ʻEletā Eduardo Gavarret
ʻO e Kau Fitungofulú
ʻI he fakakaukau ʻa ʻEletā ʻEtuato Kavaleti ki hono uiuiʻi ki he Kōlomu ʻUluaki ʻo e Kau Fitungofulú, ʻokú ne fakamoʻoni ai ʻo pehē, “Taimi ʻe niʻihi ʻoku hoko mai e ngaahi meʻa ʻoku hangē ʻoku ʻikai hanau mahuʻingá ʻo hangē ha pāsoló ke teuteuʻi ai koe.”
Naʻe fāʻeleʻi ʻa ʻEletā Kavaleti ʻi he ʻaho 11 ʻo Mē, 1956, ʻi Mainasi ʻi ʻUlukuai, kia Sione Kavaleti mo ʻElesā ʻInisaulate Kavaleti. Naʻá ne ngāue fakafaifekau ʻi Palakuai mo ʻUlukuai mei he 1975 ki he 1977 pea ʻi heʻene fokí, naʻá ne mali mo Noma Pītisi Kokoloso ʻi he ʻaho 20 ʻo ʻOkatopa, 1978. Naʻe silaʻi kinaua ki mui ai ʻi he Temipale Sao Paulo Palāsilá.
Naʻe ʻosi e ako ʻa ʻEletā Kavaleti ki he ngaahi meʻa fakapulé ʻi he pisinisí ʻi he 1986 mei he Escuela Superior de Administracion Empresas. ʻI he 2000 naʻá ne maʻu hono MA ʻi he meʻa fakapule ʻi he pisinisí ki he fakamāketí mei INPG (Instituto Nacional de Pos-graduacāo) ʻi Palāsila.
ʻOku pehē ʻe ʻEletā Kavaleti, “ ʻI heʻeku fakakaukau atu ki he kuo hilí, ʻoku lava pē ke u mamata ki he kau mai e toʻukupu ʻo e ʻEikí ki heʻeku moʻuí, ʻo ne ʻave au mei he feituʻu ʻe taha ki he feituʻu hoko maí pea mei he uiuiʻi ʻe taha ki he uiuiʻi ʻe taha koeʻuhí ke toe lelei ange ʻeku tauhi kiate Iá.”
Lolotonga ʻene hoko ko e pīsope ʻi Palakuaí, naʻá ne kau ki ha kautaha naʻa nau ngaohi e faitoʻó ʻo nau hiki ai ia ki Polivia ke ne kamata ha vaʻa foʻou ʻo e kautahá ai. Naʻe uiuiʻi ai ia heni ko e palesiteni ʻo ha siteiki foʻou, peá ne hoko atu ko ha fakafofonga fakavahelahi. ʻI he taimi ne hiki ai ʻe he kautahá ʻa e fāmilí ki Pelū ke fokotuʻu ai ha vaʻa foʻou ʻe tahá, naʻe ui ai ia ko ha Taki Fakaʻēlia. Naʻe toe hiki kinautolu ʻe he kautaha ki Palāsila, ʻa ia naʻá ne hoko ai ko ha Fitungofulu Fakaʻēlia. Naʻá ne hoko ki mui ai ko ha palesiteni fakamisiona.
ʻOku pehē ʻe ʻEletā Kavaleti, “ ʻOku ʻikai ʻuhinga ʻa e uiuiʻí ki ha ngaahi tuʻunga ʻokú te maʻu. ʻOku tokoniʻi kitautolu ʻe he ngaahi uiuiʻí ke tau ofi ange kia Kalaisi. Ko ha ngaahi founga pē ia ke maʻu ai e ola ʻoku fie maʻú. Kuo pau ke tau fekumi ki he ueʻi ʻa e Laumālié, tau ako ke lotu, pea tuku ʻetau tokangá ki he kakai kehé kae ʻikai ʻiate kitautolu pē.”
ʻI he taimi naʻe uiuiʻi ai iá, naʻá ne lolotonga hoko ko e pule lahi ʻo ha kautaha ngaohiʻanga faitoʻo ʻi Lima, ʻi Pelū. ʻOku ʻi ai ʻena fānau ʻe toko tolu mo hono uaifí.
ʻOku pehē ʻe ʻEletā Kavaleti, “ ʻI he taimi ʻoku hoko ai ʻa Kalaisi ko e uho ia ʻo ʻetau moʻuí, ʻe lelei ʻa e meʻa hono kotoa. He ko Ia ʻokú Ne puleʻi ʻa e meʻa kotoa pē.”