Benneg 49
Paltiing a naited kada Sidney Rigdon, Parley P. Pratt, ken Leman Copley, babaen ni Joseph Smith a Propeta, iti Kirtland, Ohio, idi Marso 1831 (History of the Church, 1:167–169). (Sumagmamano a nagadawan iti pakasaritaan ti mangted iti petsa daytoy a paltiing a Mayo 1831.) Inawat ni Leman Copley ti ebanghelio ngem naggudeng pay laeng kadagiti sumagmamano a pannursuro dagiti Shaker [Manangbutbuteng] (Gunglo Dagiti Mamati iti Maikadua a Panagparang ni Cristo), a sigud a pakaibilanganna. Sumagmamano kadagiti pammati dagiti Shaker a napasamaken ti maikadua a yaay ni Cristo ken nagparang iti langa ti babai, a ni Ann Lee; saan a maibilang a nasken ti panagbuniag iti danum; naipangpangruna a maipawil ti panagsida iti baboy, ken adu ti di nagsida iti ania man a karne; ken maibilang a nangatngato nga agpang ti di panangasawa ngem iti panagasawa. Iti panangirugina iti daytoy a paltiing, insurat ti Propeta, “Tapno nalawlawag ti pannakaawat iti daytoy a saritaan, nagsaludsodak iti Apo, ket naawatko ti sumaganad” (History of the Church, 1:167). Barusngien ti paltiing ti sumagmamano a nakaibatayan ti kapanunotan ti ragup dagiti Shaker. Intugot dagiti kabsat a naagapad ti kopia ti paltiing iti purok dagiti Shaker (iti asideg ti Cleveland, Ohio) ket binasada a sibubukel, ngem dida inawat.
1–7, Agtalinaedto a di ammo ti aldaw ken oras a yaay ni Cristo agingga a dumteng; 8–14, Nasken nga agbabawi ti tao, mamati iti ebanghelio, ken agtungpal kadagiti ordinansa tapno maisalakan; 15–16, Imbilin ti Dios ti panagasawa; 17–21, Maipalubos ti panagsida iti karne; 22–28, Rumang-ayto ti Zion ken agbukar dagiti Lamanite a kas iti rosas sakbay ti Maikadua a Yaay.
1 Imdenganyo ti balikasko, katulongak a Sidney, ken Parley, ken Leman; ta adtoy, pudno kunak kadakayo, a bilinenkayo a mapan mangikasaba iti ebangheliok nga inawatyo, a kas iti pannakaawatyo, kadagiti Shaker.
2 Adtoy, kunak kadakayo, a tarigagayanda a maammuan ti paset laeng ti kinapudno, ngem saan nga amin, ta saanda a pudno kaniak ket masapul nga agbabawida.
3 Gapuna, ibaonkayo, katulongak a Sidney ken Parley, a mangikasaba iti ebanghelio kadakuada.
4 Ket nasken a maordenan ni katulongak a Leman iti daytoy a trabaho, tapno maikalinteganna ida, a saan a maibatay iti inawatna kadakuada, ngem maibatay iti isuroyonto a katulongak kenkuana; ket iti panangaramidna, bendisionakto, no saan saanto a rumang-ay.
5 Kastoy ti kinuna ti Apo; ta siak ti Dios, ket imbaonko ti Bugbugtong nga Anakko iti lubong para iti pannakasubbot ti lubong, ket impaulogko nga isu nga umawat kenkuana maisalakanto, ket isu a di umawat kenkuana mailunodto—
6 Ket inaramidda iti Anak ti Tao a kas iti panangilistada; ket innalana ti bilegna iti makanawan ti dayagna, ket agturay ita iti langit, ket agturay agingga a bumaba iti daga tapno ilupekna dagiti kabusorna, iti asidegen a panawen—
7 Siak, ti Apo a Dios, nasaokon; ngem awan ti tao a makaammo iti aldaw ken oras, uray pay dagiti anghel iti langit, wenno maammuandanto agingga nga umay.
8 Gapuna, kayatko nga agbabawi dagiti amin a tao, ta nagbasolda amin, malaksid dagiti inlatangko, dagiti nasantuan a tao a diyo am-ammo.
9 Gapuna, kunak kadakayo nga impatulodko kadakayo ti agnanayon a katulagak, a kas iti dayta a manipud iti punganay.
10 Ken dayta nga inkarik tungpalek, ket agtamed dagiti pagilian iti daga; ket, no saan a ti bagbagida, bumabadanto, ta ti nangitan-ok iti bagina ita maibabanto ti bilegna.
11 Gapuna, bilinenkayo a mapan kadagitoy a tao, ket ibagayo kadakuada, a kas iti apostolko a nagkauna, a ni Pedro:
12 Mamatikayo iti nagan ti Apo a Jesus, nga adda idi iti daga, ken dumtengto, ti pangrugian ken ti panungpalan;
13 Agbabawikayo ken agpabuniag iti nagan ni Jesucristo, a maibatay iti nasantuan a bilin, para iti pannakaugas dagiti basol;
14 Ket asino man a mangaramid iti daytoy umawatto iti sagut ti Espiritu Santo, babaen ti panangipatay kadagiti dakulap dagiti elder ti simbaan.
15 Ket manen, pudno kunak kadakayo, nga asino man a mangipawil iti panagasawa saanto nga ordenan ti Dios, ta inordenan ti Dios iti tao ti panagasawa.
16 Gapuna, nainkalintegan a nasken a maaddaan iti maysa nga asawa, ket agkappengda a maymaysa, ket amin dagitoy tapno matungpal ti daga ti pannakaparsua;
17 Ket iti kasta mapno iti bilang ti tao, a maibatay iti pannakaparsuana sakbay ti pannakaaramid ti lubong.
18 Ket asino man a mangipawil iti panagsida iti karne, tapno saan met nga agsida dayta a tao, saan nga inordenan ti Dios;
19 Ta, adtoy, dagiti ayup iti talon ken dagiti tumatayab iti tangatang, ken ti agtaud iti daga, naordenan nga aramaten ti tao a taraon ken aruaten, ket tapno maaddaan iti kinabuslon.
20 Ngem saan a naited a gamgamen ti maysa a tao iti ad-adu ngem ti sabali, gapuna managbasol ti lubong.
21 Ket ay-ayto pay ti tao a mamagsayasay iti dara wenno mangdadael iti lasag a dina kasapulan.
22 Ket manen, pudno kunak kadakayo, a saan nga umay ti Anak ti Tao iti langa ti babai, wenno tao nga agbambaniaga iti daga.
23 Gapuna, saankayo a paallilaw, ngem ituloyyo ti kinatibkeryo, a kumitkita iti langit a madayyegto, ken ti daga nga agarigenggen ken aggayonggayongto a kasla nabartek a tao, ken dagiti patad a maitan-ok, ken dagiti bantay a maipababanto, ken dagiti narusanger a lugar a mapalinisto—ket amin dagitoy inton puyoten ti anghel ti trumpetana.
24 Ngem sakbay a dumteng ti naindaklan nga aldaw ti Apo, rumang-ayto ni Jacob iti langalang, ket agbukarto dagiti Lamanite a kas iti rosas.
25 Rumang-ayto ti Zion kadagiti turod ken agragsak kadagiti bantay, ket aguummongdanto a sangsangkamaysa iti lugar nga intudingko.
26 Adtoy, kunak kadakayo, mapankayo a kas imbilinko kadakayo; agbabawikayo kadagiti amin a basolyo; dumawatkayo ket maikkankayonto; agtuktokkayo ket malukatanto kadakayo.
27 Adtoy, umayakto kadakayo ket sarunuenkayo; ket addaakto iti tengngayo, ket saankayonto a mabainan.
28 Adtoy, siak ni Jesucristo, ket umayak a di agtaktak. Pudno a kasta. Amen.