Tufa’a 89
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 27 nō Fepuare 1833. Nō te mea i fa’a’ohipa na te mau taea’e i te mātāmua i te ’ava’ava i roto i tā rātou mau putuputura’a, ’ua arata’ihia te peropheta ’ia feruri nō ni’a i taua mea ra ; nō reira, ’ua ani atu ra ’oia i te Fatu nō ni’a i te reira. ’Ei fa’ahope’ara’a, ’ua fāri’ihia teie heheura’a ’o tei parauhia te Parau pa’ari.
1–9, ’Ua ’ōpanihia ’ia fa’a’ohipa i te uaina, te mau ’ava ta’ero, te ’ava’ava, ’e te mau inu ve’ave’a ; 10–17, ’Ua fa’ata’ahia te mau rā’au ri’i, te mau mā’a hotu, te ’i’o, ’e te mau huru sītona ato’a ’ei mā’a nā te mau ta’ata ’e te mau ’ānimara ; 18–21, Nā te ha’apa’ora’a i te ture nō te ’evanelia, ’e tae noa atu i te Parau pa’ari, e fa’atae mai i te mau ha’amaita’ira’a pae tino ’e pae vārua.
1 E Parau Pa’ari, ’ei maita’i nō te ’āpo’ora’a o te mau tahu’a rahi i ha’aputuputuhia i Kirtland, ’e nō te ’ēkālesia, ’e nō te feiā mo’a i Ziona ato’a ho’i—
2 ’Ia fa’ataehia atu ’ei arohara’a ; ’eiaha nā roto i te fa’auera’a ’e ’aore rā te fa’ahepora’a, nā roto rā i te heheura’a ’e te parau pa’ari, i te fa’a’itera’a atu i te ’ōpuara’a ’e te hina’aro o te Atua nō te fa’aorara’a pae tāhuti o te feiā mo’a ato’a i te mau mahana hope’a nei—
3 I hōro’ahia mai ’ei parau tumu ma te fafaura’a ho’i, i fa’aauhia nō te maita’i o tei paruparu ’e tei paruparu roa i rotopū i te mau feiā mo’a pā’āto’a, ’o tē parauhia nei ’e ’aore rā ’o tē ti’a ’ia parauhia e feiā mo’a.
4 Inaha, ’oia mau, tē nā ’ō mai ra te Fatu ia ’outou na ē : Nō te mau ’ino ’e te mau ’ōpuara’a ’ī’ino e vai nei ’e ’o tē tupu ho’i i roto i te ’ā’au o te mau ta’ata ’ōpuara’a ’ino i te mau mahana hope’a, ’ua fa’aara na vau ia ’outou, ’e tē fa’aara nei ho’i au ia ’outou na, nā roto i te hōro’ara’a atu ia ’outou i teie parau pa’ari nā roto i te heheura’a—
5 Mai te mea e inu te ta’ata i te uaina ’e ’aore rā i te inu pūai i rotopū ia ’outou na, inaha, e ’ere ïa i te mea maita’i, e ’ere ato’a ïa i te mea au i mua i te aro o tō ’outou Metua, i roto ana’e rā i te ha’aputuputura’a nō te pūpū atu i tā ’outou mau ’ōro’a i mua iāna ra.
6 ’E inaha, ’ei uaina teie, ’oia ïa, ’ei uaina ateate ho’i nō te mā’a hotu o te vine e ti’a ai, ’o tā ’outou iho i hāmani.
7 ’E, teie fa’ahou ā, e ’ere te inu pūai nō te ’ōpū, nō te horoira’a rā i tō ’outou tino.
8 ’E teie fa’ahou ā, e ’ere ho’i te ’ava’ava nō te tino, e ’ere ato’a ho’i nō te ’ōpū, ’e e ’ere roa ho’i i te mea maita’i nō te ta’ata nei, ’ei rā’au ri’i rā ïa nō te mau vāhi pēpē ’e nō te pua’atoro ato’a i ma’ihia ra, ’ia fa’a’ohipahia ma te ’ite ’e te ’aravihi ho’i.
9 ’E teie fa’ahou ā, e ’ere te mau mea inu ve’ave’a i te mea maita’i nō te tino ’e ’aore rā nō te ’ōpū.
10 ’E teie fa’ahou ā, ’oia mau tē parau atu nei au ia ’outou na, ’ua fa’ata’a te Atua i te mau rā’au ri’i maita’i ato’a nō te ha’apa’ora’a i te tino, te huru, ’e te fa’a’ohipara’a a te ta’ata nei—
11 Te mau rā’au ri’i ato’a i te tau mau ra, ’e te mau hotu ato’a i te tau mau ra ; ’ia fa’a’ohipahia teie mau mea ato’a ma te pa’ari ’e te ha’amāuruuru.
12 ’Oia ïa, te ’i’o ato’a o te mau ’ānimara ’āvae maha ’e tō te mau manu o te reva ho’i, ’ua fa’ata’a vau, ’o te Fatu, i te reira ’ei mā’a nā te ta’ata, ’ia ’amuhia ma te ha’amāuruuru ; noa atu rā i te reira, ’ia rave-au-noa-hia te reira ;
13 ’E e mea au ïa iā’u nei ’ia ’ore taua mau mea ra ’ia ’amuhia, maori rā i te tau to’eto’e, ’e ’aore rā i te taime o’e.
14 ’Ua fa’ata’ahia te mau huru huero sītona ato’a ’ei mā’a nā te ta’ata ’e nā te mau ’ānimara ’āvae maha, ’ia riro ’ei mā’a tumu, ’eiaha nā te ta’ata ana’e, nā te mau ’ānimara ’āvae maha ra o te ’āua, ’e nā te mau manu o te reva, ’e nā te ’ānimara ’ōviri ato’a ’o tē horo nei ’e ’o tē ne’e haere nei i ni’a i te fenua nei ;
15 ’E ’ua hāmanihia te reira e te Atua ’ei mā’a nā te ta’ata nei i te mau tau ana’e nō te o’e ’e te po’ia rahi.
16 E mea maita’i te mau huru huero sītona ato’a ’ei mā’a nā te ta’ata nei ; ’e ’oia ato’a te hotu nō te vine ; te mau mea ho’i ’o tē fa’ahotu mai i te mā’a, nō roto mai i te fenua ’e nō ni’a ato’a i te fenua—
17 Noa atu ra i te reira, te sītona nā te ta’ata, te tō popa’ā nā te pua’atoro, te outa nā te pua’ahorofenua, te olura nā te mau manu o te reva ’e nā te pua’a, ’e nā te mau ’ānimara ’āvae maha ato’a o te ’āua, ’e te kerite nā te mau ’ānimara ato’a ’o tē fa’a’ohipahia, ’e nō te hāmani i te mau mea inu marū, ’e ’oia ato’a te tahi atu mau huru huero sītona ’ē atu.
18 ’E te feiā mo’a ato’a ’o tē ha’amana’o i te ha’apa’o ’e i te rave i te mau mea i parauhia nei, ma te tāmau noa i te ha’apa’o maita’i i te mau fa’auera’a, e fāri’i rātou i te ora maita’i i roto i tō rātou pito ’e te puo i tō rātou mau ivi ;
19 ’E e ’itea ho’i ia rātou te pa’ari ’e te mau tao’a rahi nō te ’ite, ’oia te mau tao’a rahi i hunahia ra ;
20 ’E e horo ho’i ’e e ’ore roa e paruparu, ’e e haere ’e e ’ore roa e rohirohi.
21 ’E tē hōro’a atu nei au, ’o te Fatu, i te fafaura’a ia rātou ra, e fāriu ’ē atu te melahi o te pohe ia rātou ra, mai tei te mau tamari’i o ’Īserā’ela ra, ’e e ’ore roa ho’i e taparahi ia rātou ra. ’Āmene.