Benneg 21
Paltiing a naited ken ni Joseph Smith a Propeta, iti Fayette, Nueva York, idi 6 ti Abril 1830 (History of the Church, 1:74–79). Naited daytoy a paltiing iti pannakabukel ti Simbaan, iti naagapad a petsa, iti balay ni Peter Whitmer, Sr. Innem a lallaki, a nabuniagan sakbayna, ti nairaman. Impeksa dagitoy a tao babaen ti sangsangkatunos a butos ti tarigagay ken pasnekda a mangbukel, a maibatay iti bilin ti Dios (kitaen ti benneg 20). Binutosanda met ti panangawat ken ikakanunongda kada Joseph Smith, Jun., ken Oliver Cowdery a kas mangimaton a dadaulo ti Simbaan. Iti panangipatay kadagiti dakulap, inordenan ni Joseph kalpasanna ni Oliver nga elder ti Simbaan, ken inordenan met ni Oliver ni Joseph. Kalpasan ti pannakaipaay ti sakramento, impatay da Joseph ken Oliver dagiti dakulapda kadagiti nakiraman a saggaysa, iti pannakayawat ti Espiritu Santo ken pannakapatalged ti tunggal maysa a kas kameng ti Simbaan.
1–3, Natudingan ni Joseph Smith a mammadto, agipatarus, propeta, apostol, ken elder; 4–8, Iturong ti balikasna ti pagimbagan ti Zion; 9–12, Mamatinto dagiti Santo kadagiti balikasna bayat ti panagsaona babaen ti Mangliwliwa.
1 Adtoy, addanto kasuratan nga italimengyo; ket iti daydiay maawagankanto iti mammadto, iti agipatpatarus, iti propeta, iti apostol ni Jesucristo, iti elder ti simbaan babaen ti pagayatan ti Dios nga Ama, ken ti parabur ti Apoyo a Jesucristo.
2 A pinaregta ti Espiritu Santo a mangibaskag ditoy iti pamuon, ken mangbangon iti daytoy iti kasantuan a pammati.
3 A simbaan a nabukel ken naipasdek iti tawen ti Apom a sangapulo-ket-walo-gasut ken tallopulo, iti maikapat a bulan, ken iti maikanem nga aldaw iti bulan a maawagan iti Abril.
4 Gapuna, kayatna a sawen ti simbaan, imdengamto amin a balikasna ken bilbilinna nga itednanto kenka bayat ti panangawatna kadakuada, a magna iti amin a kinasanto iti imatangko;
5 Ta maawatmonto ti balikasna, a kasla agtaud iti ngiwatko, iti amin a kinaanus ken pammati.
6 Ta babaen ti panangaramidmo kadagitoy a banag saanto nga agballigi kenka dagiti ruangan ti impierno; wen, ket paksiatento ti Apo a Dios dagiti bileg ti kasipngetan iti imatangmo, ket padayyegennanto dagiti langit nga agpaay iti pagimbagam, ken iti dayag ti naganna.
7 Ta kastoy ti kuna ti Apo a Dios: Pinaregtak nga aggunay iti pagsayaatan ti Zion iti naindaklan a bileg a para iti pagimbagan, ket ammok ti kinaregtana, ken nangngegko dagiti kararagna.
8 Wen, nakitak ti panagsangitna para iti Zion, ket aramidek a saanton a lumdaang gapu kenkuana; ta dumteng dagiti aldaw a panagrag-ona iti pannakaugas ti basbasolna, ken ti pannakaipakita dagiti bendisionko kadagiti aramidna.
9 Ta, adtoy, bendisionakto amin dagiti agtrabaho iti bangkagko iti naindaklan a bendision, ket mamatidanto kadagiti balikasna, a naited kenkuana babaen kaniak babaen ti Mangliwliwa, a nangipakita a nailansa ni Jesus babaen dagiti managbasol a lallaki para kadagiti basol ti lubong, wen, para iti pannakaugas ti basbasol iti napnuan babawi a puso.
10 Gapuna a nasken unay kaniak a maordenan babaen kenka, Oliver Cowdery nga apostolko;
11 Gapu ta daytoy ti ordinansa a para kenka, nga elderka iti babaen ti imana, isu nga immun-una ngem sika, tapno agbalinka nga elder iti daytoy a simbaan ni Cristo, a nakaaramatan ti naganko—
12 Ken ti umuna a mangaskasaba daytoy a simbaan iti simbaan, ken iti lubong, wen, kadagiti Gentil; wen, ket kinuna ti Apo a Dios, adtoy, adtoy! kadagiti met Hudio. Amen.