1 Ngehi me Alpa oh Omeka, Kauno Krais; iei, Ngehi me ih, me tapi oh imwi, Soundoar en sampah.

2 I kapwaiadahr oh kaunsekalahr kupwur en ih me iei Ngehi, me Sahmo, duwen ngehi—ni ei wiahier met pwe I en kak kihdo soahng koaros pahn ei manaman—

3 Kolokol manaman koaros, iei kamwomwalahn Sehdan oh eh doadoahng kan ni imwin sampah, oh keimseklahn rahn en kadeiko, me I pahn wiahiong towe kan, I pahn kadeidkada aramas koaros nin duwen eh doadoahk kan oh wiewia kan me e pahn wiahda.

4 Oh mehlel aramas koaros anahne koluhla de lokolok, pwe ngehi, Koht, me poatoapoat.

5 Eri, I sohte pahn kapwure kadeik kan me I pahn wia, ahpw meid suwediong irail akan me pahn mih pali meing en lime kan, oh irail pahn mwahiei, weriwer oh ngih kan tehtehrek.

6 Ahpw, e sohte ntingdi me e pahn mie imwin kalokolok wet, ahpw ihme ntingdi iei kalokolok poatopoat.

7 E pil ntingdi lekidekla soutuk; eri e kin kasansalda laud sang ekei pwuhksarawi kan, pwe en kak doadoahk nan mohngiongin aramas akan, ong kalinganpen mwareie.

8 Eri, I pahn kawehwehiong kumwail rir wet, pwe e konehng kumwail en ese nin duwen amwail wia nei wahnpoaron.

9 I koasoiwei ong kumwail me pilipildahr nan soahng wet, nin duwen amwail ehu, pwe kumwail en pidelong wasahn ei komoal.

10 Pwe kilang, ia uwen lapalap en me rir en Koht! Pwe kilang, ngehi me poatoapoat, oh kalokolok me I kin kohsang nan pehi iei kalokolok poatoapoat, pwe mwarei Poatoapoat. Eri—

11 Kalokolok soutuk iei sapwellime Koht kalokolok.

12 Kalokolok poatoapoat iei sapwellimen Koht kalokolok.

13 Eri, I ndahiong kumwail en koluhla, oh kapwaiada kosonned akan me kumwail alehdier sang nan pehn nei sounpapah Sosep Smith, Jun., ni mwarei;

14 Oh e sang ni ei manaman kehlail me kumwail alehkihdi kosonned akan;

15 Eri I ndahiong kumwail en koluhla—koluhla, pwe I de kalokehkin kumwail ei mahsen akan, oh sang ni ei engieng, oh sang ei nsensuwed, oh amwail lokolok pahn kamedek—ia uwen kamedek kumwail sohte ese, ia uwen lapalap kumwail sohte ese, ei, ia uwen apwal en kolokol kumwail sohte kak ese.

16 Pwe kilang, ngehi, Koht, lokolongkier mepwukat pwehki aramas koaros, pwe irail dehr lokolok ma irail pahn koluhla;

17 Ahpw ma irail sohte pahn koluhla irail pahn lokolok duwehte ngehi;

18 Lokolok me kahrehda pein ngehi, iei Koht, me lapalapasang aramas koaros, en rerrerki pwehki medek, oh nta kerasang ni pwoahr en kiliet pwon, oh ngehi lokolok ni paliwar oh palingehn—oh mentehn I en dehr nim sang nan dahl katiko, oh roingkipene—

19 Ahpw, lingan ong Sahmo, oh I tungoale oh kaimwsekala ei kaunop ong aramas akan.

20 Eri, I pwurehng kihong kumwail kosonned en koluhla, pwe I de wiahiong kumwail en karakarahkala sang ni ei manaman; oh kumwail wehkada dipamwail akan, pwe kumwail de lokolongki kalokolok pwukat me I mahsaniher, me kumwail ekis kehnehr, ei, ni ahnsou me kumwail kehn ei kin kihsang Ngehno.

21 Oh I mahnsanihong kumwail me kumwail en kalohngkihte koluhla, oh dehr kasalehiong sampah mepwukat lao e pahn koasoandi sang rehi.

22 Pwe irail sohte kak tungoale uduk ahnsou wet, ahpw milik me irail kak alehda; eri, irail sohte konehng ese mepwukat, pwe irail de mehla.

23 Kumwail eseiehla, oh rong ei mahsen kan; weweidki mpai en Ngehnio, oh kumwail pahn alehdi popohl rehi.

24 Ngehi Sises Krais; I kohdo sang ni kupwur en Sahmo, oh I pahn wia kupwure.

25 Oh pil, I kihong kumwail kosonned me kumwail sohte pahn noahroke ehn mehn mpomw eh pwoud; de pil kihsang mour en mehn mpomw.

26 Oh pil, I kihong kumwail kosonned me kumwail sohte pahn noahroke pein amwail dipwisou, ahpw kumwail pahn kisakiski ni saledek ong ntingdahn Pwuhk en Mormon, me audaudiki mehlelo oh mahsen en Koht—

27 Me iei ei mahsen ong Mehn Liki kan, pwe kereniongehr e pahn kohla rehn mehn Suhs, me Mehn Leimen kan kadaudok sang, pwe irail en kamehlele rongamwahuo, oh dehier kasik emen Mesaia me pahn ketido pwe e ketidohier.

28 Oh pil, I kihong kumwail kosonned me kumwail pahn kin kapakap ni ngihl laud pil duwehte nan mohngiongamwail; ei, mwohn sampah oh pil ni rir, mwohn aramas oh pil ni rir.

29 Oh kumwail pahn kalohngki rohng kaperen, ei, kasalehda pohn nahna kan, oh wasa ileile koaros, oh rehn aramas koaros me kumwail pahn mweimweiong kilang.

30 Oh kumwail pahn wia ni aktikitik pwon, koapwkoapworopworikin ie, dehr akamaiong sounakamai kan.

31 Oh padahk loal kumwail sohte pahn koasoia, ahpw kumwail pahn kalohngki koluhla oh pwoson Sounkomouro, oh kamwakel en dihp kan sang ni papidais, oh sang ni kisiniei, iei, Ngehn Sarawi.

32 Kilang, met iei kosonned kesempwal oh imwila me I pahn kihong kumwail duwen irair wet; pwe met pahn itarohng kumwail nan ehu ehu rahn, lao lel imwin amwail mour.

33 Oh ma kumwail pahn pireksang kaweid pwukat kumwail pahn ahneki pahtou, iei, kamwomwalahn amwail mour oh amwail dipwisou.

34 Kumwail kisakiskihwei amwail dipwisou, iei, pali en sapwamwail kan, oh koaros ihte dahme anahnepe sowese amwail peneinei.

35 Pwainla amwail pweipwand me kumwail wiahiong soun prindo. Kasaledekehsang kumwail nan mour en kalidu.

36 Kumwail kohsang imwamwail oh wasahn keiru, ihte ahnsou me kumwail inangih kilang amwail peneinei;

37 Oh koasoi saledek ong aramas koaros; iei, padahk, kangoange, kalohk ki mehlelo, iei ni ngihl laud, ni ngihl en pereperen, weriweriki—Kepinga Kauno, kepinga Kauno meid pai mwaren Kauno Koht!

38 Kalapw kapakap, oh I pahn kamwerehdi Ngehnio pohmwail, oh amwail kapai kan pahn lap—ei, e pahn lapasang uwen ma kumwail pahn kihpene pai en sampah oh soahng kan me kin ohla pwon.

39 Kilang, kumwail kak en sohte wadek met oh sohte pereperen oh perenda nan mohngiongamwail kan?

40 De kumwail kak en sohte tangatangseli ahnsou werei ni sohte kaweid?

41 De kumwail kak en sohte karakarahk oh mpai, oh wiewia kumwail mwahu mwohi? Ei, kohdo rehn Sounkomouro. Ahmen.