwe irail sohte pwung mwohi oh irail anahne koluhla.
3 Eri, I kadar kumwahwei, nei ladu Sidney oh Parley, en kalohngki rongamwahuo ong irail.
4 Oh nei ladu Leman pahn kasarawihong doadoahk wet, pwe en kak wewehieng irail mwahu, kaidehn sang nin duwen me e alehdisang irail, ahpw sang duwen me e kaskuhlkier sang nei sounpapah kan; oh sang ni eh pahn wia met I pahn kapaiada ih, ma soh a e sohte pahn pweida.
5 Kauno me mahsanier; pwe Ngehi me Koht, oh I kadarewehr ei tungoal Ieros Kesempwalo pohn sampah ong komourpen sampah, oh kalohngkier me mehmen me alehda ih e pahn komourla, oh mehmen me sohte pahn alehda ih pahn lekdekla.
6 Oh irail wiahiongehr Nein Aramas nin duwen pein nsenarail; oh e ketin alehier sapwellime manaman ni palimaun en sapwellime lingan, oh met kaundahr nanleng kan, oh pahn wie kakaun lao e ketdihla pohn sampah pwe en kalowehdi imwintihti kan koaros pahn aluweluwe kan, ahnsouo kerendohr—
7 Ngehi, Kauno Koht, me mahsaniher met; ahpw awao oh rahno sohte mehmen ese, pil tohnleng kan en nanleng sehse, irail pahn sehse lao e ketido.
8 Eri, I kupwuriki aramas koaros en koluhla, pwe koaros mihmiher pahn manaman en dihp, ihte irailko me I ketin piladahr, aramas sarawi kan me kumwail sohte ese.
9 Eri, I mahsanihong kumwail me I ketikihong kumwailehr ei inou poatoapoat, iei me kohsang nin tapio.
10 Oh I kapwaiadahr dahme I inoukihda, oh wehi kan en sampah pahn poaridihsang; oh, ma irail sohte pahn pein poaridiheng, irail pahn aktikitikla, pwe me kin aklapalap pahn kin aktikitikla.
11 Eri, I ketkihong kumwail kosonned ehu me kumwail en kowei nan pwungen aramas pwukat, oh ndahiong irail, duwehte nei wahnpoaren en kawao, me adaniki Piter:
12 Kamehlele mwaren Kauno Sises, me ketidohr pohn sampah, oh me pahn ketido, me wia tapi oh imwi;
13 Koluhla oh pepdaisla ni mwaren Sises Krais, nin duwen kosonned sarawi, ong lapwepen dihp akan;
14 Oh mehmen me pahn wia met pahn ale kisakis en Ngehn Sarawi, sang ni pwilikihdi peh kan sang elder kan en mwomwohdiso.
15 Oh pil, mehlel I mahsanihong kumwail, me mehmen me padahngki me kapwopwoud kaidehn koasondi en Koht, pwe kapwopwoud iei koasondi en Koht ong aramas.
16 Eri, e wia kosonned me ohl emen pahn pwoudiki lih emente, oh ira riemen pahn wiahla war ehu, oh soahng pwukat koaros me pahn kasalehda kahrepen kepikpikdahn sampah;
17 Oh me e pahn direkihla aramas, nin duwen sapwellime kepikipik mwohn sampah ah wiawihdao.
18 Oh mehmen me padahngki en dehr tungoale uduk en mahn akan, aramaso sohte pahn pil iang tungoale, met kaidehn koasondi en Koht.
19 Pwe, kilang, mahn en nan mohs oh menpihr kan, oh me sang sampah, iei koasondi ong aramas en doadoahngki ong mwonge oh ong likou, oh pwe en kak ahniki me tohto.
20 Ahpw e sohte ketikihong pwe aramas emen en ahniki dipwisou tohtohsang emen, ihme kahrehda sampah mihkihla nan dihp.
21 Oh meid suwediong aramas emen me kakerehdi nta de wiakawehla uduk en mahn akan oh sohte anahne.
22 Oh pil, mehlel I mahsanihong kumwail, me Nein Aramas sohte ketido ni mwohmw en paliweren lih emen, de pil ohl emen me seiseilokseli pohn sampah.
23 Eri, kalekeikumwail pwe emen de keteweikumwaildi, ahpw nantihong kolokolteng amwail pwoson, kin kaskasik rerrer en pahn lahng akan, oh sampah pahn mwekidada oh wasawasaseli rasohng ohl sakaula men, oh nan wahu kan pahn audaudla, oh nahna kan pahn patapatala, oh wasa mwangaingai kan pahn medendella—oh mepwukat koaros pahn wiawi ni ansou me tohnglengo pahn pouk nah sowio.
24 Ahpw mwohn rahn lap en Kauno pahn lelledo, Seikop pahn kekeirda nan sapwtehno, oh Mehn Leimen kan pahn duwehla masal en rohs.
25 Saion pahn keirda pohn dohl akan oh pereperen pohn nahna kan, oh pahn pokonpene ni wasa ehu me I pahn pilada.
26 Kilang, I mahsanihong kumwail, kumwail en kowei nin duwen me I ruwesehkin kumwailehr, koluhkihla dipemwail kan koaros; peki oh kumwail pahn ale; letelet oh e pahn ritidahng kumwail.
27 Kilang, I pahn ketila mwohmwail oh wia doarepemwail; oh I pahn ketiketseli nan pwungamwail, oh kumwail sohte pahn pingida.
28 Kilang, Ngehi Sises Krais, oh I mwadang lelledo. Ihme pahn wiawi. Ahmen.