ʻEletā Allan F. Packer
ʻO e Kau Fitungofulú
ʻOku manatu ʻa ʻEletā ʻĀlani Fōlesi Peeka ki heʻene taʻu 10 nai pe 12, ʻa e ʻikai pē te ne ongoʻi ʻe ia naʻe tali mai ʻene ngaahi lotú. ʻI he ʻaho ʻe taha lolotonga ʻene ngāue mo ʻene tamaí, ʻa Poiti K. Peeka, ʻa ia ʻoku hoko he taimí ni ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, naʻe fakahā ange ʻe ʻĀlani e meʻa naʻe hohaʻa ki ai hono lotó.
Naʻe akoʻi ia ʻe heʻene tamaí ʻaki ha talanoa fakatātā, ʻo ne talaange ʻoku ʻikai ke fakaʻaongaʻi ʻe he kau pailaté honau fakamalú ʻi he taimi kotoa pē ʻoku nau puna aí, ka ʻoku nau tui maʻu pē kinautolu. Naʻe fakalotolahiʻi ʻe Palesiteni Peeka hono fohá ke hokohoko atu pē ʻene lotú, ke ne kātaki fuoloa, pea ke ne tui te ne maʻu ha tali ʻi he taimi ʻe fie maʻu aí.
ʻOku pehē ʻe ʻEletā Peeka, ʻa ia ne toki uiuiʻí ni ki he Kōlomu ʻUluaki ʻo e Kau Fitungofulú, “Naʻe tokoniʻi au ʻe he lēsoni ko iá ʻi he ngaahi taʻu ne kamakamata ai hoku fakatupulaki ʻeku fakamoʻoní.”
Naʻe fāʻeleʻi ʻa ʻEletā Peeka ʻi Pilikihami Siti ʻi ʻIutā, USA, ʻi he ʻaho 7 ʻo Siulai, 1948, kia Poiti Keneti mo Touna Sāmita Peeka. Neongo ko ʻena fakatou haʻu pē mo hono uaifi ko Teuli Pēneti Pēká mei ʻIutā, ka naʻá na fetaulaki ʻi Positoni ʻi Masasūseti, USA, ʻi he akoʻanga māʻolungá. Hili e ngāue fakafaifekau ʻa ʻEletā Peeka ki he Misiona ʻAnitesí mo e Misiona Kolomupia-Venesuelá, naʻá na mali mo Teuli ʻi he Temipale Sōlekí ʻi he ʻaho 1 ʻo Sune, 1970. ʻOku ʻi ai ʻena fānau ʻe toko 8 mo e makapuna ʻe 17.
Naʻe maʻu e mataʻitohi ʻo ʻEletā Peeka ʻi he ʻenisinia ʻuhila fakatekinolosia mei he ʻUnivēsiti Pilikihami ʻIongí. Kuó ne ngāue fakapisinisi pea hoko ko ha tokoni palesiteni ki ha ngaahi kautaha lahi.
Kuo ngāue foki ʻa ʻEletā Peeka ʻi ha ngaahi uiuiʻi faka-Siasi lahi, kau ai ʻene hoko ko ha pīsope, Taki Sikauti, tokoni ʻi ha kau palesitenisī fakasiteiki, palesiteni ʻo e Misiona Sipeini Malaká mo e mēmipa ʻo e poate lahi ʻo e Kau Talavoú.
ʻOku pehē ʻe ʻEletā Peeka, “ ʻOku ou ʻiloʻi ʻoku moʻoni e ngāué. Ko e Fakamoʻuí ʻa hotau Huhuʻí. Naʻá ne fakaava e matapaá mo tuku mai kiate kitautolu ʻa e faingamālie ke tau toe foki ai ki heʻetau Tamaí. ʻOku ou lāngilangiʻia ʻi he lava ke u tokoni kiate Ia ʻi Heʻene ngāué.”