Benneg 3
Paltiing a naited ken ni Joseph Smith a Propeta, iti Harmony, Pennsylvania, idi Hulio 1828, maipanggep iti pannakapukaw ti 116 a panid ti manuskrito a naipatarus manipud iti umuna a paset ti Libro ni Mormon, a naawagan iti Libro ni Lehi. Nagkedked ti Propeta a mangitalek kadagitoy a panid iti dayta a Martin Harris, a nagserbi iti ababa a panawen a para surat iti pannakaipatarus ti Libro ni Mormon. Naited ti paltiing babaen ti Urim ken Tumim. (History of the Church, 1:21–23.) (Kitaen ti benneg 10.)
1–4, Maysa nga awan inggana a panagrikus ti turong ti Apo; 5–15, Nasken nga agbabawi ni Joseph Smith wenno mapukawna ti sagut iti panagipatarus; 16–20, Dumteng ti Libro ni Mormon a mangisalakan iti bukel ni Lehi.
1 Dagiti aramid, ken dagiti balabala, ken dagiti panggep ti Dios saan a mapaay, wenno masayang.
2 Ta saan a magna ti Dios iti killo a dana, wenno agbaw-ing iti makanawan wenno iti makanigid, wenno agaramid iti maigidiat iti imbagana, ngarud nalinteg dagiti dalanna, ket maysa nga awan inggana a panagrikus ti turongna.
3 Laglagipenyo, laglagipenyo a saan a ti aramid ti Dios ti mapaay, ngem ti aramid dagiti tao;
4 Ta nupay adu ti paltiing ti tao, ken addaan iti bileg nga agaramid kadagiti naindaklan nga aramid, ngem ipagpannakkelna met ti pigsana, ken tagtagiawanenna dagiti pammagbaga ti Dios, ket surotenna ti panniktar ti pagayatanna ken dagiti nailubongan a tarigagayna, nasken a matnag ken sagabaenna ti panagibales kenkuana ti nalinteg a Dios.
5 Adtoy, naitalek kenka dagitoy a banag, ngem kasano ti kaiget dagiti bilinmo; ken laglagipem met dagiti kari a naaramid kenka, no saanmo ida a labsingen.
6 Ket adtoy, kasano ti kasansan ti panaglabsingmo kadagiti bilin ken paglintegan ti Dios, ket simmurotka iti pananguyot dagiti tao.
7 Ta, adtoy, saanka koma a nagbuteng iti tao nga ad-adda ngem iti Dios. Nupay tinagiawan dagiti tao dagiti pammagbaga ti Dios, ken umsienda dagiti balikasna—
8 Nagtalinaedka koma latta a napudno; ket intanggayana koma ti takiagna ket tinarabaynaka kadagiti nakaam-amak a pana ti kabusor; ket adda koma kenka iti amin a kanito ti riribuk.
9 Adtoy, sika ni Joseph, ket sika ti napili a mangaramid iti aramid ti Apo, ngem gapu iti pagbasolan, no dimo ammo matnagkanto.
10 Ngem laglagipem, manangngaasi ti Dios; ngarud, agbabawika iti naaramidmo a maisuppiat iti bilin nga intedko kenka, ket sika pay laeng ti mapili, ket maitedto manen kenka ti trabaho;
11 Malaksid no aramidem daytoy, mabaybay-ankanto ket agbalinka a kas kadagiti sabali a tao, ket awanton ti sagutmo.
12 Ket no ipatungpalmo dagiti inted kenka ti Dios a panagkita ken bileg nga agipatarus, yawatmo dayta a sagrado kadagiti ima ti nadangkes a tao,
13 A nangtagiawan kadagiti pammagbaga ti Dios, ken nanglabsing kadagiti kasagraduan a kari a naaramid iti imatang ti Dios, ken nagpannuray iti bukodna a pangngeddeng ken impannakkelna ti bukodna a sirib.
14 Ket daytoy ti gapu ti pannakapukawmo kadagiti kalintegam iti maysa a panawen—
15 Ta impalubosmo a mailudekludek manipud pay idi damo ti pammagbaga ti mangiturturongmo.
16 Nupay kasta, maituloy ti aramidko, ta idinto nga immay ti pannakaammo iti Mangisalakan iti lubong, babaen ti pammaneknek dagiti Hudio, kastanto met ti idadateng kadagiti taok ti pannakaammo iti Mangisalakan—
17 Ken kadagiti Nephite, ken dagiti Jacobite, ken dagiti Josephite, ken dagiti Zoramite, babaen ti pammaneknek dagiti ammada—
18 Ket dumtengto daytoy a pammaneknek iti pannakaammo dagiti Lamanite, ken dagiti Lemuelite, ken dagiti Ismaelite, a napukawan iti pammati gapu iti basbasol dagiti ammada, a binaybay-an ti Apo a mangdadael kadagiti kabsatda a Nephite, gapu iti basbasolda ken dagiti makadurmen nga aramidda.
19 Ket gapu iti daytoy a panggep ti nakataginayonan dagiti pinanid, a naglaon kadagitoy a kasuratan—tapno mabalin a matungpal dagiti kari ti Apo, nga inaramidna kadagiti taona;
20 Ken bareng no dumteng iti pannakaammo dagiti Lamanite kadagiti ammada, ken bareng no maammuanda dagiti kari ti Apo, ken tapno patienda ti ebanghelio ken agpannurayda kadagiti kinaimbag ni Jesucristo, ken maitan-okda babaen ti pammati iti naganna, ken tapno bareng no maisalakanda babaen ti panagbabawida. Amen.