1 Nyob rau hnub tim peb ntawm lub Kaum Hli Ntuj, ntawm xyoo ib txhiab cuaj puas kaum yim, kuv tau zaum hauv kuv chav tsev tab tom xav txog cov vaj lug kub;

2 Thiab tab tom rov xav txog txoj kev txi theej txhoj tseem ceeb uas Vajtswv Leej Tub tau ua, kom txhiv neeg ntiaj teb dim;

3 Thiab Leej Txiv thiab Leej Tub txoj kev hlub zoo kawg nkaus tiag tiag uas qhia tawm los ntawm qhov uas tus Txhiv Dim los rau hauv lub ntiaj teb;

4 Hais tias vim yog los ntawm nws txoj kev theej txhoj, thiab los ntawm kev ua raws li tej ntsiab cai ntawm txoj moo zoo, tib neeg txais tau kev cawm dim.

5 Thaum kuv ua li no, kuv lub cim xeeb rov qab xav txog tej lus uas tus thwj tim Petus sau, mus rau cov ntseeg thaud uas tawg khiav ri niab mus thoob Pootus, Kalatias, Kapadaukias, thiab lwm qhov chaw nyob hauv Axias, uas Khetos cov thwj tim tau tshaj tawm txoj moo zoo mus lawm tom qab tus Tswv raug ntsia rau saum tus ntoo khaub lig.

6 Kuv tau qhib phau Npaivnpaum thiab nyeem tshooj peb thiab plaub ntawm Petus thawj tsab ntawv, thiab thaum kuv nyeem kuv tau pom meej, tshaj li kuv tau pom yav tas los, los ntawm cov lus nram no:

7 “Vim muaj ib zaug Khetos tau raug txom nyem them tej kev txhaum, tus ncaj ncees raug kom them rau cov tsis ncaj ncees, xwv kom nws muaj peev xwm coj tau peb mus cuag Vajtswv, nws sab cev nqaij daim tawv raug tua tuag, tiam sis tus Ntsuj Plig txhawb nws txoj sia:

8 “Nws thiaj tau mus thiab tshaj tawm Vajtswv txoj lus rau cov ntsuj plig uas raug kaw;

9 “Cov ntsuj plig uas qee lub sij hawm tsis mloog lus, es muaj ib zaug Vajtswv tau ua siab ntev rau lawv thaum Nau-as ua neej nyob, thaum nws tab tom npaj lub nkoj, tsuas yog ob peb leeg xwb, uas yog, muaj yim leej xwb thiaj dim los ntawm dej.” (1 Petus 3:18–20.)

10 “Twb yog vim li no thiaj tau coj txoj moo zoo mus tshaj tawm rau lawv cov uas tau tuag lawm, xwv kom lawv yuav raug txiav txim raws li neeg thaum muaj cev nqaij daim tawv, tiam sis ua neej raws li Vajtswv siab nyiam ntawm sab ntsuj plig.” (1 Petus 4:6.)

11 Thaum kuv xav txog tej yam uas tau muab sau cia no, ua rau lub qhov muag ntawm kuv txoj kev to taub qhib, thiab tus Tswv tus Ntsuj Plig los rau kuv, thiab kuv pom ib tsoom neeg ntawm cov tuag, tag nrho cov yau thiab cov hlob.

12 Thiab muaj ib pab ntsuj plig suav tsis txheeb ntawm cov neeg ncaj ncees uas sib sau ua ke rau ib qho chaw, yog cov uas tau rau siab ntseeg txoj lus tim khawv txog Yexus thaum lawv tseem nyob hauv lub ntiaj teb uas txawj tuag no;

13 Thiab yog cov uas tau muab kev txi ua lub cim piv txog txoj kev txi tseem ceeb ntawm Vajtswv Leej Tub, thiab tau raug kev txom nyem los ntawm lawv tus Txhiv Dim lub npe.

14 Tag nrho cov neeg no tau ncaim lub neej hauv ntiaj teb no mus lawm, muaj kev cia siab ruaj rau kev sawv rov los uas muaj yeeb koob, los ntawm Vajtswv uas yog Leej Txiv thiab nws Tib Leeg Tub uas yog Yexus Khetos txoj kev tshav ntuj.

15 Kuv pom hais tias lawv tau muaj kev xyiv fab thiab kev zoo siab puv npo, thiab lawv xyiv fab hlo ua ke vim twb txog lub sij hawm uas lawv yuav dim lawm.

16 Lawv txoos ua ke tos ntsoov Vajtswv Leej Tub txoj kev los mus rau hauv lub ntuj ntsuj plig, los mus tshaj tawm lawv txoj kev txhiv dim tej hlua ntawm txoj kev tuag.

17 Lawv tej hmoov av uas tsaug zog yuav txum tim rov mus rau lawv lub cev zoo tag nrho, cov pob txha nyias txuas rau nyias, thiab cov leeg thiab tej nqaij mus rau lawv, tus ntsuj plig thiab lub cev yuav los ua ke thiab yuav tsis sib cais ib zaug ntxiv li lawm, xwv kom lawv yuav txais tau ib txoj kev xyiv fab puv npo.

18 Thaum cov neeg coob coob no tseem tos thiab tseem sib tham, zoo siab kawg rau lub sij hawm uas yuav tso lawv dim txoj kev tuag tej saw hlau, Vajtswv Leej Tub txawm tshwm los, tshaj loo txoj kev ywj pheej rau cov raug kaw uas rau siab ntseeg;

19 Thiab nyob ntawd nws tshaj tawm txoj moo zoo uas kav ib txhis rau lawv, uas yog tej lus qhuab qhia txog txoj kev sawv rov los thiab txoj kev txhiv tib neeg dim ntawm txoj kev poob, thiab dim ntawm nyias tej kev txhaum yog hloov siab lees txim.

20 Tiam sis rau cov neeg phem nws twb tsis mus, thiab nyob hauv cov tsis mloog Vajtswv lus thiab cov tsis hloov siab lees txim uas tau ua rau lawv tus kheej qias thaum muaj cev nqaij daim tawv, nws twb tsis tau tsa suab rau lawv;

21 Thiab cov neeg ntxeev siab uas tau xyeej tej lus tim khawv thiab tej lus ceeb toom ntawm cov yaj saub yav thaum ub kuj tsis tau pom nws lub yeeb haum, thiab tsis tau ntsia nws lub ntsej muag.

22 Qhov chaw uas cov no nyob, kev tsaus ntuj kav, tiam sis nyob ntawm cov neeg ncaj ncees muaj kev kaj siab lug;

23 Thiab cov ntseeg xyiv fab rau lawv txoj kev txhiv dim, thiab txhos lub hauv caug pe thiab lees Vajtswv Leej Tub ua lawv tus Txhiv Dim thiab tus Cawm Dim ntawm kev tuag thiab tej saw hlau ntawm ntuj txiag teb tsaus.

24 Lawv lub ntsej muag ci ci, thiab txoj kev ci ntsa iab los ntawm tus Tswv lub yeeb haum tsaws rau saum lawv, thiab lawv hu nkauj qhuas nws lub npe dawb huv.

25 Kuv xav tsis thoob, vim kuv to taub tias tus Cawm Seej siv li ntawm peb xyoos hauv nws txoj kev qhuab qhia nrog cov Neeg Yudais thiab cov uas yog tsev neeg Ixayees, mob siab npaj qhia txoj moo zoo uas kav ib txhis rau lawv thiab hais kom lawv hloov siab lees txim;

26 Thiab txawm hais tias nws tau ua tej yam zoo kawg, thiab tej txuj ci tseem ceeb, thiab kev tshaj tawm qhov tseeb, los ntawm hwj chim thiab txoj cai loj, los tsuas muaj tsawg tus uas mloog nws lub suab, thiab xyiv fab nyob ntawm nws xub ntiag, thiab txais kev cawm seej ntawm nws tes.

27 Tiam sis qhov uas nws mus qhuab qhia rau cov uas tuag lawm tsuas yog muaj nyob rau lub sij hawm tsis ntev tom qab nws raug ntsia rau saum ntoo khaub lig thiab ua ntej nws txoj kev sawv rov los xwb;

28 Thiab kuv tau xav txog Petus tej lus—thaum nws hais tias Vajtswv Leej Tub mus qhia Vajtswv txoj lus rau cov ntsuj plig uas raug kaw, cov uas qee lub sij hawm tsis mloog lus, thaum yav tas los Vajtswv ua siab ntev rau lawv thaum Nau-as ua neej nyob—thiab ua li cas nws ho mus qhia tau txoj moo zoo rau cov ntsuj plig ntawd thiab mus ua tau tej hauj lwm uas yuav tsum ua nyob hauv lawv rau lub sij hawm luv npaum li ntawd.

29 Thiab thaum kuv xav txog qhov no, ua rau kuv lub qhov muag txawm qhib, thiab txhawb kuv txoj kev to taub, thiab kuv to taub hais tias tus Tswv nws tus kheej tsis tau mus rau hauv cov neeg phem thiab cov tsis mloog lus uas tau xyeej txoj kev tseeb, mus qhia lawv;

30 Tiam sis saib seb, los ntawm cov neeg ncaj ncees, nws tau tsa nws pab neeg thiab txib tej tub xa xov, cov uas muaj hwj chim thiab muaj txoj cai, thiab tso cai kom lawv mus thiab coj txoj kev kaj ntawm txoj moo zoo mus rau lawv cov uas nyob hauv qhov tsaus ntuj, twb yog rau tag nrho cov ntsuj plig ntawm tib neeg; thiab yog li ntawd tau tshaj tawm txoj moo zoo mus rau cov tuag zoo li no.

31 Thiab cov tub xa xov uas tau xaiv mus tshaj txog lub caij tus Tswv pub txiaj ntsim thiab tshaj tawm txoj kev ywj pheej rau cov uas raug txhom khi, uas twb yog rau tag nrho cov uas yuav hloov siab lees txim rau lawv tej kev txhaum thiab txais txoj moo zoo.

32 Tau tshaj tawm txoj moo zoo zoo li no mus rau cov uas tuag thaum lawv tseem muaj kev txhaum, tsis tau paub qhov tseeb, los yog ua kev txhaum, vim lawv xyeej cov yaj saub.

33 Tau qhia cov no txog txoj kev ntseeg Vajtswv, kev hloov siab lees txim rau tej kev txhaum, kev sawv lwm tus cev ua kev cai raus dej rau txoj kev zam txim rau tej kev txhaum, lub txiaj ntsim Vaj Ntsuj Plig Dawb Huv los ntawm kev tso tes saum taub hau,

34 Thiab tag nrho lwm lub ntsiab cai ntawm txoj moo zoo uas lawv yuav tsum paub thiaj ua rau lawv tus kheej zoo txaus xwv kom lawv yuav raug txiav txim raws li tej neeg thaum muaj cev nqaij daim tawv, tiam sis ua neej raws li Vajtswv siab nyiam ntawm sab ntsuj plig.

35 Ces tau qhia zoo li no nyob hauv cov tuag, tag nrho cov yau thiab cov hlob, rau cov tsis ncaj ncees thiab rau cov uas rau siab ntseeg thiab, hais tias lawv txais txoj kev txhiv dim los ntawm Vajtswv Leej Tub txoj kev txi nyob saum tus ntoo khaub lig.

36 Tau qhia zoo li no hais tias peb tus Txhiv Dim siv nws lub sij hawm thaum nws nyob hauv lub ntuj ntsuj plig, qhia thiab npaj cov ntsuj plig ntawm cov yaj saub uas rau siab ntseeg uas tau ua tim khawv txog nws thaum muaj cev nqaij daim tawv;

37 Kom lawv yuav coj tsab xov txog txoj kev txhiv dim mus rau tag nrho cov tuag, mus rau cov uas nws tus kheej mus tsis tau rau, vim yog lawv tej kev ntxeev siab thiab kev ua txhaum, kom los ntawm nws cov tub qhe txoj kev mus qhuab qhia lawv thiaj yuav hnov nws tej lus thiab.

38 Nyob hauv cov neeg tseem ceeb thiab muaj hwj chim uas tau tuaj txoos ua ke nyob hauv pawg neeg ncaj ncees coob coob no yog muaj Txiv Adas, tus Laus Hnub Laus Nyoog thiab tag nrho sawv daws txiv,

39 Thiab peb Niam Evas uas muaj yeeb koob, nrog rau nws ntau leej ntxhais uas nyob hauv ntau tiam uas rau siab ntseeg thiab teev tiam Vajtswv tus uas tseeb thiab muaj txoj sia nyob.

40 Anpees, uas yog thawj tug neeg tuag rau txoj kev ntseeg, kuj nyob ntawd, thiab nws tus kwv Xej, uas yog ib tug ntawm cov muaj hwj chim, tus uas muaj yam ntxwv zoo li nws txiv Adas.

41 Nau-as, tus uas ceeb toom txog dej nyab ntiaj teb; Xees, uas yog tus pov thawj hlob tseem ceeb; Anplaham, uas yog leej txiv ntawm cov rau siab ntseeg; Ixaj, Yakhauj, thiab Mauxes, tus tseem ceeb uas muab kev cai rau cov Neeg Ixayees;

42 Thiab Yaxayas, tus uas tshaj tawm tej yuav muaj los yav tom ntej hais tias tau tsa tus Txhiv Dim los mus khi tuav cov uas muaj lub siab puas tag, los mus tshaj tawm txoj kev ywj pheej rau cov raug kaw, thiab txoj kev qhib lub tsev kaw rau cov raug muab khi cia, los kuj nyob ntawd thiab.

43 Tsis tas li ntawd xwb, Exekees, tus uas tau ua yog toog pom lub hav loj uas muaj tej pob txha qhuav qhawv, uas yuav muaj nqaij los vov, uas yuav rov qab sawv los thaum cov tuag sawv rov los ua cov neeg muaj txoj sia;

44 Danias, tus uas pom ua ntej thiab qhia ua ntej txog txoj kev tsim Vajtswv lub nceeg vaj nyob hauv hnub nyoog kawg, uas yuav tsis raug puas tsuaj thiab tsis muab rau lwm haiv neeg ib zaug ntxiv;

45 Eli-as, tus uas nyob nrog Mauxes saum lub Roob Hloov Hlo;

46 Thiab Malakis, tus yaj saub uas ua tim khawv txog Eliyas txoj kev los—tus uas Maulaunais tau hais txog rau tus Yaj Saub Joseph Smith, tshaj tawm hais tias nws yuav tsum los ua ntej hnub tseem ceeb thiab txaus ntshai ntawm tus Tswv yuav pib—lawv kuj nyob ntawd thiab.

47 Tus Yaj Saub Eliyas yog tus muab tej kev cog lus uas tau muab cog tseg rau lawv cov yawg koob coj los cog rau hauv cov me nyuam lub siab,

48 Uas qhia ua ntej txog txoj hauj lwm tseem ceeb uas yuav ua nyob hauv tus Tswv cov tuam tsev nyob hauv lub caij nyoog tso txoj cai uas muaj txhij txhua, rau txoj kev txhiv cov tuag dim, thiab txoj kev muab cov me nyuam khi rau lawv niam thiab txiv, tsis li ces tag nrho neeg ntiaj teb yuav raug ib txoj kev foom tsis zoo thiab puas tsuaj huv tib si mus thaum nws los.

49 Tag nrho cov no thiab ntau ntxiv, tsis hais cov yaj saub uas nyob hauv cov Neeg Nifais thiab ua tim khawv txog Vajtswv Leej Tub txoj kev los, lawv koom tes nyob hauv lub rooj sib txoos loj loj thiab tos rau lawv txoj kev cawm dim,

50 Vim cov tuag tau xav hais tias qhov uas lawv cov ntsuj plig sib ncaim ntev loo ntawm lawv lub cev nqaij yeej zoo li kev ua cev qhev.

51 Tus Tswv qhia cov no, thiab muab hwj chim rau lawv kom sawv los, tom qab tus Tswv txoj kev sawv hauv qhov tuag rov los, kom nkag mus rau hauv nws Txiv lub nceeg vaj, mus txais lub meej mom tsis txawj tuag thiab txoj sia nyob mus ib txhis,

52 Thiab ua lawv tej hauj lwm mus ntxiv txij lub sij hawm ntawd mus ib yam li tus Tswv tau cog lus tseg, thiab yog cov tau txais tag nrho tej koob hmoov uas tau muab tshwj tseg cia rau lawv cov uas hlub nws.

53 Tus Yaj Saub Joseph Smith, thiab kuv txiv, uas yog Hyrum Smith, Brigham Young, John Taylor, Wilford Woodruff, thiab lwm tus ntsuj plig uas tau tshwj tseg cia kom los yug rau lub caij nyoog uas muaj txhij txhua los koom tes hauv txoj kev teeb lub hauv paus ntawm txoj hauj lwm tseem ceeb hauv hnub nyoog kawg,

54 Tsis hais kev txhim tsa tej tuam tsev thiab txoj kev ua kab ke nyob rau haud pub rau txoj kev txhiv cov tuag dim, kuj nyob hauv lub ntuj ntsuj plig thiab.

55 Kuv pom hais tias lawv kuj nyob ua ke nrog cov neeg tsim txiaj thiab cov neeg muaj hwj chim uas tus Tswv tau xaiv thaum chiv keeb los ua cov kav nyob hauv Vajtswv lub Koom Txoos.

56 Ua ntej lawv yug, lawv, nrog rau ntau tus ntxiv, tau txais lawv tej thawj zaj lus kawm nyob hauv lub ntuj ntsuj plig thiab tau npaj los thaum txog lub sij hawm tus Tswv pom zoo los ua hauj lwm nyob hauv nws lub vaj txiv ntoo roj rau txoj kev cawm seej ntawm neeg cov ntsuj plig.

57 Kuv pom hais tias cov txwj laug uas rau siab ntseeg nyob rau lub caij nyoog tso txoj cai no, thaum lawv ncaim lub neej hauv ntiaj teb no mus, lawv ua lawv tej hauj lwm ntxiv mus tshaj tawm txoj moo zoo ntawm kev hloov siab lees txim thiab kev txhiv dim, los ntawm Vajtswv Tib Leeg Tub txoj kev txi, rau cov uas nyob hauv qhov tsaus ntuj thiab ua qhev rau kev txhaum nyob hauv lub ntuj loj ntawm cov tuag cov ntsuj plig.

58 Cov tuag uas hloov siab lees txim yuav txais kev txhiv dim, los ntawm kev ua raws li cov kab ke hauv Vajtswv lub tsev,

59 Thiab tom qab lawv tau raug txim rau lawv tej kev ua txhaum lawm, thiab tau ntxuav lawv huv lawm, lawv yuav txais nqi zog raws li tej yam lawv ua, vim lawv yog cov uas muaj tug txais txoj kev cawm seej.

60 Tus Tswv tau muab txoj kev ua yog toog pom txoj kev txhiv cov tuag dim qhia tshwm sim los rau kuv li no, thiab kuv ua pov thawj, thiab kuv paub hais tias zaj lus pov thawj no muaj tseeb, los ntawm peb tus Tswv thiab Cawm Seej, Yexus Khetos, txoj koob hmoov, twb yog li ntawd. Amees.