Դաս 2․ Ուսուցչի նյութ

Արձագանքել Տիրոջ մարգարեներին

Տիրոջ մարգարեները բացահայտում են և ուսուցանում են Աստծո խոսքը: Եթե մենք ականջ դնենք նրանց ուսմունքներին, մենք կարող ենք զգալ Աստծո խոսքի զորությունը մեր կյանքում: Այս դասից հետո ուսանողները պետք է կարողանան բացատրել, թե ինչպես ենք մենք օրհնվում, երբ վստահում ենք Տիրոջ մարգարեներին և այն ուղերձներին, որ նրանք կանչված են հաղորդելու: Ուսանողները նաև կգնահատեն ներկայիս մարգարեական խորհրդին ականջ դնելու իրենց սեփական ջանքերը:

Ուսուցման առաջարկներ

Բարելավել մեր ուսուցումը և ուսումնառությունը

Համապատասխանեցրեք ուսուցման մեթոդները ուսանողների կարիքներին Երբեմն դասերն ավելի շատ նյութ են պարունակում, քան դուք կկարողանաք համարժեքորեն ընդգրկել դրանք դասարանում: Դասի ծրագրում ամեն ինչ ընդգրկելու փոխարեն, կենտրոնացեք սուրբ գրությունների և նյութի վրա, որն առավելապես կօգնի ձեր ուսանողներին արդյունավետ, արդար գործողություններ կատարել, որպեսզի նրանք ավելի շատ նմանվեն Երկնային Հորը և Հիսուս Քրիստոսին: Ուղղություն խնդրեք Սուրբ Հոգուց և ուսանողներից, որը կօգնի ձեզ իմանալ, թե ինչ սկզբունքներ, հարցեր և գործողություններ օգտագործեք դասարանում:

Տերն ուղարկում է Լեքիին՝ մարգարեանալու Երուսաղեմի ժողովրդին:

Սկսեք դասը` խնդրելով ուսանողներին մտածել այն ժամանակի մասին, երբ ինչ-որ մեկը բացասաբար արձագանքեց մի ուղերձի կամ գաղափարի, որով իրենք փորձում էին կիսվել:

• Ինչո՞ւ են անդամները, միսիոներները և մարգարեները շարունակում կիսվել ուղերձներով, որոնք, ըստ նրանց, ժողովրդականություն չեն կարող վայելել:

Լեքին քարոզում է Երուսաղեմում, Դել Փարսոն

Ցուցադրեք մի նկար, որը պատկերում է Լեքիին քարոզելիս: Հրավիրեք որևէ ուսանողի նկարագրել այն միջավայրը, որից սկիզբ առավ Մորմոնի Գիրքը՝ ինչպես արձանագրված է 1 Նեփի 1-ում: (Եթե դուք ուսուցանում եք այս դասընթացի առաջին երկու դասերը միասին, ուսանողները, գուցե, հնարավորություն չեն ունեցել ուսումնասիրել նախապատրաստական նյութը այս դասի համար: Կարող եք հրավիրել մի ուսանողի բարձրաձայն կարդալ 1 Նեփի 1.4-ը։)

• Ի՞նչ ենք սովորում Տիրոջ և Նրա մարգարեների մասին Մորմոնի Գրքի սկզբում։ (Ուսանողների հետ կարդացեք կամ վերանայեք Նախագահ Հենրի Բ. Այրինգի հայտարարությունը նախապատրաստական նյութի բաժին 1-ում։)

Բացատրեք, որ տեսիլքում Տերը Լեքիին տվեց մի գիրք, որ կարդար: Լեքին մարդկանց ասաց, որ Երուսաղեմը կործանվելու է։ (Տես 1 Նեփի 1.12–13:)

Կարդացեք 1 Նեփի 1.14-ը միասին` փնտրելով, թե Լեքին ինչպես արձագանքեց տեսիլքին:

• Լեքին ի՞նչ իմացավ Տիրոջ բնավորության մասին: Ձեր կարծիքով, այս գիտելիքը Տիրոջ ողորմածության մասին ինչպես ազդեց Լեքիի՝ Երուսաղեմի ժողովրդին մարգարեանալու վճռականության վրա:

Հրավիրեք ուսանողներին կարդալ 1 Նեփի 1.18–19 հատվածները, փնտրելով, թե ինչ կարող ենք սովորել մարգարեների մասին Լեքիի փորձառությունից: Օգնեք ուսանողներին գտնել այնպիսի ճշմարտություններ, ինչպիսիք են. Մարգարեները հռչակում են Տիրոջ խոսքերն ու կամքը: Մարգարեներն ուսուցանում են և վկայում են Հիսուս Քրիստոսի և փրկագնման մասին, որը գալիս է Նրա միջոցով:

• Որո՞նք են մեր կենդանի մարգարեների և առաքյալների վերջին ուղերձներից մի քանիսը, որոնք հռչակում են Տիրոջ խոսքերը և կամքը:

Հանձնարարեք ուսանողներին վերանայել Երեց Դ․ Թոդ Քրիստոֆերսոնի և Երեց Ուլիսես Սոարեսի հետևյալ հայտարարությունը նախապատրաստական նյութի բաժին 1-ից և կիսվել, թե ինչը նրանց համար ընդգծվեց:

• Այս հատվածներն ինչպե՞ս են ազդում այն վերաբերմունքի վրա, որը դուք ունեք ներկայիս մարգարեների հանդեպ: Ինչպե՞ս են նրանք ազդում Հիսուս Քրիստոսի հանդեպ ձեր զգացումների վրա:

• Ո՞ր վերջին մարգարեական ուղերձներն են օգնել ձեզ ավելի լավ ճանաչել Աստծո սերն Իր զավակների հանդեպ: (Ուսանողները խորհրդածեցին մի հարցի շուրջ, որը նման էր սրան, երբ նրանք ուսումնասիրում էին նախապատրաստական նյութի բաժին 1-ը։)

Նեփին հաստատում է ստանում, որ մարգարեներն ուսուցանում են Աստծո խոսքը:

Հրավիրեք ուսանողներին գտնել որոշ մարգարեական ուսմունքներ, որոնք մարդիկ, գուցե, դժվարանում են ընդունել մեր օրերում: (Նշում. Անհրաժեշտության դեպքում, հիշեցրեք ուսանողներին, որ մեր մտադրությունը Տիրոջ մարգարեներին քննադատելը չէ, այլ քննարկել, թե ինչպես կարող ենք հավատքով արձագանքել մարգարեական ուղերձին, որը մենք կամ մեր ծանոթը, գուցե, դժվարանում է հասկանալ կամ ընդունել:)

• Ինչու՞ է երբեմն դժվար ընդունել այն, ինչ մարգարեն է հայտարարում:

Ցուցադրեք կամ տվեք հետևյալ հարցը. Ի՞նչ կարող եմ անել, եթե մաքառում եմ մի բանի դեմ, որը մարգարեն է ուսուցանում: Երբ ուսանողները քննարկեն այս հարցը, ազատ զգացեք օգտագործել հետևյալ նյութն ամբողջությամբ կամ մի մասը` օգնելով նրանց մտածել, թե ինչպես կարձագանքեին, եթե իրենք կամ իրենց ծանոթը ունեցել է այդ մտահոգությունը:

Պատկերացրեք, թե ինչ կզգայիք, եթե լինեիք Լեքիի զավակներից մեկը, երբ հայրը հաղորդեց նրանց, որ Տերը կամենում է, որ իրենք թողնեն իրենց տունը և ճամփա ընկնեն դեպի անապատ:

• Լամանը և Լեմուելը ինչպես արձագանքեցին իրենց տնից հեռանալու լուրին: Ինչպե՞ս արձագանքեց Նեփին (Հրավիրեք նրանց վերանայել 1 Նեփի 2.11 -13․16-17։ Դուք կարող եք նշել, որ Նեփիի սիրտը գուցե նույնպես կարիք ուներ փափկելու [տես 1 Նեփի 2.16]:)

• Որո՞նք են Մորմոնի Գրքում գրված տարբեր եղանակներից մի քանիսը, որոնցով մարդիկ արձագանքում էին մարգարեներին և նրանց ուղերձներին: (Կարող եք ուսանողներին ժամանակ տալ վերանայել իրենց սովորածը, երբ ուսումնասիրում էին նախապատրաստական նյութի 3-րդ բաժինը:) Որո՞նք էին նրանց արձագանքի հետևանքները։ Ե՞րբ եք տեսել նմանատիպ արձագանքների այսքան տարբեր օրինակներ մեր օրերում:

• Ի՞նչ կարող ենք սովորել իր հոր ուղերձին Նեփիի տված արձագանքից։ Փրկիչն ինչպե՞ս է օգնում մեզ իմանալ, որ Նրա մարգարեների խոսքերը ճշմարիտ են: (Ուսանողները կարող են գտնել նմանատիպ մի սկզբունք. Եթե մենք խոնարհեցնենք մեզ և դառնանք դեպի Տերը, Նա կարող է օգնել փափկացնել մեր սրտերը մարգարեների խոսքերի ճշմարտացիության վերաբերյալ:)

Կարդացեք Նախագահ Ռասսել Մ. Նելսոնի հետևյալ հայտարարությունը.

Նախագահ Ռասսել Մ. Նելսոն

Դուք կարող եք իմանալ ինքներդ ձեզ համար, թե որն է ճիշտ և որը ոչ` սովորելով զանազանել Հոգու հուշումները: …

Իմ սիրելի՛ եղբայրներ և քույրեր, ես աղաչում եմ ձեզ, լրջորեն որոնեք հաստատում Հոգուց, որ այն ինչ ես ասացի ձեզ, ճշմարիտ է և Տիրոջից: Նա հայտարարել է, որ մենք կարող ենք փնտրել գիտելիք երկնքից և սպասել ստանալու այն (տես Վարդապետություն և Ուխտեր 42․61]։ …

Հարցրեք Երկնային Հորը՝ արդյո՞ք մենք իսկապես Տիրոջ առաքյալներն ու մարգարեներն ենք: («Աստծո սերն ու օրենքները» [ելույթ` տրված Բրիգամ Յանգի համալսարանում հոգևոր հավաքի ժամանակ, սեպ. 17, 2019], 4–5, speeches.byu.edu)

• Ի՞նչ փորձառություններ եք ունեցել մարգարեի աստվածային կոչման կամ ուղերձի ճշմարտացիության վերաբերյալ ինքնուրույն սովորելիս։

Երբ ավարտեք քննարկումը «Ի՞նչ կարող եմ անել, եթե մաքառում եմ ինչ-որ բանի հետ, որը մարգարեն է ուսուցանում» հարցի վերաբերյալ, ուսանողներին ժամանակ տվեք` խորհելու և արձանագրելու, թե ինչ են իրենք զգացել կամ սովորել, որը կարող է օգնել իրենց կամ մեկ ուրիշի, ով ունի նմանատիպ հարց:

Դուք կարող եք հրավիրել մի քանի ուսանողների կիսվել, թե ինչը իրենք ուրիշ կերպ կանեն ապագայում, եթե մաքառեն որևէ բանի հետ, ինչը մարգարեն է ուսուցանում:

Հաջորդ անգամ

Գուցե կամենաք ցույց տալ Լեքիի կենաց ծառի տեսիլքի մի նկար և հրավիրեք ուսանողներին մտածել, երբ նրանք ուսումնասիրեն նախապատրաստական նյութը հաջորդ դասի համար, թե ինչ կարող է ուսուցանել այս տեսիլքը Աստծո խոսքի զորության մասին: