Benneg 105
Paltiing a naited babaen ni Joseph Smith a Propeta, iti Karayan Fishing, Missouri, idi 22 ti Hunio 1834 (History of the Church, 2:108–111). Kimmaro ti panagranggas dagiti manangriribuk kadagiti Santo iti Missouri, ket impakdaar dagiti nabukel a bunggoy kadagiti sumagmamano nga ili ti panggepda a mangdadael kadagiti tao. Dimteng ti Propeta manipud iti Kirtland a nangidaulo iti bunggoy a naawagan iti Kampo ti Zion, a nangisangpet iti luplupot ken abasto. Bayat ti panagkampo ti bunggoy iti Karayan Fishing, inawat ti Propeta ti paltiing.
1–5, Mabangonto ti Zion a maibagay iti celestial a paglintegan; 6–13, Naisanud iti bassit a panawen ti pannakasubbot ti Zion; 14–19, Makirangetto ti Apo kadagiti dangadang ti Zion; 20–26, Nasken nga agalibtak dagiti Santo ket saanda a pagtangsit ti naindaklan nga aramid iti panaguummongda; 27–30, Nasken a magatang dagiti daga iti Jackson ken dagiti kadarrapat a probinsia; 31–34, Awaten dagiti elder ti talugading iti balay ti Apo iti Kirtland; 35–37, Mapasantonto dagiti Santo nga agpadpada a naawagan ken napili; 38–41, Itag-ay dagiti Santo ti wagayway ti kappia iti lubong.
1 Pudno kunak kadakayo a nangummong iti bagbagiyo a sangsangkamaysa tapno maadalyo ti pagayatak maipanggep iti pannakasubbot dagiti naparigat a taok—
2 Adtoy, kunak kadakayo, no saan la a gapu iti panagsalungasing dagiti taok, a nagsao maipanggep iti simbaan a saan nga iti tunggal maysa, nalabit a nasubbotda koma itan.
3 Ngem adtoy, saanda a naadal ti agbalin a natulnog kadagiti banag nga impaimak kadakuada, ngem napnoda iti amin a kita ti kinadakes, ket dida nangibinglay kadagiti taraonda, kas nagbalin a sasanto, kadagiti nakurapay ken naparigat kadakuada;
4 Ken saan a nagkaykaysa a maibatay iti panagkaykaysa a kasapulan ti paglintegan iti celestial a pagarian;
5 Ket saan a mabangon ti Zion malaksid no maibatay kadagiti pagbatayan ti paglintegan ti celestial a pagarian; no saan saanko a maawat iti bagik.
6 Ket nasken a madusa dagiti taok agingga a maadalda ti panagtungpal, no kasapulan, kadagiti banag a pagsagabaanda.
7 Agsaoak a saan a maipanggep kadagiti natudingan a mangidaulo kadagiti taok, nga isuda dagiti immuna nga elder ti simbaanko, ta saanda a mapabasol amin;
8 Ngem agsaoak maipanggep kadagiti simbaanko iti ganggannaet—adunto ti agkuna: Sadino ti yan ti Diosda? Adtoy, isalakannanto ida iti oras ti panagparikut, no saan saantayonto a mapan iti Zion, ken idulintayonto ti kuartatayo.
9 Ngarud, bunga ti panagsalungasing dagiti taok, nasken unay kaniak nga aguray dagiti elderko iti bassit a panawen para iti pannakasubbot ti Zion—
10 Tapno maisaganada mismo ti bagbagida, ken tapno naan-anay pay ti pannakaisuro dagiti taok, ken maaddaan iti padas, ken naan-anay ti pannakaammoda iti pagrebbenganda, ken dagiti banag a kinasapulak iti imada.
11 Ket saan a mapasamak daytoy agingga a matalugadingan dagiti elderko iti bileg manipud iti ngato.
12 Ta adtoy, insaganak ti naindaklan a talugading ken bendision a maibukbok kadakuada, no la ketdi napudnoda ken ituloyda ti agpakumbaba kaniak.
13 Ngarud nasken unay kaniak nga aguray dagiti elderko iti ababa a panawen, para iti pannakasubbot ti Zion.
14 Ta adtoy, saanko a kasapulan kadakuada ti makiranget kadagiti dangadang ti Zion; ta, kas nasaok iti napalabas a bilinko, a tungpalekto—makirangetakto kadagiti dangadangyo.
15 Adtoy, ti managdadael nga imbaonko a mangdadael ken mangidasay kadagiti kabusorko; ket kalpasan ti saan unay nga adu a tawen saandanto a mabati a mangrugit iti patawidko, ken mangtabbaaw iti naganko kadagiti daga nga indatonko a paguummongan a sangsangkamaysa dagiti santok.
16 Adtoy, binilinko ni katulongak a Joseph Smith, Jun., a mangibaga kadagiti panuli ti balayko, nga isu dagiti mannakigubatko, dagiti agtutubok, ken agkabannuag, nga aguummong a sangsangkamaysa para iti pannakasubbot dagiti taok, ken mangrebbek kadagiti torre dagiti kabusorko, ken mangwarawara kadagiti agbantayda;
17 Ngem saan a dimngeg dagiti panuli ti balayko kadagiti balikasko.
18 Ngem gapu ta adda dagiti dimngeg kadagiti balikasko, insaganaak ida iti bendision ken talugading, no itultuloyda ti kinapudnoda.
19 Nangngegak dagiti kararagda, ket awatekto ti datonda; ket nasken unay kaniak a maipanda iti kasta a kaadayo a pakasubokan ti pammatida.
20 Ket ita, pudno kunak kadakayo, itedko kadakayo ti bilin, nga uray no mano ti umay ditoy, makapagyan iti lugar iti aglawlaw, pagyanenyo ida;
21 Ket dagiti saan a makapagyan, nga adda dagiti kaamaanda iti daya, agbatida koma iti ababa a panawen, no la ketdi tudinganto ida ni katulongak a Joseph;
22 Ta bagbagaakto maipanggep iti daytoy a banag, ket matungpalto amin a banag a kayatna nga ituding kadakuada.
23 Ket agbalin koma a napudno unay amin dagiti taok nga agindeg iti lugar iti aglawlaw, ken managkararag, ken agpakumbaba kaniak, ken dida ipalgak dagiti banag nga impalgakko kadakuada, agingga a nainsiriban kaniak a naskenen a maipalgakda.
24 Saanyo a pagsasaritaan dagiti panangukom, wenno pagpannakkel ti pammati wenno uray dagiti naindaklan nga aramid, ngem annadanyo ti aguummong a sangsangkamaysa, iti maysa a lugar agingga a mabalin, a sangsangkaayo ti rikna dagiti tao;
25 Ket adtoy, ikkankayo iti tulong ken parabur kadagiti matada, tapno makapaginanakayo a sitatalna ken sitatalged, bayat ti panangibagbagayo kadagiti tao: Itdenyo ti panangukom ken linteg kadakami a maibatay iti paglintegan, ket aturendakami kadagiti biddutmi.
26 Ita, adtoy, kunak kadakayo, gagayyemko, magun-odyo ti tulong dagiti tao iti kastoy a wagas, agingga a nakapigpigsan ti buyot ti Israel.
27 Ket paluknengekto ti puspuso dagiti tao, a kas iti inaramidko iti puso ni Paraon, manen ken manen, agingga a ti katulongak a ni Joseph Smith, Jun., ken kadagiti elderko, a tinudingak, maaddaanda iti panawen a mangummong kadagiti panuli ti balayko,
28 Ken makaipatulod kadagiti masirib a lallaki, a mangipatungpal iti dayta naibilinkon maipanggep iti pannakagatang kadagiti amin a daga iti probinsia a Jackson a mabalin a gatangen, ken kadagiti kadarrapat a probinsia iti aglawlaw.
29 Ta pagayatak a magatang dagitoy a daga; ket matagikua ida dagiti santok kalpasan ti pannakagatangda a maibatay kadagiti paglintegan ti panagidaton a naitedkon.
30 Ket kalpasan ti pannakagatang dagitoy a daga, pagtalinaedek dagiti buyot ti Israel a nadalus iti panagtagikuada kadagiti dagada, a nagatangda iti napalabas babaen ti kuartada, ken ti pannakarebbek dagiti torre dagiti kabusorko a naipasango kadakuada, ken nangwarawara kadagiti agbambantay, ken nangibales kaniak kadagiti kabusorko iti maikatlo ken maikapat a kaputotan dagiti gumurgura kaniak.
31 Ngem mapapigsa koma nga umuna ti buyotko, ken mapasanto koma iti imatangko, tapno agbalin a nalawag a kas iti init, ken nadalus a kas iti bulan, ken tapno pagamkan dagiti wagaywayna iti amin a pagilian;
32 Tapno mapilitan dagiti pagarian iti lubong nga umawat a ti pagarian ti Zion ti talaga a pagarian ti Diostayo ken Cristona; ngarud, paiturayantayo koma kadagiti paglinteganna.
33 Pudno kunak kadakayo, nasken unay kaniak a rumbeng nga umawat dagiti immuna nga elder ti simbaanko ti talugadingda manipud iti ngato iti balayko, nga imbilinko a mabangon babaen ti naganko iti daga ti Kirtland.
34 Ket maaramid ken maipatungpal koma dagiti bilin nga intedko maipanggep iti Zion ken ti paglinteganna, kalpasan ti pannakasubbotna.
35 Adda aldaw a pannakatuding, ngem dimtengen ti aldaw a panagpili; ket maikari koma dagiti mapili.
36 Ket maipakitanto iti katulongak, babaen ti timek ti Espiritu, dagiti napili; ket mapasantodanto;
37 Ket no la ketdi tungpalenda dagiti balakad nga awatenda, addanto bilegda kalpasan ti adu nga aldaw a mangaramid kadagiti amin a banag a maipanggep iti Zion.
38 Ket kunak manen kadakayo, tuntonenyo ti kappia, saan laeng a kadagiti tao a nangdangran kadakayo, ngem kadagiti pay amin a tao;
39 Ket itag-ayyo ti wagayway ti kappia, ket ipakdaaryo ti kappia kadagiti suli ti daga;
40 Ket isingasingyo ti kappia kadagiti nangdangran kadakayo, a maibatay iti timek ti Espiritu nga adda kadakayo, ket agkaykaysanto nga agtrabaho ti amin a banag para iti pagimbaganyo.
41 Ngarud, agtalinaedkayo a napudno; ket adtoy, ken imutektekan, addaak kadakayo agingga iti panungpalan. Pudno a kasta. Amen.