Tufa’a 27
E heheura’a tei hōro’ahia mai ia Iosepha Semita te peropheta, i Harmony, i Pennsylvania, i te ’āva’e ’Ātete 1830. ’A fa’aineine ai rātou nō te ’ōro’a nō te pāne ’e te uaina i roto i te hō’ē purera’a, ’ua haere atu Iosepha nō te rave mai i te uaina. ’Ua fārerei mai ra te hō’ē ve’a nō te ra’i mai iāna ’e ’ua fāri’i ’oia i teie nei heheura’a, ’e ’ua pāpa’ihia te tahi tufa’a nō te reira i taua taime ra, ’e te toe’a i te ’āva’e Tetepa i muri iho. Tē fa’a’ohipahia nei te pape i teienei i roto i te mau purera’a ’ōro’a a te ’Ēkālesia ’e ’aita te uaina.
1–4, ’Ua ha’apāpūhia mai te mau mea e fa’a’ohipa nō te ravera’a i te ’ōro’a ; 5–14, E fāri’i te Mesia ’e tōna mau tāvini nō te mau tau tu’ura’a ’evanelia ato’a i te ’ōro’a ; 15–18, ’A tātua na i te tā’āto’ara’a nō te ha’ana tama’i a te Atua.
1 ’A fa’aro’o mai na i te reo o Iesu Mesia, tō ’oe Fatu, tō ’oe Atua, ’e tō ’oe Tāra’ehara, e mea ora ho’i tāna parau, ’e te pūai rahi.
2 Inaha ho’i, tē parau atu nei au ia ’oe na, ’eiaha e ha’apa’o i te mea tā ’outou e ’amu ’e tā ’outou e inu, ’a rave ai ’outou i te ’ōro’a, mai te mea ē e rave ’outou i te reira ma te mata rōtahi i tō’u nei hanahana—ma te ha’amana’ora’a ho’i i mua i tō’u nei Metua i tō’u nei tino ’o tei ha’apohehia nō ’outou, ’e tō’u nei ho’i toto ’o tei ha’amani’ihia ’ia matara tā ’outou ra mau hara.
3 Nō reira, e fa’auera’a ho’i tā’u e hōro’a atu ia ’outou, ’ia ’ore ’outou ’ia ho’o mai i te uaina, ’eiaha ato’a i te tahi inu pūai a tō ’outou ra mau ’emeni ;
4 Nō reira, ’eiaha roa ’outou e inu i te reira maori rā ’ia hāmani-’āpī-hia te reira i rotopū ia ’outou na ; ’oia ïa, i roto i teie bāsileia o tō’u Metua, ’o tē fa’ati’ahia i ni’a i te fenua nei.
5 Inaha, e pa’ari teie i roto iā’u nei ; nō reira, ’eiaha e māere, nō te mea e tae mai te hora vau e inu ai i tō te mā’a hotu o te vine i pīha’i iho ia ’outou i ni’a i te ao nei, ’e i pīha’i iho ia Moroni, ’o tā’u i tono atu ia ’oe na nō te fa’a’ite atu i te Buka a Moromona, tei roto i te reira te ’īra’a nō tā’u nei ’evanelia mure ’ore, ’o ’oia ho’i tā’u i hōro’a atu i te mau tāviri nō te pāpa’a parau nō te rā’au a Epheraima ;
6 ’E ’ia Elia ato’a, ’o tā’u i hōro’a atu i te mau tāviri nō te fa’atupu i te fa’aho’ira’a mai i te mau mea ato’a i parauhia e te vaha o te mau peropheta mo’a ato’a, mai te ha’amatara’a mai ā o teie nei ao, nō ni’a i te mau mahana hope’a ra ;
7 ’E ’ia Ioane ato’a, te tamaiti a Zakaria, ’o taua Zakaria ra ho’i tā Elia i haere atu ’e i fa’a’ite ho’i ē, e noa’a iāna te hō’ē tamaiti, ’e ’ia topahia tōna i’oa ’o Ioane, ’e e fa’a’īhia ’oia i te vārua o Elia ;
8 ’O te reira ho’i Ioane tā’u i tono atu ia ’ōrua, e tō’u nā tāvini e Iosepha Semita, tamaiti, ’e e Oliver Cowdery, ’ia fa’atōro’a ia ’ōrua i roto i te autahu’ara’a mātāmua ’o tā ’ōrua i fāri’i na, ’e ’ia mā’itihia ’ōrua ’e ’ia fa’atōro’ahia ho’i mai ia Aarona ato’a ra ;
9 ’E ’ia Eliaha te peropheta ato’a, ’o tā’u i hōro’a atu i te mau tāviri nō te mana nō te fa’afāriura’a mai i te ’ā’au o te mau metua i te mau tamari’i, ’e te ’ā’au ho’i o te mau tamari’i i te mau metua, ’ia ’ore te ao ato’a nei ’ia tā’irihia i te ’anatemara’a ;
10 ’E ’ia Iosepha ato’a ’e Iakoba, ’e ’ia Isaaka, ’e ’ia Aberahama, tō ’ōrua mau metua, nā roto ho’i ia rātou ra te mau parau fafaura’a i vai ai ē i teienei ā ;
11 ’E i pīha’i iho ato’a ia Mihaela, ’oia ho’i ’o Adamu, te metua tāne nō te mau ta’ata ato’a, te tamaiti ari’i nō te mau ta’ata ato’a, te ta’ata pa’ari roa o te mau mahana ato’a ra ;
12 ’E i pīha’i iho ato’a ia Petero, ’e ia Iakobo, ’e ia Ioane, ’o tā’u i tono atu ia ’ōrua na, ’e nā roto ia rātou vau i fa’atōro’a ai ia ’ōrua ’e i ha’amau ai ho’i ia ’ōrua ’ei nā ’āpōsetolo, ’e ’ei nā ’ite pāpū nō tō’u nei i’oa, ’ia fāri’i ’ōrua i te mau tāviri nō tā ’ōrua ’ohipa mo’a ’e nō te mau mea iho ā tā’u i heheu atu ia rātou ra ;
13 ’O tā’u i hōro’a atu i te mau tāviri nō tō’u nei bāsileia, ’e nō te hō’ē tau tu’ura’a ’evanelia nō te mau taime hope’a ; ’e nō te ’īra’a o te mau taime ato’a, ’e i roto i te reira vau e ha’aputuputu ai i te mau mea ato’a ’ia riro ’ei hō’ē, tō ni’a i te ra’i, ’e tō ni’a i te fenua nei ;
14 ’E i pīha’i iho ato’a ia rātou pā’āto’a tā tō’u Metua i hōro’a mai iā’u nō roto mai i te ao nei.
15 Nō reira, ’a poupou i tō ’ōrua ’ā’au ’e ’a ’oa’oa, ’e ’a tātua na i tō ’ōrua tau’upu, ’e ’a tu’u ho’i i te tā’āto’ara’a nō tā’u nei ha’ana tama’i i ni’a iho ia ’ōrua na, ’ia ti’a ia ’ōrua ’ia pāruru ia ’ōrua iho i te mahana ’ino rahi ra, ’e nā roto i te ravera’a i te mau mea ato’a, ’ia ti’a ia ’ōrua ’ia fa’a’oroma’i noa.
16 Nō reira, ’a ti’a mai i ni’a, ma te tātua i tō ’ōrua tau’upu i te parau mau, ’e ma te tāmau i ni’a ia ’ōrua te pāruru ’ōuma nō te parauti’a, ’e ma te fa’atia’a i tō ’ōrua ’āvae i te fa’aineinera’a nō te ’evanelia nō te hau, ’o tā’u i tono atu i tā’u nei mau melahi ’ia hōro’a atu ia ’ōrua na ;
17 Ma te ravera’a ato’a ho’i i te pāruru tama’i nō te fa’aro’o ’ia ti’a ia ’outou ’ia tūpohe i te mau ihe auahi a te feiā parauti’a ’ore ra ;
18 ’E ’a rave i te tāupo’o pāruru nō te ora, ’e te ’o’e o tō’u nei Vārua, ’o tā’u e nīni’i atu i ni’a iho ia ’ōrua na, ’e tā’u ho’i parau ’o tā’u e heheu atu ia ’ōrua, ’e ’a tāhō’ē roa ’ōrua i te mau mea ato’a tā ’ōrua e ani mai iā’u nei, ’e ’a tāmau noa i te fa’aro’o ē tae noa atu ’ua tae mai au, ’e e tāhitihia ïa ’ōrua i ni’a, ’e i te vāhi i pārahihia e au ra ’ei reira ato’a ïa ’ōrua. ’Āmene.