ʻEletā Jorge F. Zeballos
ʻO e Kau Fitungofulú
Hili pē ha taʻu ʻe 12 mei hono fāʻeleʻi ʻo ʻEletā Siaosi Fenanitō Sepalosi ʻi he ʻaho 19 ʻo Siulai, 1955, naʻe haʻu e kau fuofua faifekau ʻa e Siasí ki hono koló, ko ʻOveli ʻi Sile, ʻi he 1967.
Naʻe kamata ʻene fieʻiló ʻi he ʻalu holo ʻa e kau tangata ʻAmelika Noate ʻe toko faá ʻi honau koló, mo honau fakaʻekeʻeke naʻe fai ʻi he nusipepa fakalotofonuá. ʻI he kamata ke kau atu e kau faifekaú ki he pasiketipolo liiki ʻa e koló, naʻe muimuiʻi pē ʻe Siaosi ʻenau vaʻingá he naʻá ne manako foki he pasiketipoló. Naʻe tuʻo taha ʻene moulu mai ʻo toi he tuʻa tēpile ʻa e kau fakamāú ke ne ʻilo e hingoa ʻo e timí. Fakaofo, ka naʻa nau hingoa kotoa pē ko “ ʻEletā.”
ʻI hano talaange ʻe ha taha he kalasi ʻa Siaosí kuó ne ʻosi kau ia mo hono fāmilí ki he siasi ʻo e kau faifekaú, naʻe kole ange ʻe Siaosi pe ʻe lava ke haʻu mo ia. Naʻá ne maʻulotu maʻu pē ʻi ha māhina ʻe fitu pea toki ʻiloʻi ʻe he kau faifekaú kuo teʻeki ai ke akoʻi pe papitaiso ʻa Siaosi. Ne taimi nounou pē mei ai kuo maʻu e ngofua mei heʻene ongomātuʻá, ko ʻAlapeto Sepalosi mo ʻInesi Sepalosi, pea papitaiso ia.
Ki mui ai lolotonga e ako ʻa Siaosi ʻi he ʻUnivēsiti ʻo Sanitā Maliá ʻi Valapalaisó, naʻá ne fetaulaki mo Kāmani Kolōlia Valenisuela. Ko ʻene manatu ʻeni ki aí, “ ʻI he fuofua taimi pē ne u sio ai kiate iá, naʻá ku ʻiloʻi te u mali mo ia. Naʻe ngali kehe ʻaupito ʻeni he ne u ʻosi maʻu hoku uiuiʻi ke ʻalu ʻo ngāue fakafaifekaú, pea naʻe ʻikai te ne kau ia ki he Siasí.” ʻI ha ngaahi uike siʻi pē mei ai naʻe akoʻi kiate ia e lēsoni ʻa e kau faifekaú, peá ne papitaiso ia ki muʻa peá ne ʻalu ʻo ngāue ʻi he Misiona Sile Konisepisioní.
Ne fetohiʻaki ʻa Siaosi mo Kāmani lolotonga ʻene ngāue fakafaifekaú, na kaungāmeʻa ki mui ai, peá na mali ʻi he ʻaho 26 ʻo Sune, 1982, ʻi he Temipale Sao Paulo Palāsilá. ʻOku ʻi ai ʻena fānau ʻe toko nima.
ʻOku ʻi ai e mataʻitohi ʻo ʻEletā Sepalosi ʻi he ʻenisinia sivilé mei he ʻUnivēsiti ʻo Sanitā Malia mo hono MA ʻi hono puleʻi ʻo e pisinisí mei he ʻUnivēsiti Pilikihami ʻIongí. Ki muʻa pea uiuiʻi ia ke hoko ko e palesiteni ʻo e Misiona Sile Sonisepisioni Saute ʻi he 2005, ko e pule ia ʻo ha kautaha keliʻanga koloa ʻi lalofonua ʻi Sile. Ne toki uiuiʻi foki ʻa ʻEletā Sepalosi ki he Kōlomu ʻUluaki ʻo e Kau Fitungofulú, ka naʻá ne hoko foki ki muʻa ko ha pīsope, palesiteni fakasiteiki, fakafofonga fakavahelahi mo ha Fitungofulu Fakaʻēlia.