Iralaud 42
Soukohp Sosep Smith alehdi kaudiahl ni pali riau, nan Kirtland, Ohio, Pepuweri 9 oh 23, 1831. Pali keieu, audaudki ire tikitik 1 lel 72, me alahldi mwohn elder ehk riemen oh pweidahn sapwellimen Kauno inou me ketikihong irail mwowe me “kosonnedo” pahn kohda nan Ohio (tehk iralaud 38:32). Pali keriau audaudiki ire tikitik 73 lel 93. Soukohpo kasalehda kaudiahl wet me “kupwukupwure kosonned en Mwomwohdiso.”
1–10, elder kan malipilipda irail en kalohngki rongamwahu, papidaisla me weliakapw akan, oh kauada Mwomwohdiso; 11–12, Irail anahne en malipilipda oh kasarawihla oh en padahngki padahk kan en rongamwahu me mih nan pwuhksarawi kan; 13–17, Irail en padahk oh kokohp sang ni manaman en Ngehno; 18–29, Souleng kan pahngokiong en dehr kam aramas, pirap, likamw, noahrok, kamwahl, de karaun likamwih mehteikan; 30–39, Kosonned akan me kin apwalih dipwsou kan me souleng kan tohnmeteikihda kasansalda; 40–42, Pohnmwahso oh soukautih lekidekla; 43–52, Me soumwahu kan pahn kamaiauda sang ni apwaapwalih oh sang ni pwoson; 53–60, Pwuhksarawi kan kaweid Mwomwohdiso oh pahn kalohkda nan sampah; 61–69, Wasa me Serusalem Kapw oh me rir kan en wehio pahn kasansalda; 70–73, Dipwsou kan me kohdo sang tohnmetei kan pahn doadoahk ong sawasepen ohpiser kan en Mwomwohdiso; 74–93, Kosonned akan me pahn apwalih dihp en nenek, kamwahl, kam aramas, pirap, oh wehkada dihp wiawihda.
1 Rong mwahu, kumwail elder kan en ei mwomwohdiso, kumwail pokonpenehr oh ehupene ni mwarei, iei Sises Krais Sapwallimen Koht ieiaso, Sounkomourpen sampah; ni mehlel ma kumwail pahn kamehlele mwarei oh kapwaiada ei kosonned akan.
2 I pwurehng ndahiong kumwail, rong mwahu oh rong oh peikiong kosonned akan me I pahn kihong kumwail.
3 Pwe mehlel I ndahwei, me ni amwail pokonpene oh ehupene nin duwen kosonned me I mahsanihong kumwail, oh pwungkipene ni amwail pahn sair soahng wet, oh pahn peki rehn Sahmo ni mwarei, ni mehlel kumwail udahn pahn alehdi.
4 Kilang, mehlel I ndahiong kumwail, I kihong kumwail keieu en kosonned wet, me kumwail pahn kohwei ni mwarei, emen emen kumwail, likin nei ladu Sosep Smith, Jun., oh Sidney Rigdon.
5 Oh I pahn kihong irail kosonned me irail pahn kohwei erein kisin ansou kis, oh e pahn kohieng irail sang ni manaman en Ngehno ahnsouo me irail pahn pwurodo.
6 Oh kumwail pahn kohkihwei manaman en Ngehniet, kalkalohngki ei rongamwahu, wad riemen, ni mwarei, ngilemwail akan ngilauddiki duwehte ngilen koronihda, kalkalohngki ei mahsen duwehte tohnleng kan en Koht.
7 Oh kumwail pahn kohwei papidaiski pihl, ndinda: Kumwail koluhla, kumwail koluhla, pwe wehin nanleng kerendohr.
8 Oh sang wasaht kumwail pahn kohwei nan wasa kan nan pali kapi; oh irail akan koaros me kumwail pahn diar me pahn alehda kumwail kumwail pahn kauada ei mwomwohdiso nan wasa koaros—
9 Lao lel ansouo me pahn kohdo me pahn kasansalohng kumwail sang wasa ile, ahnsou me kahnihmw en Serusalem Kapw pahn kaunopada, pwe kumwail en kak kohpene wiahla ehu, pwe kumwail en kak wia nei aramas oh I pahn wia amwail Koht.
10 Oh pil ehu, I ndahiong kumwail, me nei ladu Edward Partridge pahn mihmi nan ohpis me I idiadahngehr loalle. Oh ma ansou pahn kohdo, ma e kawehla kosonned emen udahn pahn welianda ih. Iei met mehlel. Ahmen.
11 Pil ehu I ndahiong kumwail, me sohte me pahn kohwei kalohk ei rongamwahu, de kawada ei mwomwohdiso, ma e sohte kasarawihla sang emen me kol mweimwei, oh e sansal ong mwomwohdiso me e kol mweimwei oh me e kin kalapw alehdi kasarawi sang lapalap akan en mwomwohdiso.
12 Oh pile hu, elder kan, samworo kan oh sounpadahk kan en ei mwomwohdiso pahn padahk ki ei rongamwahu, me mih nan Pwuhk Sarawi oh Pwuhk en Mormon, me audaudki rongamwahu unseko.
13 Oh irail pahn kanaiohng kapwaiada inou kan oh koasondi kan en mwomwohdiso, oh mepwukat irail pahn padapadahngki, ni arail pahn alehdi kaweid sang Ngehno.
14 Oh Ngehno pahn kohieng kumwail sang ni pwoson kapakap; oh ma kumwail sohte alehdi Ngehno kumwail sohte pahn padahk.
15 Oh mepwukat koaros kumwail pahn kanaiohng kapwaiada nin duwen me I mahsanih ong wiepen amwail padpadahk, lao unsek en nei pwuhksarawi kan pahn kohwei.
16 Oh ni amwail pahn ngil laudki ngilamwail akan sang rehn Sounkoaloalamwahuo, kumwail pahn koasoiwei oh wia kokohp nin duwen me I kilang konehng;
17 Pwe, kilang, Sounkoaloalamwahuo mwahngih soahng koaros, oh kin kadehdeh Sahmo oh Sapwellimeo.
18 Oh met, kilang, I kosoiwei ong mwomwohdiso. Kumwail sohte pahn kam aramas; oh mehmen me pahn kam aramas sohte pahn alehdi mahkpe nin sampah, de nan sampah me pahn kohdo.
19 Oh pil ehu, I nda, kumwail sohte pahn kam aramas; pwe mehmen me pahn kam aramas pahn mehla.
20 Kumwail sohte pahn pirap; oh mehmen me pahn pirap oh sohte koluhla pahn lekidekla liki.
21 Kumwail sohte pahn likamw; mehmen me pahn likamw oh sohte koluhla pahn lekidekla.
22 Kumwail pahn pokohng amwail pwoud sang ni mohngiong unsek, oh loalloapwoationg ih oh sohte emen.
23 Oh mehmen me pahn kilikilang lih emen oh men dihpki e kahmahmkilahr eh pwoson, oh Ngehno sohte pahn ieiang; oh ma e sohte pahn koluhla e pahn lekidekla.
24 Kumwail sohte pahn kamwahl; oh mehmen me pahn kamwahl, oh sohte koluhla, pahn lekidekla.
25 Ahpw mehmen me kamwahl oh koluhla sang ni mohngiong unsek, oh manokehla, oh sohte pwurehng wia, kumwail pahn mahkehng;
26 Ahpw ma e pwurehng wia, e sohte pahn pwurehng ale mahkpe, ahpw e pahn lekdekla.
27 Kumwail sohte pahn karaun likamwih mehn mpemwail kan, de wiahiong ih me suwed.
28 Kumwail esehier ei kosonned akan me pid duwen mepwukat me ntingdi nan nei pwuhksarawi kan; mehmen me dipada oh sohte koluhla e pahn lekidekla.
29 Ma kumwail poakohng ie kumwail pahn papa hie oh kapwaiada ei kosonned akan koaros.
30 Oh kilang, kumwail pahn tamataman me semwehmwe kan, oh tohnmeteikihong irail amwail dipwsou kan me kumwail ahnekikan ong sawasparail, sang ni inou oh kisin likou mweimwei me sohte kak ohla.
31 Oh ni amwail pahn kihong me semwehmwe kan amwail dipwsou kan, kumwail pahn wiahiong ie; oh kumwail pahn patohwando rehn pisop en ei mwomwohdiso oh nah soun sawas akan, riemen elder kan, de samworo lapalap akan, me e pahn idiada de me e idiadahr oh kasarawilahr ong kahrepen doadoahko.
32 Oh ni e pahn wiawi, me mwurin arail pahn wahdo mwohn pisop en ei mwomwohdiso, oh mwurin e pahn alehdi kadehdeh pwukat me pid duwen dipwsou kan en tohnmetei en ei mwomwohdiso, me re solahr pahn kak kopwurupwursang mwomwohdiso, me pahn pwungehng ei kosonned akan, emen emen aramas pahn pein pwukoaki mwohi, eh kohwa dipwsou kan, de me e alehdi sang dipwsou tohnmetei kan, nin duwen me pahn itar ong pein ih oh eh peneinei.
33 Oh pil ehu, ma mie dipwsou kan me mwomwohdiso ahneki, de emen emen towe kan, me laudsang dahme anahnepe ong sawasparail mwurin tepin tohnmetei me re alehdi, me wia luhwe me pahn anahnepe en kopwurupwuriong pisop ni tohnmetei, e pahn kolkoldi pwe en doadoahk ong irail me sohte arail, nan ansou kan, pwe aramas koaros me ahneki anahn en kak alehdi ni saledek oh alehdi nin duwen me e inangih.
34 Eri, me luweh kan pahn kin wie nekinek nan ei wasahn nahk, pwe en kak sawas ong me semwehmwe kan oh anahn akan, nin duwen me konsel ileile en mwomwohdiso pahn koasondehdi, oh me pisopo oh nah konsel pahn kosonehdi;
35 Oh ong doadoahk en pwainda sahpw akan ong kamwahupen mwomwohdiso unsek, oh kauwada ihmw sarawi en kaudok kan, oh kaukauwada Serusalem Kapw me pahn kasansalada mwuhr—
36 Pwe nei aramas en inou en kak kohpene wiahla ehu ni rahno ahnsou me I pahn patohdo nan ei tehnpas sarawi. Oh me I wia ong komourpen nei aramas.
37 Oh ansouo pahn kohdo, me mehmen me dipada oh sohte koluhla pahn lekidekla sang ei mwomwohdiso, oh e sohte pahn pwurehng alehdi dahme e tohnmeteikihong me semwehmwe oh anahn akan en ei mwomwohdiso, de ni ehu koasoi, ong ie—
38 Pwe ni ansou me kumwail pahn wiahiong emen me tikitik pwukat, kumwail wiahiong ie.
39 Pwe ansou pahn kohdo, me dahme I mahsaniher sang ni ewen nei soukohp akan udahn pahn pweida; pwe I pahn ale pai en tohnmetei en irail akan me kin pereniki ei rongamwahu sang rehn Mehn Liki kan oh kihong me semwehmwe kan en nei aramas akan me wia peneinei en Israel.
40 Oh pil ehu, kumwail sohte pahn ahneki pohnmwahso nan amwail mohngiong kan; mweidehng amwail likou karment kan en mengei, oh linganpe en wia lingan en pein amwail wiepen doadoahk;
41 Mweidehng soahng koaros me kumwail wia en wiawi ni mwakelekel mwohi.
42 Kumwail sohte pahn pohnkahke; pwe mehmen me pahn pohnkahke sohte pahn iang kang pilawa de likawih ehn tohn doadoahk kana rail likou karment kan.
43 Oh ma mie emen rehmwail me soumwahu, oh ahpw sohte ahneki pwoson en maiauda, ahpw kamehlele, kumwail pahn apwalih ni keneinei, sang ni tuhkehn wini kan oh tungoal mwahu kan, oh kaidehn sawas sang imwintihtih.
44 Oh elder kan en mwomwohdiso, riemen de emen, pahn malipilipda, oh pahn kapakapiki oh pwilikihdi pehrail kan pohrail sang ni mwarei; oh ma irail mehla irail pahn mehla ong ie, oh ma irail pahn mourla irail pahn mourla ong ie.
45 Kumwail pahn momourpene nan limpoak, me pahn kahrehda kumwail pahn kin mwahiei ni ansou me emen pahn mehla, ahpw mehlel ong irail me sohte ahneki koapwoaroapwoar en iasadahu.
46 Oh ansou pahn kohdo me irail kan me mehla ni arail miniminiong ie irail sohte pahn kehn mehla, pwe e pahn wia mehkot mwahu ong irail;
47 Oh irail akan me pahn mehla sohte miniminiong ie, meid suwed ong irail, pwe arail mehla pahn kamedek.
48 Oh pil ehu, ansou pahn kohdo me mehmen me pwoson ie ong en maiauda, oh e sohte koasondi en mehla, e pahn maiauda.
49 Mehmen me ahneki pwoson en kilang e pahn kilangada wasa.
50 Mehmen me ahneki pwoson en rong e pahn rongada wasa.
51 Me sikelo me ahneki pwoson en lus pahn lusda.
52 Oh irail me sohte ahneki pwoson en wia mepwukat, ahpw kamehlele ie, ahneki manaman en wiahla nei pwutak kan; oh ni arail pahn sohte kawehla ai kosonned akan ke pahn seweseiraildahsang nan arail luwet akan.
53 Kumwail pahn kesihnen nan wasa me kumwail kohwahki.
54 Kumwail sohte pahn kihsang ehn riomwail ohl ah likou garment; kumwail pahn pwain ong me kumwail alehdi sang riomwail ohl.
55 Oh ma kumwail pahn alehdi laudsang me kumwail pahn sowesehkin kumwail, kumwail pahn kihong nan ei wasahn nahk, pwe soahng koaros en kak wiawi nin duwen dahme I mahsanih.
56 Kumwail pahn idek, oh nei pwuhksarawi kan pahn kohwei nin duwen me I koasonehdi, oh e pahn nekinekla wasa mwahu;
57 Oh e pahn konehng kumwail en ahneki meleilei me pid duwen pwuhksarawi kan, oh sohte padahngki duwe loa kumwail alehdi ni unsek.
58 Oh I kihong kumwail kosonned ehu me ansouo me kumwail pahn padahkihong duwen pwuhksarawi kan aramas koaros; pwe e pahn kaweidwei ong wehi koaros, keinek koaros, lokaia koaros, oh aramas koaros.
59 Kumwail pahn ale soahng kan me kumwail alehdier, me kohweiehr ong kumwail nan nei pwuhksarawi en wia kosonned, pwe en wia ei kosonned en apwalih ei mwomwohdiso;
60 Oh mehmen me pahn wia nin duwen soahng pwukat e pahn komourla, oh mehmen me sohte pahn wia mepwukat e pahn lekidekla ma e pahn wenlahte mwowe.
61 Ma kumwail pahn peki, kumwail pahn alehdi kaudiahl pohn kaudiahl, eripit pohn eripit, pwe kumwail en esehla me rir kan oh soahng popohl kan—me kin wahdo peren, me kin wahdo mour soutuk.
62 Kumwail pahn peki, oh e pahn kasansalohng kumwail nin duwen pein ei ansou wasa me Serusalem Kapwo pahn kokouda.
63 Oh kilang, ansou pahn kohdo me nei ladu kan pahn pekederwei ong palimese oh ong palikapi, ong paliepeng oh palieir.
64 Oh iei met, kumwail mweidehng me kohwei palimese en padahkihong irail me weliakapwala en tangala palikapi, oh met iei pwehki dahme me pahn kohdo pohn sampah, oh doadoahk en pwihn suwed rir kan.
65 Kilang, kumwail pahn kapwaiada soahng pwukat koaros, oh kapai lap kumwail pahn ahneki; pwe ong kumwail e kohieng kumwail manaman en esehla me rir kan en wehio, ahpw ong sampah e sohte kohieng irail en ese.
66 Kumwail pahn kapwaiada kosonned kan me kumwail alehdi oh loaloapwoationg.
67 Oh mwuri kumwail pahn alehda inou kan en mwomwohdiso, me duwehte e pahn itarohng koasoneikumwaildi, pali koaros wasah oh pil nan Serusalem Kapwo.
68 Eri, mehmen me sohte eripit, mweidehng en peki rehi, oh I pahn kihong ih ni saledek oh sohte pahn kadeik ih.
69 Kumwail perenda nan amwail mohngiongkan, pwe I kihong kumwailehr wehio, de ni ehu koasoi, kih kan en mwomwohdiso I kihwei her. Met mehlel. Ahmen.
70 Samworo kan oh sounpadahk kan pahn alehdi arail pwukoah kohwahkan, duwehte towe kan.
71 Oh elder kan oh samworo lapalap kan me idihdahr en sowese pisop nin duwen soun sawas nan mehkoaros, en ale sawas ong arail peneinei kan sang nan dipwsou kan me tohnmeteidahr ong pisop, ong kamwahupen me semwehmwe kan, oh ong ekei kahrepe kan, nin duwen me kawehwedahr mwowe;
72 De irail pahn alehda pweipwei me pwung ong arail sahpis koaros, ma irail alehdi pwukoahn kohwa de ni ehu wiepe tohrohr, nin duwen me irail pahn medewe keieu mwahu de me sounsawas kan oh pisop pahn koasonehdi.
73 Oh pisopo, pil, pahn alehdi sawasepe, de pweipwei me pwungehng eh sahpis kan koaros nan mwomwohdiso.
74 Kilang, mehlel I ndahiong kumwail, me aramas men rehmwail, me pahn mweisang eh werek pwehki eh wiahda dipen nenek, de ni ehu koasoi, ma irail kadehdehki mwohmwail sang nan mohngiong karakarahk koaros me ih kahrepehn met, kumwail sohte pahn keseirailsang rehmwail;
75 Ahpw ma kumwail pahn diarada me mie aramas rehmwail mweisang arail werek pwehki kamwahl, oh pein irail me wiahda dihp wet, oh arail werek kan momourte, irail pahn lekideksang rehmwail.
76 Oh pil, I ndahiong kumwail, me kumwail pahn anahne mwasamwasahn oh kanaiehng, sang ni kalelapak koaros, me kumwail sohte pahn alehda soangen aramaso ma irail pwopwoud;
77 Oh ma irail sohte pwopwoud, irail pahn koluhkihla diparail kan koaros ma soh kumwail sohte pahn alehda irail.
78 Oh pil, aramas koaros me wia tohn mwomwohdiso en Krais, pahn kapwaiada kolokol kosonned akan koaros oh inou kan en mwomwohdiso.
79 Oh ansou pahn kohdo, ma mie aramas nanpwungamwail pahn kamaramas irail pahn wisikla oh wiepen kosonned en sahpw pahn apwalih; pwe tamataman me sohte mahkpe; oh e pahn kasansalada nin duwen kosonned en nan sahpw.
80 Oh ma mie ohl de lih men me wiahda dipen kamwahl, ohlo de liho pahn pakadeik mwohn elder riemen en mwomwohdiso, de tohtohsang, oh koasoi koaros pahn wia mehn kedip ong ohlo de liho sang sounkadehde riemen en mwomwohdiso, oh kaidehn imwintihti; ahpw ma sounkadehde tohtosang riemen e pahn mwahu.
81 Ahpw ohlo de liho pahn pakadeikda sang ni ewen sounkadehdeh riemen; oh elder kan pahn wahdo keiso mwohn mwomwohdiso, oh mwomwohdiso pahn kasalehda sang ni kauwada pehrail kan ong kadeikpen ohlo de liho, pwe irail en kak pakadeik nin duwen kosonned en Koht.
82 Oh ma e kak, e pahn konehng me pisopo pahn pil iang patehng.
83 Oh met me kumwail pahn wia nan keis koaros me pahn kohdo mwohmwail.
84 Oh ma ohl men de lih men me mie me pirapa, ohlo de liho pahn wisikla mwohn kosonned en nan sahpw.
85 Oh ma ohlo de liho pahn pirap, ohlo de liho pahn wesikla mwohn kosonned en nan sahpw.
86 Oh ma ohlo de liho pahn likamw, ohlo de liho pahn wesikla mwohn kosonned en nan sahpw.
87 Oh ma ohlo de liho pahn wia soahngen wiepen dihp sohte lipilipil, ohlo de liho pahn wesikla mwohn kosonnedo, iei me sang Koht.
88 Oh ma riomwail ohl de lih pahn wiahiong kummwail dihp, kumwail pahn ale ohlo de liho nanpwungen ohlo de liho oh kumwail kelehpw; oh ma ohlo de liho pahn wehkada ar sapwung kumwail pahn kamwahula.
89 Oh me ohlo de liho sohte wehkada eh sapwung kumwail pahn wahla ohlo de liho mwohn mwomwohdiso, kaidehn mwohn towe kan, ahpw mwohn elder kan. Oh e pahn wiawi nan mihting, oh kaidehn mwohn weipokon.
90 Oh ma riomwail ohl de lih kin wiahiong dihp aramas tohto, ohlo de liho pahn kapwungpwungla mwohn aramas tohto.
91 Oh ma mie emen me wiahda dihp ni sansal, ohl de lih e udahn pahn kopwungpwungla ni sansal, pwe en kak namenekla. Oh ma ih ohl de lih sohte wehkada, e udahn pahn wesikdo mwohn kosonned en Koht.
92 Ma mie me wiahda dihp ni rir, ohl de lih e pahn kapwungpwungla ni rir, pwe en kak ahneki ansou mwahu en wehkada ni rir ong ih me e wiahda dihp ong, oh ong Koht, pwe mwomwohdiso en dehr koasoia kadeik ih.
93 Oh iei met me kumwail pahn wia nan mehkoaros.