ʻEletā Marcos A. Aidukaitis
ʻO e Kau Fitungofulú
ʻI he taimi naʻe taʻu valu ai e foha lahi taha ʻo ʻEletā Mākosi ʻAnitoni ʻAitukaitisí, naʻá ne tā valivali hono fāmilí ko haʻane ngāue fakaako. Ko e taimi ko ʻení naʻe ngāue taimi lōloa ai ʻa ʻEletā ʻAitukaitisi ko e pule fakakātoa ʻo ha kautaha ʻi Sao Paulo ʻi Palāsila. ʻOkú ne pehē ʻi heʻene manatu ki aí, “Naʻe lahi ʻaupito ʻeku ngāué peá u folau ki ha ngaahi feituʻu lahi ʻi māmani.”
Naʻe ʻilonga ʻaupito e ʻikai ke ʻasi ʻa ʻEletā ʻAitukaitisi ʻi he fakatātā naʻe tā ʻe hono fohá. Naʻe fehuʻi ange ʻe he faiakó ki he tamasiʻí, “Ko fē hoʻo tangataʻeikí?” Naʻá ne tali ange, “ʻOkú ne ngāue ia.”
Ne hoko e meʻá ni ko ha fakatokanga kia ʻEletā ʻAitukaitisi. ʻOkú ne pehē, “Ne u fetongi ngāue pea fakaleleiʻi e meʻa naʻe totonu ke fakaleleiʻí,” ʻo toe kamata foʻou ʻene feinga ke fakamuʻomuʻa hono fāmilí.
Naʻe fāʻeleʻi ʻa ʻEletā ʻAitukaitisi kia ʻAnitoni ʻAitukaitisi mo Malia Titaliti ʻAitukaitisi ʻi he ʻaho 30 ʻo ʻAokosi 1959, ʻi Pōtō ʻAlekili, ʻi Palāsila. Naʻe papitaiso ʻene tamaí ʻi he 1940, pea ko e ʻuluaki mēmipa ia ʻo e Siasí ʻi hono fāmilí, ʻo hangē pē ko e uaifi ʻo ʻEletā ʻAitukaitisí, ʻa Lūʻisa ʻIngikeleti ʻAitukaitisi. Naʻe mali ʻa ʻEletā mo Sisitā ʻAitukaitisi ʻi he ʻaho 13 ʻo Sānuali 1986, ʻa ia naʻe ʻikai lava ha māhina ʻe taha mei he taimi naʻá ne papitaiso ai hono uaifí. Naʻá na sila ʻi he Temipale Polovo ʻIutaá ʻi he taʻu hono hokó. ʻOku ʻi ai ʻena fānau ʻe toko nima.
Naʻe ngāue ʻa ʻEletā ʻAitukaitisi ʻi he Misiona Palāsila Sao Paulo Sauté mei he 1979 ki he 1981, pea ʻokú ne pehē naʻe hanga ʻe heʻene ngāue fakafaifekaú ʻo liliu ʻene moʻuí. Naʻe toe lahi ange ai ʻene ʻofa ki he Fakamoʻuí, teuteuʻi ia ke ne tauhi ki hono fāmilí pea mo ʻene Tamai Hēvaní, pea ʻokú ne pehē, “naʻá ku maʻu ai ha lotolahi ke akoʻi pea papitaiso hoku uaifí.”
Hili ʻene ngāue fakafaifekaú, naʻe maʻu hono mataʻitohi BA ʻi he ʻenisinia fakamakēnikí mo hono MBA mei he ʻUnivēsiti Pilikihami ʻIongí, ʻa ia naʻá ne kau ki heʻene timi soká. ʻI heʻene ʻosi mei he akó naʻá ne ngāue fakapule maʻá ha ngaahi kautaha lahi kehekehe, ʻo ʻuluaki kamata pē ʻi he ʻIunaiteti Siteití pea hoko ai ki Palāsilá, pea iku ki heʻene kamata ʻene pisinisi pē ʻaʻana.
Ki muʻa pea uiuiʻi ʻa ʻEletā ʻAitukaitisi ki he ʻUluaki Kōlomu ʻo e Kau Fitungofulú, naʻá ne hoko ko e palesiteni ʻo e Misiona Palāsila Palāsilá, Fitungofulu Fakaʻēlia, palesiteni fakasiteiki, fakafofonga fakavahelahi ʻo e uelofeá, mo e aleaʻanga māʻoluga.