Tufa’a 77
E heheura’a tei hōro’ahia mai ia Iosepha Semita te peropheta, i Hiram, i Ohio, e riro ē, tei te ’āva’e Māti 1832. Tē fa’ati’a ra te ’ā’amu nō Iosepha Semita ē, « ’Ei tū’atira’a i te ’īritira’a nō te mau pāpa’ira’a mo’a, ’ua fāri’i au i te ha’amāramaramara’a i raro nei nō ni’a i te Apokalupo a Ioane ».
1–4, E vārua tō te mau ’ānimara ’āvae maha ’e e ora rātou ma te ’oa’oa mure ’ore ; 5–7, E vai tāhuti noa teie nei ao e 7 000 matahiti ; 8–10, E fa’aho’i mai te tahi mau melahi i te ’evanelia ’e e tāvini rātou i ni’a i te fenua nei ; 11, Te tā’atira’a nō te 144 000 ; 12–14, E haere mai te Mesia i te ’ōmuara’a nō te hitura’a o te tauatini matahiti ; 15, E fa’aineinehia e piti peropheta i te nūna’a ’āti Iuda.
1 Uira’a. E aha te miti hi’o i parauhia e Ioane i roto i te pene maha ’e te ’īrava ono nō te Apokalupo ?Pāhonora’a. ’O te ao nei ïa, i tōna huru mo’a ’e te tāhuti ’ore ’e te mure ’ore.
2 Uira’a. E aha tē ti’a ’ia tātou ’ia ’ite nō ni’a i nā ’ānimara ’āvae maha e maha i parauhia i roto i taua iho ’īrava ra ?Pāhonora’a. E mau parau fa’aau noa te reira, i parauhia e te Heheu parau ra ’o Ioane, nō te fa’a’itera’a i te huru nō te ao ra, te pāradaiso o te Atua, te ’oa’oa o te ta’ata, ’e ’o te mau ’ānimara ’āvae maha, ’e ’o te mau mea e ne’e haere, ’e ’o te mau manu o te reva ; te mea vārua ra, e hōho’a ïa nō te mea tāhuti nei ; ’e te mea tāhuti nei, e hōho’a ïa nō te mea vārua ; te vārua o te ta’ata nei, e hōho’a ïa nō tōna iho tino, ’e te vārua ato’a o te ’ānimara ’āvae maha, e tō te tahi atu mau ’ānimara tāta’itahi ’o tā te Atua i hāmani.
3 Uira’a. E mau ’ānimara ’āvae maha noa ānei teie mau ’ānimara ’āvae maha e maha i parauhia, ’e ’aore rā e fa’ahōho’ara’a ānei te reira nō te tahi mau pupu ’e ’aore rā mau nāti ’ānimara ?Pāhonora’a. E mau ’ānimara ’āvae maha ta’a ’ē e maha noa iho rātou, ’o tei fa’a’itehia mai ia Ioane nō te fa’ahōho’a i te hanahana o te mau pupu ’ānimara mai te au i tō rātou iho nāti ’e ’aore rā i tō rātou ao i hāmanihia ai rātou, nō te fāri’i i tō rātou ’oa’oa mure ’ore.
4 Uira’a. E aha tē ti’a ’ia tātou ’ia ’ite nō ni’a i te mau mata ’e te mau pererau o te mau ’ānimara ’āvae maha ?Pāhonora’a. E fa’ahōho’a tō rātou mau mata i te māramarama ’e te ite, ’oia ho’i, ’ua ’ī rātou i te ’ite ; ’e tō rātou mau pererau, ’ua e fa’ahōho’a ïa i te pūai, ’ia haere, ’ia rave i te ’ohipa, ’e te tahi atu ā mau mea.
5 Uira’a. E aha tē ti’a ’ia tātou ’ia ’ite nō ni’a i te maha ’e te piti ’ahuru peresibutero, i parauhia e Ioane ?Pāhonora’a. E mea ti’a ia tātou ’ia ’ite, teie mau peresibutero tā Ioane i ’ite, ’o te mau peresibutero ïa ’o tei ha’apa’o maita’i i roto i te ’ohipa ’evanelia ’e ’ua pohe rātou ; e melo rātou nō nā ’ēkālesia e hitu, ’e tei roto rātou i te pāradaiso o te Atua i taua taime ra.
6 Uira’a. E aha tē ti’a ’ia tātou ’ia ’ite nō ni’a i te buka tā Ioane i ’ite, ’o tei tāpirihia i te pae i muri i te mau tītiro e hitu ra ?Pāhonora’a. E mea ti’a ia tātou ’ia ’ite, tei roto i te reira te hina’aro i heheuhia mai, te mau parau ’aro, ’e te mau ’ohipa a te Atua ; te mau mea huna nō tāna ’ōpuara’a nō ni’a i teie nei ao i roto nā matahiti e hitu tauatini matahiti te reira e vai noa ai, ’oia ho’i tōna vaira’a tāhuti nei.
7 Uira’a. E aha tē ti’a ’ia tātou ’ia ’ite nō ni’a i te mau tītiro e hitu ’o tei tītirohia i ni’a i te reira ?Pāhonora’a. E mea ti’a ia tātou ’ia ’ite, te tītiro mātāmua ra ’o te mau mea ïa nō te tauatini matahiti mātāmua, ’e te piti ato’a nō te piti ïa o te tauatini matahiti, e nā reira noa ē tae noa atu i te hitu ra.
8 Uira’a. E aha tē ti’a ’ia tātou ’ia ’ite nō ni’a i nā melahi e maha i parauhia i roto i te pene hitu ’e te ’īrava hō’ē nō te Apokalupo ?Pāhonora’a. E mea ti’a ia tātou ’ia ’ite, e maha melahi tei tonohia mai mai mua mai i te Atua, ’e ’ua hōro’ahia ia rātou te mana i ni’a a’e i te mau tufa’a e maha o te ao nei, nō te fa’aora ’e nō te ha’amou i te ora ; ’e ’o rātou teie ’o tei fāri’i i te ’evanelia mure ’ore nō te hōro’a atu i te mau nūna’a ato’a, i te mau ’ōpū ato’a, i te mau reo ato’a, ’e i te mau ta’ata ato’a ho’i ; ’o tei mau i te mana nō te ’ōpani i te mau ra’i, nō te tā’ati mai i te ora, ’e ’aore rā nō te huri i raro i te mau retioni pōiri ra.
9 Uira’a. E aha tē ti’a ’ia tātou ’ia ’ite nō ni’a i te melahi i haere atu i ni’a mai te hiti’a o te rā mai, Apokalupo, pene hitu ’e te ’īrava piti ?Pāhonora’a. E mea ti’a ia tātou ’ia ’ite ē, te melahi i haere atu i ni’a mai te hiti’a o te rā mai, ’o ’oia ïa ’o tei hōro’ahia atu te tītiro a te Atua ora nō ni’a i nā ’ōpū hō’ē ’ahuru ma piti nō ’Īserā’ela ; nō reira, ’ua pi’i māite atu ’oia i te mau melahi e maha tei ia rātou te ’evanelia mure ’ore, i te nā-’ō-ra’a atu ē : ’Eiaha e ha’amāuiui atu i te fenua, ’eiaha ato’a i te moana, ’eiaha ato’a i te mau tumu rā’au, ē tae noa atu i te taime e oti ai ia tātou te tītirora’a i te mau tāvini o te Atua i ni’a i tō rātou ra mau rae. ’E, mai te mea e fāri’i ’outou i te reira, ’o Elia teie ’o tē haere mai nō te ha’aputuputu ’āmui i te mau ’ōpū nō ’Īserā’ela ’e nō te fa’aho’i mai ho’i i te mau mea ato’a ra.
10 Uira’a. E aha te tau e tupu ai te mau mea i parauhia i roto i teie nei pene ?Pāhonora’a. E tupu taua mau mea ra i te ono o te tauatini matahiti, ’oia ho’i, i te ’īritira’ahia te ono o te tītiro.
11 Uira’a. E aha tē ti’a ’ia tātou ’ia ’ite nō ni’a i te tu’ura’a i te tāpa’o i ni’a i te hō’ē hānere e maha ’ahuru ma maha tauatini, nō roto mai i te mau ’ōpū ato’a nō ’Īserā’ela—hō’ē ’ahuru ma piti tauatini nō roto mai i te mau ’ōpū tāta’itahi ?Pāhonora’a. E mea ti’a ia tātou ’ia ’ite ē, te feiā i tāpa’ohia e mau tahu’a rahi ïa, ’o tei fa’atōro’ahia i te ha’apa’ora’a mo’a a te Atua ra, nō te fa’atere i te ’evanelia mure ’ore ; ’e ’o rātou ho’i ïa teie ’o tei fa’atōro’ahia nō roto mai i te mau nūna’a ato’a, te mau ’ōpū ato’a, te mau reo ato’a, ’e te mau ta’ata ato’a, e nā melahi ’o tei hōro’ahia ia rātou te mana i ni’a a’e i te mau nūna’a o te ao nei, ’ia ’āfa’i mai i te feiā e rave rahi ’o tē haere mai i roto i te ’ēkālesia a te Matahiapo.
12 Uira’a. E aha tē ti’a ’ia tātou ’ia ’ite nō ni’a i te fa’a’otora’a i te mau pū, ’o tei fa’ahitihia i roto i te pene va’u nō te Apokalupo ?Pāhonora’a. E mea ti’a ia tātou ’ia ’ite ē, mai te au i tā te Atua i hāmani i te ao nei i roto nā mahana e ono, ’e i te hitu o te mahana i fa’aoti ai ’oia i tāna ’ohipa, ’e i ha’amo’a ai i te reira, ’e ’ua hāmani ato’a ho’i i te ta’ata nō roto mai i te repo o te fenua nei, mai te reira ato’a, i te ha’amatara’a o te hitu o te tauatini matahiti e ha’amo’a ai te Fatu ra o te Atua i te ao nei, ’e e fa’aoti ai i te fa’aorara’a i te ta’ata nei, ’e e ha’avā ai i te mau mea ato’a, ’e e fa’aora ai ho’i i te mau mea ato’a ra, maori rā te reira mea ’o tāna i ’ore i tu’u i roto i tōna ra mana, i te taime e oti ai iāna te tā’atira’a i te mau mea ato’a, ē tae noa atu ho’i i te hope’a o te mau mea ato’a ra ; ’e te fa’a’otora’a i te mau pū a te mau melahi e hitu ra, ’o te fa’aineinera’a ’e te fa’aotira’a ho’i ïa i tāna ’ohipa, i te ha’amatara’a o te hitu o te tauatini matahiti—te fa’aineinera’a i te ’ē’a nā mua i te tau nō tōna haerera’a mai.
13 Uira’a. Afea ra te mau mea i pāpa’ihia i roto i te pene iva nō te Apokalupo e fa’atupuhia ai ?Pāhonora’a. E fa’atupuhia taua mau mea ra i muri iho i te ha’amatara’a nō te hitu o te tāpa’o tā’ati, nā mua i te haerera’a mai o te Mesia.
14 Uira’a. E aha tē ti’a ia tātou ’ia ’ite nō ni’a i te buka na’ina’i ’o tei ’amuhia e Ioane, mai te au i tei fa’ahitihia i roto i te pene ’ahuru nō te Apokalupo ?Pāhonora’a. E mea ti’a ia tātou ’ia ’ite ē, e misiōni te reira, ’e e ’ōro’a ho’i, ’ia ha’aputuputu mai ’oia i te mau ’ōpū nō ’Īserā’ela ; inaha, ’o Elia teie, mai te au i tei pāpa’ihia ra, ’o tē haere mai e ti’a ai, ’e ’o te fa’aho’i mai ho’i i te mau mea ato’a ra.
15 Uira’a. E aha tē ti’a ’ia ’itehia nō ni’a i nā ’ite to’opiti i fa’a’itehia i roto i te pene ’ahuru ma hō’ē nō te Apokalupo ?Pāhonora’a. E nā peropheta to’opiti rāua ’o tē fa’ati’ahia mai nō te nūna’a ’āti Iuda i te mau mahana hope’a ra, i te taime nō te fa’aho’ira’a mai o te ’evanelia, ’e ’ia tohu atu i te mau ’āti Iuda i muri a’e i tō rātou ha’aputuputura’ahia ’e tō rātou patura’a i te ’oire nō Ierusalema i te fenua nō tō rātou ra mau metua.