Pāpa’ira’a mo’a
Te Ha’api’ira’a Tumu ’e te mau Fafaura’a 91


Tufa’a 91

E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 9 nō Māti 1833. I taua taime ra tē rave ra te peropheta i te ’ohipa ’īritira’a i te Faufa’a Tahito. ’Ia tae ’oia i taua tufa’a nō te mau pāpa’ira’a tahito i parauhia te Apokaripha, ’ua ani ’oia i te Fatu ’e ’ua fāri’i ihora i teie arata’ira’a.

1–3, ’Ua tano te pae rahi nō te ’īritira’a o te Apokaripha, ’āre’a rā tē vai ra e rave rahi mau parau i tu’uhia atu i roto e te rima o te ta’ata nei ’e e ’ere i te parau mau ; 4–6, E tauturu te reira i te feiā ’o tei ha’amāramaramahia e te Vārua.

1 ’Oia mau, tē nā ’ō mai ra te Fatu ia ’outou nō ni’a i te Apokaripha—Tē vai nei te mau mea e rave rahi i roto i te reira ’o tei riro ’ei parau mau, ’e ’ua ti’a te pae rahi i te ’īritira’ahia ;

2 Tē vai nei te mau mea e rave rahi i roto i te reira e ’ere i te parau mau, e mau parau tei tu’uhia atu i roto e te rima o te ta’ata nei.

3 ’Oia mau, tē parau atu nei au ia ’outou na, e ’ere ïa i te mea faufa’a ’ia ’īritihia te Apokaripha.

4 Nō reira, ’o ’oia ’o tē tai’o i te reira, ’ia māramarama ïa ’oia, nō te mea nā te Vārua e fa’a’ite mai i te parau mau ;

5 ’E ’o ’oia ’o tē ha’amāramaramahia e te Vārua, e noa’a iāna te maita’i nā roto i te reira ;

6 ’E ’o ’oia ’o tē ’ore e fāri’i nā roto i te Vārua ra, e ’ore ho’i ïa e faufa’ahia. Nō reira, e ’ere ïa i te mea faufa’a ’ia ’īritihia te reira. ’Āmene.