ʻEletā José A. Teixeira
ʻO e Kau Fitungofulú
Ko e konga ʻa ʻEletā Hōsea ʻAokositō Teiseila ʻo e Kōlomu ʻUluaki ʻo e Kau Fitungofulú ʻo e kinautolu ne papitaiso ʻi he taimi ne fakangofua ai e kau faifekau ʻa e Siasí ki Potukali ʻi he konga ki mui ʻo e 1975. Naʻe fakafeʻiloaki ʻene ongomātuʻá, ʻa Fernando Teixeira mo Benilde Teixeira, mo hono toenga ʻo e fāmilí ki he ongoongolelei kuo toe fakafoki maí ʻi he 1976, pea naʻe papitaiso kotoa e fāmilí ʻi he 1977.
Ki muʻa aí, naʻe maʻulotu maʻu pē ʻa ʻEletā Teiseila ʻi hono siasí, tokoni ʻi he taimi lotú, pea fai e meʻa kotoa pē naʻe ʻamanaki ʻe fai ʻe ha tokotaha tui kei talavou pehē. Ka naʻe kei ʻi ai pē ʻene ngaahi fehuʻi fekauʻaki mo e meʻa naʻá ne tui ki aí.
ʻI hono fakaafeʻi ia ʻe he ongo faifekaú ke ne lau e Tohi ʻa Molomoná pea lotuá, naʻá ne fai ia. ʻOkú ne pehē, “Ko e kamataʻanga ia ʻo ʻeku fakamoʻoni ki he Tohi ʻa Molomoná mo Siosefa Sāmitá.”
Naʻe fāʻeleʻi ʻa ʻEletā Teiseila ʻi he ʻaho 24 ʻo Fēpueli, 1961, ʻi Vila Liale ʻi Potukali, ka naʻá ne tupu hake ʻi he kolo motuʻa ko ia ko Komipala, ʻo ne kau ai ki he Siasí ʻi hono taʻu 16. Hangē ko e tokotaha papi ului kotoa pē, naʻá ne fehangahangai mo ha ngaahi fili fekauʻaki mo hono ngaahi kaungāmeʻá. Kae meʻamālie naʻe taimi siʻi pē kuo tali ʻe hono ngaahi kaumeʻá e tuʻunga moʻui foʻou naʻá ne moʻuiʻakí. Ko ʻene fakamatala ʻeni ʻi heʻene manatu ki aí, “Naʻa nau ʻiloʻi ko ʻemau kaungāmeʻá pē ʻe ʻi ai leva e ngaahi meʻa ia he ʻikai lava ke mau fai.”
Hili e ngāue ʻa ʻEletā Teiseila ʻi he Misiona Lisipooni Potukalí, naʻá ne kau atu ki he Laulā Puna ʻa Potukalí pea naʻá ne ʻalu ʻo ngāue ʻi ʻOilasi (Oeiras) ʻa ia ko ha konga ʻo e ʻiuniti fakavahaʻapuleʻanga ʻa e NATO. ʻI heʻene ʻi aí, naʻe uiuiʻi ia ko e talēkita ʻo e potungāue fetuʻutaki mo e kakaí ʻa e Siasí maʻá e fonuá. Naʻá na fetaulaki mo Filomina Lōpesi Teleisa Kalio, ko e kouʻotineita ʻo e potungāue fetuʻutaki mo e kakaí maʻá e siteiki Lisiponí pea naʻe nofo mo ia ʻi ʻOilasi, ʻi ha ako naʻe fai. Naʻá na mali ʻi he Tempale Peeni Suisalaní ʻi he ʻaho 5 ʻo Sune, 1984, pea ʻoku ʻi ai ʻena fānau tangata ʻe toko ua mo e taʻahine ʻe toko taha.
ʻOku ʻi ai ha ngaahi mataʻitohi ʻo ʻEletā Teiseila ʻi he ʻakauní mo hono puleʻi ʻo ha pisinisí, pea ki muʻa hono uiuiʻi ko ʻení, naʻá ne hoko ko e tokotaha pule fakavahaʻapuleʻanga maʻá e Siasí, pea naʻá ne nofo pē ʻi Felengifeeti ʻi Siamane. Naʻe hoko ʻa ʻEletā Teiseila ko ha palesiteni fakavahe, palesiteni fakasiteiki, Fitugofulu Fakaʻēlia, mo e palesiteni ʻo e Misiona Palāsila Sao Paulo Sauté.