Tufa’a 66
E heheura’a tei hōro’ahia mai nā roto ia Iosepha Semita te peropheta, i Hiram, i Ohio, i te 29 nō ’Ātopa 1831. ’Ua tāparu ’ōmo’e William E. McLellin i te Fatu ’ia fa’a’itehia mai nā roto i te peropheta i te pāhonora’a nō e pae uira’a ’aita Iosepha Semita i ’ite. ’Ia au i te tītaura’a a McLellin, ’ua ani te peropheta i te Fatu ’e ’ua fāri’i ho’i i teie heheura’a.
1–4, Te fafaura’a mure ’ore ’o te ’īra’a ïa nō te ’evanelia ; 5–8, ’Ua tītauhia i te mau peresibutero ’ia poro i te ’evanelia, ’ia fa’a’ite i te ’itera’a pāpū, ’e ’ia ’āparau i te mau ta’ata ; 9–13, E fāri’ihia te ’āi’a nō te ora mure ’ore nā roto i te tāvinira’a mau.
1 Inaha, tē nā ’ō mai ra te Fatu i tō’u tāvini ra ia William E. McLellin—E ao tō ’oe na, nō te mea ē ’ua fāriu ’ē mai ’oe i tā ’oe mau ’ohipa ’ī’ino, ’e ’e ’ua fāri’i ho’i i tā’u nei mau parau mau, tē nā reira mai nei te Fatu tō ’oe Tāra’ehara, te Fa’aora o tō te ao nei, ’e nō rātou ato’a ’o tē ti’aturi mai i tō’u nei i’oa.
2 ’Oia mau tē parau atu nei au ia ’oe na, e ao tō ’oe nō te fāri’ira’a i tā’u fafaura’a mure ’ore, ’oia te ’īra’a nō tā’u nei ’evanelia, i fa’ataehia atu i te tamari’i a te ta’ata nei, ’ia noa’a ia rātou te ora ’e ’ia noa’a ho’i ia rātou te mau hanahana ’o tē heheuhia mai i te mau mahana hope’a nei, mai te au i tei pāpa’ihia e te mau peropheta ’e te mau ’āpōsetolo ho’i i muta’a ihora.
3 ’Oia mau tē parau atu nei au ia ’oe na, e tō’u tāvini e William, ’ua mā ’oe, ’eiaha rā te tā’āto’ara’a ; nō reira, ’a tātarahapa i te mau mea ’o tē ’ore e au i tō’u hi’ora’a, tē nā reira mai ra te Fatu, nō te mea nā te Fatu e fa’a’ite atu i te reira ia ’oe na.
4 ’E i teienei, ’oia mau, nā’u, nā te Fatu, e fa’a’ite atu ia ’oe i tā’u ’ōpuara’a nō ni’a ia ’oe, ’oia ho’i tō’u hina’aro nō ni’a ia ’oe na.
5 Inaha, ’oia mau tē parau atu nei au ia ’oe na, ’o teie tō’u hina’aro ia ’oe, ’ia poro haere i tā’u nei ’evanelia i terā fenua ’e i terā fenua, ’e i terā ’oire ’e i terā ’oire ho’i, ’oia ïa, i terā mau rētioni ē ’ati noa a’e ’o tei ’ore ā i porohia.
6 ’Eiaha e fa’aea e rave rahi mahana i teie nei vāhi ; ’eiaha e haere atu i te fenua nō Ziona i teienei ; ’āre’a rā mai te mea e ti’a ia ’oe ’ia hāpono atu, ’a hāpono atu ïa ; ’ia ’ore rā, ’eiaha e feruri i tā ’oe na tao’a.
7 ’A haere atu i te mau fenua i te hiti’a o te rā, ’a fa’a’ite atu i tō ’oe ’itera’a pāpū i te mau vāhi ato’a, i te mau ta’ata ato’a ’e i roto ho’i i tō rātou ra mau sunago, ma te tāmata i te fa’afāriu mai i te mau ta’ata.
8 ’Ia tere ato’a tō’u tāvini ra ’o Samuel H. Smith nā muri ia ’oe, ’e ’eiaha e fa’aru’e atu iāna, ’e ’a hōro’a atu iāna i tā ’oe mau ha’api’ira’a ; ’e ’o ’oia ’o tē ha’apa’o maita’i ra, e fa’aitoitohia ïa ’oia i roto te mau vāhi ato’a ; ’e e haere au, ’o te Fatu, i pīha’i iho ia ’ōrua na.
9 ’A tu’u atu i tō ’oe pu’e rima i ni’a iho i te feiā ma’i, ’e e ora rātou. ’Eiaha e ho’i mai ē tae noa atu i te taime au, ’o te Fatu, e ti’i atu ai ia ’ōrua. ’A fa’a’oroma’i i roto i te ’ati. ’A ani mai, ’e e fāri’i ïa ’oe ; ’a pātōtō mai ’e e ’īritihia ïa ia ’oe na.
10 ’Eiaha ho’i e tītau ’ia fa’ateiahahia. ’A ha’apae atu i te mau parauti’a ’ore ato’a ra. ’Eiaha e fa’aturi—’o te hō’ē ho’i ïa fa’ahemara’a tei ha’ape’ape’a ia ’oe na.
11 ’A ha’apa’o noa i teie nei mau parau, nō te mea e parau mau roa taua mau mea ra ’e te ti’a ho’i ; ’e ’a fa’arahi i tō ’oe na tōro’a, ’e ’a fa’atae atu i te mau ta’ata e rave rahi i Ziona ma te hīmene ’oa’oa mure ’ore i ni’a iho i tō rātou ra upo’o.
12 ’A tāmau noa i roto i teie nei mau mea ē tae noa atu i te hope’a, ’e e noa’a ia ’oe te korona nō te ora mure ’ore i te rima ’atau o tō’u Metua, ’o tei ’ī roa i te aroha ’e te parau mau.
13 ’Oia mau, tē nā reira mai ra te Fatu ra ’o tō ’oe Atua, tō ’oe Tāra’ehara, ’oia ’o Iesu Mesia. ’Āmene.