Pāpa’ira’a mo’a
Fa’a’itera’a mana 2


Fa’a’itera’a mana 2

Tē ha’api’i nei te Buka a Moromona ē, « hō’ē ana’e rātou ato’a i mua i te Atua », « te ’ere’ere ’e te ’uo’uo, te tītī ’e te ti’amā, te tāne ’e te vahine » (2 Nephi 26:33). I te roara’a o te ’ā’amu o te ’Ēkālesia, ’ua bāpetizohia te mau ta’ata e rave rahi i rotopū i te mau nūna’a ta’ata ato’a ’e te mau nūna’a tūta’ere, i roto i te mau fenua e rave rahi, ’e ’ua ora rātou ’ei mau melo ha’apa’o maita’i o te ’Ēkālesia. I te tau ’a ora noa ai Iosepha Semita, ’ua fa’atōro’ahia te tahi ri’i mau taea’e ’ere’ere o te ’Ēkālesia i te autahu’ara’a. ’Oi’oi i roto i te ’ā’amu o te ’Ēkālesia, ’ua fa’aea te feiā fa’atere i te hōro’a i te autahu’ara’a i te mau taea’e ’ere’ere, te mau hua’ai tamari’i nō ’Āfirika mai. ’Aita te mau pāpa’a parau e ha’apāpū maita’i nei i te tumu nō teie ravera’a. ’Ua ti’aturi te feiā fa’atere o te ’Ēkālesia ē, tītauhia te hō’ē heheura’a nō ’ō mai i te Atua nō te taui i teie ravera’a ’e ’ua ’imi rātou i te arata’ira’a nā roto i te pure. ’Ua tae mai te heheura’a i te Peresideni nō te ’Ēkālesia, te peresideni Spencer W. Kimball, tei ha’apāpūhia i te tahi feiā fa’atere nō te ’Ēkālesia i roto i te hiero nō Roto Miti i te 1 nō Tiunu 1978. ’Ua fa’a’ore te heheura’a i te mau ’ōpanira’a ato’a nō te autahu’ara’a tei tu’uhia i ni’a i te hō’ē noa atu nūna’a ta’ata nā mua a’e.

Nā te feiā ato’a ’o tē hina’aro ’ia ’ite :

I te 30 nō Tetepa 1978, i te l48ra’a o te ’āmuira’a rahi nō ’Ātopa a Te ’Ēkālesia a Iesu Mesia i te Feiā Mo’a i te mau Mahana Hope’a nei, ’ua fa’a’itehia mai teie mau mea i muri nei e te peresideni N. Eldon Tanner, tauturu mātāmua i roto i te Peresidenira’a Mātāmua nō te ’Ēkālesia :

I te pae mātāmua nō Tiunu i teie matahiti, ’ua fa’a’ite mai te Peresidenira’a Mātāmua ’e ’ua fāri’ihia te hō’ē heheura’a e te peresideni Spencer W. Kimball, nō ni’a i te fa’ataera’a i te mau ha’amaita’ira’a nō te autahu’ara’a ’e nō te hiero i te mau tāne ha’apa’o maita’i ato’a nō te ’Ēkālesia. ’Ua ani mai te peresideni Kimball iā’u ’ia fa’a’ite atu i te ’āmuira’a ē i muri iho i tōna fāri’ira’a i teie heheura’a, ’o tei tae mai iāna nā roto i te ferurira’a hōhonu ’e te pure nō te hō’ē taime huru maoro i roto i te mau piha mo’a nō te hiero mo’a, ’ua fa’a’ite atu ’oia i te reira i tōna nā tauturu, ’o tei fāri’i mai ’e ’o tei pāturu mai i te reira. ’Ua fa’a’itehia atu te reira i muri iho i te Tino ’Ahuru Ma Piti ’āpōsetolo, ’o tei pāturu pā’āto’a mai i te reira, ’e ’ua fa’a’ite-ato’a-hia atu ho’i te reira i te Huimana fa’atere rahi ato’a o te ’Ēkālesia, ’o tei pāturu pā’āto’a ato’a mai i te reira.

’Ua ani mai te peresideni Kimball iā’u ’ia tai’o atu i teie rata i teienei :

Te 8 nō Tiunu 1978

Nā te mau ti’a fa’atere rahi nō te autahu’ara’a ’e te mau ti’a fa’atere autahu’ara’a nō te fenua iho, a Te ’Ēkālesia a Iesu Mesia i te Feiā Mo’a i te mau Mahana Hope’a nei, i roto i te ao tā’āto’a nei :

E au mau taea’e :

’A ’ite ai tātou i te tupura’a rahi o te ’ohipa a te Fatu i ni’a i te fenua nei, ’ua māuruuru roa tātou i te mea ē ’ua fāri’i te mau ta’ata nō te mau nūna’a e rave rahi i te parau poro’i nō te ’evanelia i fa’aho’i-fa’ahou-hia mai, ’e ’ua tomo rahi mai rātou i roto i te ’Ēkālesia. Nā teie i fa’auru i te hina’aro i roto ia mātou ’ia fa’atae atu i te mau melo ha’apa’o maita’i ato’a nō te ’Ēkālesia i te mau maita’i ato’a ’e te mau ha’amaita’ira’a ato’a nō te ’evanelia.

’Ua ’ite mātou i te mau fafaura’a i fa’a’itehia mai e te mau peropheta ’e te mau peresideni nō te ’Ēkālesia ’o tei nā mua a’e nei ia mātou, ’E tē vai ra te taime, i roto i tā te Atua ’ōpuara’a mure ’ore, e fāri’i ai tō tātou mau taea’e pā’āto’a ’o tei ha’apa’o maita’i i te autahu’ara’a, ’e nā roto i tō mātou ’itera’a i te ha’apa’o maita’i o teie feiā i tāpe’ahia na te autahu’ara’a ia rātou, ’ua tītau maoro mātou ma te onoono nō ni’a i teie mau taea’e ha’apa’o maita’i tō tātou, ’e ’ua ti’aoro atu mātou e rave rahi hora i te Fatu, i roto i te piha ni’a nō te hiero nō tāna arata’ira’a.

’Ua fa’aro’o mai ’oia i tā mātou mau pure, ’e nā roto i te heheura’a ’ua fa’a’ite pāpū mai ’oia ē ’ua tae te mahana tei fafauhia i te mātāmua roa e fāri’i ai te mau tāne ha’apa’o maita’i ato’a i roto i te ’Ēkālesia i te autahu’ara’a mo’a, ma te mana nō te fa’a’ohipa i te ha’amanara’a a te Atua, ’e nō te ’oa’oa ’e tōna ato’a ra ’utuāfare i te mau ha’amaita’ira’a ato’a nō te reira, ē tae noa atu i te mau ha’amaita’ira’a nō te hiero. Nō reira, e nehenehe i te mau tāne ha’apa’o maita’i pā’āto’a nō te ’Ēkālesia ’ia fa’atōro’ahia i te autahu’ara’a, noa atu te huru o te nūna’a ta’ata ’e tōna ’iri. Tē anihia nei te feiā fa’atere nō te autahu’ara’a ’ia pe’e māite i te arata’ira’a i fa’ata’ahia nō te uiuira’a i te feiā i mana’ohia nō te fa’atōro’a i te Autahu’ara’a a Aarona ’e ’aore rā i te Autahu’ara’a a Melehizedeka nō te ha’apāpū e mea ha’apa’o maita’i ’e e mea ti’amā rātou.

Tē fa’a’ite atu nei mātou ma te ’ā’au ha’eha’a ē ’ua heheu mai te Fatu i tōna hina’aro i teienei nō te ha’amaita’ira’a i tāna mau tamari’i ato’a i ni’a i te fenua ato’a nei ’o tē hina’aro ’ia ha’apa’o i te reo o tōna mau tāvini i ha’amanahia, ’e ’ia fa’aineine ia rātou nō te fāri’i i te mau ha’amaita’ira’a ato’a nō te ’evanelia.

Ma te aroha,

Spencer W. Kimball

N. Eldon Tanner

Marion G. Romney

Te Peresidenira’a Mātāmua

Nā roto i te fāri’ira’a ia Spencer W. Kimball ’ei peropheta, ’ei hi’o, ’ei heheu parau, ’e ’ei peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei, tē anihia nei tātou, e te ’āmuira’a, ’ia fāri’i i teie heheura’a ’ei parau ’e ’ei hina’aro nō te Fatu. ’O tātou ato’a ’o tei hina’aro ’ia fāri’i i te reira ’a fa’a’ite mai ïa nā roto i te ’āfa’ira’a i te rima ’atau i ni’a. Mai te mea tē vai ra te hō’ē pāto’ira’a ’a fa’a’ite ato’a mai i te reira.

Te mā’itira’a nō te pāturu i teie anira’a i ni’a nei ’ua fāri’ihia ïa e te mau ta’ata ato’a.

’Oire nō Roto Miti, Utaha, te 30 nō Tetepa 1978.