1 ’A ha’apa’o mai na ’o ’outou e te mau ta’ata nō tā’u nei ’ēkālesia, ’o tei hōro’ahia atu te bāsileia ra ; ’a ha’apa’o mai na ’outou ’e ’a fa’aro’o iāna ’o tei fa’atumu i te niu o te ao nei, ’o tei hāmani i te mau ra’i ra ’e te mau nu’u ta’ata ato’a nō reira ra, ’e nā roto iāna i hāmanihia ai te mau mea ato’a ’o tei ora, ’e ’o tei haere, ’e ’o tē vai nei.

2 ’E tē parau fa’ahou atu nei au, ’a ha’apa’o mai na i tō’u nei reo, ’oi ro’ohia ’outou i te pohe ; ’e i te hora mana’o-’ore-hia e ’outou e pau ai te tau māhanahana, ’e e oti ho’i te ’auhune, ’e ’aita ho’i tō ’outou na mau vārua i fa’aorahia.

3 ’A fa’aro’o mai na iāna, ’o ’oia te ti’a i mua i te Metua, ’o tē ’imi nei i tō ’outou maita’i i mua iāna ra—

4 I te nā-’ō-ra’a atu ē : E te Metua ē, ’a hi’o na i te mau mamae rahi ’e te pohe ho’i nōna ’o tei ’ore roa i rave i te hara ra, ’o tā ’oe i māuruuru roa ra ; ’a hi’o na i te toto ’o tā ’oe Tamaiti nei ’o tei ha’amani’ihia ra, e toto ho’i nōna nō tā ’oe iho i hōro’a atu ia fa’ahanahanahia ’oe ;

5 Nō reira, e te Metua ē, ’a fa’aora na i tō’u nei mau taea’e, i tei fa’aro’o mai i tō’u nei i’oa, ’ia haere mai rātou iā’u nei ’e ’ia noa’a ho’i te ora mure ’ore.

6 ’A ha’apa’o mai na ’outou e te mau ta’ata nō tā’u nei ’ēkālesia, ’e ’o ’outou e te mau peresibutero ho’i, ’a fa’aro’o tāhō’ē mai na, ’e ’a fa’aro’o ho’i i tō’u nei reo ’a parauhia ai i teie mahana, ’e ’eiaha e fa’a’eta’eta i tō ’outou ’ā’au ;

7 Nō te mea ’oia mau tē parau atu nei au ia ’outou na, ’o Alepha ’e ’o Omega vau, te ha’amatara’a ’e te fa’ahope’a, te māramarama ’e te ora ho’i o te ao nei—te māramarama ’o tē ’ana’ana nei i roto i te pōiri, ’e ’aita ho’i te pōiri i māramarama mai i te reira.

8 I haere mai na vau i tō’u ihora mau ta’ata, ’e ’aita tō’u iho mau ta’ata i fāri’i mai iā’u nei ; ’āre’a rā te feiā ato’a ’o tei fāri’i mai iā’u nei, ’ua hōro’a atu ïa vau i te mana ’ia rave i te mau semeio e rave rahi, ’e ’ia riro ho’i ’ei mau tamaiti nā te Atua ; ’e ia rātou ho’i ’o tei ti’aturi i tō’u nei i’oa ’ua hōro’a atu vau i te mana ’ia roa’a te ora mure ’ore.

9 ’E nō reira ato’a vau i fa’atae atu ai i tā’u fafaura’a mure ’ore i te ao nei, ’ia riro ho’i ’ei māramarama i tō te ao nei, ’e ’ia riro ho’i ’ei reva tumu nō tō’u nei mau ta’ata, ’e nō te mau ’Ētene ’ia ’imi ho’i rātou i te reira, ’e ’ia riro ’ei ve’a i mua i tō’u nei aro nō te fa’aineine i te ’ē’a i mua iā’u.

10 Nō reira, ’a haere mai na ’outou i reira, ’e i iāna ’o tē tae mai ra e hōro’a ïa vau i tō’u mana’o, mai te au i tā’u i hōro’a i te mau ta’ata i te ’anotau tahito ra, ’e e fa’a’ite atu vau ia ’outou i tō’u nei mau mana’o pūai ra.

11 Nō reira, ’a fa’aro’o tāhō’ē mai na ’outou ato’a ’e e fa’a’ite atu vau ia ’outou i tō’u nei pa’ari—te pa’ari nōna nō tā ’outou e parau mai nei ē, ’o ’oia te Atua nō Enoha, ’e tōna ra mau taea’e.

12 ’O tei fa’ata’a-’ē-hia atu na i te ao nei, ’e ’ua fāri’ihia ho’i iā’u iho nei—’ei ’oire i fa’ahereherehia ē tae noa atu i te taera’a mai o te hō’ē mahana parauti’a ra—te hō’ē mahana ’o tei ’imi-noa-hia e te mau ta’ata mo’a ato’a ra, ’e ’aore rātou i ’ite i te reira nō te ’ohipa ’ī’ino ’e te mau ’ohipa faufau ra ;

13 ’E ’ua fā’i mai ra rātou ē, e mau ta’ata ’e’ē rātou ’e te purutia ho’i i teie nei ao.

14 ’Ua noa’a rā ia rātou te fafaura’a ē, e ’itea te reira ia rātou ra, ’e e ’ite mata ho’i rātou i te reira i roto i te tino nei.

15 Nō reira, ’a ha’apa’o mai na ’e e fa’a’ite atu vau i tō’u mana’o ia ’outou, ’e e parau atu ho’i au ia ’outou ē e tohu ho’i, mai tā’u i rave i te mau ta’ata i te ’anotau tahito ra.

16 ’E e fa’a’ite māramarama atu vau i te reira mai te au i tā’u i fa’a’ite atu i te reira i tā’u mau pipi, ’a ti’a tino ai au i mua ia rātou ra, ’e ’ua parau atu ra ho’i ia rātou, i te nā-’ō-ra’a atu ē : Nō te mea ’ua ani mai ’outou iā’u nō ni’a i te mau tāpa’o nō tō’u taera’a mai, i te mahana vau e tae mai ai i roto i tō’u hanahana i roto i te mau ata o te reva ra, nō te fa’atupu i te mau fafaura’a tā’u i hōro’a atu i tō ’outou mau metua,

17 Mai tā ’outou ho’i i hi’o atu i te maorora’a o te ta’a-’ē-ra’a o tō ’outou mau vārua i tō ’outou mau tino ’ei tītīra’a ra, e fa’a’ite atu vau ia ’outou ē e nāhea mai te taera’a mai o te mahana fa’aorara’a ra, ’e ’oia ato’a te fa’aho’ira’a mai i tō ’Īserā’ela i ha’apurara-’ē-hia ra.

18 ’E i teienei tē ’ite ra ’outou i teie nei hiero ’o tē vai i Ierusalema ra, ’o tā ’outou e parau nei, ’o te fare o te Atua, ’e tē parau mai ra tō ’outou ra mau ’enemi ē e ’ore roa teie nei fare e topa atu.

19 Terā rā, ’oia mau tē parau atu nei au ia ’outou na, e tae mai te fa’aanora’a i ni’a i teie nei u’i mai te ta’ata ’eiā i te pō ra, ’e e ha’amouhia teie nei feiā ’e e ha’apurarahia ho’i i rotopū i te mau nūna’a ato’a ra.

20 ’E teie nei hiero tā ’outou e ’ite nei, e hurihia ïa i raro roa ’ia ’ore roa te hō’ē ’ōfa’i e vaiihohia i ni’a iho i te tahi ra.

21 ’E a muri a’era e ’ore roa teie nei u’i o te ’āti Iuda ra e mou i te pohe ē tae noa atu i te tupura’a o te mau fa’aanora’a ato’a tā’u i fa’a’ite atu ia ’outou na nō ni’a ia rātou ra.

22 Tē parau mai na ’outou ē ’ua ’ite iho ā ’outou ē e tae mai te hope’a o teie nei ao ; tē parau ato’a mai na ’outou ē ’ua ’ite ’outou ē e mou ato’a te mau ra’i ’e te fenua ho’i ;

23 ’E i teie mea e parau mau tā ’outou e parau na, nō te mea ’oia mau iho ā ïa ; terā rā e ’ore roa teie nei mau mea tā’u i fa’a’ite atu ia ’outou na e mou ē tae noa atu i te taime e hope roa te mau mea ato’a i te fa’atupuhia ra.

24 ’E ’ua fa’a’ite atu vau i teie nei mea ia ’outou nō ni’a ia Ierusalema ; ’e ’ia tae i te reira mahana, ’ei reira e ha’apurarahia ai te hō’ē toe’a i rotopū i te mau nūna’a ato’a ra ;

25 Terā rā e ha’aputuputu-fa’ahou-hia rātou ; e fa’aea ā rā ho’i rātou ē tae roa atu i te taime ē hope roa ai te mau tau o te mau ’Ētene ra.

26 ’E i te reira mahana e fa’aro’ohia te parau nō te mau tama’i ’e te ro’o nō te mau tama’i, ’e e ’ārepurepu roa te ao pā’āto’a nei, ’e e ’āhuehue te ’ā’au o te ta’ata nei, ’e e parau mai rātou ē tē ha’amaoro nei te Mesia i tōna taera’a mai ē tae noa atu i te hope’a o te ao nei.

27 ’E e iti roa te aroha o te mau ta’ata, ’e e tupu rahi roa te ’ohipa ’ī’ino.

28 ’E ’ia tae mai te mau tau o te mau ’Ētene ra, ’ei reira te hō’ē māramarama e ’ana’ana mai ai i rotopū ia rātou ’o tē pārahi noa ra i roto i te pōiri, ’e ’o te ’īra’a te reira nō tā’u nei ’evanelia ;

29 Terā rā ’aita roa rātou e fāri’i i te reira ; nō te mea ho’i ’aita rātou e ’ite mai i te māramarama, ’e tē fa’afāriu ’ē atu nei rātou i tō rātou ’ā’au iā’u nei nō te mau ha’api’ira’a noa a te ta’ata nei.

30 ’E i roto i te reira ra u’i e hope roa ai te mau tau o te mau ’Ētene i te fa’atupuhia.

31 ’E e ti’a mai ho’i te mau ta’ata i te reira u’i, ’o tē ’ore roa e mou ē tae noa atu i te taime rātou e ’ite ai i te hō’ē ’ati rahi i te pararera’a atu ; nō te mea e tāpo’i mai te hō’ē ma’i ano i te fenua.

32 Terā rā e ti’a noa tā’u mau pipi i te mau vāhi mo’a, ’e e ’ore roa rātou e fa’anu’u-’ē-hia atu ; i rotopū rā i te feiā parauti’a ’ore ra, e fa’ateitei mai te mau ta’ata i tō rātou reo ma te fa’a’ino atu i te Atua ’a pohe atu ai.

33 ’E e tupu mai te mau ’āueuera’a fenua i terā vāhi ’e i terā vāhi, e rave rahi ho’i te anora’a ; noa atu rā i te reira, e fa’a’eta’eta te mau ta’ata i tō rātou ’ā’au iā’u nei, ’e e rave rātou i te ’o’e, rātou rātou iho, ’e e taparahi ho’i rātou te tahi i te tahi ra.

34 ’E i teienei, ’ia oti a’era iā’u te Fatu i te paraura’a atu i teie nei mau parau i tā’u ra mau pipi, ’ua pe’ape’a ihora rātou.

35 ’E ’ua parau atu ra vau ia rātou : ’Eiaha e pe’ape’a, nō te mea, ’ia hope teie nei mau mea ato’a i te tupu, e ’ite ai ’outou ē e fa’atupuhia te mau fafaura’a i fafauhia atu ia ’outou na.

36 ’E ’ia ha’amata ana’e te māramarama i te ’ana’ana mai, e riro ïa te reira ia rātou ra mai te hō’ē parabole tā’u e fa’a’ite atu ia ’outou na—

37 Tē hi’o atu ra ’outou ’e tē ’ite ra i te mau tumu suke, ’e tē ’ite ra ’outou i te reira i tō ’outou iho mau mata, ’e tē parau mai ra ’outou, ’a ha’amata ai rātou i te ’ōteo mai, ’e tē vai marū noa ra tō rātou ra mau rau’ere, ’ua fātata mai nei te tau māhanahana.

38 ’Oia ato’a ïa ’ia tae i te reira ra mahana ’ia ’ite rātou i teie nei mau mea ato’a ra, ’ei reira rātou e ’ite ai ē, ’ua fātata mai te hora.

39 ’E a muri a’era ’o ’oia ’o tei mata’u mai iā’u nei, e tīa’i ïa ’oia i te mahana rahi o te Fatu ra ’ia tae mai, ’oia ho’i i te mau tāpa’o nō te taera’a mai o te Tamaiti a te Ta’ata nei.

40 ’E e ’ite rātou i te mau tāpa’o ’e te mau mea māere, nō te mea e fa’a’itehia mai taua mau mea ra i roto i te mau ra’i i ni’a, ’e i roto i te fenua i raro nei.

41 ’E e ’ite rātou i te toto, te auahi, ’e te mau māhu au auahi ra.

42 ’E nā mua a’e i te taera’a mai o te mahana o te Fatu ra, e ha’apōirihia te rā, e fa’arirohia te marama ’ei toto, ’e e ma’iri mai ho’i te mau feti’a o te ra’i.

43 ’E e ha’aputuputuhia mai te toe’a ra i teie nei vāhi ;

44 ’Ei reira rātou e tīa’i mai ai iā’u nei, ’e inaha, e tae mai ïa vau ; ’e e ’ite mai rātou iā’u i roto i te mau ata o te ra’i ra, ma te fa’a’ahuhia i te mana ’e te hanahana rahi, i pīha’i iho i te mau melahi mo’a ato’a ra ; ’e ’o tē ’ore rā e tīa’i mai iā’u nei ra, e tāpū-’ē-hia atu ïa ’oia.

45 Terā rā, hou te rima o te Fatu e topa atu ai, e fa’a’oto mai te hō’ē melahi i tāna pū, ’e e ti’afa’ahou mai te feiā mo’a ’o tei ta’oto na nō te fārerei iā’u nei i roto i te ata ra.

46 Nō reira, mai te mea ’ua ta’oto na ’outou ma te hau, e ao ïa tō ’outou ; nō te mea mai tā ’outou e ’ite nei iā’u ’e ’ua ’ite ho’i ē tē vai nei Au, mai te reira ato’a tō ’outou haerera’a mai iā’u nei, ’e e ora ïa tō ’outou mau vārua ’e e fa’aoti-roa-hia tō ’outou fa’aorara’a ; ’e e ti’a mai te feiā mo’a ato’a, mai nā ’ōti’a e maha o te ao nei.

47 ’Ei reira te rima o te Fatu e topa atu ai i ni’a i te mau nūna’a ato’a.

48 ’Ei reira te Fatu e tu’u atu ai i tōna ra ’āvae i ni’a i teie nei mou’a, ’e e vāhihia te reira nā rōpū, ’e e ’āueue ho’i te fenua ’e e turorirori atu i terā vāhi ’e i terā vāhi, ’e e ’āueue ato’a te mau ra’i ra.

49 ’E e parau mai ho’i te reo o te Fatu, ’e e fa’aro’o te mau hope’a ato’a o te fenua i te reira ; ’e e ’oto te mau nūna’a o te fenua nei, ’e ’o tei ’ata ra e ’ite ïa rātou i tō rātou ra huru ma’ama’a.

50 ’E e ’ati rahi tē tāpo’i mai i te feiā fa’ao’ō’o ra, ’e e mou ho’i te feiā tahitohito ; ’e e tāpūhia atu rātou ato’a ’o tei tītau noa i te ’ohipa ’ī’ino, ’e e hurihia ho’i i roto i te auahi.

51 ’Ei reira te mau ’āti Iuda e hi’o mai ai iā’u nei ma te parau mai ē : E aha teie nei mau puta i roto i tō ’oe nā rima ’e tō ’oe nā ’āvae ho’i ?

52 ’Ei reira rātou e ’ite ai ē ’o vau te Fatu ; nō te mea e parau atu vau ia rātou : ’O teie nei mau puta ’o te mau puta ïa i ha’aputahia ai au i roto i te fare o tō’u ra mau hoa. ’O vau nei ïa ’o tei fa’ateiteihia i ni’a. ’O Iesu vau ’o tei fa’asātaurohia ra. ’O vau nei te Tamaiti a te Atua.

53 Ei reira rātou e ’oto ai nō tā rātou ra mau ’ohipa ’ī’ino ; ’ei reira rātou e mihi ai nō te mea ’ua hāmani ’ino rātou i tō rātou ra ari’i.

54 ’Ei reira te mau nūna’a ’ētene e fa’aorahia ai, ’e ’o rātou ’o tei ’ore i ’ite i te ture ra e fāri’i ïa rātou i te ti’afa’ahoura’a mātāmua ; ’e e riro te reira ’ei mea au nō rātou.

55 ’E e ru’uru’uhia Sātane, ’ia ’ore ’ia roa’a te hō’ē vāhi nōna i roto i te ’ā’au o te mau tamari’i a te ta’ata nei.

56 ’E i te reira mahana, ’ia tae atu vau i roto i tō’u nei hanahana, e fa’atupuhia ai te parabole tā’u i parau atu nō ni’a i te mau vahine pāretenia hō’ē ’ahuru ra.

57 ’O rātou ho’i ’o tei pa’ari ’e ’ua fāri’i ho’i i te parau mau, ’e ’ua rave ho’i i te Vārua Mo’a ’ei arata’i nō rātou ra, ’e ’aita ho’i rātou i ti’aturi i te parau ha’avare—’oia mau tā’u e parau atu ia ’outou na, e ’ore rātou e tāpūhia i raro ’e e hurihia i roto i te auahi ; e pārahi rā rātou ma te hau i te reira mahana.

58 ’E e hōro’ahia atu te fenua nei ’ei ’āi’a nō rātou ; ’e e rahi roa rātou ’e e riro ho’i ’ei mea pūai, ’e e tupu noa tā rātou ra mau tamari’i i te pa’arira’a ma te hara ’ore ē tae noa atu i te fa’aorara’a.

59 E fa’aea noa ho’i te Fatu i rotopū ia rātou, ’e e vai noa tōna hanahana i ni’a iho ia rātou, ’e e riro ’oia ’ei ari’i ’e ’ei hōro’a ture nō rātou.

60 ’E i teienei, inaha, tē parau atu nei au ia ’outou na ē, e ’ore roa e hōro’a-fa’ahou-hia atu ia ’outou te ’ite i te tahi mea nō ni’a i teie nei pene, ē tae noa atu i te taime e oti ai te Faufa’a ’Āpī i te ’īritihia, ’e i roto i te reira e fa’a’itehia atu ai teie nei mau mea ato’a ra ;

61 Nō reira, tē fa’ati’a atu nei au ia ’oe ’ia ’īriti mai i te reira i teienei, ’ia ineine ’outou nō te mau mea tē tupu a muri atu ra.

62 Nō te mea ’oia mau tē parau atu nei au ia ’outou na, e mau mea faufa’a rahi roa tē vai nei nō ’outou na ;

63 Tē fa’aro’o na ’outou i te parau nō te mau tama’i i te mau fenua ’e’ē ra ; terā rā, inaha, tē parau atu nei au ia ’outou, e mea fātata roa mai ïa, tei tō ’outou pae ’ūputa ho’i ïa, ’e i nā matahiti ri’i i mua nei, e fa’aro’o ai ’outou i te parau nō te mau tama’i i tō ’outou iho mau fenua.

64 Nō reira vau, te Fatu, i parau atu ai ē, ’a ha’aputuputu mai ’outou mai te mau fenua i te hiti’a o te rā, ’a ha’aputuputu mai ’outou i te vāhi hō’ē, e te mau peresibutero nō tā’u nei ’ēkālesia ; ’a haere atu ’outou i te mau tufa’a fenua i te tō’o’a o te rā, ’a ti’aoro atu i tō reira mau ta’ata ’ia tātarahapa, ’e mai te mea e tātarahapa mai rātou, ’a fa’ati’a ïa i te mau ’ēkālesia nā’u.

65 ’E ma te ’ā’au hō’ē ’e te ferurira’a hō’ē, ’a ha’aputu mai i tā ’outou na mau tao’a ’ia ti’a ia ’outou ’ia ho’o mai i te hō’ē ’āi’a ’o tē fa’ata’ahia nō ’outou a muri a’e.

66 ’E e parauhia te reira ’o te Ierusalema ’Āpī, e fenua nō te hau, e ’oire nō te ha’apūra’a, e vāhi nō te pāruru i te feiā mo’a o te Atua Teitei Roa ;

67 ’E e vai noa te hanahana o te Fatu i reira, ’ei reira ato’a te hanohano o te Fatu, nō te reira e ’ore roa te feiā parauti’a ’ore e tae atu i reira, ’e e parauhia te reira ’o Ziona.

68 ’E a muri a’era, ’ua ti’a roa i te ta’ata tāta’itahi i rotopū i te feiā parauti’a ’ore, ’o tē ’ore roa e rave i tāna ’o’e nō te ’aro atu i tōna ta’ata tupu, ’ia horo atu i Ziona nō te pārurura’a.

69 ’E e ha’aputuputuhia i reira te mau ta’ata nō roto mai i te mau nūna’a ato’a i raro a’e i te ra’i ra, ’e e riro ïa ē ’o rātou ana’e te mau ta’ata ’o tē ’ore roa e ’aro atu te tahi i te tahi.

70 ’E e parauhia i rotopū i te feiā parauti’a ’ore : ’Eiaha roa tātou e haere atu i ni’a nō te ’aro ia Ziona, nō te mea e mea hanohano roa tō Ziona mau ta’ata ; nō reira e ’ore roa tātou e manuia.

71 ’E a muri a’era e ha’aputuputuhia mai te feiā parauti’a mai roto mai i te mau nūna’a ato’a, ’e e haere mai ho’i rātou i Ziona, i te hīmenera’a mai i te mau hīmene ’oa’oa mure ’ore ra.

72 ’E i teienei tē parau atu nei au ia ’outou na, ’a tāpe’a mai i teie nei mau mea ’ia ’ore ’ia ha’apararehia atu i tō te ao nei ē tae noa atu i te tau e au iā’u nei, ’ia oti ia ’outou teie ’ohipa i mua i te mata o te mau ta’ata nei, ’e i mua ho’i i te mata o tō ’outou ra mau ’enemi, ’ia ’ore rātou ’ia ’ite i tā ’outou mau ’ohipa ē tae noa atu i te taime e oti ai te mea tā’u i fa’aue atu ia ’outou na ;

73 ’E ’ia ’ite rātou i te reira, ’ia feruri rātou i teie nei mau mea.

74 ’Ia fā mai ho’i te Fatu ra e riro ’oia ’ei mea hanohano ia rātou, e ro’ohia rātou i te mata’u, ’e e ti’a noa rātou i te ātea ’ē ’a rurutaina ai.

75 ’E e mata’u te mau nūna’a ato’a nō te hanohano rahi o te Fatu, ’e te mana ho’i nō tōna ra pūai. ’Oia ïa. ’Āmene.