Iralaud 21
Kaudiahl kohieng Soukohp Sosep Smith, nan Fayette, New York, Epreil 6, 1830. Kaudiahl wet kohda ni ahnsou me Mwomwohdiso wiawihda, ni rahn me sansalehr, nan imwen Peter Whitmer Sr. Ohl wenemen, me papidaisla mwowe, iang towehda. Sang ni minimin en usuhs unsek aramas pwukat kasalehda arail inangih oh utuht en wiahda, nin duwen sapwellimen Koht kosonned (tehk iralaud 20). Irail pil usadahr oh alehdahr oh utungada Sosep Smith Jr. oh Oliver Cowdery en wia oahpiser me pahn kaunda Mwomwohdiso. Sang ni pwilidien peh kan, Joseph kasarawihla Oliver en wiahla elder en Mwomwohdiso, oh Oliver pil kasarawihla Sosep ni mwohmwohte. Mwurin kasarawialahn kamadipw sarawio, Sosep oh Oliver pwilikihdi pehra kan pohn irail akan me iang wad emen ong alahldahn Ngehn Sarawio oh kasarawiong emen emen en wiahla towe mehlel en Mwomwohdiso.
1–3, Sosep Smith malipilipda en wia ohl sarawi, sounkawehwe, soukohp, wahnpoaron, oh elder; 4–8, Sapwellime mahsen pahn kaweid doadoahk en Saion; 9–12, Souleng kan pahn kamehlele sapwellime mahsen akan ni eh pahn mahsen sang pahn kaweid en Sounkoaloalamwahuo.
1 Kilang, kumwail pahn kin wiahda oh kolokol poadoapoad ehu; oh nan poadoapoado ke pahn adaniki ohl sarawi men, sounkawehweh men, soukohp men, oh wahnpoaron en Sises Krais men, elder en mwomwohdiso sang kupwuren Koht Sahmo, oh kupwur kalahngan en ahmw Kaun Sises Krais,
2 Me alehdier kamarain en Ngehn Sarawio en koasondehdi poahson, oh en kauwada pelien lamalam me keieu sarawio.
3 Mwomwohdiso me wiawihda oh koasoansoandi nan pahr en ahmw Kaun kid welipwiki silihsek, nan kapahieu en sounpwung, oh keweneu en rahn en sounpwungo me iei Epreil.
4 Eri, kumwail, tohn mwomwohdiso pahn rong mwahu sapwellime mahsen kan koaros oh kosonned akan me e pahn kihong kumwail ni ansou me e pahn alehdi, oh weweidiki nan mour sarawi koaros mwohi;
5 Pwe sapwellime mahsen kan kumwail pahn alehda ni kanangamah oh pwoson nan mehkoaros, duwehte sang pein eweiet.
6 Pwe ma kumwail pahn wia mepwukat ewen kehl en ehl sohte pahn kak powehdi kumwail; ei, oh Kauno Koht pahn kasohrehsang manaman en rotorot mwohmwail, oh kupwurehda nanleng kan en mwekidada ong kamwahupamwail, oh kalinganpen mware.
7 Pwe met Kauno Koht ketin mahsaniher: Ih me I kamarainieki en kamwakid doadoahk en Saion sang ni manaman kehlail ong me mwahu, oh I wehwehki eh pwersek, oh I rongehr eh kapakap akan.
8 Ei, eh mwahieiki Saion I kilangehr, oh I pahn kupwurehda me e sohlahr pahn mwahieiki; pwe eh rahn peren lelledohr ong kamwakelpen dipe kan, kasansaldahn ei kapai kan ong eh doadoahk kan.
9 Pwe, kilang, I pahn kapaiahki kapai laud irail koaros me pahn doadoahk nan ei mwahto, oh irail pahn kamehlele eh mahsen kan, me pahn kohieng ih sang rehn Sounkaloalamwahuo, me kasalehda me Sises ketin kalohpwuala rehn ohl dipan akan pwehki dipen sampah, ei, ong kamwakelpen dihp ong irail me ahneki mohngiong peik.
10 Eri I kupwurehda me e kowe, Oliver Cowdery nei wahnpoaron, me pahn kasarawiala ih;
11 Oh met iei tiahk sarawi ehu ong kowe, me pahn wiahla elder men pahn eh manaman, pwehki iei ih me tep ong kowe, pwe ken kak wiahla elder men ong mwomwohdiso en Krais, kolokol edeiet—
12 Oh tepin sounkalohk en mwomwohdiso ong mwomwohdiso, oh ong mwohn sampah, ei, mwohn Mehn Liki kan; ei, oh met Kauno Koht ketin mahsaniher, kilang, kilang! pi long Mehn Suhs akan. Ahmen.