Iralaud 41
Soukohp Sosep Smith alehdi kaudiahl ong Mwomwohdisoh, nan Kirtland, Ohio, Pepuary 4, 1831. Kaudiahl wet kaweidki Soukohpo oh elder kan en nan Mwomwohdiso en kapakap pwe en alehdi Sapwellimen Koht “kosonned” (tehk iralaud 42). Sosep Smith apwtehn kohdo nan Kirtland sang New York, oh Leman Copley, emen tohn Mwomwohdisoh sang wasa keren nan Thompson, Ohio, “peki Brother Joseph oh Sidney [Ridgon] … en kousoan reh oh e pahn apwaliekin ira ihmw oh ara anahn akan.” Kaudiahl wet kasalehda ni sansal iawasa me Sosep oh Sidney pahn kousoan oh pil maliplipdahn Edward Partridge pwe en wia tepin bishop en Mwomwohdiso.
1–3, Elder kan pahn apwalih Mwomwohdiso sang ni ngehn en kaudiahl; 4–6, Tohnpadahk mehlel pahn alehdi oh kapwaiada Sapwellimen Kauno kosonned; 7–12, Edward Patridge kahdankihla pisop en nan Mwomwohdiso.
1 Rong mwahu oh rong, kumwail nei aramas akan, Kauno oh amwail Koht me ketin mahsanih, kumwail me I perenki en kapaiahki kapai keieu lap sang kapai koaros, kumwail rong ie; oh ong kumwail me sohte kin rong ie, kosekose oh ndinda me kumwail ese mwarei, I pahn keriahkinkumwailla keriah lap sang keria koaros.
2 Rong mwahu, kumwail elder kan en ei mwomwohdiso me I malipehier, I kihong kumwail kosonned ehu me kumwail en ehupene kapokonpene oh en pwungkipene ei mahsen;
3 Oh sang ni amwail pwoson en kapakap kumwail pahn alehdi ei kosonned, pwe kumwail en kak ese ia mwomwen amwail pahn apwalih ei mwomwohdiso oh wia mehkoaros ni pwungih mwohi.
4 Oh I pahn wia amwail kaun ahnsou me I pahn kohdo; oh kilang, I pahn mwadangete kohdo, oh kumwail pahn kilang peik e wiawi ong ei kosonned.
5 Mehmen me pahn alehdi ei kosonned oh kapwaiada, iei ih nei tohnpadahk; oh mehmen me nda me e alehdi oh sohte kapwaiada, iei kaidehn ih nei tohnpadahk, oh e pahn lekidekiei sang rehmwail;
6 Pwe e sohte konehng me soahng kan me ongete irail seri en wehio pahn kohieng irail me sohte warohng, de kidi kan, de takai kesempwal akan lekidekla mwohn pwihk.
7 Oh pil, e konehng me nei ladu Sosep Smith, Jun., pahn alehdi ehu ihmw me wiawihda ong ih, me e pahn kousoan loale oh kawehwe.
8 Oh pil, e konehng me nei ladu Sidney Rigdon pahn koukousoan ni mwohmw me e kilang mwahu ong ih, ansou koaros me e pahn kapwaiada ei kosonned akan.
9 Oh pil, I malipehier nei ladu Edward Partridge; oh I kihong ehu kosonned, me e pahn idihdida sang ni ngihl en mwomwohdisoh, oh kasarawihong en wiahla pisop ong mwomwohdiso, en kohkohlahsang e doadoahk en netinet oh tohnmeteikihla eh ansou koaros nan doadoahk en mwomwohdiso;
10 Pwe en tehk soahng koaros nin duwen eh pahn idihdida nan ei kosonned ni rahno me I pahn kihong irail.
11 Oh met pwehki eh mohngiong eh mwakelekel mwohi, pwe e rasohng Nathanael en mahso, me sohte widing mih reh.
12 Mahsen pwukat kohienguhk, oh mahsen pwukat mwakelekel mwohi; eri, kanaiehng mwomwen amwail pahn kolokol, pwe mahsen pwukat kumwail pahn pwukoahki ni rahn en kopwungo. Iei met mehlel. Ahmen.