Tufa’a 48
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 10 nō Māti 1831. ’Ua ani te peropheta i te Fatu i te huru nō te rāve’a nō te fāri’ira’a mai i te mau fenua ’ei vāhi fa’aeara’a nō te feiā mo’a. E ’ohipa faufa’a rahi ho’i te reira nō te haerera’a mai o te mau melo o te ’Ēkālesia mai te pae hiti’a o te rā o te Fenua Marite mai, nō te fa’a’itera’a i tō rātou hina’aro ’ia ha’apa’o i te fa’auera’a a te Fatu ’ia ha’aputuputu mai rātou i Ohio (’a hi’o i te mau tufa’a 37:1–3 ; 45:64).
1–3, ’Ia ’ōpere te feiā mo’a i Ohio i tō rātou ra mau fenua nō tō rātou mau taea’e ; 4–6, ’Ua tītauhia te feiā mo’a ’ia ho’o mai i te mau fenua, ’ia patu i te hō’ē ’oire, ’e ’ia pe’e i te a’ora’a a tō rātou mau ti’a peresideni.
1 E mea faufa’a roa ’ia fa’aea noa ’outou i teie nei ma’a taime i roto i tō ’outou mau vāhi fa’aeara’a e ti’a ai, mai te au i tei tano ia ’outou.
2 ’E mai te mea ho’i e mau fenua tō ’outou, e tufa atu ’outou i te reira nō te mau taea’e nō te hiti’a o te rā mai ra ;
3 ’E mai te mea ē ’aita tō ’outou e mau fenua, ’a tu’u atu ia rātou ’ia ho’o mai, nō teie nei taime, i te fenua e au ia rātou i roto i te mau tufa’a fenua ē ’ati noa a’era ; e mea ti’a ho’i ’ia noa’a ia rātou te tahi mau vāhi pārahira’a nō teie nei taime.
4 E mea ti’a ïa ia ’outou ’ia fa’aherehere noa i te moni ato’a e nehenehe ia ’outou ’ia fa’aherehere, ’e ’ia fāri’i i te mau mea ato’a ’o tē noa’a ia ’outou nā roto i te parauti’a, ’ia ti’a ia ’outou a muri atu ’ia ho’o mai i te fenua ’ei ’āi’a, ’oia ho’i te ’oire.
5 ’Aita te vāhi e heheuhia mai i teienei ; terā rā i muri a’e i te haerera’a mai o tō ’outou ra mau taea’e mai te hiti’a o te rā mai e fa’ata’ahia te hō’ē mau ta’ata, ’e e fa’a’itehia ia rātou te vāhi ; ’oia ho’i, e heheuhia mai te reira ia rātou ra.
6 ’E e fa’ata’ahia rātou nō te ho’o mai i te mau fenua, ’e nō te ha’amatara’a ho’i i te patura’a i te niu nō te ’oire ; ’ei reira ’outou e ha’amata ai i te ha’aputuputuhia mai ma tō ’outou ato’a ra mau ’utuāfare, te ta’ata ato’a mai te au i tōna ra ’utuāfare, mai te au i tōna ra mau ha’apa’ora’a, ’e ’ia au ho’i i te fa’ata’ahia nōna e te peresidenira’a ’e te ’episekōpo ho’i nō te ’ēkālesia, mai te au i te mau ture ’e te mau fa’auera’a tā ’outou i fāri’i na, ’e ’o tā ’outou e fāri’i ho’i a muri atu ra. ’Oia ïa. ’Āmene.