1 Thiab tau muaj tias peb rov pib kho lub teb chaws dua thiab peb rov pib nyob muaj kev thaj yeeb hauv thaj av. Thiab kuv txib kom yuav tsum ua tej cuab yeej ua rog txhua yam, xwv kom kuv thiaj yuav muaj tej cuab yeej rau kuv cov neeg thaum lub sij hawm cov Neeg Lamas rov qab tuaj ua rog tawm tsam kuv cov neeg dua.

2 Thiab kuv txib kom muaj neeg zov ib puag ncig ntawm thaj av, xwv kom cov Neeg Lamas tsis txhob tuaj ntsiag to tawm tsam peb thiab ua rau peb puas tsuaj; thiab kuv tau tiv thaiv kuv cov neeg thiab kuv tej tsiaj zoo li no, thiab ua kom lawv tsis txhob poob mus rau peb cov yeeb ncuab tes.

3 Thiab tau muaj tias peb tau peb cov yawg koob thaj av los ua peb tug tau ntau xyoo, muaj tseeb tiag, tau nees nkaum ob xyoos.

4 Thiab kuv tau txib kom cov txiv neej yuav tsum mus ncaws teb, thiab cog txhua yam noob thiab txhua yam txiv ntoo.

5 Thiab kuv tau txib kom cov poj niam yuav tsum xaws, thiab rau siab ua dej num, thiab ua hauj lwm, thiab ntos txhua yam ntaub zoo nkauj, muaj tseeb tiag, thiab khaub ncaws txhua yam, xwv kom peb yuav tau hnav npog peb tej kev liab qab; thiab peb tau vam meej li no nyob hauv thaj av—peb tau muaj kev thaj yeeb li no tsis tu ncua nyob rau hauv thaj av tau nees nkaum ob xyoos.

6 Thiab tau muaj tias vaj ntxwv Lamas tau tuag; thiab nws tus tub tau pauv nws qhov chaw los kav. Thiab nws pib txhaub nws cov neeg kom ntxeev siab tawm tsam kuv cov neeg; yog li ntawd lawv pib npaj ua rog, thiab tuaj ua rog tawm tsam kuv cov neeg.

7 Tiam sis kuv tau xa kuv cov tub nyiag xov tawm mus ncig thaj av Seloos, xwv kom kuv yuav nrhiav paub txog lawv tej kev npaj ua rog, xwv kom kuv yuav tawm tsam tau lawv, xwv kom lawv yuav tuaj tsis tau rau kuv cov neeg thiab ua rau lawv puas tsuaj.

8 Thiab tau muaj tias lawv tuaj rau pem sab qaum teb ntawm thaj av Sailos, nrog lawv cov tub rog coob, tej txiv neej uas muaj hneev, thiab xub, thiab ntaj, thiab liag, thiab pob zeb, thiab hlua fiav; thiab lawv muab lawv lub taub hau chais do dus; thiab lawv hnav tawv tsiaj npog lawv ob ceg.

9 Thiab tau muaj tias kuv txib kom cov poj niam thiab cov me nyuam ntawm kuv cov neeg mus nkaum nyob hauv hav zoov; thiab kuv kuj txib kom txhua tus neeg laus thiab txhua tus neeg hluas ntawm kuv cov neeg uas tseem muaj cuab kav tuav tau ntaj riam yuav sib sau tuaj ua ke mus ua rog tawm tsam cov Neeg Lamas; thiab kuv tau muab lawv tso rau lawv qhov chaw, txhua tus txiv neej raws li nws hnub nyoog.

10 Thiab tau muaj tias peb tau mus ua rog tawm tsam cov Neeg Lamas; thiab kuv, txawm tias kuv laus lawm, tau mus ua rog tawm tsam cov Neeg Lamas. Thiab tau muaj tias peb tau mus ua rog nrog tus Tswv lub zog.

11 Nim no, cov Neeg Lamas tsis paub dab tsi txog tus Tswv, los sis txog nws lub zog li, yog li ntawd lawv vam khom rau lawv tus kheej lub zog. Tiam sis lawv kuj yog ib co neeg muaj zog, xws li ntawm tib neeg lub zog.

12 Lawv yog ib co neeg qus, thiab tsiv heev, thiab ib co neeg nyiam tua neeg, ntseeg lawv cov yawg koob tej kab lis kev cai, uas yog li no—Lawv ntseeg hais tias lawv raug ntiab tawm ntawm thaj av Yeluxalees mus vim yog lawv cov yawg koob tej kev ua phem, thiab hais tias lawv cov kwv tij tau ua tsis ncaj rau lawv nyob hauv roob moj sab qhua, thiab lawv cov kwv tij kuj tau ua tsis ncaj rau lawv thaum tab tom hla dej hiav txwv;

13 Thiab ntxiv, hais tias lawv cov kwv tij tau ua tsis ncaj rau lawv thaum nyob hauv thaj av uas yog lawv thawj qhov qub txeeg qub teg, tom qab lawv tau hla dej hiav txwv, thiab tag nrho tej no vim yog Nifais rau siab tshaj lawv ua raws li tus Tswv tej lus txib—yog li ntawd tus Tswv txhawb nqa nws heev, vim tus Tswv hnov nws tej lus thov thiab tau teb nws, thiab nws tau coj lawv mus nyob rau hauv roob moj sab qhua.

14 Thiab nws cov kwv tij npau taws rau nws vim lawv tsis to taub tus Tswv tej kev ua dej ua num; lawv kuj tau npau taws rau nws thaum nyob saum cov dej vim lawv ua lawv lub siab tawv qhawv tawm tsam tus Tswv.

15 Thiab ntxiv, lawv npau taws rau nws thaum lawv tuaj txog rau hauv thaj av uas cog lus cia, vim lawv hais tias nws tau txeeb kav cov neeg uas yog lawv tug; thiab lawv nrhiav kev muab nws tua.

16 Thiab ntxiv, lawv npau taws rau nws vim nws khiav tawm mus rau hauv hav zoov raws li tus Tswv tau txib nws, thiab nqa cov ceev xwm txheej uas muab sau rau saum cov phiaj toog, vim li no lawv hais tias nws nyiag lawv tug.

17 Thiab xws li no lawv tau qhia lawv cov me nyuam kom lawv ntxub, thiab kom lawv tua, thiab kom lawv ua tub sab nyiag thiab tua txeeb tej khoom, thiab ua txhua yam uas lawv ua tau los rhuav cov Neeg Nifais; yog li ntawd lawv muaj kev ntxub uas nyob mus ib txhis rau Nifais cov xeeb leej xeeb ntxwv.

18 Vim yog rau lub hom phiaj no vaj ntxwv Lamas thiaj tau dag kuv, los ntawm nws txoj kev txawj haub, thiab kev txawj dag ntxias, thiab nws tej lus cog tseg, kuv thiaj tau coj kuv cov neeg tuaj nyob rau hauv thaj av no, xwv kom lawv thiaj ua tau rau peb puas tsuaj; muaj tseeb tiag, thiab peb raug kev txom nyem tau ntau xyoo nyob rau hauv thaj av.

19 Thiab nim no kuv, Xeenas, tom qab tau qhia txhua yam no rau kuv cov neeg ntsig txog cov Neeg Lamas, kuv tau txhawb kom lawv mus ua rog nrog lawv lub dag zog, tso siab rau tus Tswv; yog li ntawd, peb tau nrog cov Neeg Lamas sib tawm tsam tim ntsej tim muag.

20 Thiab tau muaj tias peb rov qab ntiab lawv tawm ntawm peb thaj av dua; thiab peb tua lawv tuag coob kawg nkaus, coob heev li uas peb twb tsis suav lawv.

21 Thiab tau muaj tias peb rov qab los rau hauv peb thaj av, thiab kuv cov neeg tau rov pib zov lawv tej yaj, thiab ncaws lawv tej teb.

22 Thiab nim no kuv, vim kuv laus lawm, tau tso lub nceeg vaj rau kuv ib tug tub; yog li ntawd, kuv tsis hais ntxiv lawm, thiab thov kom tus Tswv foom koob hmoov rau kuv cov neeg. Amees.