Pāpa’ira’a mo’a
Te Ha’api’ira’a Tumu ’e te mau Fafaura’a 44


Tufa’a 44

E heheura’a tei hōro’ahia mai ia Iosepha Semita te peropheta ’e ia Sidney Rigdon, i Kirtland, i Ohio, i te pae hope’a nō Fepuare 1831. Nā roto i te fa’ati’ara’a i te tītaura’a i fa’a’itehia mai i roto i teie nei tufa’a, ’ua fa’ata’a ihora te ’Ēkālesia ’ia fa’aterehia te hō’ē ’āmuira’a i te pae mātāmua nō te ’āva’e Tiunu i mua.

1–3, ’Ia ha’aputuputu mai te mau peresibutero nō te hō’ē ’āmuira’a ; 4–6, ’Ia fa’anahonahohia rātou mai te au i te mau ture o te fenua ’e ’ia aupuru i te feiā veve.

1 Inaha, tē nā ’ō mai nei te Fatu ia ’outou e tō’u nei mau tāvini, e mea ti’a ïa iā’u nei ’ia anihia te mau peresibutero nō tā’u nei ’ēkālesia ’ia ha’aputuputuhia mai i te vāhi hō’ē, mai te hiti’a o te rā ’e te tō’o’a o te rā, ’e mai te apato’erau ’e te apato’a, nā roto i te hō’ē rata ’e ’aore rā nā roto i te tahi atu ā rāve’a.

2 ’E a muri a’era, mai te mea e ha’apa’o maita’i rātou, ’e e fa’atupu ho’i i te fa’aro’o iā’u nei, e nīni’i atu vau i tō’u nei Vārua i ni’a iho ia rātou i te mahana rātou e ha’aputuputu mai ai.

3 ’E a muri a’era e haere atu rātou i te mau tufa’a fenua ē ’ati noa a’era, ’e e poro haere ho’i i te parau tātarahapa i te mau ta’ata.

4 ’E e rave rahi tē fa’afāriuhia mai, ’e nā roto i te reira e noa’a ai ia ’outou te mana ’ia fa’anahonaho ia ’outou iho mai te au i te mau ture a te ta’ata nei ;

5 ’Ia ’ore tō ’outou mau ’enemi ’ia mana i ni’a ia ’outou na ; ’ia fa’aorahia ’outou i roto i te mau mea ato’a ra ; ’ia ti’a ho’i ia ’outou ’ia ha’apa’o i tā’u mau ture ; ’ia ’ōfatihia atu te mau fa’aaura’a ato’a ’o tā te ’enemi e rave nō te ha’amou i tō’u mau ta’ata.

6 Inaha, tē parau atu nei au ia ’outou na ē, ’ia haere ’outou i te feiā veve ’e te feiā e ’ere nei i te tahi mau mea ’e ’ia tauturu ho’i ia rātou ’ia fa’aorahia atu rātou, ’ia vai maita’i noa rātou ē tae noa atu i te taime e ti’a ai ’ia ravehia te mau mea ato’a mai te au i tā’u nei ture ’o tā ’outou i fāri’i ra. ’Āmene.