Iralaud 35
Soukohp Sosep Smith oh Sidney Rigdon alehdi kaudiahl, nan de karanihte Fayette, New York, Tihsempe 7, 1830. Ni ansouo, Soukohpo kereniong rahn koaros e kin kedikediropwiki kauwehwehn Pwuhk Sarawio. Kawehwehu tepida ni tepin sounpwung en Suhn 1830, oh Oliver Cowdery oh John Whitmer koaros wia pwukoahn soun nting. Pwehki ansouo ira koaros malipilipiongehr ekei pwukoah tohrohr, Sidney Rigdon malipilipda sang powe pwe en wia papah ong soun nting ong Soukohpo nan doadoahk wet (tehk ire tikitik 20). Pwe en wia mehn kapehsehn poadoapoad en kaudiahl wet, ahn Joseph Smith poadoapoad koasoia: “Nan Tihsempe Sidney Rigdon kohdo [sang Ohio] pwe en kalelapak rehn Kauno, oh Edward Partridge iang ih kohdo. … Mwurinte ohl riemenet ar lelledo, Kauno ahpw ketin mahsanih.”
1–2, Ia mwomwen ohl akan ar kak wiahla sapwellimen Koht pwutak kei; 3–7, Malipilip wiawihong Sidney en papidaisla oh kohieng Ngehn Sarawi; 8–12, Kilel kan oh manaman kapwuriamwei kan kin kohdo sang ni pwoson; 13–16, Sapwellimen Kauno ladu kan pahn kamwakele wehi kan sang ni manaman en Ngehno; 17–19, Sosep Smith kolokol kih kan en soahng rir kan; 20–21, Me pilipilda kan pahn mihmihte ni rahno me Kauno pahn ketido; 22–27, Israel pahn komourla.
1 Kumwa rong kepitien Kauno amwa Koht, iei Alpa oh Omeka, me tapi oh imwi, me sapwellimaniki koasoandi poatoapoat kohkohlahte, me duduwehte rahnwet oh aio, oh kohkohlahte.
2 Ngehi Sises Krais, Sapwellimen Koht Iehroso, me kalohpwuhkihla dipen sampah, iei ong koaros me pahn kamehlele mwarei, pwe irail en kak wiahla sapwellimen koht pwutak, iei ehuong ie duwehte ahi ehuong Sahmo, duwehte Sahmo ehuong ie, pwe kital en kak wiahla ehu.
3 Kilang, mehlel, mehlel, I ndahionguhk nei ladu Sidney, I kilanguhkehr oh ahmw doadoahk kan. I karongehier ahmw kapakapak kan, oh kaunopuhkada ong doadoahk kesempwal ehu.
4 Meid pai kowe, pw eke pahn wia soahng kan me kesempwal. Kilang ke pekederwei, duwehte Sohn, pwe ken kaunopada ei ahlo, oh mwohn Elaisa me pahn kohdo, oh ke sohte ese.
5 Ke kin papidaiski pil ong koluhla, ahpw irail sohte alehdi Ngehn Sarawio;
6 Ahpw met I kihonguhk kosonned ehu, me ke pahn papidaiski pihl, oh irail pahn alehda Ngehn Sarawio sang ni pwilidien peh kan, iei duwehte wahnpoaron en mahso.
7 Oh ansouo pahn lelledo me e pahn mie doadoahk kesempwal nan sahpwo, iei rehn Mehn Liki kan, pwe arail sapwung kan oh arail tiahk suwed kan pahn sansalada mwohn mesen aramas koaros.
8 Pwe ngehi iei Koht, oh I sohte pahn uhdihsang kapahwei pehi kan; oh I pahn kasalehda manaman kapwuriamwei kan, kilel kan, oh soang kapwuriamwei kan, ong irail koaros me pahn kamehlele mwareie.
9 Oh mehmen me pahn peki ni mwarei sang ni pwoson, irail pahn ahneki manaman en kausala tepel kan; irail pahn kamwahuiala me soumwahu; irail pahn kahrehda me maskunkan kilangada wasa, oh me salengepon kan rongada wasa, oh me aupwon kan lokaiahda, oh me sikel kan aluhda.
10 Oh ansouo pahn mwadang lelledo me soahng kesempwal akan pahn kasansalohng aramas akan;
11 Ahpw ma sohte pwoson sohte mehkot pahn kasansalada ihte tehnlahn Papilon, Papilonohte me kahrehda wehi kan koaros nimehr wain me kin elehda engiengo pwehki eh nenek.
12 Oh sohte me wiwia mwahu ihte irail akan me kaunopadahr en alehda ahi rongamwahu unseko, me I kadarewei ong dih wet.
13 Eri, I malipe soahng kan me luwet en sampah, irail akan me sohte kaskuhlda oh aramas teikan kailongki, pwe ren kamwakele wehi kan sang ni manaman en Ngehnio;
14 Oh pehrail kan pahn wia pehi, oh I pahn wia arail mehn sansar oh pereparail; oh I pahn katengehdi likoparail akan, oh irail pahn mahwinkinie duwehte ohl komwad kei; oh arail imwintihtih kan pahn mih pahn nehrail kan; oh I pahn kamwomwala me suwed kan pwehki irail, oh sang ni kisiniei en engieng I pahn doareirailla.
15 Oh rongamwahuo pahn kalohkehng me semwehmwe kan oh me mpai kan, oh irail pahn kasikasik ansou en ei ketido, pwe e kerendohr—
16 Oh irail pahn esehla karasaras en tuhkehn piko, pwe mehle ansou wet sumer kerendohr.
17 Oh sang nan pehn nei ladu Sosep I kadareweiehr ahi rongamwahu unseko; oh nan eh luwet I kapaiadahr ih;
18 Oh I kihongehr ih kih kan en soahng kan me riri me I katengehdi, iei soahng kan me sangete ni tepidahn sampah, oh soahng kan me pahn kohdo sang ansou wet kohla lel ansou me I pahn ketido, ma e pahn tengedi rehi, oh ma soht, emen tohrohr I pahn wiliankihda.
19 Eri, mwasamwasahn ih mwahu pwe ah pwoson sohte pahn pweiek, oh e pahn kohieng sang rehn Sounkaloalamwahuo, Ngehn Sarawio, me mwahngih soahng koaros.
20 Oh kosonned ehu I pahn kihonguhk—me ke pahn wia nah soun nting; oh pwuhksarawi kan pahn kohda, iei duwehte arail mihmi loaleie, ong komourpen nei me pilipilda kan;
21 Pwe irail pahn rong ngileiet, oh pahn kilang ie, oh sohte pahn memeir, oh pahn mihmihte ni rahn ei pahn kohdo; pwe irail pahn mwakelekelda, duwehte ngehi me mwakelekel.
22 Oh met I ndahionguhk, mihmi reh, oh e pahn ianguhk nan ahmw seiloak; dehr moanokehla ih, oh mehlel mepwukat pahn pweida.
23 Oh ni ahnsou kan me kumwa sohte pahn kin nting, kilang, e pahn kin wia kokohp; oh ke pahn kin kalohngki ei rongamwahu oh doadoahngki mahsen kan en soukohp sarawi kan pwe en kadehdehki eh mahsen kan, ni eh pahn kin alehdi mahsen kan.
24 Kapwaiada kosonned akan koaros oh inou kan me kumwa seliong; Oh I pahn kamwakidada nanleng kan ong kamwahupemwa, oh Sehdan pahn rerrer oh Saion pahn perenda pohn dohl akan oh keirda;
25 Oh Israel pahn komourla ni ansou me I koasoandi; oh sang ni kih kan me I kihweiehr irail pahn kaweidki, oh sohlahr pwurehng salongala.
26 Kumwa perenda nan mohngiongumwa kan oh pereperen, poadoarepomwa kerendohr.
27 Dehr masak, kisin pelin sihp, wehio iei amwail lao I pahn kohdo. Ahpw, I pahn mwadang kohdo. Iei ni mehlel. Ahmen.