Iralaud 27
Kaudiahl kohieng Soukohp Sosep Smith, nan Harmony, Pennsylvania, Oakos 1830. Ni ansou me Sosep kaukaunopehng ansou en kaudok ehu me kamadipw sarawi en pilawa oh wain pahn kin kasarawihla, e ahpw kohlahng ale wain. Ih eri tuhwongidi meninkeder en nanleng men oh alehdi kaudiahl wet, kisehn kaudiahl wet ntingdi ansouo oh luhwehu ntingdi nan Septempe me pahn wado. Pihl me pahn uhd weliandi wain oh doadoahk nan ansou en kaudok en kamadipw sarawi en Mwomwohdiso.
1–4, Tungoal ko me pahn doadoahk nan ansou en tungoal en kamadipw sarawi kawehwehda; 5–14, Krais oh Sapwellime ladu kan sangete nan dih en ansou koaros pahn tungoale kamadipw sarawio; 15–18, Pwuhrieng nan sapwellimen Koht tehtehn mahwino pwon.
1 Rong mwahu kepitien Sises Krais, amwail Kaun, amwail Koht, oh amwail Soundor, me sapwellimeniki mahsen me momour oh manaman.
2 Pwe, kilang, I ndahiong kumwail, e sohte wiahda mehkot dahme kumwail pahn tungoale de kumwail pahn nim ni ahnsou me kumwail pahn tungoale kamadipw sarawio, ma kumwail pahn wia sang ni loaloapwoationg kilenglahng ei lingan—wie katamataman ong Sahmo paliwerei me pwoukinkumwailahr, oh ntahi me kepwilipwilikidier ong kamwakelpen dipamwail kan.
3 Eri, kosonned ehu I kihong kumwail, me kumwail sohte pahn pwainda wain de sakau kehlail sang rehn amwail imwintihti kan;
4 Eri, kumwail sohte pahn tungoale ehu ihte me kapw me kumwail wiahda; ei, nan sapwellimen Semeio wehi me pahn kokouda pohn sampah.
5 Kilang, met iei ei eripit; eri, kumwail dehr pwuriamwei, pwe awahu kerendohr me I pahn iang kummwail tungoale wahntuhkehn waino pohn sampah, oh iangahki Moronai, me I kadarewei rehmwail pwe en kasalehda Pwuhk en Mormon, me audaudiki rongamwahu unsek poatoapoato, me I ketikihongehr kih kan en poadoapoad en dinapw en Ihpram;
6 Oh pil iangahki Ilaias, me I ketikihong kih kan en pweidahn kopwurupwurdohn soahng koaros me soukohp sarawi ko koaros mahsaniher duwen imwin rahn akan sangete ni tepin sampah;
7 Oh pil Sohn nein Sakaraias, ihte Sakaraiaso me Ilaias pwarek oh ketikihong inou me e pahn nainiki pwutak, oh e pahn adaniki Sohn, oh e pahn audaudiki ngehn en Ilaias;
8 Ihte Sohno me I kadarewei rehmw, nei ladu, Sosep Smith, Jun., oh Oliver Cowdery, pwe en kasarawihong kumwa tepin prihsduhdo me kumwa alehdier, pwe kumwa en kak malipilipda oh kasarawihla duwehte Aron;
9 Oh pil Elaisa, me I ketikihong kih kan en manaman en wekidala mohngiong en pahpahko ong seri ko, oh mohngiong en seri ko ong pahpa ko, pwe sampah pwon de keriahla;
10 Oh pil rehn Sosep oh Seikop, oh Aisek, oh Eipraam, amwail pahpah ko, me inou ko manamanehngete;
11 Oh pi long Maikel, de Adam, sahm en koaros, nanmwarikihn koaros, nan mwein kawa;
12 Oh pi long Piter, oh Seims, oh Sohn, me I kadarewei rehmw, pwe en kasarawihukala idihukada oh kasarawihukala en wiahla wahnpoaron, oh wia sounkadehdeh mehlel eng mwarei, oh kolokol kih kan en ahmw doadoahk oh soahngohte me I ksalehiong irail;
13 Ong kumwa me I ketikihong kih kan en ei wehi, oh keimwsek pen mwehi ehu en rongamwahuo; oh ong unsek en ahnsou kan, ni ansou me I pahn pwurehng kapwurepene soahng koaros en wiahla ehu, koaros me mih nanleng, oh me mih pohn sampah;
14 Oh pil irail koaros me Semei ketikihong ie sang nan sampah.
15 Eri, kumwail perenda nan mohngiongamwail kan oh wie pereperen, oh katengehdi likopomwail kan, oh pwuriong nan ei tehtehn mahwino, pwe kumwail en kak powehdi rahn suwedo, mwurin amwail wia soahng koaros, kumwail pahn kak keskesihnen.
16 Eri, kumwail keskesihnen oh katengehki likopemwail akan mehlel, perehki mwaremwaremwail akan mour pwung, oh suhtihda kaunopadahn en rongamwahu en popohl, me I kadarewei nei tohnleng kan en kihong kumwail;
17 Oh kumwail pahn alehda mehnsansar en pwoson pwe kumwail en kak powehdi nein me suwedo arep kan koaros;
18 Oh alehda lisoarop en komour, oh kedlahs en Ngehnio, me I pahn kamwerehdi pohmwail, oh ei mahsen me I pahn kasalehiong kumwail, pwungkihda duwen soahng koaros me ke pahn peki rehi, oh loaloapwoationg lao I pahn lellewei, oh ke ahpw pahn kohdahdo, pwe wasa me I mih ie ke pahn pili ang. Ahmen.