1 Tus Tswv hais tseeb li no tias: Yuav muaj tias txhua tus neeg uas tso nws tej kev txhaum tseg thiab los cuag kuv, thiab hu txog kuv lub npe, thiab ua raws li kuv lub suab hais, thiab ua raws li kuv tej lus txib, yuav pom kuv lub ntsej muag thiab paub hais tias muaj kuv;

2 Thiab hais tias kuv yog txoj kev kaj tseeb uas ci rau txhua tus neeg uas los rau hauv lub ntiaj teb;

3 Thiab hais tias kuv koom Leej Txiv, thiab Leej Txiv koom kuv, thiab Leej Txiv thiab kuv wb yog ib tug—

4 Koom Leej Txiv vim nws tau muab tag nrho tej nws muaj rau kuv, thiab koom Leej Tub vim kuv nyob hauv lub ntiaj teb thiab tau txais cev nqaij daim tawv, thiab tau nyob nrog neeg cov tub ki.

5 Kuv tau nyob hauv lub ntiaj teb thiab tau txais tej uas kuv Txiv muab, thiab tau muab nws tej hauj lwm tshwm sim los.

6 Thiab Yauhas pom thiab ua pov thawj txog tag nrho kuv lub yeeb koob, thiab tag nrho Yauhas cov lus pov thawj yuav muab ua tshwm sim tom qab no mus.

7 Thiab nws ua pov thawj, hais tias: Kuv twb pom nws lub yeeb koob, hais tias twb muaj nws thaum chiv keeb, ua ntej muaj lub ntiaj teb;

8 Yog li ntawd, thaum chiv keeb twb yeej muaj Txoj Lus, vim nws yog Txoj Lus, uas twb yog tus tub xa xov ntawm kev cawm seej—

9 Txoj kev kaj thiab tus Txhiv Dim ntawm neeg ntiaj teb; tus Ntsuj Plig ntawm txoj kev tseeb, tus uas los rau hauv lub ntiaj teb, vim nws tau tsim lub ntiaj teb, thiab los ntawm nws muaj txoj sia ntawm tib neeg thiab txoj kev kaj ntawm tib neeg.

10 Nws tau tsim tej ntuj; nws tau tsim tib neeg; txhua yam yog nws tsim, thiab yog los ntawm nws, thiab yog ntawm nws.

11 Thiab kuv, Yauhas, ua pov thawj hais tias kuv tau pom nws lub yeeb koob, uas yog lub yeeb koob ntawm Leej Txiv Tib Leeg Tub, uas muaj txoj kev tshav ntuj thiab kev tseeb nplua mias, uas yog tus Ntsuj Plig ntawm txoj kev tseeb, uas tau nqis los thiab ua neej nyob muaj cev nqaij daim tawv, thiab tau nrog peb nyob.

12 Thiab kuv, Yauhas, pom hais tias nws tsis tau txais tag nrho txhua yam thaum xub thawj, tiam sis tau txais lub hwj chim ntxiv rau lub hwj chim;

13 Thiab nws tsis tau txais txhua yam thaum xub thawj, tiam sis tau txais lub hwj chim ntxiv rau lub hwj chim, txog thaum nws tau txais tag nrho;

14 Thiab li no nws thiaj hu ua Vajtswv Leej Tub, vim nws tsis tau txais tag nrho thaum xub thawj.

15 Thiab kuv, Yauhas, ua pov thawj, thiab xyuas seb, lub ntuj ceeb tsheej tau qhib, thiab tus Vaj Ntsuj Plig Dawb Huv tau nqis los rau saum nws muaj yeeb yam li tus nquab, thiab los tsaws rau saum nws, thiab muaj ib lub suab los saum ntuj los hais tias: Tus no yog kuv Leej Tub uas kuv hlub.

16 Thiab kuv, Yauhas, ua pov thawj hais tias nws tau txais tag nrho Leej Txiv lub yeeb koob;

17 Thiab nws tau txais hwj chim tag nrho, nyob saum ntuj thiab hauv ntiaj teb tib si, thiab Leej Txiv lub yeeb koob nyob nrog nws, vim nws twb nyob hauv Leej Txiv.

18 Thiab yuav muaj tias, yog nej rau siab ntseeg nej yeej yuav tau txais tag nrho Yauhas cov lus pov thawj.

19 Kuv muab cov lus hais no rau nej kom nej yuav to taub thiab paub teev tiam, thiab paub hais tias nej teev tiam dab tsi, kom nej yuav los cuag Leej Txiv los ntawm kuv lub npe, thiab thaum txog sij hawm yuav tau txais tag nrho tej uas nws muaj.

20 Vim, yog nej ua raws li kuv tej lus txib nej yuav tau txais tag nrho tej nws muaj, thiab yuav tau yeeb koob los ntawm kuv ib yam li kuv tau los ntawm Leej Txiv, yog li ntawd, kuv hais rau nej tias, nej yuav tau txais lub hwj chim ntxiv rau lub hwj chim.

21 Thiab nim no, kuv hais tseeb rau nej tias, twb muaj kuv nyob thaum chiv keeb nrog Leej Txiv, thiab twb yog tus Tub Hlob;

22 Thiab tag nrho cov uas yug los ntawm kuv ces yog cov yuav tau txais lub yeeb koob ntawm tib tug ntawd, thiab yog lub koom txoos ntawm tus Tub Hlob.

23 Twb muaj nej nyob thaum chiv keeb nrog Leej Txiv thiab; cov uas yog Ntsuj Plig, uas twb yog tus Ntsuj Plig ntawm kev tseeb;

24 Thiab kev tseeb yog kev paub tej yam uas tab tom muaj, thiab tej yam uas tau muaj lawm, thiab tej yam uas tseem yuav muaj los;

25 Thiab txhua yam uas tshaj los sis tsawg dua li no ces yog tus ntsuj plig ntawm tus niag phem uas yog tus neeg dag txij thaum chiv keeb los.

26 Tus Ntsuj Plig ntawm kev tseeb yog los ntawm Vajtswv. Kuv yog tus Ntsuj Plig ntawm kev tseeb, thiab Yauhas ua pov thawj txog kuv, hais tias: Nws tau txais qhov tseeb tag nrho, muaj tseeb tiag, uas twb yog ntawm tag nrho qhov tseeb;

27 Thiab tsis muaj ib tug uas txais tau tag nrho tsuas yog tus ntawd ua raws li Vajtswv tej lus txib xwb.

28 Tus uas ua raws li Vajtswv tej lus txib txais tau qhov tseeb thiab txoj kev kaj, kom txog thaum nws tau yeeb koob ntawm qhov tseeb thiab paub txhua yam.

29 Twb muaj neeg nyob thaum chiv keeb nrog Vajtswv. Kev txawj ntse, los yog txoj kev kaj ntawm qhov tseeb, tsis yog muaj leej twg tau tsim los sis ua los, thiab yeej ua tsis taus.

30 Txhua yam tseeb nyias nyob taus nyias qhov chaw uas Vajtswv tau muab tso, kom nyias ua nyias hauj lwm, ib yam li txhua yam kev txawj ntse thiab; yog tsis li ces twb tsis muaj dab tsi li.

31 Saib seb, ntawm no yog txoj kev ywj siab xaiv ntawm tib neeg, thiab ntawm no yog txoj kev raug txim ntawm tib neeg; vim tej uas muaj thaum chiv keeb twb muab qhib plho qhia los rau lawv, thiab lawv tsis txais yuav txoj kev kaj.

32 Thiab txhua tus neeg uas nws tus ntsuj plig tsis txais txoj kev kaj ces yuav raug txim.

33 Vim tib neeg twb yog ntsuj plig. Tej uas muaj cev nqaij yeej nyob mus ib txhis, thiab ntsuj plig thiab cev nqaij, uas sib koom tsis sib cais li, txais txoj kev xyiv fab puv npo;

34 Thiab thaum sib cais ces tib neeg tsis muaj peev xwm txais tau txoj kev xyiv fab puv npo.

35 Lub cev nqaij yog Vajtswv chaw nyob; muaj tseeb tiag, tib neeg yog Vajtswv chaw nyob, uas twb yog tej tuam tsev; thiab lub tuam tsev twg uas raug muab ua qias, Vajtswv yuav ua kom lub tuam tsev ntawd puas tsuaj.

36 Vajtswv lub yeeb koob yog kev txawj ntse, los yog hais tias, yog txoj kev kaj thiab qhov tseeb.

37 Txoj kev kaj thiab qhov tseeb tso tus niag phem ntawd pov tseg.

38 Txhua tus ntsuj plig ntawm tib neeg twb tsis muaj kev txhaum thaum chiv keeb; thiab vim Vajtswv tau txhiv tib neeg dim ntawm txoj kev poob, Vajtswv pom tias tib neeg hloov rov qab tsis muaj kev txhaum, thaum lawv yog me nyuam mos liab.

39 Thiab tus niag phem ntawd los thiab tshem txoj kev kaj thiab qhov tseeb ntawm noob neej mus, los ntawm kev tsis mloog lus, thiab vim yog lawv cov yawg koob tej kab lis kev cai.

40 Tiam sis kuv tau txib nej kom tu nej cov me nyuam raws li txoj kev kaj thiab qhov tseeb.

41 Tiam sis kuv hais tseeb rau koj, kuv tus tub qhe Frederick G. Williams, koj pheej raug txim li no mus ntxiv;

42 Koj tsis tau qhia txoj kev kaj thiab qhov tseeb rau koj cov me nyuam, kom raws li tej lus txib; thiab tus niag phem ntawd tseem muaj hwj chim kav koj, thiab qhov no yog qhov ua rau koj muaj kev txom nyem.

43 Thiab nim no kuv muab ib lo lus txib rau koj—yog koj xav tau kev cawm dim koj yuav tsum kho koj tsev neeg kom muaj kab muaj kev, vim muaj ntau yam uas tsis yog nyob hauv koj tsev neeg.

44 Kuv hais tseeb rau kuv tus tub qhe Sidney Rigdon tias, muaj tej yam txog nws cov me nyuam uas nws tsis ua raws li tej lus txib; yog li ntawd, qhov xub thawj cia li kho koj tsev neeg kom muaj kab muaj kev.

45 Kuv hais tseeb rau kuv tus tub qhe Joseph Smith, tus Hluas, los yog hais tias, kuv yuav hu nej ua phooj ywg, vim nej yog kuv cov phooj ywg, thiab nej yuav tau qub txeeg qub teg nrog kuv—

46 Kuv hu nej ua kuv cov tub qhe kom pab tau neeg ntiaj teb, thiab nej yog lawv cov tub qhe kom pab tau kuv—

47 Thiab nim no, kuv hais tseeb rau Joseph Smith, tus Hluas tias—Koj tsis tau ua raws li tej lus txib, thiab yeej yuav tsum raug cem rau tus Tswv pom;

48 Koj tsev neeg yeej yuav tsum hloov siab lees txim thiab muab tej yam tso pov tseg, thiab yuav tsum mloog zoo dua rau tej koj hais, tsis li ces yuav raug muab tshem tawm ntawm lawv qhov chaw mus.

49 Kuv hais dab tsi rau ib tug ces kuv hais rau txhua tus; thov Vajtswv tas mus li nyob tsam tus niag phem ntawd muaj hwj chim nyob hauv koj, thiab muab koj tshem tawm ntawm koj qhov chaw mus.

50 Kuv tus tub qhe Newel K. Whitney thiab, ib tug npisov ntawm kuv lub koom txoos, yuav tsum raug qhuab ntuas, thiab muab nws tsev neeg kho kom muaj kab muaj kev, thiab xyuas kom lawv yuav tsum rau siab thiab mob siab dua rau hauv tsev, thiab thov Vajtswv tas mus li, tsis li ces lawv yuav raug muab tshem tawm ntawm lawv qhov chaw mus.

51 Nim no, kuv hais rau nej, kuv cov phooj ywg, kom kuv tus tub qhe Sidney Rigdon cia li mus, thiab nrawm nroos, thiab tshaj tawm lub xyoo uas tus Tswv pub txiaj ntsim, thiab txoj moo zoo ntawm kev cawm seej, raws li kuv yuav ua rau nws txawj hais lus; thiab los ntawm nej txoj kev muaj kev ntseeg thov Vajtswv nrog kev koom ib lub siab, ces kuv yuav txhawb nws.

52 Thiab cia kuv ob tug tub qhe Joseph Smith, tus Hluas, thiab Frederick G. Williams nkawd npaj nrawm nroos thiab, thiab yuav muab rau nkawd raws nraim li txoj kev muaj kev ntseeg thov Vajtswv; thiab npaum li uas nej ua raws li tej lus kuv hais nej yuav tsis raug puas tsuaj tas nyob hauv lub neej no, thiab nyob hauv lub neej yuav los.

53 Thiab, kuv hais tseeb rau nej tias, yog kuv lub siab nyiam uas nej yuav nrawm nroos los txhais kuv cov vaj lug kub, thiab kom nej paub txog keeb kwm, thiab txog tej teb chaws, thiab txog tej nceeg vaj, txog Vajtswv thiab tib neeg tej kev cai, thiab tag nrho tej no yog rau txoj kev cawm seej ntawm Xi-oos. Amees.