Դաս 6․ Ուսուցչի ձեռնարկ

Հիսուս Քրիստոսի անսահման քավությունը

Մորմոնի Գիրքը Հիսուս Քրիստոսի և Նրա միջոցով իրականացվող փրկագնման հզոր վկան է: Այս դասը կօգնի ուսանողներին բացատրել, թե մենք ինչպես ենք անկումից փրկագնվում Հիսուս Քրիստոսի և Նրա Քավության միջոցով: Ուսանողները նաև կորոշեն, թե ինչ կարող են անել, որպեսզի ավելի շատ ապավինեն Փրկչին՝ օգնելով իրենց հաղթահարել բնական մարդու իրենց հակումները:

Ուսուցման առաջարկներ

Բարելավել մեր ուսուցումն ու ուսումնասիրությունը

Ուսանողներին տեղեկացրեք ուսման արդյունքների մասին։ Ուսման արդյունքները դրույթներ են, որոնք սահմանում են, թե ուսանողներն ինչ գիտելիքներ և հմտություններ պետք է կարողանան զարգացնել ուսումնական գործընթացում: Ուսանողների հետ կիսվեք յուրաքանչյուր դասի ներածության մեջ թվարկված նախատեսված արդյունքներով: Այս հաստատված արդյունքները կարող են օգնել ուսուցիչներին և ուսանողներին միասին գնահատել իրենց ուսումնասիրության և քննարկումների հաջողությունը:

Մորմոնի Գրքի մարգարեները վկայում են Հիսուս Քրիստոսի Քավության անհրաժեշտության մասին

Ցուցադրեք հետևյալ անավարտ հարցը. Ինչպիսի՞ն կլիներ իմ կյանքը առանց …

Որպեսզի օգնեք ուսանողներին մտածել, թե ինչպես կարող են լրացնել հարցը, ցուցադրեք մի քանի տարբեր նկարներ կամ բառեր: Հրավիրեք ուսանողներին զուգընկերոջ հետ համառոտ քննարկել, թե ինչպես կպատասխանեն յուրաքանչյուր կետի կամ գաղափարի վերաբերյալ հարցին: Կարող եք օգտագործել ուղեկցող նկարները կամ որոշ նկարներ, որոնք ինքներդ եք ընտրում: Համոզվեք, որ վերջնական նկարը ներկայացնում է Հիսուս Քրիստոսի քավիչ զոհաբերությունը, որպեսզի ուսանողները կարողանան քննարկել, թե ինչպիսին կլիներ իրենց կյանքն առանց Հիսուս Քրիստոսի և Նրա Քավության:

պարմանուհի՝ հեռախոսը ձեռքին

երիտասարդ աղջիկները ծիծաղում են

ծնողները և երեխաները ծիծաղում են

Քրիստոսը Գեթսեմանիում, ըստ՝ Հարի Անդերսոնի

Գրատախտակին գրեք հետևյալ անավարտ նախադասությունը. Առանց Փրկիչի և Նրա Քավության մենք …

Հիշեցրեք ուսանողներին, որ Հակոբն ու Ամուղեկը կարևոր քարոզներ տվեցին Հիսուս Քրիստոսի Քավության մասին: Ուսանողներին հանձնարարեք վերանայել 2 Նեփի 9.6–10 և Ալմա 34.9-ը՝ փնտրելով արտահայտություններ, որոնք կարող են օգտագործել գրատախտակի հայտարարությունն ավարտելու համար:

• Որո՞նք են այս հատվածների մի քանի արտահայտությունները, որոնք կարող ենք օգտագործել՝ գրատախտակի հայտարարությունն ավարտելու համար: (Երբ ուսանողները կիսվեն արտահայտությունը լրացնելու տարբեր եղանակներով, գրեք պատասխանները դրա տակ: Ուսանողները կարող են գտնել նմանատիպ մի ճշմարտություն. Առանց Փրկիչի և Նրա Քավության, մենք անխուսափելիորեն կկործանվեինք: Այլ ճշմարտություններ, որոնք նրանք կարող են բացահայտել, ներառում են հետևյալը. Առանց Փրկիչի և Նրա Քավության մենք կտրված կլինեինք Տիրոջ ներկայությունից, այլևս չէինք աճի, կդառնայինք սատանայի հպատակ և կնմանվեինք նրան, կմնայինք թշվառության մեջ և ենթակա կլինեինք մահվան ու դժոխքի ահավոր հրեշին: Հրավիրեք ուսանողներին բացատրել, թե իրենց կարծիքով, ինչ են նշանակում այս արտահայտությունները:)

• Ի՞նչ է «սարսափելի հրեշը», որը Հակոբը նկարագրել է 2 Նեփի 9.10-ում: Ի՞նչն է այդքան ահավոր: (Անհրաժեշտության դեպքում օգնեք ուսանողներին հասկանալ, թե մշտական ֆիզիկական և հոգևոր մահը մեզ ինչո՞ւ կխանգարեր նմանվել Երկնային Հորը: Ուշադրություն դարձրեք, որ հոգևոր մահը Անկման և մեր անձնական անհնազանդության արդյունքն է: [Տես «Մահ, հոգևոր» և «Մահ, ֆիզիկական», Ավետարանի թեմաներ, topics.ChurchofJesusChrist.org:])

• Անկման հետևանքների ճանաչումն ինչպե՞ս է օգնում մեզ հասկանալ, թե մենք ինչո՞ւ ունենք Հիսուս Քրիստոսի կարիքը:

Միասին կարդացեք 2 Նեփի 9.11–12, 19–22-ը և խնդրեք ուսանողներին փնտրել, թե ինչ ուղիներով է Հիսուս Քրիստոսը քավում մեզ մահվան և դժոխքի «սարսափելի հրեշից» (հատված 10):

• Ինչպե՞ս է Հիսուս Քրիստոսը մեզ փրկում մահվան և դժոխքի «այս սարսափելի հրեշից»:

• Ինչպե՞ս եք վերաբերվում Փրկիչին, իմանալով, որ նա և՛ պատրաստ է, և՛ կարող է ազատել ձեզ մահից և դժոխքից:

Հիշեցրեք ուսանողներին, որ Հակոբը և Ամուղեկը նկարագրեցին «անսահման» քավության կամ զոհաբերության կարիքը (տես 2 Նեփի 9.7, Ալմա 34.10): Հրավիրեք ուսանողներին վերանայել նախագահ Ռասսել Մ. Նելսոնի և նախագահ Թադ Ռ. Քալիսթերի հայտարարությունները նախապատրաստական նյութի բաժին 1-ում՝ փնտրելով, թե ինչպես է Փրկիչի Քավությունն անսահման:

• Ձեր կարծիքով, ինչո՞ւ է կարևոր հասկանալ, որ Փրկիչի Քավությունն անսահման է:

• Իմանալով, որ Փրկիչի Քավությունն անսահման է, ինչպե՞ս եք հասկանում և վերաբերվում ձեր սեփական մաքառումներին ու մտահոգություններին:

• Ի՞նչ կարող եք անել, որպեսզի Տիրոջը ցույց տաք ձեր հավատն առ այն, որ Նրա անսահման Քավությունը կարող է օգնել և փրկել ձեզ: (Ուսանողներին ժամանակ տվեք իրենց մտքերը գրանցելու համար):

Թագավոր Բենիամինն ուսուցանում է իր ժողովրդին, որ Հիսուս Քրիստոսի Քավության միջոցով նրանք կարող են իրենց միջից հանել բնական տղամարդուն կամ կնոջը

Ցուցադրեք հետևյալ խոսքերը. «Բնական մարդն Աստծո մի թշնամի է, և եղել է Ադամի անկումից ի վեր» (Մոսիա 3.19): Հիշեցրեք ուսանողներին, որ Բենիամին թագավորը ուսուցանել է այս ճշմարտությունը:

• Ինչպե՞ս կբացատրեք, թե ինչ է «բնական մարդը» որևէ մեկին, ում անծանոթ չէ այս եզրույթը: (Կարող եք քաջալերել ուսանողներին կրկնել երեց Դեյվիդ Ա. Բեդնարի հայտարարությունը նախապատրաստական նյութի բաժին 2-ում։)

Դասարանով կարդացեք Մոսիա 3.19-ը և հրավիրեք ուսանողներին փնտրել, թե ինչ է սովորեցրել Բենիամին թագավորն իր ժողովրդին բնական մարդուն հաղթահարելու մասին:

• Ի՞նչ սկզբունք կարող ենք սովորել Բենիամին թագավորի ուսմունքներից, որոնք կարող են օգնել մեզ հաղթահարել մեր մեջ գտնվող բնական տղամարդուն կամ կնոջը: (Ուսանողները կարող են բացահայտել նմանատիպ մի ճշմարտություն․ Երբ մենք ենթարկվում ենք Սուրբ Հոգու հորդորներին, Հիսուս Քրիստոսը կօգնի մեզ հեռացնել բնական տղամարդուն կամ կնոջը և դառնալ սրբեր Իր Քավության միջոցով:)

Որպեսզի ուսանողները խորացնեն այս սկզբունքի իրենց ընկալումը, տվեք հետևյալ հարցերից մեկը կամ մի քանիսը՝ ըստ ուսանողների կարիքների․

• Ձեզ համար ի՞նչ է նշանակում «ենթարկվել Սուրբ Հոգու հորդորներին»: Ինչպե՞ս է Սուրբ Հոգին օգնել ձեզ հաղթահարել բնական տղամարդու կամ կնոջ հակումները:

• Ինչո՞ւ բնական տղամարդուց կամ կնոջից ազատվելը կարող է տեղի ունենալ միայն այն ժամանակ, երբ մենք ապավինենք Հիսուս Քրիստոսին և Նրա Քավությանը:

• Փրկիչի Քավությանն ապավինելը ինչպե՞ս է օգնել ձեզ՝ սրբացված և Քրիստոսանման մարդ դառնալու ձեր ջանքերում:

• Ինչպե՞ս կարող են Մոսիա 3.19-ում նշված ուսմունքները մեզ հույս և ուժ պարգևել, երբ մենք զգում ենք, որ չենք կարող վերահսկել կամ հաղթահարել բնական տղամարդու կամ կնոջ ախորժակներն ու ազդակները:

Խնդրեք ուսանողներին մտածել իրենց կյանքի այն ոլորտի մասին, որտեղ նրանք կարող են պայքարել բնական տղամարդու կամ կնոջ ախորժակի, ցանկությունների կամ ազդակների դեմ: Ցուցադրեք հետևյալ հարցերը և ուսանողներին հրավիրեք խորհել և գրանցել իրենց մտքերն ու տպավորությունները.

• Ի՞նչը կարող է խանգարել ինձ ենթարկվել Սուրբ Հոգուն:

• Մոսիա 3.19-ում նկարագրված Քրիստոսանման հատկանիշներից ո՞րը պետք է ավելի լիարժեք զարգացնեմ:

• Ի՞նչ գործողություններ եմ ձեռնարկելու, որպեսզի կարողանամ ավելի մեծ օգնություն ստանալ Փրկիչից, երբ ձգտում եմ զարգացնել այդ Քրիստոսանման հատկությունը:

Եզրափակեք՝ կիսելով ձեր վկայությամբ, որ Հիսուս Քրիստոսը փրկագնել է մեզ Անկումից և կարող է փրկագնել մեզ մեր անձնական մեղքերից ու փոխակերպել մեզ, որ ավելի շատ նմանվենք Իրեն և մեր Երկնային Հորը:

Հաջորդ անգամ

Հրավիրեք ուսանողներին մտածել ֆիզիկական, մտավոր, հուզական և հոգևոր մաքառումների մասին, որոնք նրանք գուցե ունեն: Երբ նրանք ուսումնասիրեն հաջորդ դասի նախապատրաստական նյութը, հանձնարարեք նրանց մտածել, թե Հիսուս Քրիստոսը ինչպես կարող է օգնել նրանց իրենց մաքառումներում: