Դաս 17․ Ուսուցչի նյութ

Պատկանել Տիրոջ Եկեղեցուն

Ինչպես Իր հետևորդների համար Պաղեստինում, այնպես էլ Նեփիացիների և Լամանացիների մեջ Հիսուս Քրիստոսը կազմավորեց Իր Եկեղեցին: Նա կանչեց տասներկու աշակերտների և նրանց քահանայության իշխանություն տվեց: Այս դասը ուսանողներին հնարավորություն կտա կենտրոնանալ հաղորդության արարողության վրա և պարզել, թե ինչ կարող են անել` այն ավելի իմաստալի և Քրիստոսակենտրոն դարձնելու համար: Ուսանողները նաև կորոշեն, թե ինչ կարող են անել, որ օգնեն մյուսներին իրենց ծխերում կամ ճյուղերում ունենալ պատկանելության և ընկերակցության զգացում:

Ուսուցման առաջարկներ

Հիսուս Քրիստոսը հաստատում է հաղորդությունը և պատվիրում մարդկանց միմյանց հաճախ հանդիպել և ոչ մեկին չարգելել մասնակցել իրենց երկրպագությանը

Ցույց տվեք հետևյալ պատկերը և հիշեցրեք ուսանողներին, որ Նեփիացիների և Լամանացիների մեջ որպես Իր ծառայության մաս, Հիսուս Քրիստոսը քահանայության իշխանությամբ օժտեց Իր տասներկու աշակերտներին և կազմավորեց Իր Եկեղեցին (տես 3 Նեփի 11.18–22, 12.1, 18.5, 37, 26.17–21):

Քրիստոսը երեք Նեփիացի աշակերտների հետ, նկարը՝ ըստ Գարի Լ. Քափի

• Ի՞նչ եք կարծում, ինչու է կարևոր, որ Տերը այդպիսի բարձր առաջնահերթություն է դրել Իր Եկեղեցին հաստատելու վրա՝ ինչպես հնում, այնպես էլ մեր օրերում: (Հրավիրեք ուսանողներին վերանայել երեց Դ․ Թոդ Քրիստոֆերսոնի հայտարարությունը նախապատրաստական նյութի բաժին 1-ում:)

Նշեք, որ չնայած Եկեղեցու մասին կան շատ տեսակետներ, որոնց վերաբերյալ մենք կարող ենք ավելին իմանալ, այս դասը կկենտրոնանա միայն երկու տեսակետների վրա: Ցուցադրեք հետևյալ հարցերը և հրավիրեք ուսանողներին ընտրել այն հարցը, որն իրենք կկամենան խորապես հետազոտել:

• Ի՞նչ կարող եմ անել, որպեսզի հաղորդությունը դառնա իմ եկեղեցական փորձառության ավելի իմաստալի մասը:

• Ինչպե՞ս կարող եմ օգնել Եկեղեցում ստեղծել ավելի հյուրընկալ և ներգրավող փորձառություն բոլոր մարդկանց համար:

Բարելավել մեր ուսուցումը և ուսումնասիրությունը

Փոքր խմբերով քննարկումներն ու հանձնարարությունները կարող են օգնել ուսանողներին ավելի խորը սովորել: Փոքր խմբեր ձևավորելը կարող է թույլ տալ ավելի մեծ թվով ուսանողների մասնակցել և կարող է ապահովել կայուն մթնոլորտ, որտեղ նրանք կարող են միմյանց հետ կիսվել մտքերով, զգացումներով, և փորձառություններով: Փոքր խմբերը կարող են նաև զարգացնել բարեկիրթ շփման և հաղորդակցության հմտություններ: Որպեսզի օգնեք ուսանողներին ավելի իմաստալի փորձառություն ունենալ փոքր խմբերում, օգտակար կլինի տրամադրել հետևյալը. (1) սկզբնաղբյուրներ, ինչպիսիք են` մեջբերումներ, գերագույն համաժողովի ելույթների պատճեներ կամ այլ օժանդակ նյութեր, (2) հստակ հրահանգներ և մտածելու տեղիք տվող հարցեր և (3) քննարկման համար շատ ժամանակ:

Հրավիրեք ուսանողներին փոքրիկ խմբեր կազմել (երեք-չորս մարդ ամեն խմբում) նրանց հետ, ովքեր ընտրել են նույն հարցը: Յուրաքանչյուր խմբին տվեք օժանդակ նյութը, որը համապատասխանում է իրենց հարցին: (Երկու օժանդակ նյութերն էլ գտնվում են այս դասի վերջում:) Հրավիրեք ուսանողներին օգտագործել օժանդակ նյութին վերաբերող հարցերը և սկզբնաղբյուրները` իմաստալի քննարկում ծավալելու համար: Մինչ խմբերը քննարկում են, շրջեք սենյակում և, անհրաժեշտության դեպքում, ուղղորդում և աջակցություն առաջարկեք:

Իրենց թեմայի քննարկման համար խմբերին բավական ժամանակ տրամադրելուց հետո հրավիրեք ուսանողներին կիսվել դասարանի հետ որոշ սկզբունքներով, որոնք նրանք սովորեցին Փրկիչի կատարած ուսուցումներից: Օգտակար կլինի, եթե մի քանի րոպե կենտրոնանաք մեկ թեմայի վրա, իսկ հետո անդրադառնաք հաջորդ թեմային:

Ուսանողները, հնարավոր է, գտնեն սկզբունքներ, որոնք նման են հետևյալին.

• Երբ ճաշակում ենք հաղորդությունը, մենք վկայում ենք Երկնային Հորը` Հիսուս Քրիստոսին միշտ հիշելու և Նրա պատվիրաններին հնազանդվելու մեր հոժարակամությունը:

• Եթե մենք ճաշակենք հաղորդությունը և միշտ հիշենք Հիսուս Քրիստոսին, մենք Նրա Հոգին մեզ հետ կունենանք։

• Տերը պատվիրում է մեզ հրավիրող և ներգրավող լինել Աստծո բոլոր զավակների հանդեպ և օգնել նրանց գալ Իր մոտ:

Երբ ուսանողները գտնեն սկզբունքները, խնդրեք նրանց գրել դրանք գրատախատակին: Խնդրեք ուսանողներին կիսվել մտքերով կամ հարցերով, որոնք իրենք ունեն այս սկզբունքներից որևէ մեկի վերաբերյալ:

Ցուցադրեք հետևյալ հարցերը և հրավիրեք ուսանողներին ընտրել մեկը կամ երկուսը՝ դրանց շուրջ խորհելու համար: Կարող եք խրախուսել ուսանողներին գրի առնել այն մտքերն ու տպավորությունները, որոնք նրանք ստանում են։

• Ի՞նչ եմ անելու, որպեսզի նախապատրաստվեմ հաղորդությունը ճաշակելուն և դարձնեմ այն ավելի իմաստալի և Քրիստոսակենտրոն փորձառություն:

• Ի՞նչ եմ անելու, որպեսզի օգնեմ մյուսներին իրենց ընդունված զգալ և Հիսուս Քրիստոսի Եկեղեցուն պատկանելու զգացում ունենալ:

Հաջորդ անգամ

Հրավիրեք ուսանողներին մտածել իրենց շրջապատող աշխարհի որոշ պայմանների մասին, որոնք կարող են դժվարացնել ավետարանով ապրելը: Խրախուսեք ձեր ուսանողներին ուսումնասիրել հաջորդ դասի նախապատրաստական նյութը, որոնելով, թե մենք ինչպես կարող ենք օգնել ուրիշներին զգալ, որ Հիսուս Քրիստոսի Եկեղեցում մեզ բոլորիս համար տեղ կա:

Հաղորդության օրհնությունները

Մորմոնի Գրքի ուսմունքները և վարդապետությունը. Ուսուցչի ձեռնարկ.Դաս 17

Հրահանգներ քահանայության ղեկավարների համար

Օգտագործեք հետևյալ հրահանգները, որպեսզի հեշտացնեք քննարկումը ձեր խմբի անդամների հետ: Խրախուսեք ձեր խմբի բոլոր անդամներին մասնակցել: Այնուամենայնիվ, ոչ ոք չպետք է պարտադրված զգա՝ կիսվելու իր մտքերով:

Ի՞նչ կարող եմ անել, որպեսզի հաղորդությունը դառնա իմ եկեղեցական փորձառության ավելի իմաստալի մասը:

Վերանայեք 3 Նեփի 18.6–12, 20.8–9-ը և երեց Ա. Բեդնարի և Դ. Թոդ Քրիստոֆերսոնի ուսմունքները նախապատրաստական նյութի բաժին 2-ում: Ապա քննարկեք հետևյալ հարցերը.

• Ի՞նչ ենք մենք վկայում Երկնային Հորը, երբ ճաշակում ենք հաղորդությունը:

• Ինչպե՞ս կարող է հաղորդությունը մեզ ավելի մոտեցնել Փրկիչին: Ինչո՞վ է ձեր կյանքը առանձնահատուկ, երբ դուք ավելի կենտրոնացած եք Հիսուս Քրիստոսի վրա և ավելի մոտ եք զգում Նրան:

• Ըստ երեց Բեդնարի և երեց Քրիստոֆերսոնի, ինչպե՞ս պետք է հաղորդությունը ազդի մեր կյանքի և բնավորության վրա ամեն շաբաթ: Արդյոք որևէ մեկը կկամենար վկայել այդ օրհնությունների մասին՝ իրենց սեփական փորձառություններից ելնելով:

• Ի՞նչն է ամենից շատն օգնել ձեզ հաղորդությունը իմաստալի և Քրիստոսակենտրոն փորձառություն դարձնելու համար:

© 2021 by Intellectual Reserve, Inc. Բոլոր իրավունքները վերապահված են:

Հաղորդության օրհնությունները

օժանդակ նյութ ուսուցչի համար

Ողջունել բոլոր մարդկանց եկեղեցում

Մորմոնի Գրքի ուսմունքները և վարդապետությունը. Ուսուցչի ձեռնարկ.Դաս 17

Հրահանգներ քահանայության ղեկավարների համար

Օգտագործեք հետևյալ հրահանգները, որպեսզի հեշտացնեք քննարկումը ձեր խմբի անդամների հետ: Խրախուսեք ձեր խմբի բոլոր անդամներին մասնակցել: Այնուամենայնիվ, ոչ ոք չպետք է պարտադրված զգա՝ կիսվելու իր մտքերով:

Ինչպե՞ս կարող եմ օգնել Եկեղեցում ստեղծել ավելի հյուրընկալ և ներգրավող փորձառություն բոլոր մարդկանց համար:

Գուցե կամենաք սկսել ձեր քննարկումը՝ գտնելով մի քանի ընդհանուր պատճառներ, թե մարդիկ ինչու կարող են ներգրավված չզգալ իրենց ծխում կամ ճյուղում: Տրամադրեք որոշ ժամանակ՝ վերանայելու 3 Նեփի 18.22–25-ը և քույր Քերոլ Ֆ. Մակքոնկիի հայտարարությունը բաժին 3-ի նախապատրաստական նյութում: Ապա քննարկեք հետևյալ հարցերը.

• Ձեր կարծիքով, այս հատվածներում ո՞ր ուսմունքներն ու սկզբունքներն են կարևոր, որ հասկանան Եկեղեցու բոլոր անդամները: Ինչո՞ւ:

• Ձեզ համար ի՞նչն էր կարևոր քույր Մակքոնկիի հայտարարության մեջ: Ի՞նչ եք կարծում, ինչ է նշանակում «տեսնել [ուրիշներին] Քրիստոսանման աչքերով»: (Carol F. McConkie, “Lifting Others” [video], ChurchofJesusChrist.org):

• Փրկիչի կյանքից ի՞նչ օրինակներ են ցույց տալիս Աստծո բոլոր զավակներին հրավիրելու և ներառելու Նրա ցանկությունը՝ անկախ նրանց հանգամանքներից:

• Ինչպե՞ս կարող ենք հետևել Փրկիչի օրինակին` լինել ավելի ներգրավող և հրավիրող անդամների և այցելուների հանդեպ, ովքեր հաճախում են մեր ծխերը կամ ճյուղերը: Ի՞նչ են արել մարդիկ, որն օգնել է ձեզ ներգրավված և ընդունված զգալ եկեղեցում:

© 2021 by Intellectual Reserve, Inc. Բոլոր իրավունքները վերապահված են:

Ողջունել բոլոր մարդկանց Եկեղեցում

ուսուցչի օժանդակ նյութ 2