Tufa’a 86
E heheura’a tei hōro’ahia mai nā roto ia Iosepha Semita te peropheta, i Kirtland, i Ohio, i te 6 nō Tītema 1832. ’Ua fāri’ihia teie heheura’a ’a hi’opo’a ai ’e ’a fa’a’āfaro ai te peropheta i te mau ’api parau i pāpa’i-rima-hia nō te ’īritira’a o te Bibilia.
1–7, ’Ua hōro’a mai te Fatu i te aura’a nō te parabole nō te sītona ’e te zīzānia ; 8–11, ’Ua ha’amāramarama mai ’oia i te aura’a nō te mau ha’amaita’ira’a autahu’ara’a i te feiā mau i riro ’ei mau fatu ’āi’a ’ia au i te tino nei.
1 ’Oia mau, tē nā ’ō mai ra te Fatu ia ’outou, e tō’u mau tāvini, nō ni’a i te parabole nō te sītona ’e te zīzānia ;
2 Inaha, ’oia mau tē parau atu nei au, ’o te ’āua ra ’o te ao nei ïa, ’e te mau ’āpōsetolo ra ’o te mau ueue huero ïa ;
3 ’E i muri iho i tō rātou vare’ara’a i te ta’oto—inaha ’ua ueue ihora te ta’ata hāmani ’ino i te ’ēkālesia i te zīzānia, ’o ’oia te ta’ata tāiva, te vahine fa’aturi, ’o ’oia ’o Babulonia, ’o tei fa’ainu i te mau nūna’a ato’a i tāna ’āu’a, tei roto i tō rātou ’ā’au te ’enemi, ’oia ho’i ’o Sātane, e pārahi ai nō te fa’atere ari’i mai ; nō reira, ’ua fa’aapiapi ihora te zīzānia i te sītona ’e ’ua ti’avaru atu i te ’ēkālesia i roto i te mēdēbara.
4 Inaha rā, i roto i te mau mahana hope’a ra, ’oia i teie nei ā, ’a ha’amata ai te Fatu i te fa’atupu mai i te parau, ’e tē tupu ’oi’oi mai ra te ’ōteu ’e tē vai marū noa ra—
5 Inaha, ’oia mau tē parau atu nei au ia ’outou na, tē ti’aoro nei te mau melahi i te Fatu i te ao ’e te pō, rātou ’o tei vai ineine noa ’e ’o tē tīa’i nei ’ia tonohia atu nō te ’ō’oti i te mau ’āua ;
6 Terā rā, ’ua parau atu ra te Fatu ia rātou, ’eiaha e ’ōhiti mai i te zīzānia ’a vai marū noa ai te ’ōteu (no te mea ’oia mau, e mea paruparu tō ’outou fa’aro’o) ’o te ha’amou ato’a ’outou i te sītona.
7 Nō reira, ’a vaiiho noa i te sītona ’e te zīzānia ’ia tupu ’āpipiti noa ē tae noa atu i te taime nō te ’auhune ; ’ei reira ’outou e ha’aputu ai i te sītona mai roto mai i te zīzānia, ’e i muri iho i te ha’aputura’a i te sītona ra, inaha, e ru’uru’uhia ïa te zīzānia i roto i te mau ruru, ’e e vai noa te ’āua ’ia taninahia i te auahi.
8 Nō reira, tē nā ’ō mai ra te Fatu ia ’outou, ’o tei mau noa i te autahu’ara’a nā roto i te hua’ai o tō ’outou ra mau metua—
9 Nō te mea e mau fatu ’āi’a ti’a ’outou i te ture, mai te au i te huru tāhuti nei, ’e ’ua hunahia atu ’outou i tō te ao nei i pīha’i iho i te Mesia nā roto i te Atua—
10 Nō reira ’ua vai mai tō ’outou ora ’e te autahu’ara’a ho’i, ’e ’ia vai noa ho’i e ti’a ai nā roto ia ’outou ’e tō ’outou hua’ai ē tae noa atu i te fa’aho’ira’a mai o te mau mea ato’a i parauhia e te vaha o te mau peropheta mo’a mai te ha’amatara’a mai ā o teie nei ao.
11 Nō reira, e ao tō ’outou mai te mea e vai tāmau noa ’outou i roto i tō’u maita’i, ’ei māramarama i te mau ’Ētene, ’e nā roto i teie nei autahu’ara’a, ’ei fa’aora nō tō’u mau ta’ata o ’Īserā’ela. Nā te Fatu i parau mai i te reira. ’Āmene.