Tufa’a 53
E heheura’a tei hōro’ahia mai nā roto ia Iosepha Semita te peropheta, ’ia Algernon Sidney Gilbert, i Kirtland, i Ohio, i te 8 nō Tiunu 1831. Nā roto i te tītaura’a a Sidney Gilbert, ’ua ani atu te peropheta i te Fatu nō ni’a i tā Gilbert ’ohipa ’e tōna fa’ata’ara’a i roto i te ’Ēkālesia.
1–3, ’Ua pi’ihia ’e ’ua mā’itihia Sidney Gilbert ’ia fa’atōro’ahia ’ei peresibutero i roto i te ’Ēkālesia ; 4–7, ’Ia tāvini ato’a ’oia ’ei mono nō te ’episekōpo.
1 Inaha, tē parau atu nei au ia ’oe na, e tō’u nei tāvini e Sidney Gilbert, ’ua fa’aro’o vau i tā ’oe na mau pure ; ’e ’ua ti’aoro mai ’oe iā’u nei ’ia fa’a’itehia atu ia ’oe na, e te Fatu ra ’o tō ’oe Atua, i te mea nō ni’a i tō ’oe pi’ira’a ’e tō ’oe mā’itira’ahia i roto i te ’ēkālesia ’o tā’u, tā te Fatu, i fa’atupu mai i teie mau mahana hope’a nei.
2 Inaha, ’o vau, ’o te Fatu, ’o tei fa’asātaurohia ho’i nō te mau hara a tō te ao nei, tē hōro’a atu nei ia ’oe i te hō’ē fa’auera’a ’ia fa’aru’e atu ’oe i te ao nei.
3 ’A rave i ni’a ia ’oe na tā’u fa’atōro’ara’a, ’oia ïa ’o te reira nō te peresibutero, ’ia poro haere i te fa’aro’o ’e te tātarahapa ’e te ha’amatarara’a hara, mai te au i tā’u parau, ’e te fāri’ira’a ho’i i te Vārua Mo’a nā roto i te tu’ura’a i te rima ra ;
4 ’E ’ia riro ato’a ho’i ’ei ta’ata ha’apa’o i teie nei ’ēkālesia i te vāhi ’o tē fa’ata’ahia mai e te ’episekōpo, mai te au i te mau fa’auera’a ’o tē hōro’ahia atu a muri atu ra.
5 ’E teie fa’ahou ā, ’oia mau tē parau atu nei au ia ’oe, e haere ’oe i tō ’oe na tere i pīha’i iho i tō’u nā tāvini ra ia Iosepha Semita, tamaiti, ’e ia Sidney Rigdon.
6 Inaha, ’o teie nā ’ōro’a mātāmua tā ’oe e fāri’i ; ’e e fa’a’itehia atu te toe’a i te hō’ē taime i mua nei, mai te au i tā ’oe na ’ohipa i roto i tā’u nei ’ō vine.
7 ’E teie fa’ahou ā, ’ua hina’aro vau ’ia ’ite ’oe ē, ’o ’oia ana’e ’o tē ha’apa’o maita’i ē tae noa atu i te hope’a tē fa’aorahia. ’Oia ïa. ’Āmene.