ʻEletā Kent D. Watson
ʻO e Kau Fitungofulú
ʻI he vakai atu ʻa ʻEletā Keni Tī Uatesoni ki heʻene moʻui ki muʻá, naʻá ne ongoʻi maʻu pē ko ha tokotaha ia naʻe tui pea ʻi ai maʻu pē ʻene fakamoʻoni, ka naʻe ʻi ai ha meʻa ʻe taha naʻe hoko ʻo kaunga lahi ki heʻene moʻuí.
ʻOku pehē ʻe ʻEletā Uatesoni, ʻa ia ne toki uiuiʻi ki he Kōlomu hono Ua ʻo e Kau Fitugofulú, “Kuo kaunga lahi ʻeku fili ke u ʻalu ʻo ngāue fakafaifekaú heʻeku kei talavoú ki he ngaahi tafaʻaki kotoa pē ʻo ʻeku moʻuí.”
Naʻá ne maʻu ha uiuiʻi ki he Misiona Hahake Mamaʻo Faka-Tongá peá ne ngāue ʻi Taiuani. ʻOku hoko atu pē ʻene fakamatala, “Tupu mei heʻeku ngāue fakafaifekaú, kuó u liliu ai mei he tuʻu pē ʻi he vaeuá ʻo u hoko ko ha tokotaha ako lelei. Naʻe tupu mei heʻeku ngāue fakafaifekaú ʻeku fetaulaki mo hoku uaifí. Naʻe fakafeʻiloaki au kiate ia ʻe ha taha ne ma hoa faifekau ki muʻa. Naʻe tupu mei heʻeku ngāue fakafaifekaú ʻeku ako e lea faka-Siaina. Naʻe tupu mei heʻeku ngāue fakafaifekaú ʻeku maʻu ha ngāue maʻuʻanga moʻui ʻoku ou fiefia ai. Naʻe tupu mei heʻeku ngāue fakafaifekaú ʻa hono maʻu ʻe homau fāmilí ʻa e faingamālie ke mau nofo ai ʻi ha ngaahi kolo lahi.”
Naʻe maʻu e mataʻitohi BA mo e MA ʻo ʻEletā Uatesoní mei he ʻUnivēsiti Pilikihami ʻIongí pea ko ʻene ngāue maʻuʻanga moʻuí ko ha tokotaha ʻakauniteni pea naʻe faifai pē ʻo ne hoko ko e sea mo e CEO ʻo ha kautaha ʻakauniteni fakavahaʻapuleʻanga.
Naʻe maʻu foki ʻe ʻEletā Uatesoni ʻa e faingamālie ke toe foki mo hono uaifí ki he feituʻu naʻá ne ngāue fakafaifekau aí ke hoko ko e palesiteni ʻo e Misiona Taiuani Taisungí mo e palesiteni fakataimi ʻo e Misiona Taiuani Kaosingí. Kuó ne maʻu ha falala ki he mālohi ʻo e toʻu tupú ʻi he Siasí hili ia haʻane ngāue mo ha kau faifekau kei talavou tokolahi.
Kuo ngāue ʻa ʻEletā Uatesoni ʻi ha ngaahi uiuiʻi faka-Siasi lahi, kau ai ʻene hoko ko ha pīsope mo ha tokoni ʻi ha kau palesitenisī fakasiteiki.
Naʻe fāʻeleʻi ʻa ʻEletā Uatesoni ʻi Sita Siti ʻi ʻIutā, USA, kia Lolenisō Tī Uatesoni mo Siosi Uatesoni, ʻi he ʻaho 8 ʻo Mē, 1943. Naʻá na mali mo Koni Lingimani ʻi he ʻaho 23 ʻo ʻAokosi, 1967, ʻi he Temipale Sōlekí pea ʻoku ʻi ai ʻena fānau ʻe toko nima.