Tufa’a 99
E heheura’a tei hōro’ahia mai nā roto ia Iosepha Semita te peropheta, ’ia John Murdock, i te 29 nō ’Ātete 1832, i Hiram, i Ohio. ’Ua ma’iri hō’ē matahiti tō John Murdock porora’a i te ’evanelia ’e tē fa’aea noa ra tāna mau tamari’i—aita e metua vahine fa’ahou inaha ’ua fa’aru’e mai tāna vahine, ’o Julia Clapp, i te ’āva’e ’Ēperēra 1831—i roto i te tahi mau ’utuāfare i Ohio
1–8, ’Ua pi’ihia John Murdock nō te poro haere i te ’evanelia, ’e te feiā ’o tē fāri’i mai iāna e fāri’i ato’a ïa rātou i te Fatu ’e i tōna aroha.
1 Inaha, tē nā ’ō mai nei te Fatu i tō’u tāvini ra ia John Murdock—’ua pi’ihia ’oe ’ia haere atu i te mau tufa’a fenua i te hiti’a o te rā, i terā fare e i terā fare, ’e i terā ’oire iti ’e i terā ’oire iti, ’e i terā ’oire rahi ’e i terā ’oire rahi, nō te poro haere i tā’u ’evanelia mure ’ore i te mau ta’ata nō taua mau vāhi ra, i rotopū i te hāmani-’ino-ra’a ’e te ’ohipa ’ī’ino.
2 ’E te feiā e fāri’i mai ia ’oe na, ’ua fāri’i mai ïa iā’u nei ; ’e e noa’a ia ’oe te mana nō te poro i tā’u parau nā roto i te fa’a’itera’a a tō’u Vārua Mo’a.
3 ’E te feiā e fāri’i mai ia ’oe na mai te hō’ē tamari’i ri’i ra, ’ua fāri’i ïa i tō’u nei bāsileia ; e ao tō rātou, nō te mea e noa’a ia rātou te aroha.
4 ’E te feiā e vahavaha mai ia ’oe na, e vahavaha-ato’a-hia ïa rātou e tō’u ra Metua ’e e tōna ’utuāfare ; ’e e horoi atu ’oe i tō ’oe ’āvae i te mau vāhi mo’emo’e nā te pae ’ē’a ra, ’ei fa’a’itera’a pāpū nō te fa’ahapa ia rātou ra.
5 ’E inaha, ’e ’a hi’o na, e haere ’oi’oi mai au i te ha’avāra’a, nō te ha’apāpū i te mana’o o te ta’ata ato’a i tā rātou mau ’ohipa paieti ’ore ato’a ’o tā rātou i rave ’ei pāto’ira’a iā’u nei, mai te au i tei pāpa’ihia nō ni’a iā’u nei i roto i te ’ōtarora’a o te buka.
6 ’E i teienei, ’oia mau tē parau atu nei au ia ’oe, e ’ere ïa i te mea ti’a ’ia haere atu ’oe ē tae noa atu i te taime ’ua ha’apa’ohia tā ’oe mau tamari’i, ’e ’ua tonohia atu ma te marū i te ’episekōpo nō Ziona ra.
7 ’E ’ia hope te tahi mau matahiti ri’i, mai te mea e hina’aro ’oe i te reira iā’u nei, e ti’a ïa ia ’oe ’ia haere ato’a atu i ni’a i te fenua maita’i, nō te fāri’i i tō ’oe fenua ’āi’a ;
8 ’Ia ’ore rā, e tāmau noa ’oe i te poro haere i tā’u nei ’evanelia ē tae noa atu i te taime ’oe e rave-’ē-hia atu ai. ’Āmene.